Ba zengilaka Yesu lufwa
19
Na yina,
Pilate pesaka lutumu ya kunata Yesu,
mpe ya kubula yandi bikoti.
2 Basoda yidikaka yimpu ya bansende,
mpe tulaka yandi yawu na yintu.
Bawu lwatisaka yandi mpe kiyunga ya mbwaki mutindu biyunga ya bamfumu.
3 Bawu kwendaka pene-pene na yandi,
mpe tubaka:
"Mbote ya nge,
Ntinu ya ba-Zwife!"
Na manima,
bawu bulaka yandi makofi.
4 Pilate basikaka dyaka na ngaanda,
mpe tubaka na nkonga:
"Beno kuwa!
Mu ke natina beno yandi awa na ngaanda,
samu ti beno zaba ti mu me tala ve kibila ya kuzengila yandi lufwa."
5 Na yina,
ba nataka Yesu na ngaanda.
Yandi vwandaka ya kulwata yimpu ya bansende mpe kiyunga ya mbwaki.
Pilate zabisaka bawu:
"Muntu yango,
ni yandi yayi."
6 Ntangu bamfumu ya banganga-Nzambi* mpe mikengi talaka yandi,
bawu lookaka:
"Koma yandi na kulunsi!
Koma yandi na kulunsi!"
Pilate tubaka:
"Beno baka yandi,
mpe beno koma yandi beno mosi.
Mu me tala ve kibila ya kuzengila yandi lufwa."
7 Ba-Zwife vutulaka:
"Beto ke na Misiku ya beto,
mpe na kutala Misiku ya beto,
yandi fwana kufwa samu ti yandi me tuba ti yandi kele Mwana ya Nzambi*."
8 Ntangu Pilate kuwaka mutindu yina,
boma ya yandi lutilaka.
9 Yandi kotaka dyaka na yinzo ya kimfumu,
mpe yufulaka Yesu:
"Wapi sika nge katukaka?"
Kasi Yesu pesaka ve yandi mvutu.
10 Na yina,
Pilate zabisaka yandi:
"Nge zola ve kupesa munu mvutu?
Nge zaba ve ti mu ke na luve ya kupesa nge kimpwanza,
mpe ya kukomisa nge na kulunsi?"
11 Yesu vutulaka:
"Nge kele ve na luve na munu kana Nzambi me pesa nge yawu ve.
Ni yawu yina,
muntu yina me yekula munu na nge me sala disumu ya kulutila ya nge."
12 Katuka ntangu yina,
Pilate vwandaka sosa kupesa Yesu kimpwanza,
kasi ba-Zwife vwandaka looka:
"Kana nge pesa yandi kimpwanza,
nge kele ve ndiku ya ntinu Sezale*!
Muntu yina ke tubaka:
'Mu kele ntinu' kele mbeni ya Sezale."
13 Ntangu Pilate kuwaka mutindu yina,
yandi nataka Yesu na ngaanda,
mpe kwendaka vwanda na kiti ya lufundusu,
na kisika yina ba vwandaka bokila "Ngaanda ya Matadi".
(Ba vwandaka bokila yawu "Ngabata" na ndinga ya ba-Ebeleyo.)
14 Ya vwandaka kilumbu yina tekilaka mukembo ya Pakia.
Ya lendaka vwanda ngunga ya sambanu ya suka.
Pilate tubaka na ba-Zwife:
"Ntinu ya beno,
yandi yayi."
15 Kasi bawu lookaka dyaka:
"Kufwa yandi!
Kufwa yandi!
Koma yandi na kulunsi!"
Pilate yufulaka bawu:
"Beno zola ti mu koma ntinu ya beno na kulunsi?"
Bamfumu ya banganga-Nzambi vutulaka:
"Beto ke kaka na ntinu mosi:
Ni Sezale."
16 Na yina,
Pilate yekulaka bawu Yesu,
samu ti ba koma yandi na kulunsi.
Bawu bakaka Yesu,
mpe nataka yandi.
Ba komaka Yesu na kulunsi
17 Yesu basikaka na mbanza,
mpe vwandaka nata kulunsi ya yandi samu na kukwenda na kisika yina ba vwandaka bokila "Mikwa ya yintu" (to "Ngolongota" na ndinga ya ba-Ebeleyo).
18 Ni kuna,
ba komaka Yesu na kulunsi.
Ba komaka yandi na kati-kati ya bimpumbulu zole yina ba komaka mpe,
mosi na lweka ya bakala,
mpe ya nkaka na lweka ya kento.
19 Pilate tumisaka ti ba tula na kulunsi ya Yesu dibaya yina ba sonikaka:
"Yesu ya Nazaleti,
ntinu ya ba-Zwife."
20 Mutindu kisika yina ba komaka Yesu vwandaka pene-pene na mbanza,
ba-Zwife mingi vwandaka tanga bisono yina.
Ba sonikaka yawu na ndinga ya ba-Ebeleyo,
na ndinga ya bantu ya Loma,
mpe na ndinga ya ba-Ngeleke*.
21 Na yina,
bamfumu ya banganga-Nzambi* tubaka na Pilate:
"Katula bisono yayi:
'Ntinu ya ba-Zwife',
kasi sonika:
'Muntu yayi tubaka:
Mu kele ntinu ya ba-Zwife.' "
22 Pilate vutulaka:
"Mu ke soba ve mambu yina mu me sonika."
23 Ntangu basoda manisaka na kukoma Yesu na kulunsi,
bawu bakaka bilele ya yandi,
mpe kabulaka yawu na bandambu yiya.
Konso soda kuzwaka ndambu mosi.
Bawu bakaka mpe kinkuti ya yinda ya Yesu yina vwandaka kaka lele mosi katuka na zulu tii na yinsi.
24 Bawu tubaka:
"Beto pasula yawu ve.
Kasi beto budila yawu dzeke samu na kuzaba nani ke kuzwa yawu."
Ni mutindu yayi,
salamaka mambu yina ba sonikaka na Dibuku ya Nzambi:
"Bawu me kabula bilele ya munu,
bawu na bawu,
mpe ba me budila kinkuti ya munu dzeke
samu na kuzaba nani ke kuzwa yawub."
Ni mutindu yina,
basoda salaka.
25 Pene-pene ya kulunsi ya Yesu vwandaka na bakento yayi:
mama ya Yesu,
mpangi ya mama ya Yesu,
Maliya kento ya Kolopase,
mpe Maliya ya mbanza Madala.
26 Yesu talaka mama ya yandi,
mpe pene-pene na yandi,
kilandi yina yandi vwandaka zola mingi.
Na yina,
yandi tubaka:
"Kento!
Tala mwana ya nge."
27 Na manima,
yandi tubaka na kilandi yina:
"Tala mama ya nge."
Katuka kilumbu yina,
kilandi yango yambaka Maliya na yinzo ya yandi.
Yesu kufwaka
28 Yesu zabaka ti na ntangu yina,
mambu nyonso lungaka.
Na yina,
samu ti mambu yina ba sonikaka na Dibuku ya Nzambi salama,
yandi tubaka:
"Mu ke na nsatu ya mazac."
29 Ndonga ya kufuluka na malafu ya ngayi vwandaka kuna.
Basoda bakaka kima mutindu mafudya,
mpe tulaka yawu na malafu ya ngayi.
Bawu kangaka yawu na nsongi ya mwa yinti ya isopid,
mpe tulaka yandi yawu na bikoba.
30 Ntangu Yesu kunwaka malafu ya ngayi,
yandi tubaka:
"Nyonso me lunga."
Na manima,
yandi kondikaka yintu,
mpe vutulaka mwela ya yandi na sika ya Nzambi.
Soda tobolaka bambanzi ya Yesu
31 Ya vwandaka kilumbu yina tekilaka kilumbu ya saba*,
mpe bamfumu ya ba-Zwife vwandaka zola ve ti bamvumbi vwanda na bakulunsi tii na kilumbu ya saba,
samu ti kilumbu ya saba yina vwandaka kilumbu ya mfunu.
Na yina,
bawu lombaka Pilate muswa ya kubuka makulu ya bantu yina ba komaka,
mpe ya kukatula bawu na bakulunsi.
32 Na yina,
basoda kwizaka buka makulu ya bimpumbulu zole yina ba komaka kintwadi na Yesu.
33 Ntangu ba kumaka na ntwala ya Yesu,
ba talaka ti yandi vwandaka me kufwa.
Ni yawu yina,
bawu bukaka yandi ve makulu.
34 Kasi soda mosi tobolaka yandi bambanzi na dikonga,
mpe menga na maza basikaka.
35 Muntu yina ke na kuzabisa beno mambu yayi talaka yawu,
mpe kimbangi ya yandi kele ya tsyelika.
Yandi zaba ti yandi ke na kuzonza butsyelika,
mpe yandi salaka kimbangi yayi samu ti beno mpe kwikila.
36 Mambu yayi salamaka samu na kulungisa mambu yina ba sonikaka na Dibuku ya Nzambi:
"Ba ke buka ata mukwa mosi ya yandie."
37 Mpe kibuku ya nkaka ya Dibuku ya Nzambi ke zabisaka:
"Ba ke sikika meso ya bawu na muntu yina ba me tobola bambanzif."
Ba tulaka nzutu ya Yesu na ndyamu
38 Na manima,
Yosefi ya mbanza Alimate kwendaka lomba na Pilate muswa ya kukatula nzutu ya Yesu na kulunsi.
(Yosefi vwandaka mpe kilandi* ya Yesu,
kasi na mansweki samu ti yandi vwandaka na boma ya bamfumu ya ba-Zwife.)
Pilate pesaka yandi muswa.
Na yina,
yandi kwendaka baka nzutu ya Yesu.
39 Nikodemi,
yina na ntama kwendaka tala Yesu na mpimpa vwandaka kintwadi na Yosefi.
Yandi nataka mananasi yina ba yidikaka na mile* mpe na aloweseg.
Yawu lendaka vwanda na bakilo makumi tatu.
40 Yosefi mpe Nikodemi bakaka nzutu ya Yesu,
mpe zingaka yawu na balele.
Bawu tulaka yawu mananasi mutindu vwandaka kifu ya ba-Zwife na kuzika bamvumbi.
41 Pene-pene ya kisika yina ba komaka Yesu na kulunsi vwandaka na ndyamu ya malu-malu na kati ya bilanga,
sika ba vwandaka me zika ntete muntu ve.
42 Mutindu ya vwandaka kilumbu yina ba-Zwife vwandaka kubika saba*,
Yosefi mpe Nikodemi zikaka Yesu na ndyamu yina,
samu ti yawu vwandaka pene-pene.