Yesu na ntwala ya Pilate
27
Na suka-suka,
bamfumu nyonso ya banganga-Nzambi* mpe bakuluntu ya ba-Zwife vukanaka samu na kubaka lukanu ya kufwa Yesu.
2 Bawu kangaka Yesu basinga.
Bawu nataka yandi,
mpe pesaka yandi na maboko ya mfumu Pilate,
mfumu ya kizunga.
Yuda lelamaka
3 Ntangu Yuda yina yekulaka Yesu talaka ti ba zengilaka Yesu lufwa,
yandi talaka ntima mpasi,
mpe kwendaka vutula mbongo makumi tatu ya bisengo na sika ya bamfumu ya banganga-Nzambi* mpe bakuluntu ya ba-Zwife.
4 Yandi zabisaka bawu:
"Mu me sala masumu na kuyekula na lufwa muntu yina me sala dyambu ve."
Kasi bawu vutulaka:
"Yawu me tala beto ve!
Ya ke mambu ya nge!"
5 Yuda losaka mbongo yango na kati ya Yinzo ya Nene ya Nzambi*,
mpe basikaka.
Na manima,
yandi kwendaka lelama.
6 Bamfumu ya banganga-Nzambi lokotaka mbongo yina,
mpe tubaka:
"Misiku ya beto ke yiminaka na kutula mbongo ya mutindu yayi na kibumbulu-mbongo ya Yinzo ya Nene ya Nzambi samu ti ya kele ntalu ya menga ya muntu."
7 Na manima ya kuwisana,
bawu bakaka mbongo yina,
mpe sumbaka bilanga ya muntu yina ke yidikaka banzungu ya ntoto.
Bawu salaka yawu kisika ya kuzika banzenza.
8 Ni yawu yina,
tii bubu yayi,
ba ke bokilaka bilanga yina:
"Bilanga ya menga".
9 Yawu salamaka mutindu mumbikudi* Yelemi zabisaka:
"Bawu bakaka mbongo makumi tatu ya bisengo (ntalu yina bantu ya Isayeli zengaka samu na yandi),
10 mpe bawu pesaka yawu samu na kusumba bilanga ya bakala yina ke yidikaka banzungu ya ntoto mutindu Mfumu* tumisaka munua."
Yesu na ntwala ya Pilate
11 Ba nataka Yesu na ntwala ya mfumu Pilate,
mpe mfumu yufulaka yandi:
"Nge kele ntinu ya ba-Zwife?"
Yesu vutulaka:
"Nge ke na kutuba yawu nge mosi."
12 Kasi ntangu bamfumu ya banganga-Nzambi* mpe bakuluntu ya ba-Zwife vwandaka funda yandi,
yandi vutulaka ata dyambu.
13 Na yina,
Pilate yufulaka yandi:
"Nge me kuwa ve mambu nyonso yina bawu me funda nge?"
14 Kasi Yesu vutulaka ata mvutu na mambu nyonso yina,
mpe mfumu yitukaka mingi.
Bantu lombaka na Pilate na kufwa Yesu
15 Na konso mukembo ya Paki*,
mfumu ya kizunga vwandaka na kifu ya kupesa kimpwanza na nkole yina bantu vwandaka zola ti yandi basisa.
16 Na ntangu yina,
ya vwandaka na nkole mosi ya nsangu.
Nkumbu ya yandi vwandaka [Yesu] Balabase.
17 Na yina,
Pilate yufulaka nkonga ya bantu yina vukanaka kuna:
"Nani beno zola ti mu pesa kimpwanza:
[Yesu] Balabase to Yesu yina ba ke bokilaka Masiya*?"
18 Pilate zabaka ti bawu vwandaka tala Yesu musoki.
Ni yawu yina,
bawu yekulaka Yesu na sika ya yandi.
19 Ntangu Pilate vwandaka ya kuvwanda na kiti yina ba ke fundisaka,
kento ya yandi fidisaka yandi nsangu yayi:
"Kukota ve na mambu ya muntu yayi ya kudedama*.
Yandi me sala dyambu ve.
Mpimpa yayi,
mu me tala mpasi mingi na bandosi samu na yandi."
20 Bamfumu ya banganga-Nzambi mpe bakuluntu ya ba-Zwife tumisaka nkonga na kulomba ti ba basisa Balabase na boloko,
mpe ba kufwa Yesu.
21 Mfumu yufulaka dyaka bawu:
"Nani na kati ya bawu zole beno zola ti mu pesa kimpwanza?"
Bawu vutulaka:
"Balabase!"
22 Pilate yufulaka bawu:
"Yinki mu ke sala Yesu yina ba ke bokilaka Masiya?"
Bawu nyonso vutulaka:
"Koma yandi na kulunsi!"
23 Pilate yufulaka bawu:
"Wapi dyambu ya yimbi yandi me sala?"
Kasi bawu lookaka na ngolo nyonso:
"Koma yandi na kulunsi!"
24 Ntangu Pilate talaka ti yandi lendaka sala dyaka kima ve,
mpe muvusu vwandaka lutila,
yandi bakaka maza,
mpe sukulaka maboko na ntwala ya bantu.
Yandi tubaka:
"Lufwa ya muntu yayi kele na yintu ya munu ve!
Ya kele dyambu ya beno!"
25 Bantu nyonso vutulaka:
"Beto me ndima ti lufwa ya yandi vwanda na bayintu ya beto mpe ya bana ya beto!"
26 Na yina,
Pilate pesaka Balabase kimpwanza.
Yandi tumisaka ti ba bula Yesu bikoti,
mpe yekulaka yandi na maboko ya bawu samu na kukoma yandi na kulunsi.
Basoda vwandaka seka Yesu
27 Basoda ya Pilate nataka Yesu na kati ya yinzo ya mfumu,
mpe nkonga nyonso ya basoda zungaka yandi.
28 Bawu katulaka yandi binkuti,
mpe lwatisaka yandi kiyunga ya mbwaki.
29 Bawu yidikaka na bansende yimpu ya kintinu,
mpe lwatisaka yandi yawu.
Bawu simbisaka yandi didyadya na diboko ya bakala.
Na manima,
bawu fukamaka na ntwala ya yandi,
mpe sekaka yandi na kutuba:
"Mbote ya nge,
ntinu ya ba-Zwife!"
30 Bawu vwandaka lobola yandi mante.
Bawu bakaka didyadya,
mpe vwandaka bula yandi yawu na yintu.
31 Ntangu bawu manisaka na kuseka yandi,
bawu katulaka yandi kiyunga,
mpe lwatisaka yandi binkuti ya yandi.
Na manima,
bawu nataka yandi samu na kukoma yandi na kulunsi.
Ba komaka Yesu na kulunsi
32 Ntangu bawu basikaka na mbanza,
bawu bwabanaka bakala mosi na nkumbu Simoni,
muntu ya mbanza Silene.
Bawu tumisaka yandi na ngolo nyonso na kunata kulunsi ya Yesu.
33 Bawu kumaka na kisika yina ba ke bokilaka Ngolongota,
ya zola kutuba:
"Kisika ya Mukwa ya yintu".
34 Kuna,
bawu pesaka Yesu vinu yina bawu vukisaka na nkisi ya ndudi mingi.
Yesu mekaka yawu,
mpe mangaka na kunwa.
35 Bawu komaka Yesu na kulunsi.
Bawu kabulaka bawu na bawu binkuti ya yandi na kubula dzeke,
36 mpe bawu vwandaka kuna samu na kukeba yandi.
37 Ba tulaka na zulu ya kulunsi mwa dibaya yina ba sonikaka dyambu yina ba zengilaka yandi lufwa:
"Muntu yayi kele Yesu,
ntinu ya ba-Zwife."
38 Basoda komaka mpe na bakulunsi bimpumbulu zole pene-pene ya Yesu,
mosi na lweka ya yandi ya bakala,
mpe ya nkaka na lweka ya kento.
39 Bantu yina vwandaka luta kuna vwandaka finga yandi,
mpe vwandaka ningisa yintu.
40 Bawu vwandaka tuba:
"Nge vwandaka zola kumwangisa Yinzo ya Nene ya Nzambi*,
mpe kutunga dyaka yawu na bilumbu tatu.
Kana nge kele Mwana ya Nzambi*,
vuukisa nzutu ya nge,
mpe kulumuka na kulunsi."
41 Mutindu mosi mpe,
bamfumu ya banganga-Nzambi*,
milongisi ya Misiku*,
mpe bakuluntu ya ba-Zwife vwandaka seka yandi na kutuba:
42 "Yandi vuukisaka bantu ya nkaka,
kasi yandi lenda kuvuukisa ve nzutu ya yandi mosi?
Kana yandi kele ntinu ya yinsi ya Isayeli,
yandi kulumuka na kulunsi,
mpe beto ke kwikila yandi.
43 Yandi tulaka kivuvu ya yandi na Nzambi,
mpe tubaka ti yandi kele Mwana ya Nzambi.
Na yina,
kana Nzambi ke zolaka yandi,
yandi vuukisa yandi ntangu yayi."
44 Bimpumbulu yina ba komaka na bakulunsi pene-pene ya Yesu,
fingaka yandi mpe mutindu yina.
Lufwa ya Yesu
45 Na ngunga ya midi,
kitombe kumaka na yinsi nyonso tii na ngunga ya tatu na manima ya midi.
46 Pene-pene na ngunga ya tatu,
Yesu lookaka na ndinga ya ngolo:
"Eli,
Eli,
lema sabatani!"
Ya zola kutuba:
"Nzambi ya munu!
Nzambi ya munu!
Samu na yinki nge me bika munub?"
47 Bantu ya nkaka yina vwandaka kuna kuwaka yandi,
mpe tubaka:
"Beno kuwa!
Yandi ke na kubokila Eli!"
48 Mosi na kati ya bawu kwendaka baka na mbangu nyonso kima mosi mutindu mafudya.
Yandi tulaka yawu malafu ya ngayi,
mpe kangaka yawu na nsongi ya didyadya.
Yandi pesaka yawu na Yesu samu ti yandi kunwa.
49 Kasi ba ya nkaka tubaka:
"Vingila!
Beto tala ntete kana Eli ke kwiza kuvuukisa yandi."
50 Yesu lookaka dyaka na ndinga ya ngolo,
mpe kufwaka.
51 Kaka na ntangu yina,
lele yina ke kabulaka bisika ya longo* ya Yinzo ya Nene ya Nzambi* pasukaka na kati-kati na bandambu zole kubanda na zulu tii na yinsi.
Ntoto ninganaka,
matadi ya nene pasukaka,
52 bandyamu zibukaka,
mpe bantu ya longo mingi yina kufwaka vumbukaka na lufwa.
53 Bawu basikaka na bandyamu,
mpe na manima ya mvumbukulu ya Yesu na lufwa,
bawu kotaka na mbanza ya longo sika bantu mingi talaka bawu.
54 Na kutala ntoto yina ninganaka,
mpe mambu nyonso yina salamaka,
mfumu ya basoda ya Loma mpe basoda yina vwandaka na yandi samu na kukeba Yesu kumaka na boma mingi,
mpe tubaka:
"Ya tsyelika,
muntu yayi vwandaka Mwana ya Nzambi*!"
55 Bakento mingi vwandaka ya kutelama na mwa ntama,
mpe vwandaka tala.
Bawu landaka Yesu katuka Ngalili samu na kusadila yandi.
56 Na kati ya bawu vwandaka Maliya ya mbanza Madala,
Maliya mama ya Zaki na Yosefi,
mpe mama ya bana ya Zebede.
Ba tulaka nzutu ya Yesu na ndyamu
57 Ya vwandaka kuma mpimpa,
ntangu bakala mosi ya mvwama na nkumbu Yosefi,
muntu ya mbanza Alimate kwizaka.
Yandi mpe vwandaka kilandi* ya Yesu.
58 Yandi kwendaka tala Pilate,
mpe lombaka yandi nzutu ya Yesu.
Pilate pesaka muswa ya kupesa yandi yawu.
59 Yosefi bakaka nzutu ya Yesu,
mpe zingaka yawu na lele ya lino ya kuvedila.
60 Yandi tulaka yawu na kati ya ndyamu ya malu-malu ya yandi mosi yina ba timunaka na mongo ya matadi.
Na manima,
yandi vindumunaka ditadi ya nene samu na kukanga ndyamu,
mpe kwendaka.
61 Maliya ya mbanza Madala na ndoyi ya yandi vwandaka kuna ya kuvwanda na ntwala ya ndyamu.
Basoda kengilaka ndyamu
62 Kilumbu yina vwandaka landa vwandaka kilumbu ya saba*.
Na yina,
bamfumu ya banganga-Nzambi* mpe ba-Falisye* kwendaka na sika ya Pilate,
63 mpe tubaka:
"Mfumu,
beto ke na kubambuka ti ntangu yandi vwandaka moyo,
muntu yina ya luvunu tubaka:
'Mu ke vumbuka na lufwa na kilumbu ya tatu.'
64 Na yina,
pesa muswa ya kutula mikengi na ndyamu ya yandi tii na kilumbu ya tatu.
Kana ve,
bilandi* ya yandi ke kwiza kuyiba nzutu ya yandi,
mpe ke tuba ti yandi me vumbuka na lufwa.
Luvunu yina ke lutila ngolo na luvunu ya ntete."
65 Pilate zabisaka bawu:
"Basoda bawu yayi.
Beno kwenda kukeba ndyamu mutindu beno zola."
66 Na yina,
bawu kwendaka kengila ndyamu.
Bawu kangaka mbote ditadi yina vwandaka na mwelo ya ndyamu,
mpe tulaka basoda.