Nsangu ya Mbote ya
MATAYI
NKOTOLO
Bantu ke tubaka ti kisoniki ya Nsangu ya Mbote* yayi kele Zwife mosi na nkumbu Matayi. Yandi vwandaka kilokoti-mpaku, mpe mosi na kati ya bantumwa* kumi na zole ya Yesu. Yawu ke na kutalana ti kisoniki ya dibuku yayi vwandaka na nsatu ya kulutila na kusonika mambu yayi samu na ba-Zwife yina kumaka bilandi* ya Yesu. Yandi vwandaka zola kulakisa bawu ti: Mambu mingi yina kele ya kusonama na kati ya dibuku ya Ngwisani ya Ntama*, yina mimbikudi* bikulaka, vwandaka me salama na Yesu.
Mambu mingi yina kele na kati ya Nsangu ya Mbote yayi kele mpe na kati ya Nsangu ya Mbote ya Make. Kasi na bikapu ya ntete mpe ya zole, beto lenda kutanga mambu yina me tadila dikanda ya Yesu katuka bankoko ya ntete tii na mbutukulu ya Yesu, mpe bumwana ya Yesu. Na kati ya bikapu zole yina mpe, Kisoniki ke na kulakisa yimeni ti Yesu kele Ntinu, Kivuukisi mpe Masiya* yina Nzambi pesaka nsilulu. Kasi yandi kele mpe Emanwele: Ya zola kutuba ti Nzambi kele na beto.
Na kati ya dibuku ya yandi, kisoniki ke na kuvukisa ndongosolo ya Yesu mpe binzonzi tanu ya nene:
1) 5--7: "Malongi na zulu ya mongo", yawu kele malongi ya kyese yina ke na kuzabisa kifwani ya nkadulu ya kukwikama yina fwana kuvwanda na bilandi ya Yesu.
2) 10: Malongi ya Yesu na sika ya bilandi yina fwana kwenda kuzabisa nkwizulu ya Kimfumu ya Mazulu*.
3) 13: Ndongosolo ya Kimfumu ya Mazulu na kati ya bingana sambwadi: Kimfumu ya Mazulu kele ya kubumbama, kasi yawu ke talana na pwelele nyonso na ntangu yina Nzambi zengaka.
4) 18: Mutindu ya kuzinga ya bantu yina fwana kukota na kati ya Kimfumu ya Mazulu.
5) 24--25: Mutindu ya kuvingila nkwizulu ya Kimfumu ya Mazulu.
Na kati ya Nsangu ya Mbote yayi, Yesu ke na kutalana mutindu Ntinu yina me kwiza kubanda luzingu ya malu-malu ya Kimfumu ya Mazulu na yinza. Yandi ke na kupesa na sika ya bayina ke na kukota na kati ya Kimfumu yayi ya Mazulu, ndongosolo yina ke na bawu nsatu samu na kuvwanda bambangi na sika ya bantu ya nkaka.
Dibuku yayi kele ya kukabuka mutindu yayi:
- 1.1-17: Bankoko ya Yesu.
- 1.18--2.23: Mbutukulu mpe bumwana ya Yesu.
- 3.1-12: Mambu yina Za Mubotiki zabisaka.
- 3.13--4.11: Mbotokolo ya Yesu mpe bantontolo ya Satana.
- 4.12--18.35: Kisalu yina Yesu salaka na kizunga ya Ngalili sika yandi longaka, longisaka bankonga ya bantu, mpe belusaka bambevo.
- 19--20: Nzyetolo ya Yesu na Yelusalemi.
- 21--28: Bilumbu ya nsuka ya Yesu na Yelusalemi: nzengolo ya lufwa ya yandi, lufwa ya yandi, mvumbukulu ya yandi na lufwa, mpe mutindu yandi vwandaka talana dyaka na bantu.