Ndongosolo ya Za Mubotiki
3
Ya vwandaka mvula ya kumi na tanu ya kimfumu ya ntinu Tibele na yinsi ya Loma.
Ponse Pilate vwandaka mfumu ya Zude.
Elode vwandaka mfumu ya Ngalili,
mpe mpangi ya yandi Filipe mfumu ya kizunga ya Itule mpe Takonite.
Lisanyase vwandaka mfumu ya kizunga ya Abilene.
2 Ane mpe Kayife vwandaka banganga-Nzambi ya ntete*.
Ni na ntangu yina mpe na yinsi ya kuyuma,
Nzambi zabisaka mambu ya yandi na sika ya Za,
mwana ya Zakali.
3 Za vwandaka tambula na kizunga nyonso yina kele pene-pene na nzadi ya Yodani.
Yandi vwandaka tuba:
"Beno soba nkadulu ya beno.
Beno kuzwa mbotokolo mpe Nzambi ke lemvokila beno masumu."
4 Na yina,
mambu yina sonikaka mumbikudi* Ezayi salamaka:
"Ndinga ya muntu ke na kulooka na yinsi ya kuyuma:
Beno yidika nzila samu na Mfumu*,
mpe beno sungika banzila ya yandi!
5 Mabenga nyonso ke fuluka na ntoto.
Myongo nyonso ya nene mpe ya fyoti ke kuluka.
Banzila ya kutengama ke sungama.
Banzila ya mabulu ke yilama,
6 mpe bantu nyonso ke tala mpulusu yina me katuka na Nzambia."
7 Bantu mingi vwandaka kwiza na sika ya Za samu ti yandi botika bawu.
Na yina,
yandi vwandaka zabisa bawu:
"Dikanda ya bampidi!
Nani me zabisa beno ti beno lenda kukima lufundusu ya Nzambi yina me kuma pene-pene?
8 Beno lakisa mavanga yina ke na kulakisa ti beno me soba nkadulu ya beno.
Beno bika na kuzonzaka na yinsi ya bantima ya beno:
'Beno kele bana ya Abalami.
' Ya tsyelika,
mu ke na kuzabisa beno,
Nzambi lenda kukitula matadi yayi samu ti yawu kuma bana ya dikanda ya Abalami!
9 Disoka kele yimeni ya kukubama samu na kuzenga bayinti sika kele myanzi ya yawu.
Ba ke zenga konso yinti yina ke butaka ve bambuma ya mbote,
mpe ba ke losa yawu na tiya."
10 Bantu yufulaka Za:
"Na yina,
yinki beto fwana kusala?"
11 Yandi vutulaka:
"Muntu yina ke na biyunga zole fwana kupesa mosi na muntu yina ke na yawu ve,
mpe muntu yina ke na madya fwana kukabula na muntu yina ke na yawu ve."
12 Bilokoti-mpaku mpe,
kwizaka na sika ya Za samu na kubotama,
mpe yufulaka yandi:
"Mulongisi,
yinki beto fwana kusala?"
13 Za vutulaka:
"Ntangu beno ke futisaka bantu mpaku,
beno lutisa ve ntalu yina luyalu zengaka."
14 Basoda mpe yufulaka yandi:
"Kasi beto,
yinki beto fwana kusala?"
Za vutulaka:
"Beno baka ve mbongo ya muntu na ngolo to na kutuba mambu ya luvunu.
Kasi beno yangalala kaka na difuta yina beno ke kuzwaka."
15 Bantu nyonso vwandaka vingila na kivuvu Masiya*,
mpe vwandaka banza ti Za lendaka vwanda Masiya.
16 Na yina,
Za zabisaka bawu nyonso:
"Mu ke na kubotika beno na maza.
Kasi muntu yina ke kwiza me lutila munu ngolo.
Mu kele ve ya kulunga samu na kunyangula basinga ya mapapa ya yandi.
Ni yandi ke botika beno na Mpeve ya Longo mpe na tiya.
17 Yandi me simba kiyengoso na diboko samu na kukabula bambuma na matiti.
Yandi ke yonzika bambuma na kisika yina ba ke bumbaka yawu,
mpe ke yoka matiti na tiya yina ke kufwa ve."
18 Za vwandaka zabisa bantu Nsangu ya Mbote*,
mpe vwandaka pesa bankindusulu mingi ya nkaka.
19 Kasi Za sembaka ntinu Elode samu na Elodyade,
kento ya mpangi ya yandi yina yandi bakaka,
mpe samu ti yandi salaka dyaka mambu mingi ya nkaka ya yimbi.
20 Elode salaka dyaka dyambu ya nkaka ya yimbi:
yandi tulaka Za na boloko.
Mbotokolo ya Yesu
21 Na manima ya kubotika bantu nyonso,
Za botikaka mpe Yesu.
Ntangu Yesu vwandaka sambila,
zulu zibukaka
22 mpe Mpeve ya Longo kulumukaka na zulu ya yandi na kifwani ya dibembe.
Ndinga wakanaka na mazulu:
"Nge kele mwana ya munu yina mu ke zolaka mingi.
Ni na nge kele kilengi nyonso ya munub."
Bankoko ya dikanda ya Yesu
23 Yesu lendaka vwanda na bamvula makumi tatu ntangu yandi bandaka kisalu ya yandi.
Bantu vwandaka banza ti tata ya yandi vwandaka Yosefi,
mwana ya Eli.
24 Eli vwandaka mwana ya Matati,
mpe Matati mwana ya Levi.
Levi vwandaka mwana ya Meleki,
mpe Meleki mwana ya Yanayi.
Yanayi vwandaka mwana ya Yosefi,
mpe Yosefi
25 mwana ya Matatyase.
Matatyase vwandaka mwana ya Amose,
mpe Amose mwana ya Nawume.
Nawume vwandaka mwana ya Eseli,
mpe Eseli mwana ya Nangayi.
26 Nangayi vwandaka mwana ya Mawate,
mpe Mawate mwana ya Matatyase.
Matatyase vwandaka mwana ya Semeni,
mpe Semeni mwana ya Yoseki.
Yoseki vwandaka mwana ya Yoda,
27 mpe Yoda mwana ya Yowanane.
Yowanane vwandaka mwana ya Lesa,
mpe Lesa mwana ya Zolobabe.
Zolobabe vwandaka mwana ya Salatyele,
mpe Salatyele mwana ya Neli.
28 Neli vwandaka mwana ya Meleki,
mpe Meleki mwana ya Adi.
Adi vwandaka mwana ya Kosame,
mpe Kosame mwana ya Elemada.
Elemada vwandaka mwana ya Ele,
29 mpe Ele mwana ya Yesu.
Yesu vwandaka mwana ya Elizeli,
mpe Elizeli mwana ya Yolime.
Yolime vwandaka mwana ya Matati,
mpe Matati mwana ya Levi.
30 Levi vwandaka mwana ya Simeyoni,
mpe Simeyoni mwana ya Yuda.
Yuda vwandaka mwana ya Yosefi,
mpe Yosefi mwana ya Yonami.
Yonami vwandaka mwana ya Elyakime,
31 mpe Elyakime mwana ya Meleya.
Meleya vwandaka mwana ya Mena,
mpe Mena mwana ya Matata.
Matata vwandaka mwana ya Natane,
mpe Natane mwana ya Davidi.
32 Davidi vwandaka mwana ya Yese,
mpe Yese mwana ya Obedi.
Obedi vwandaka mwana ya Boze,
mpe Boze mwana ya Sala.
Sala vwandaka mwana ya Nasone,
33 mpe Nasone mwana ya Aminada.
Aminada vwandaka mwana ya Adimini,
mpe Adimini mwana ya Alani.
Alani vwandaka mwana ya Esomi,
mpe Esomi mwana ya Falese.
Falese vwandaka mwana ya Yuda,
34 mpe Yuda mwana ya Yakobi.
Yakobi vwandaka mwana ya Izaki,
mpe Izaki mwana ya Abalami.
Abalami vwandaka mwana ya Taya,
mpe Taya mwana ya Nakole.
Nakole vwandaka
35 mwana ya Seluke,
mpe Seluke mwana ya Langawu.
Langawu vwandaka mwana ya Faleki,
mpe Faleki mwana ya Ebele.