Ndongosolo ya Za Mubotiki
3
Na ntangu yina,
Za Mubotiki bandaka na kulongisa na yinsi ya kuyuma na Zude.
2 Yandi vwandaka tuba:
"Beno soba nkadulu ya beno samu ti Kimfumu ya Mazulu* me kuma pene-pene."
3 Za kele muntu yina mumbikudi* Ezayi zonzilaka ntangu yandi tubaka:
"Ndinga ya muntu ke na kulooka na yinsi ya kuyuma:
Beno yidika nzila samu na Mfumu*,
mpe beno sungika banzila ya yandia."
4 Za vwandaka na kinkuti yina ba yidikaka na mika ya kibulu yina ba ke bokilaka samo*.
Yandi vwandaka mpe na singa ya luketo ya mpusu ya kibulu.
Yandi vwandaka kudya makonko mpe mafuta ya nyosi ya mfinda.
5 Bantu ya mbanza Yelusalemi,
ya kizunga nyonso ya Zude,
mpe ya kizunga nyonso ya nzadi ya Yodani vwandaka kwenda na sika ya yandi.
6 Bawu vwandaka fungula masumu ya bawu na ntwala ya bantu nyonso,
mpe Za vwandaka botika bawu na kati ya nzadi ya Yodani.
7 Za talaka ti ba-Falisye* mpe ba-Saduse* mingi vwandaka kwiza na sika ya yandi samu na kuzwa mbotokolo.
Na yina,
yandi zabisaka bawu:
"Dikanda ya bampidi!
Nani me zabisa beno ti beno lenda kukima lufundusu ya Nzambi yina me kuma pene-pene?
8 Beno lakisa mavanga yina ke na kulakisa ti beno me soba nkadulu ya beno.
9 Beno vwandaka kaka ve na mabanza yayi,
beno kele bana ya Abalami.
Ya tsyelika,
mu ke na kuzabisa beno,
Nzambi lenda kukitula matadi yayi samu ti yawu kuma bana ya Abalami!
10 Disoka kele yimeni ya kukubama samu na kuzenga bayinti sika kele myanzi ya yawu.
Ba ke zenga konso yinti yina ke butaka ve bambuma ya mbote,
mpe ba ke losa yawu na tiya.
11 "Mu ke na kubotika beno na maza samu na kulakisa ti beno me soba nkadulu.
Kasi muntu yina ke na kukwiza na manima ya munu,
me lutila munu ngolo.
Mu kele ve ya kulunga na kukatula yandi mapapa.
Ni yandi ke botika beno na Mpeve ya Longo mpe na tiya.
12 Yandi me simba kiyengoso na diboko samu na kukabula bambuma na matiti.
Yandi ke yonzika bambuma na kisika ba ke bumbaka yawu,
mpe ke yoka matiti na tiya yina ke kufwaka ve."
Mbotokolo ya Yesu
13 Ni na ntangu yina,
Yesu katukaka na Ngalili,
mpe kumaka na nzadi ya Yodani.
Yandi kwendaka na sika ya Za samu ti Za botika yandi.
14 Kasi Za vwandaka zola ve na kubotika Yesu.
Yandi tubaka na Yesu:
"Ni munu fwanaka kwiza na sika ya nge samu na kuzwa mbotokolo,
kasi ni nge me kwiza na sika ya munu!"
15 Yesu vutulaka:
"Ntangu yayi,
ndima yawu salama mutindu yina.
Ya tsyelika,
ni mutindu yayi beto fwana kusala mambu nyonso yina Nzambi ke lombaka."
Na yina,
Za ndimaka.
16 Ntangu Yesu botamaka,
yandi basikaka na maza.
Kaka na ntangu yina,
zulu zibukaka.
Yandi talaka Mpeve ya Nzambi yina kulumukaka mutindu dibembe,
mpe kwizaka tentama na yandi.
17 Ndinga wakanaka na mazulu mpe tubaka:
"Yandi yayi ni Mwana ya munu yina mu ke zolaka mingi.
Ni na yandi kele kilengi nyonso ya munu."