Satana tontaka Yesu
4
Ntangu Yesu katukaka na nzadi ya Yodani,
yandi vwandaka ya kufuluka na Mpeve ya Longo,
mpe Mpeve nataka yandi na yinsi ya kuyuma.
2 Yandi salaka bilumbu makumi yiya kuna,
mpe Satana tontaka yandi.
Na kati ya bilumbu nyonso yina,
Yesu kudyaka ata kima.
Na manima,
yandi kumaka na nsatu.
3 Na yina,
Satana zabisaka yandi:
"Kana nge kele Mwana ya Nzambi*,
tumisa ditadi yayi na kukituka dimpa."
4 Yesu vutulaka:
"Dibuku ya Nzambi ke tubaka:
Luzingu ya muntu kele kaka ve samu na mampaa."
5 Satana nataka Yesu na zulu ya kisika mosi ya yinda.
Na mbala mosi,
yandi lakisaka Yesu bayinsi nyonso ya ntoto,
6 mpe tubaka:
"Mu ke pesa nge lulendo nyonso mpe bimvwama ya bayinsi nyonso yayi.
Ba pesaka munu yawu,
mpe mu lenda kupesa yawu na konso muntu yina mu zola.
7 Na yina,
kana nge siika munu,
bima nyonso yayi ke vwanda ya nge."
8 Yesu vutulaka:
Dibuku ya Nzambi ke tubaka:
"Nge fwana kusiika Mfumu* Nzambi ya nge,
mpe kaka ni yandi nge fwana kubondilab."
9 Na manima,
Satana nataka Yesu na Yelusalemi.
Yandi tulaka Yesu na zulu ya Yinzo ya Nene ya Nzambi*,
mpe tubaka:
"Kana nge kele Mwana ya Nzambi,
kubwa na yinsi,
10 samu ti Dibuku ya Nzambi ke tubaka:
'Nzambi ke tumisa bambazi* ya yandi na kukeba nge.'
11 mpe:
'Bambazi ke yamba nge na maboko ya bawu samu ti dikulu ya nge kututa ve ditadic.' "
12 Yesu vutulaka:
"Ya kele ya kusonama:
Nge fwana kutonta ve Mfumu Nzambi ya nged."
13 Na manima ya kutonta Yesu,
Satana bikaka yandi mpe kwendaka samu na kuvingila ntangu ya nkaka.
Yesu bandaka kisalu ya yandi na Ngalili
14 Yesu vutukaka ya kufuluka na ngolo ya Mpeve ya Longo na Ngalili,
mpe nsangu ya yandi mwanganaka na kizunga nyonso yina.
15 Yandi vwandaka longisa na bayinzo ya lusambulu ya ba-Zwife*,
mpe bantu nyonso vwandaka kumbisa yandi.
16 Yesu kwendaka na Nazaleti sika yandi kulaka.
Na kilumbu ya saba*,
yandi kotaka na yinzo ya lusambulu ya ba-Zwife mutindu vwandaka kifu ya yandi.
Na ntangu ya kutanga Mambu ya Nzambi,
ba lombaka Yesu na kutanga Mambu ya Nzambi.
Yandi telamaka,
17 mpe ba pesaka yandi dibuku ya mumbikudi* Ezayi.
Yandi zibulaka yawu mpe tangaka kibuku ya Mambu ya Nzambi yina ke tubaka:
18 "Mpeve ya Mfumu* kele na munu.
Yandi me soola munu samu na kunata Nsangu ya Mbote* na bamputu.
Yandi me fidisa munu na kuzabisa nsangu ya kimpwanza na bankole,
na kuzibula meso ya bampofo,
mpe samu na kupesa kimpwanza na bantu yina ba ke nyokolaka.
19 Yandi me fidisa munu mpe samu na kuzabisa mvula yina Mfumu ke lakisa bumbote ya yandie."
20 Ntangu Yesu manisaka na kutanga,
yandi kangaka dibuku.
Yandi vutulaka yawu na kisadi ya yinzo ya lusambulu,
mpe kwendaka vwanda samu na kulongisa.
Bantu nyonso yina vwandaka kuna sikikaka yandi meso.
21 Na yina,
yandi bandaka na kuzabisa bawu:
"Bubu yayi,
mambu yayi ya Dibuku ya Nzambi yina beno me kuwa me salama."
22 Bawu nyonso vwandaka kumbisa yandi,
mpe yitukaka samu na mambu ya mbote yina yandi vwandaka zonza.
Bawu vwandaka tuba:
"Ni yandi ve kele mwana ya Yosefi?"
23 Na yina,
Yesu zabisaka bawu:
"Mu zaba ti beno ke tubila munu kingana yayi:
'Munganga,
belusa nzutu ya nge,
nge mosi.
' Beno ke zabisa munu mpe:
'Mambu nyonso yina beto kuwaka ti nge salaka na mbanza Kapenawume,
sala yawu mpe awa na mbanza ya nge mosi.' "
24 Na manima,
yandi tubaka dyaka:
"Ya tsyelika,
mu ke na kuzabisa beno,
ba ke yambaka ve mbote mumbikudi na mbanza ya yandi.
25 Ya tsyelika,
mu ke na kuzabisa beno,
na ntangu ya mumbikudi Eli ntangu mvula salaka bamvula tatu na ndambu ata kunoka,
mpe nsatu ya nene kumaka na yinsi nyonso,
mifwidi vwandaka mingi na yinsi ya Isayeli.
26 Nzambi fidisaka ve Eli na mifwidi yina.
Kasi Nzambi fidisaka yandi kaka na sika ya mufwidi mosi ya kento yina vwandaka zinga na mbanza Sapeta ya kizunga ya Sidoni.
27 Mutindu mosi mpe,
na ntangu ya mumbikudi Elize,
bantu ya bwazi vwandaka mingi na yinsi ya Isayeli,
kasi ata mosi na kati ya bawu belukaka.
Kaka ni Namani,
muntu ya yinsi ya Sili,
belukakaf."
28 Bantu nyonso yina vwandaka na kati ya yinzo ya lusambulu ya ba-Zwife kumaka na nkele ya kulutila ntangu bawu kuwaka mambu yina.
29 Bawu telamaka mpe basisaka Yesu na mbanza.
Bawu nataka yandi tii na nsongi ya mongo yina ba tungaka mbanza samu na kulosa yandi na dibenga.
30 Kasi Yesu lutaka na kati-kati ya bawu,
mpe kwendaka.
Yesu belusaka muntu yina vwandaka na mpeve ya yimbi
31 Yesu kwendaka na Kapenawume,
mbanza ya Ngalili,
mpe yandi vwandaka longisa bantu na kilumbu ya saba*.
32 Bantu vwandaka yituka na ndongosolo ya yandi samu ti yandi vwandaka zonza na bumfumu nyonso.
33 Na kati ya yinzo ya lusambulu ya ba-Zwife*,
vwandaka na bakala mosi yina mpeve ya yimbi vwandaka kwamisa.
Yandi lookaka na ngolo nyonso:
34 "Ee!
Yesu muntu ya Nazaleti,
yinki nge ke na kusosa na beto?
Nge me kwiza samu na kufwa beto?
Mu zaba nani nge kele:
Nge kele muntu ya longo* yina Nzambi me fidisa!"
35 Yesu ngalaka mpeve ya yimbi mpe tubaka:
"Vwanda swi,
mpe basika na nzutu ya muntu yayi!"
Na yina,
mpeve ya yimbi losaka muntu yina na ntoto na meso ya bantu nyonso,
mpe basikaka ata kutalisa yandi mpasi.
36 Bawu nyonso yitukaka mpe vwandaka tuba bawu na bawu:
"Wapi mutindu ya mambu yandi me zonza?
Muntu yayi ke na kutumisa bampeve ya yimbi na bumfumu mpe lulendo nyonso,
mpe yawu ke na kubasika!"
37 Na yina,
nsangu ya Yesu mwanganaka na kizunga nyonso yina.
Yesu belusaka bambevo ya nkaka
38 Yesu basikaka na yinzo ya lusambulu ya ba-Zwife*,
mpe kwendaka na yinzo Simoni.
Mama ya kento ya Simoni vwandaka na dibawu ya ngolo,
mpe bayina vwandaka kuna,
lombaka Yesu na kubelusa yandi.
39 Yesu kondamaka pene-pene ya yandi,
mpe ngalaka dibawu.
Dibawu manisaka,
kento yina telamaka na nswalu mpe bandaka na kusadila bawu.
40 Ntangu bwisi yilaka,
bantu nyonso yina vwandaka na bambevo ya mutindu na mutindu nataka bawu na sika ya Yesu.
Yesu tulaka bawu maboko,
mpe belusaka bawu.
41 Bampeve ya yimbi mpe basikaka na bambevo mingi na kulooka:
"Nge kele Mwana ya Nzambi*!"
Kasi Yesu vwandaka semba bawu na ngolo nyonso,
mpe vwandaka yimina bawu na kuzonza samu ti bawu zabaka ti yandi kele Masiya*.
Yesu kwendaka longisa na Zude
42 Ntangu bwisi kutsyaka,
Yesu basikaka na mbanza,
mpe kwendaka sika yina vwandaka ve na bantu.
Nkonga ya bantu vwandaka sosa yandi.
Ntangu ba talaka yandi,
ba sosaka na kuyimina yandi na kukwenda samu ti yandi bika bawu ve.
43 Kasi Yesu zabisaka bawu:
"Mu fwana kuzabisa mpe Nsangu ya Mbote* ya Kimfumu ya Nzambi* na bambanza ya nkaka.
Ni samu na yawu Nzambi fidisaka munu."
44 Na yina,
Yesu vwandaka longisa na bayinzo ya lusambulu ya ba-Zwife* na Zude.