Nsangu ya Mbote ya
ZA
NKOTOLO
Nsangu ya Mbote* ya Za kele ve mutindu mosi na Bansangu ya Mbote ya Matayi, ya Make mpe ya Luke. Za ke na kuzonzila mambu mingi ve ya luzingu ya Yesu. Kasi na mambu yina yandi ke na kuzonzila, yandi ke na kupesa mfunu mingi na nsasa ya ndongosolo, ya bimangu mpe ya mavanga ya Yesu.
Na kati ya mabanza ya ngudi ya dibuku yayi kele nsemo, kimbangi, nkembo, butsyelika, lufundusu, mpe bundiku na kati ya Tata Nzambi mpe Yesu Mwana ya yandi, na kati ya Mwana mpe bilandi ya yandi, mpe na kati ya bilandi bawu mosi. Za ke na kuzabisa mpe ti ata muntu lenda kukuma na sika ya Tata Nzambi ata kulutila na Yesu. Na yina, yandi ke na kuzonzila Yesu mutindu Muvungi, Mwelo, mpe Nzila.
Na mbandukulu ya Nsangu ya Mbote yayi, kisoniki ke na kulakisa ti Yesu kele Ndinga ya seko ya Nzambi, yina kumaka muntu, mpe yina kwizaka zinga na kati ya bantu (1.1-18).
Dibuku yayi kele ya kukabuka mutindu yayi:
- 1--12: Na ndambu ya ntete yayi, kisoniki ke na kuzabisa bimbangi ya Za Mubotiki, ya Andele, ya Filipe, mpe ya Natanayele. Konso muntu, na mutindu ya yandi, ke na kuzonzila mambu yina yandi bakulaka na Yesu. Kaka na ndambu yayi ya ntete, kisoniki ke na kuzonzila balukutakanu mingi ya Yesu, mpe kaka bimangu sambwadi na yina yandi salaka.
- 13--16: Yesu ke na kupesa bankindusulu ya nsuka na bilandi ya yandi.
- 17: Na lusambulu, Yesu ke na kukubama samu na kutala mpasi mpe kufwa, mpe yandi ke na kupesa na sika ya Tata ya yandi bayina yandi ke bika na yinza.
- 18--20: Kisoniki ke na kuzonzila wapi mutindu ba kangaka, fundisaka, mpe zengilaka Yesu lufwa. Yawu me fwanana mingi na Bansangu ya Mbote ya nkaka. Yandi ke na kuzabisa mpe samu na yinki yandi sonikaka Nsangu ya Mbote yayi: "Yesu salaka mpe bimangu mingi ya nkaka na ntwala ya bilandi ya yandi. Kasi yawu kele ve ya kusonama na dibuku yayi. Mambu yayi kele ya kusonama, samu ti beno kwikila ti Yesu kele Masiya*, Mwana ya Nzambi*. Na yina, kana beno kwikila, beno ke kuzwa luzingu na nkumbu ya yandi."
- 21: Kuvukana ya Yesu na Pyele mpe bilandi sambanu ya nkaka na dyanga ya Tibeyale.