BISALU ya BANTUMWA
NKOTOLO
Dibuku ya Bisalu ya Bantumwa kele ndandanu ya mambu ya dibuku ya Nsangu ya Mbote* ya Luke. Na dibuku ya Bisalu ya Bantumwa, Yesu ke dyaka ve na kati ya bilandi* ya yandi na mutindu yandi vwandaka ntete, bawu vwandaka tala dyaka yandi ve na meso ya bawu. Ni yawu yina, dibuku ya Bisalu ya Bantumwa ke na kulakisa wapi mutindu vwandaka mbandukulu ya dibuundu ya Nzambi. Ata ti bawu vwandaka tala dyaka ve Yesu na meso ya bawu, kasi yandi vwandaka talana na lusalusu ya Mpeve ya yandi yina vwandaka twadisa bilandi ya yandi.
Bansangu yina kele na kati ya dibuku yayi kele ya kufuluka na mambu yina ke pesaka luzingu. Bantu lenda kutala wapi mutindu mabuundu ya Nzambi vwandaka butuka na kati-kati ya ba-Zwife mutindu na Yelusalemi, to na kati-kati ya bayina kele ve ba-Zwife mutindu na bambanza Antyose, Kolinto, to Filipe. Bantu lenda kulanda banzyetolo yina Polo salaka samu na kulongisa Nsangu ya Mbote.
Na kati ya dibuku yayi, kisoniki vwandaka mpe na bisika mingi yina salamaka mambu yina ba ke na kuzonzila na kati ya dibuku yayi. Yawu ke na kutalana na mutindu yandi ke na kuzonza na kusadila mpova "munu" samu na kuzabisa nzyetolo katuka mbanza Towase tii na mbanza Filipe (16.10-40), mpe tii na Yelusalemi sika Polo vwandaka na boloko (20.5--21.18), mpe dyaka nzyetolo katuka mbanza Sezale tii na mbanza Loma sika Polo vingilaka bamvula zole ntete ba fundisa yandi (27--28).
Dibuku yayi kele ya kukabuka mutindu yayi:
- 1.1--8.3: Mbandukulu ya dibuundu ya ntete ya Nzambi na Yelusalemi.
- 8.4--12.25: Kuzabisa Nsangu ya Mbote bisika yina me bikana na kulongisa yawu.
- 13--28: Kuzabisa Nsangu ya Mbote na bizunga yina kele pene-pene na mubu ya Meditelani tii na mbanza Loma.