Dyambu ya kinkulu ya bankoko
15
Ba-Falisye* mpe milongisi ya Misiku* yina katukaka na Yelusalemi kwendaka tala Yesu mpe yufulaka yandi:
2 "Samu na yinki bilandi* ya nge ke tumamaka ve na kinkulu ya bankoko ya beto?
Bawu ke sukulaka ve maboko ntete na kudya."
3 Yesu vutulaka:
"Kasi beno,
samu na yinki beno ke sadilaka kinkulu ya bankoko ya beno,
mpe ke tumamaka ve na musiku ya Nzambi?
4 Ya tsyelika,
Nzambi tubaka:
'Zitisa tata na mama ya nge',
mpe 'Ba fwana kufwa muntu yina ke finga tata to mama ya yandia.'
5 Kasi beno,
beno ke tubaka ti muntu lenda kutuba na tata to mama ya yandi:
'Bima yina mu zolaka pesa nge samu na kusadisa nge,
kele munkayulu yina mu ke pesa na Nzambi.'
6 Na kuzonza mutindu yina,
beno ke kangisaka muntu nzila na kuzitisa tata to mama ya yandi.
Beno ke manisaka Mambu ya Nzambi mfunu samu na kusadila kinkulu ya beno.
7 Beno kele bantu ya bantima zole!
Mumbikudi* Ezayi zabisaka mambu ya tsyelika ntangu yandi bikulaka samu na beno:
8 'Bantu yayi ke zitisaka munu kaka na bikoba ya bawu.
Kasi na bantima ya bawu,
bawu kele ntama na munu.
9 Bisambu ya bawu kele ya mpamba,
samu ti bandongosolo ya bawu kele kaka
misiku yina ke katukaka na bantub.' "
Mambu yina ke salaka ti muntu vwanda ve ya kuvedila
10 Yesu bokilaka nkonga ya bantu,
mpe tubaka:
"Beno kuwa,
mpe beno bakula mambu yayi:
11 Bima yina ke kotaka na yinwa ya muntu ke salaka ve ti muntu vwanda ve ya kuvedila*,
kasi ni nyonso yina ke basikaka na yinwa ya muntu."
12 Na yina,
bilandi* ya yandi kwizaka pene-pene ya yandi,
mpe zabisaka yandi:
"Nge zaba ve ti mambu yina nge me zonza me talisa ba-Falisye* ntima mpasi?"
13 Yesu vutulaka:
"Ba ke timuna konso yinti yina Tata ya munu yina kele na mazulu kunaka ve.
14 Beno bika bawu!
Bawu kele bampofo yina ke na kunata bampangi ya bawu bampofo.
Kana mpofo ke na kunata mpofo ya nkaka,
bawu nyonso zole ke kubwa na dibulu."
15 Pyele zabisaka Yesu:
"Tubila beto nsasa ya kingana yina."
16 Yesu vutulaka:
"Beno mpe,
beno ke ntete na mayela ve?
17 Beno zaba ve ti konso kima yina ke kotaka na yinwa ya muntu,
ke lutaka na kivumu,
mpe na manima ke basikaka na nzutu?
18 Kasi mambu yina ke basikaka na yinwa ya muntu,
ke katukaka na kati ya ntima,
mpe ni yawu ke salaka ti muntu vwanda ve ya kuvedila.
19 Ya tsyelika,
mabanza ya yimbi ke katukaka na kati ya ntima.
Ni yawu ke nataka bantu na kufwa bampangi,
kusala kinsuza,
kuzinga na kindumba,
kulaba,
kutuba bimbangi ya luvunu,
mpe kufinga bampangi.
20 Ni mambu yina ke salaka ti muntu vwanda ve ya kuvedila.
Kasi kudya ata kusukula maboko ke salaka ve ti muntu vwanda ve ya kuvedila."
Kento mosi ya nzenza kwikilaka Yesu
21 Yesu katukaka na kisika yina,
mpe kwendaka na kizunga ya mbanza Tile mpe Sidoni.
22 Kento mosi ya mbanza Kana vwandaka zinga na kizunga yina.
Yandi kwendaka sika ya Yesu,
mpe lookaka:
"Mfumu!
Mwana ya Davidi!
Tala munu kyadi!
Mpeve ya yimbi ke na kukwamisa mwana ya munu ya kento.
Ya ke na kutalisa yandi mpasi mingi."
23 Kasi Yesu vutulaka ata dyambu.
Bilandi* kwendaka pene-pene ya Yesu,
mpe tubaka:
"Vutula yandi.
Yandi ke na kubika ve na kulanda beto,
mpe na kulooka."
24 Yesu vutulaka:
"Nzambi fidisaka munu na sika ya bantu ya Isayeli yina kele mutindu mameme ya kuzimbana."
25 Kasi kento yina kwizaka fukama na ntwala ya Yesu,
mpe tubaka:
"Mfumu,
sadisa munu!"
26 Yesu vutulaka:
"Ya kele mbote ve na kubaka madya ya bana ya fyoti,
mpe kulosa yawu na bayimbwa."
27 Kento vutulaka:
"Mfumu,
ya kele ya tsyelika.
Kasi bayimbwa mpe ke kudyaka mwa bandambu ya madya yina ke kubwaka na yinsi ya mesa ya bamfumu ya bawu."
28 Na yina,
Yesu zabisaka yandi:
"Ee,
kento!
Kiminu ya nge kele nene!
Bika ti mambu yina nge ke na kulomba,
kusalama mutindu nge ke na kuzola."
Kaka na ntangu yina,
mwana ya yandi ya kento belukaka.
29 Yesu katukaka kuna,
mpe kwendaka na simu ya dyanga ya Ngalili.
Yandi yulukaka na mongo,
mpe vwandaka.
30 Bantu mingi kwizaka sika yandi vwandaka.
Bawu natinaka yandi bantu ya bifuuma na makulu,
bampofo,
bikata,
mababa,
mpe bambevo mingi ya nkaka.
Ba tulaka bawu na ntwala ya yandi,
mpe yandi belusaka bawu.
31 Bantu yitukaka mingi ntangu bawu talaka ti mababa me zonza,
bikata me tambula,
bantu ya bifuuma na makulu me beluka,
mpe bampofo me tala.
Na yina,
bawu kembisaka Nzambi ya Isayeli!
Yesu dikilaka bantu mafunda yiya
32 Yesu bokilaka bilandi* ya yandi,
mpe zabisaka bawu:
"Mu ke na kutala bantu yayi kyadi samu ti ya me kuma bilumbu tatu yina bawu kele na munu awa,
mpe bawu ke dyaka ve na kima ya kudya.
Mu zola ve ti bawu vutuka ata kudya kima samu ti bawu lenda kuvwanda ya kulemba na nzila ntangu bawu ke vutuka."
33 Bilandi vutulaka:
"Wapi sika beto lenda kuzwa madya ya kupesa bantu nyonso yayi na kisika yayi yina ke na kima ve?"
34 Yesu yufulaka bawu:
"Mampa yikwa ke na beno?"
Bawu vutulaka:
"Beto kele na mampa sambwadi na mwa bambisi ya fyoti."
35 Na yina,
yandi tumisaka bantu nyonso na kuvwanda na ntoto.
36 Yandi bakaka mampa sambwadi mpe bambisi.
Na manima ya kutonda Nzambi,
yandi bukunaka yawu mpe pesaka yawu na bilandi samu na kukabula yawu na bantu nyonso.
37 Bawu nyonso kudyaka mpe yukutaka.
Bilandi lokotaka mwa bandambu yina bikanaka,
mpe fulusaka bitunga sambwadi.
38 Lutangu ya bantu yina kudyaka vwandaka mafunda yiya ya babakala ata kubaka lutangu ya bakento mpe bana.
39 Na manima ya kuvutula bantu nyonso yina,
Yesu kotaka na bwatu,
mpe kwendaka na kizunga ya Mangada.