Bantu ya Nazaleti mangaka na kukwikila na Yesu
6
Yesu katukaka na kisika yina,
mpe kwendaka na mbanza yina yandi kulaka.
Bilandi* ya yandi mpe kwendaka na yandi.
2 Na kilumbu ya saba*,
yandi vwandaka longisa na yinzo ya lusambulu ya ba-Zwife*.
Bantu mingi yina vwandaka kuwa yandi yitukaka mingi,
mpe tubaka:
"Wapi sika yandi me kuzwa mambu nyonso yayi?
Nani me pesa yandi ndwenga yayi,
mpe lulendo ya kusala bimangu ya mutindu yayi?
3 Yandi kele kisadi-mabaya mpe mwana ya Maliya.
Yandi kele yaya ya Zaki,
Zose,
Yude mpe Simoni!
Bibusi ya yandi ke zingaka na beto awa!"
Mambu nyonso yina bawu vwandaka banza salaka ti bawu kwikila na yandi ve.
4 Na yina,
Yesu zabisaka bawu:
"Ba ke zitisaka mumbikudi* bisika nyonso.
Kasi kaka ni na mbanza ya yandi,
dikanda mpe dibuta ya yandi,
ba ke zitisaka yandi ve."
5 Kuna,
Yesu lendaka ve na kusala kimangu,
kana kaka ve mwa bambevo yina yandi tentikaka maboko mpe belusaka.
6 Yandi vwandaka yituka samu ti bantu ya mbanza ya yandi vwandaka kwikila ve.
Kisalu ya bilandi kumi na zole
Na manima,
Yesu vwandaka zyeta na babwala ya pene-pene na mbanza yina samu na kulongisa bantu.
7 Yandi bokilaka bilandi* ya yandi kumi na zole,
mpe fidisaka bawu zole zole.
Yandi pesaka bawu lulendo ya kubingisa bampeve ya yimbi,
8 mpe zabisaka bawu mutindu yayi:
"Beno nata ata kima samu na nzyetolo ya beno.
Beno nata kaka mwa yinti.
Beno nata ve mampa,
to nkutu,
to mbongo na baposi.
9 Beno lwata mapapa,
kasi beno nata ve binkuti zole."
10 Yandi zabisaka dyaka bawu:
"Na mbanza yina beno ke kuma,
beno vwanda na kati ya yinzo yina ba ke yamba beno tii ntangu beno ke katuka kuna.
11 Kana bantu ya bwala mosi yamba beno ve to manga na kuwa beno,
beno katuka kuna mpe beno ningisa fundu-fundu ya makulu ya beno.
Ya ke vwanda nkebosolo samu na bawu."
12 Na yina,
bilandi* kwendaka mpe vwandaka zabisa bantu nyonso na kusoba nkadulu.
13 Bawu bingisaka bampeve mingi ya yimbi.
Bawu vwandaka tula bambevo mingi mafuta na yintu,
mpe vwandaka belusa bawu.
Lufwa ya Za Mubotiki
14 Ntinu Elode kuwaka nsangu ya Yesu samu ti nsangu ya Yesu mwanganaka na bisika nyonso.
Ba ya nkaka vwandaka tuba:
"Za Mubotiki me vumbuka na lufwa!
Ni yawu yina,
yandi kele na lulendo ya kusala bimangu."
15 Kasi ba ya nkaka vwandaka tuba:
"Ya kele Eli."
Ba ya nkaka dyaka vwandaka tuba:
"Yandi kele mosi na kati ya mimbikudi* ya ntama."
16 Ntangu Elode kuwaka mambu nyonso yina bantu vwandaka zonza,
yandi tubaka:
"Ya kele Za Mubotiki yina mu zengisaka yintu.
Ni yandi me vumbuka na lufwa!"
17 Ya tsyelika,
Elode kangisaka Za,
mpe tulaka yandi na boloko na bisengo na makulu.
Yandi salaka mutindu yina samu na Elodyade,
kento ya mpangi ya yandi Filipe,
yina yandi kwelaka.
18 Ni yawu yina,
Za tubilaka yandi:
"Nge kele ve na muswa ya kubaka kento ya mpangi ya nge."
19 Elodyade vwandaka ya kufuluka na nkele na Za,
mpe vwandaka zola kufwa yandi.
Kasi yandi vwandaka lenda ve,
20 samu ti Elode vwandaka na boma ya Za.
Elode zabaka ti Za vwandaka muntu ya kudedama* mpe ya longo*.
Ni yawu yina,
yandi vwandaka keba yandi.
Mabanza ya yandi vwandaka kuma kidi-kidi ntangu yandi vwandaka kuwa Za.
Kasi yandi vwandaka zola kuwa mambu ya Za.
21 Kasi Elodyade kuzwaka ntangu ya mbote na kilumbu yina Elode salaka mukembo ya yandi ya mbutukulu.
Elode bokilaka na kudya bamfumu ya luyalu ya yandi,
bamfumu ya basoda,
mpe bantu ya mfunu ya Ngalili.
22 Ndumba ya Elodyade kotaka na kivinga ya mukembo,
mpe binaka.
Yandi yangidikaka Elode mpe banzenza.
Na yina,
ntinu tubaka na ndumba yina:
"Mu ke pesa nge kima ni kima yina nge ke lomba munu."
23 Na manima,
yandi zengaka ndefi yayi:
"Mu ke pesa nge nyonso yina nge ke lomba munu,
ata ya vwanda ndambu ya yinsi ya munu."
24 Ndumba basikaka mpe yufulaka mama ya yandi:
"Yinki mu fwana kulomba?"
Mama ya yandi vutulaka:
"Lomba yintu ya Za Mubotiki."
25 Ndumba vutukaka na nswalu nyonso sika ya ntinu,
mpe tubaka:
"Mu zola ti nge pesa munu malu-malu yayi yintu ya Za Mubotiki na kati ya ndonga."
26 Ntinu kumaka na kyadi.
Kasi samu na ndefi yina yandi kudyaka na ntwala ya banzenza,
yandi lendaka yimina yandi yawu ve.
27 Na yina,
yandi tumisaka mbulu-mbulu na nswalu nyonso na kunatina yandi yintu ya Za.
Mbulu-mbulu kwendaka na kati ya boloko,
mpe zengaka yintu ya Za.
28 Yandi nataka yintu yina na kati ya ndonga,
mpe pesaka yawu na ndumba.
Ndumba pesaka yawu na mama ya yandi.
29 Ntangu bilandi* ya Za kuwaka nsangu yina,
bawu kwendaka baka nzutu ya Za mpe tulaka yawu na kati ya ndyamu.
Yesu dikilaka bantu mafunda tanu
30 Bantumwa* vutukaka sika ya Yesu,
mpe zabisaka yandi mambu nyonso yina bawu salaka mpe longisaka.
31 Yesu tubaka na bantumwa:
"Beno kwiza na munu na kisika yina kele bantu ve samu na kupema fyoti."
Yandi zonzaka mutindu yina samu ti bantu mingi vwandaka kwiza mpe kwenda,
mpe bantumwa kuzwaka ve mwa ntangu ya kudya.
32 Na yina,
bawu kotaka na bwatu,
mpe kwendaka na kisika yina kele bantu ve.
33 Kasi bantu mingi talaka bawu ntangu bawu kwendaka,
mpe zabaka bawu.
Na yina,
bawu katukaka na bambanza nyonso yina vwandaka pene-pene,
mpe tekilaka na makulu na kisika yina Yesu mpe bantumwa vwandaka kwenda.
34 Ntangu Yesu basikaka na bwatu,
yandi talaka nkonga ya nene ya bantu.
Yandi kumaka ya kufuluka na kyadi samu na bawu,
samu ti bawu vwandaka mutindu mameme yina kele ve na muvungi.
Na yina,
yandi bandaka na kulongisa bawu mambu mingi.
35 Mutindu bwisi bandaka na kuyila,
bilandi ya Yesu kwendaka pene-pene ya yandi,
mpe tubaka:
"Bwisi me banda na kuyila,
mpe kisika yayi kele na kima ve.
36 Vutula bantu yayi na babwala mpe bayinzo ya mivungi yina kele pene-pene,
samu ti bawu sumba bima ya kudya."
37 Yesu vutulaka:
"Beno pesa bawu madya beno mosi."
Kasi bawu yufulaka yandi:
"Nge zola ti beto kwenda kusumba mampa yina me fwanana na nkama zole ya lutangu ya mbongo ya bisengo,
mpe beto pesa bawu yawu?"
38 Yesu zabisaka bawu:
"Beno kwenda tala mampa yikwa kele na beno?"
Bawu kwendaka tala mpe tubaka:
"Beto kele na mampa tanu na bambisi zole."
39 Na yina,
Yesu tumisaka bilandi ya yandi na kukabula bantu nyonso na mwa bankonga,
mpe na kuvwandisa bawu na zulu ya mwa matiti yina vwandaka kuna.
40 Bantu vwandaka na bankonga.
Ya vwandaka na bankonga ya bantu nkama,
mpe bankonga ya bantu makumi tanu.
41 Na manima,
Yesu bakaka mampa tanu mpe bambisi zole.
Yandi talaka na zulu mpe tondaka Nzambi.
Yandi bukunaka mampa mpe pesaka yawu na bilandi ya yandi,
samu ti bawu kabula yawu na bantu nyonso.
Yandi kabulaka mpe bambisi zole yina na bantu nyonso.
42 Bawu nyonso kudyaka mpe yukutaka.
43 Bilandi lokotaka bibuku ya mampa mpe ya bambisi yina bikanaka.
Bawu fulusaka bitunga kumi na zole.
44 Lutangu ya bayina kudyaka mampa vwandaka mafunda tanu ya babakala.
Yesu tambulaka na zulu ya maza
45 Na manima,
Yesu tumisaka bilandi* ya yandi na kukota na bwatu,
samu ti bawu tekila na simu ya nkaka ya dyanga na ndambu ya mbanza Besayida ntangu yandi mosi ke vutula bantu na bambanza ya bawu.
46 Na manima ya kuvutula nkonga yina,
yandi kwendaka na mongo samu na kusambila.
47 Ntangu mpimpa kumaka,
bwatu vwandaka me kuma na kati-kati ya dyanga,
mpe Yesu vwandaka kaka yandi mosi na ntoto.
48 Yesu talaka ti bilandi ya yandi vwandaka tala mpasi na kunata bwatu,
samu ti kitembo ya ngolo vwandaka bwabana bawu.
Na yina,
ntete bwisi kutsya,
yandi tambulaka na zulu ya maza na kukwenda na sika ya bawu,
mpe zolaka luta bawu.
49 Ntangu bawu talaka yandi na kutambula na zulu ya maza,
bawu banzaka ti ya vwandaka mukuyu,
mpe bawu bandaka na kulooka.
50 Ya tsyelika,
bawu nyonso vwandaka tala yandi,
mpe kumaka na boma.
Kasi yandi zabisaka bawu na mbangu:
"Beno vwanda na kibakala!
Ya kele munu.
Beno tala boma ve."
51 Na manima,
Yesu kotaka na bwatu yina,
mpe mupepe dingamaka.
Na yina,
bilandi yitukaka mingi.
52 Ya tsyelika,
bilandi bakulaka ve kimangu ya mampa samu ti bantima ya bawu vwandaka ya kukangama.
Yesu belusaka bambevo na kizunga ya Ngenezaleti
53 Na manima ya kusabuka dyanga,
bawu kumaka na kizunga ya Ngenezaleti.
54 Ntangu bawu vwandaka basika na bwatu,
bantu zabaka Yesu mbangu.
55 Na yina,
bantu kwendaka mbangu na kati ya kizunga nyonso,
mpe natinaka yandi bambevo na zulu ya bipoyi konso kisika yina bawu vwandaka kuwa ti Yesu kele.
56 Na bisika nyonso yina Yesu vwandaka luta na kati ya babwala,
bambanza,
mpe babwala ya mivungi,
bantu vwandaka tula bambevo na bisika yina bantu nyonso ke vukanaka.
Bawu vwandaka bondila yandi na kupesa bambevo muswa ya kusimba kwandi nsongi ya kinkuti ya yandi,
mpe bayina nyonso vwandaka simba yawu,
vwandaka beluka.