Dyambu ya kinkulu ya bankoko
7
Ba-Falisye* mpe mwa ndambu ya milongisi ya Misiku* katukaka na Yelusalemi mpe vukana na Yesu.
2 Bawu talaka ti bilandi* ya nkaka ya Yesu vwandaka kudya na maboko ya kuvedila* ve.
Ya zola kutuba ti ata kusukula maboko.
3 Ya tsyelika,
ba-Falisye mpe ba-Zwife nyonso ya nkaka ke zitisaka kinkulu ya bankoko ya bawu.
Ntete na kudya bawu ke sukulaka mbote maboko ya bawu.
4 Ntangu bawu ke katukaka na kisika yina bantu mingi ke yonzamaka,
bawu ke kudyaka ve kana bawu me yobila ntete ve.
Bawu ke zitisaka mpe misiku mingi ya nkaka ya kinkulu ya bawu mutindu:
kusukula mbote bambungu,
banzungu ya ntoto,
mpe bandonga ya bisengo.
5 Na yina,
ba-Falisye mpe milongisi ya Misiku yufulaka Yesu:
"Samu na yinki bilandi ya nge ke zitisaka ve kinkulu ya bankoko ya beto?
Bawu ke kudyaka na maboko ya kuvedila ve!"
6 Yesu vutulaka:
"Beno kele bantu ya bantima zole!
Ezayi tubaka mambu ya tsyelika ntangu yandi bikulaka samu na beno:
'Bantu yayi ke zitisaka munu kaka na bikoba ya bawu.
Kasi na bantima ya bawu,
bawu kele ntama na munu.
7 Bisambu ya bawu kele ya mpamba,
samu ti bandongosolo ya bawu kele kaka
misiku yina ke katukaka na bantua.' "
8 Yesu zabisaka dyaka bawu:
"Beno ke bikaka misiku ya Nzambi samu na kuzitisa kinkulu ya bantu."
9 Yesu zabisaka dyaka bawu:
"Beno mangaka musiku ya Nzambi samu na kuvwanda ya kukangama na kinkulu ya beno.
10 Ni Moyize tubaka:
'Zitisa tata na mama ya nge',
mpe 'Ba fwana kufwa muntu yina ke finga tata to mama ya yandib.'
11 Kasi beno,
beno ke tubaka ti muntu lenda kutuba na tata to mama ya yandi:
'Bima yina mu zolaka pesa nge samu na kusadisa nge,
kele Kobani' (ya zola kutuba:
munkayulu yina mu ke pesa na Nzambi).
12 Beno ke pesaka yandi muswa ya kusadisa dyaka ve tata to mama ya yandi.
13 Na mutindu yina,
beno ke manisaka Mambu ya Nzambi mfunu samu na kinkulu yina beno ke longisaka.
Beno ke salaka mpe mambu mingi ya mutindu yina."
Mambu yina ke salaka ti muntu vwanda ve ya kuvedila
14 Na manima,
Yesu bokilaka dyaka nkonga ya bantu,
mpe tubaka:
"Beno kuwa munu beno nyonso,
mpe beno bakula mambu yayi:
15 Ata kima ya ngaanda yina ke kotaka na nzutu ya muntu ke salaka ti yandi vwanda ve ya kuvedila*.
Kasi ni nyonso yina ke basikaka na nzutu ya muntu ke salaka ti yandi vwanda ve ya kuvedila. [
16 Kana muntu kele na makutu,
yandi kuwa.]"
17 Ntangu Yesu bikaka nkonga ya bantu,
mpe vutukaka na yinzo,
bilandi* ya yandi yufulaka yandi nsasa ya kingana yina.
18 Yesu tubaka:
"Beno mpe,
beno ke na mayela ve?
Beno zaba ve ti bima nyonso yina ke kotaka na nzutu ya muntu lenda kusumuna yandi ve?
19 Yawu ke kotaka ve na ntima ya muntu,
kasi na kivumu ya yandi.
Na manima,
yawu ke basikaka."
Na kutuba mutindu yina,
Yesu lakisaka ti madya nyonso kele ya kuvedila.
20 Yesu tubaka dyaka:
"Ni nyonso yina ke basikaka na nzutu ya muntu ke salaka ti muntu vwanda ve ya kuvedila.
21 Ya tsyelika,
ni na ntima ya muntu ke katukaka mabanza ya yimbi yina ke nataka muntu na kuzinga na kindumba,
na kulaba,
na kufwa bampangi,
22 na kusala kinsuza,
na kuvwanda na bansatu ya kubaka bima ya bampangi,
na kuvwanda na myangu,
na kuvuna bampangi,
na kuzinga kidi-kidi,
na kuvwanda na musoki,
na kuzonza yimbi ya bampangi,
na kuvwanda na lunangu,
mpe na kuvwanda na ntima ngolo.
23 Mambu nyonso yayi ya yimbi ke katukaka na ntima ya muntu,
mpe ke salaka ti muntu vwanda ve ya kuvedila."
Kento mosi ya nzenza kwikilaka Yesu
24 Yesu katukaka kuna,
mpe kwendaka na mbanza Tile.
Yandi kotaka na yinzo mosi,
mpe vwandaka zola ve ti bantu zaba ti yandi vwandaka kuna,
kasi yandi lembanaka na kubumbama.
25 Kaka na ntangu yina,
kento mosi yina mwana vwandaka na mpeve ya yimbi kuwaka nsangu ya Yesu.
Yandi kwendaka sika vwandaka Yesu,
mpe fukamaka na ntwala ya yandi.
26 Kento yango vwandaka ve Zwife.
Yandi butukaka na mbanza Finisi na kizunga ya Sili,
mpe lombaka Yesu na kubingisa mpeve ya yimbi yina vwandaka na mwana ya yandi ya kento.
27 Kasi Yesu zabisaka yandi:
"Bika bana kuyukuta ntete,
samu ti ya kele mbote ve na kubaka mampa ya bana ya fyoti samu na kupesa yawu na bayimbwa."
28 Kento vutulaka:
"Mfumu!
Ya kele ya tsyelika.
Kasi bayimbwa na yinsi ya mesa ke kudyaka bibuku ya mampa yina bana ke bwisaka!"
29 Na yina,
Yesu zabisaka yandi:
"Samu na mvutu yina nge me pesa,
nge lenda kuvutuka ya nge na yinzo.
Mpeve ya yimbi me basika na nzutu ya mwana ya nge."
30 Kento vutukaka na yinzo ya yandi,
mpe kutaka mwana ya yandi ya kuvumbuka na mfulu.
Yandi vwandaka dyaka ve na mpeve ya yimbi.
Yesu belusaka dibaba ya makutu ya kufwa
31 Na manima,
Yesu katukaka na mbanza Tile.
Yandi lutaka na mbanza Sidoni,
mpe vutukaka pene-pene na dyanga ya Ngalili na kulutila na kizunga ya Bambanza-Kumi.
32 Ba natinaka yandi muntu yina vwandaka na makutu ya kufwa,
mpe vwandaka zonza mbote ve.
Ba lombaka Yesu na kutentikila yandi maboko.
33 Na yina,
Yesu nataka yandi mwa ntama ya kisika yina vwandaka nkonga.
Yandi tulaka yandi misapi na makutu,
lobolaka mante na misapi,
mpe simbaka yandi ludimi.
34 Na manima,
Yesu talaka na zulu,
pemaka na ngolo nyonso,
mpe tubaka na muntu yina:
"Efata!"
(yina zola kutuba:
funguka).
35 Kaka na ntangu yina,
makutu ya muntu yango fungukaka,
ludimi ya yandi nyangukaka,
mpe yandi bandaka na kuzonza mbote.
36 Yesu yiminaka bawu na kutuba yawu na muntu.
Kasi mutindu yandi vwandaka lutila na kuyimina bawu,
bawu vwandaka lutila mpe na kumwangisa nsangu.
37 Bantu yitukaka mingi,
mpe vwandaka tuba:
"Mambu nyonso yina yandi ke salaka kele mbote!
Yandi ke na kufungula makutu ya bantu yina ke kuwaka ve,
mpe ke na kuzonzisa mababa."