Lufwa ya Za Mubotiki
14
Na ntangu yina,
Elode,
ntinu ya Ngalili kuwaka nsangu ya Yesu.
2 Yandi tubaka na bisadi ya yandi:
"Muntu yina kele Za Mubotiki.
Yandi me vumbuka na lufwa.
Ni yawu yina,
yandi ke na lulendo ya kusala bimangu."
3 Elode pesaka muswa ya kukanga Za.
Yandi kangisaka Za basinga ya bisengo,
mpe tulaka yandi na boloko samu na Elodyade,
kento ya mpangi ya yandi Filipe.
4 Za zabisaka Elode:
"Nge kele ve na muswa ya kubaka Elodyade na kuvwanda kento ya nge."
5 Na yina,
Elode vwandaka sosa na kufwa Za.
Kasi yandi vwandaka na boma ya nkonga ya ba-Zwife samu ti bawu vwandaka tala Za mutindu mumbikudi*.
6 Na kilumbu ya mukembo ya mbutukulu ya Elode,
ndumba ya Elodyade binaka na ntwala ya banzenza,
mpe yangidikaka mingi Elode.
7 Ni yawu yina,
Elode kudyaka ndefi ya kupesa yandi kima ni kima yina yandi ke lomba.
8 Ndumba landaka malongi ya mama ya yandi,
mpe tubaka na Elode:
"Pesa munu awa yintu ya Za Mubotiki na kati ya ndonga."
9 Elode kumaka na kyadi na kuwa mutindu yina.
Kasi samu na ndefi yina yandi kudyaka na ntwala ya banzenza,
yandi pesaka muswa ya kunatina ndumba yintu ya Za.
10 Yandi fidisaka muntu na kwenda kuzenga yintu ya Za Mubotiki na kati ya boloko.
11 Ba nataka yintu na kati ya ndonga.
Ba pesaka yawu na sika ya ndumba,
mpe ndumba pesaka yawu na mama ya yandi.
12 Bilandi* ya Za kwendaka baka nzutu ya Za mpe zikaka yawu.
Na manima,
bawu kwendaka zabisa Yesu mambu nyonso yina salamaka.
Yesu dikilaka bantu mafunda tanu
13 Ntangu Yesu kuwaka nsangu yina,
yandi kotaka na bwatu,
mpe kwendaka na kisika yina vwandaka bantu ve.
Kasi ntangu bantu zabaka yawu,
bawu bikaka bambanza ya bawu,
mpe landaka yandi na makulu.
14 Ntangu Yesu basikaka na bwatu,
yandi talaka nkonga ya nene ya bantu.
Yandi kumaka ya kufuluka na kyadi samu na bawu,
mpe belusaka bambevo ya bawu.
15 Ntangu bwisi bandaka na kuyila,
bilandi* ya Yesu kwendaka pene-pene ya yandi,
mpe zabisaka yandi:
"Bwisi me banda na kuyila,
mpe kisika yayi kele na kima ve.
Vutula bantu yayi na babwala samu ti bawu kwenda kusumba madya."
16 Yesu vutulaka:
"Ya ke mfunu ve ti bawu kwenda.
Beno pesa bawu madya,
beno mosi."
17 Kasi bilandi zabisaka yandi:
"Beto ke kaka na mampa tanu na bambisi zole awa."
18 Yesu tubaka:
"Beno natina munu yawu."
19 Na manima,
yandi tumisaka bantu nyonso na kuvwanda na zulu ya matiti.
Yandi bakaka mampa tanu yina na bambisi zole.
Yandi talaka na zulu,
mpe tondaka Nzambi.
Yandi bukunaka mampa,
mpe pesaka yawu na bilandi samu ti bawu kabula yawu na bantu nyonso.
20 Bawu nyonso kudyaka mpe yukutaka.
Bilandi lokotaka bibuku yina bikanaka,
mpe fulusaka bitunga kumi na zole.
21 Lutangu ya bantu yina kudyaka lendaka vwanda mafunda tanu ya babakala ata kubaka lutangu ya bakento mpe bana.
Yesu tambulaka na zulu ya maza
22 Na manima,
Yesu tumisaka bilandi* ya yandi na kukota na bwatu samu ti bawu tekila na simu ya nkaka ya dyanga,
mpe yandi bikanaka samu na kuvutula bantu na bambanza ya bawu.
23 Ntangu yandi manisaka na kuvutula bantu nyonso,
yandi yulukaka na mongo samu na kusambila.
Ntangu mpimpa kumaka,
yandi vwandaka kaka yandi mosi.
24 Bwatu vwandaka me bika ntoto,
mpe kumaka ntama.
Bimpo ya maza vwandaka ningisa yawu samu ti kitembo ya ngolo vwandaka bwabana bawu.
25 Ntete bwisi kutsya,
Yesu kwendaka sika ya bilandi ya yandi na kutambula na zulu ya maza.
26 Ntangu bilandi talaka yandi na kutambula na zulu ya maza,
bawu kumaka na boma,
mpe tubaka:
"Ya kele mukuyu!"
Na manima,
bawu bandaka na kulooka na ngolo nyonso samu ti bawu vwandaka na boma.
27 Kasi Yesu zabisaka bawu na mbangu:
"Beno vwanda na kibakala!
Ya kele munu!
Beno tala boma ve."
28 Na yina,
Pyele zabisaka yandi:
"Mfumu,
kana ya kele nge,
pesa munu muswa ya kukwiza sika ya nge na kutambula na zulu ya maza."
29 Yesu tubaka:
"Kwiza!"
Pyele basikaka na bwatu,
mpe bandaka na kutambula na zulu ya maza samu na kukwenda sika ya Yesu.
30 Kasi ntangu yandi talaka ti kitembo vwandaka ngolo,
yandi kumaka na boma,
mpe mutindu yandi bandaka na kudyama,
yandi lookaka:
"Mfumu!
Vuukisa munu!"
31 Na mpamukunu,
Yesu lambulaka diboko,
mpe simbaka Pyele.
Yandi zabisaka Pyele:
"Nge kele na kiminu ya fyoti!
Samu na yinki nge me sala ntembe?"
32 Bawu nyonso zole kotaka na bwatu,
mpe kitembo manisaka.
33 Na yina,
bilandi yina vwandaka na kati ya bwatu fukamaka na ntwala ya Yesu,
mpe tubaka:
"Ya tsyelika,
nge kele Mwana ya Nzambi*."
Yesu belusaka bambevo na kizunga ya Ngenezaleti
34 Na manima ya kusabuka dyanga,
bawu kumaka na Ngenezaleti.
35 Ntangu bantu ya kizunga yina zabaka ti ya vwandaka Yesu,
bawu mwangisaka nsangu na kizunga nyonso.
Na yina,
bawu natinaka yandi bambevo nyonso.
36 Bantu vwandaka bondila yandi ti yandi bika bawu na kusimba ata nsongi ya kinkuti ya yandi,
mpe bayina nyonso vwandaka simba yawu vwandaka beluka.