Bisalu 1

BISALU ya BANTUMWA

Mbandukulu

Mpangi ya munu Tofile, na kati ya dibuku ya munu ya ntete, mu zonzilaka mambu nyonso yina Yesu salaka mpe longisaka katuka kilumbu ya ntete 2 tii na kilumbu yina yandi kwendaka na zulu. Ntete yandi kwenda na zulu, yandi pesaka misiku na lulendo ya Mpeve ya Longo na bantumwa* yina yandi soolaka.

3 Na manima ya lufwa ya yandi, ni na sika ya bawu yandi talanaka na kulakisa bawu na mitindu mingi ti yandi kele moyo: Yandi talanaka na bawu bilumbu makumi yiya, mpe zonzilaka bawu Kimfumu ya Nzambi*. 4 Kilumbu mosi, ntangu yandi vwandaka kudya kintwadi na bawu, yandi tumisaka bawu: "Beno basika ve na mbanza Yelusalemi, kasi beno vingila dikabu yina Tata pesaka nsilulu: Ni dikabu yina mu zabisaka beno. 5 Za botikaka bantu na maza. Kasi beno, kaka bilumbu fyoti me bikana, Nzambi ke botika beno na Mpeve ya Longo."

Yesu nangukaka na zulu

6 Bayina vukanaka kintwadi na Yesu yufulaka yandi: "Mfumu, ni na ntangu yayi nge ke vutula kimfumu ya yinsi yayi na sika ya bantu ya Isayeli?" 7 Yesu vutulaka: "Beno kele ve na nsatu ya kuzaba bantangu to bilumbu yina, samu ti ni Tata zengaka yawu na lutumu ya yandi. 8 Kasi beno ke kuzwa ngolo ntangu Mpeve ya Longo ke kulumuka na sika ya beno. Na yina, beno ke vwanda bambangi ya munu na Yelusalemi, na kizunga nyonso ya Zude, ya Samaliya, mpe tii na bansuka ya ntoto." 9 Na manima ya kuzonza mambu yina, Yesu nangukaka na zulu ntangu bawu nyonso vwandaka tala yandi, mpe matuti bumbaka yandi.

10 Ntangu bawu vwandaka tala ntete sika Yesu vwandaka me kwenda, bantu zole yina lwataka binkuti ya mpembe talanaka na ntwala ya bawu, 11 mpe tubaka: "Beno bantu ya kizunga ya Ngalili, samu na yinki beno me telama awa, mpe ke na kutalaka na zulu? Yesu yina Nzambi me nanguna na zulu na ntwala ya beno, ke vutuka mpe mutindu mosi yina beno me tala yandi kukwenda na zulu."

12 Na yina, bantumwa* vutukaka na Yelusalemi katuka mongo ya bayinti ya Olive, yina kele pene-pene na mbanza Yelusalemi, keba ve na kilometele mosi. 13 Ntangu bawu kumaka na Yelusalemi, bawu kotaka na yinzo mpe kwendaka na kivinga yina kele na kibandu sika bawu vwandaka vukana. Na kati ya bawu vwandaka Pyele, Za, Zaki mpe Andele, Filipe mpe Toma, Batelemi mpe Matayi, Zaki mwana ya Alefe, Simoni yina vwandaka na ntama muntu ya kimvuka ya Zeloti, mpe Yuda mwana ya Zaki. 14 Na ntima mosi, bawu nyonso vwandaka vukana ntangu nyonso samu na kusambila kintwadi na bakento, Maliya mama ya Yesu, mpe baleki ya Yesu.

Nsololo ya muntu yina fwanaka baka kisika ya Yuda

15 Na bilumbu yina, bandimi vwandaka me vukana. Bawu vwandaka keba ve nkama na makumi zole. Pyele telamaka na kati-kati ya bawu, mpe tubaka: 16 "Bampangi, ya fwanaka ti mambu yina Mpeve ya Longo zabisaka na kati ya Dibuku ya Nzambi na yinwa ya Davidi salama na yina me tadila Yuda yina me kuma muntu yina lakisaka nzila na bayina vwandaka me kanga Yesu. 17 Yuda vwandaka mosi na kati ya beto, mpe yandi vwandaka sala kintwadi na beto. 18 Na mbongo yina Yuda kuzwaka na mambu ya yimbi yina yandi salaka, yandi sumbaka bilanga. Yandi kubwaka na ntoto. Kivumu ya yandi pasukaka, mpe misopo nyonso basikaka na ngaanda. 19 Bantu nyonso ya Yelusalemi kuwaka dyambu yina. Ni yawu yina, bawu pesaka bilanga yina nkumbu ya 'Akedama'. Yawu zola kutuba na ndinga ya bawu: 'Bilanga ya menga.'

20 "Na dibuku ya Mikunga, ba sonikaka:

'Bika yinzo ya yandi kuvwanda mpamba,

mpe ata muntu mosi kuvwanda na kati!'

Ba sonikaka dyaka:

'Bika muntu ya nkaka kusala kisalu ya yandi!' "

Matyase bakaka kisika ya Yuda

21-22 "Na yina, beno fwana kusoola muntu ya nkaka na kati ya bayina vwandaka na beto ntangu nyonso yina Mfumu* Yesu vwandaka tambula na kati ya beto, katuka ntangu yina Za botikaka bantu tii na kilumbu yina Yesu kwendaka na zulu. Kintwadi na beto, yandi fwana kuzabisa kimbangi ya mvumbukulu ya Mfumu Yesu."

23 Na yina, bandimi lakisaka bantu zole: Matyase mpe Yosefi yina ba ke bokilaka dyaka Basabase to Yusutuse. 24 Na manima, bawu nyonso sambilaka mutindu yayi: "Mfumu, nge zaba ntima ya muntu ni muntu. Lakisa beto na kati ya bantu zole yayi nani nge me soola 25 samu na kusala kisalu ya buntumwa* yina Yuda me bika samu na kukwenda na kisika ya yandi." 26 Na yina, bawu bulaka dzeke, mpe yawu soolaka Matyase. Ba vukisaka yandi na lutangu ya bantumwa kumi na mosi.