Yoꞌó kaꞌán a̱ xaꞌa̱ꞌ ña̱ sa̱ndoꞌoꞌ Ndiosí ne̱ xaaꞌ so̱ꞌo̱ nuu̱ꞌ a̱
65
Kaꞌán Yahvé ndii:
“Ne̱ nï̱ nda̱tuꞌu̱nꞌ xaꞌa̱ꞌ i̱ nduuꞌ ne̱ ni̱ na̱ndu̱kuꞌ yuꞌu̱,
te̱ ne̱ nï̱ na̱ndu̱kuꞌ yuꞌu̱ nduuꞌ ne̱ ni̱ xaꞌa̱n ku̱ni̱ miiꞌ yoo i̱.
Te̱ ne̱ köo̱ꞌ kivi̱ꞌ ni̱ kaꞌa̱n ndaꞌvi xiinꞌ i̱ nduuꞌ ne̱ ni̱ kaꞌa̱n i̱ xiinꞌ ndii:
Yoꞌoꞌ yoo i̱,
ni̱ katyi̱ i̱.
2 Ndu̱viꞌ ni̱ ka̱ta̱ni̱ nda̱ꞌaꞌ i̱ nuu̱ꞌ ndoꞌó,
ne̱ so̱ꞌo̱,
ndoꞌó ne̱ xäaꞌ ña̱ va̱ꞌa̱,
ne̱ xaaꞌ ña̱ kaꞌán nimá mi̱iꞌ.
3 Ndoꞌó ndii,
nuu̱ꞌ niꞌnuꞌ xa̱tyiꞌ i̱ te̱ satañaꞌa̱ꞌ tyito̱ ndo̱ꞌ yuꞌu̱,
te̱ nuu̱ꞌ niꞌnuꞌ tu̱ i̱ te̱ nasoko̱ꞌ ndo̱ꞌ ki̱tiꞌ nuu̱ꞌ i̱nga̱ ndiosí saka xaꞌa̱ꞌ ña̱ ta̱ta̱ ndo̱ꞌ.
Te̱ xaꞌmiꞌ tu̱ ndo̱ꞌ su̱xa̱ tyu̱ꞌma nuu̱ꞌ kiꞌinꞌ altar nuu̱ꞌ ndiosí saka ja̱a̱nꞌ.
4 Te̱ kuaꞌa̱n ndo̱ꞌ i̱tu̱n miiꞌ itaꞌ ñañaꞌ,
te̱ te̱i̱n ña̱ ja̱a̱nꞌ ndieeꞌ ndo̱ꞌ niiꞌ ñu̱u xakaꞌnuꞌ ndo̱ꞌ ne̱ ni̱ xiꞌi̱.
Xixiꞌ ndo̱ꞌ nde̱i̱ꞌ kini̱,
te̱ xaꞌa tu̱ ndo̱ꞌ ti̱a̱ꞌaꞌ ki̱tiꞌ,
tiꞌ täxiꞌ tu̱ꞌu̱n nde̱iꞌ i̱ ku̱xi̱ ndo̱ꞌ.
5 Ndisu̱ kaꞌán xiinꞌ taꞌanꞌ ndo̱ꞌ ndii:
Kü̱ya̱ti̱n ndikui ndo̱ꞌ nuu̱ꞌ ndu̱,
ko̱to̱ ka̱ i̱yo̱ sa̱ndeꞌi̱ ndo̱ꞌ nduꞌu̱.
Sa̱kanꞌ ña̱ ne̱ su̱ꞌu̱n ka̱ nduuꞌ nduꞌu̱ te̱ sa̱kanꞌ ndoꞌó,
katyi xiinꞌ taꞌanꞌ ndo̱ꞌ.
Ndisu̱ nuu̱ꞌ yuꞌu̱ ndii,
nduuꞌ ndo̱ꞌ nde̱e̱ naa ñuꞌma̱ xatu̱ va̱ ña̱ sanasaáꞌ yuꞌu̱ kii̱ꞌ koꞌniꞌ a̱ xiti̱nꞌ i̱,
te̱ nduuꞌ tu̱ ndo̱ꞌ nde̱e̱ naa ñuꞌu̱ ña̱ ndatin ndu̱viꞌ.
6 ’Ko̱to̱ ndo̱ꞌ,
xa̱ ni̱ na̱ko̱so̱ꞌ sa̱kuuꞌ ña̱ ni̱a̱ꞌa ña̱ xaaꞌ ndo̱ꞌ nuu̱ꞌ i̱,
köo̱ꞌ taxi̱nꞌ ka̱ yu̱ꞌuꞌ i̱.
Süu̱ꞌ ja̱a̱nꞌ ndii,
na̱ti̱i̱n ndo̱ꞌ ña̱ xataꞌa̱n xaꞌa̱ꞌ i̱ꞌi̱n ña̱ ja̱a̱nꞌ,
te̱ sa̱ndoꞌoꞌ tu̱ i̱ i̱ꞌi̱n ndo̱ꞌ xaꞌa̱ꞌ ña̱ xaaꞌ ndo̱ꞌ ja̱a̱nꞌ.
7 Sa̱a̱ i̱ sa̱kanꞌ xiinꞌ ndo̱ꞌ xaꞌa̱ꞌ ku̱a̱tyi̱ mi̱iꞌ ndo̱ꞌ xiinꞌ xaꞌa̱ꞌ ku̱a̱tyi̱ ne̱ xii̱ꞌ ya̱taꞌ ndo̱ꞌ xaꞌa̱ꞌ a̱ ña̱ ni̱ xa̱ꞌmi̱ ni̱a̱ su̱xa̱ tyu̱ꞌma xíniꞌ i̱kuꞌ naꞌnuꞌ nuu̱ ndiosí saka,
te̱ ni̱ sa̱ta̱ñaꞌa̱ꞌ tu̱ ni̱a̱ yuꞌu̱ xíniꞌ xiki̱ꞌ naꞌnuꞌ.
Xaꞌa̱ꞌ a̱ ja̱a̱nꞌ na kuiiꞌ ni̱ sa̱ndoꞌoꞌ ña̱ꞌaꞌ i̱ xaꞌa̱ꞌ sa̱kuuꞌ ña̱ ni̱a̱ꞌa ña̱ ni̱ xa̱a̱ ni̱a̱ nde̱e̱ xta̱ꞌanꞌ”,
katyi Tákuiꞌe Yahvé.
8 Ña̱ yo̱ꞌo̱ꞌ kaꞌán tu Yahvé:
“Sä̱ndo̱ñuꞌuꞌ i̱ sa̱kuuꞌ ndo̱ꞌ nde̱e̱ naa xaaꞌ ne̱ yivi̱ꞌ kii̱ꞌ naꞌiꞌ ni̱a̱ i̱i̱n yutu̱ uva ña̱ kuaꞌa̱ꞌ va̱ ti̱kui.
Te̱i̱n yo̱ꞌoꞌ uva ña̱ köo̱ꞌ a̱ ni̱ ku̱u̱n kuaꞌa̱ꞌ nda̱ꞌaꞌ kaꞌán ni̱a̱ ndii:
Kä̱ti̱a̱ ndo̱ꞌ sa̱kuuꞌ a̱,
sa̱kanꞌ ña̱ kaꞌni̱ sa̱va̱ ña̱ va̱ꞌa̱ te̱i̱n a̱,
katyi ni̱a̱.
Sa̱kanꞌ tu̱ yuꞌu̱ ndii,
sä̱ndo̱ñuꞌuꞌ tu̱ i̱ sa̱kuuꞌ ne̱ vi̱ꞌe̱ Israel,
sa̱kanꞌ ña̱ kaꞌni̱ sa̱va̱ ne̱ xikaꞌ nuuꞌ nuu̱ꞌ i̱ te̱i̱n ne̱ ja̱a̱nꞌ.
9 Sa̱kanꞌ na kuiiꞌ sa̱kakú i̱ tyaaꞌ ne̱ vi̱ꞌe̱ Israel xiinꞌ tyaaꞌ ne̱ vi̱ꞌe̱ Judá,
te̱ nda̱ꞌaꞌ ne̱ ja̱a̱nꞌ ndoo̱ sa̱kuuꞌ i̱kuꞌ ku̱ndu̱u̱ ña̱ꞌa̱ ni̱a̱.
Te̱ ne̱ ni̱ na̱ka̱xi̱n i̱ ja̱a̱nꞌ ku̱ndu̱u̱ ne̱ xiinꞌ ña̱ꞌa̱ ñu̱ꞌuꞌ ja̱a̱nꞌ,
te̱ xa̱ nuu̱ꞌ ña̱ ja̱a̱nꞌ ndoo̱ ne̱ xikaꞌ nuuꞌ nuu̱ꞌ i̱ ku̱ndi̱e̱e̱ ni̱a̱.
10 Yo̱soꞌ ña̱ naniꞌ Sarón ku̱ndu̱u̱ miiꞌ ku̱ndi̱e̱e̱ mbe̱e̱ sana̱ ne̱ nduuꞌ ne̱ nandukuꞌ yuꞌu̱,
te̱ yo̱soꞌ ña̱ naniꞌ Acor ku̱ndu̱u̱ miiꞌ ka̱xi̱ꞌ riꞌ kuꞌu̱ sa̱a̱ ni̱a̱.
11 ’Ndisu̱ ndoꞌó,
ne̱ ni̱ na̱ko̱o̱ yuꞌu̱,
Yahvé,
xata̱ꞌ ndo̱ꞌ,
te̱ ni̱ na̱ndoso̱ꞌ tu̱ ndo̱ꞌ xaꞌa̱ꞌ i̱kuꞌ su̱ꞌu̱n ña̱ nduuꞌ kuenta i̱,
te̱ ni̱ na̱soko̱ꞌ ndo̱ꞌ ña̱ xaxi̱ꞌ xiinꞌ vino nuu̱ꞌ ndiosí ña̱ taxiꞌ ña̱ vikaꞌ,
katyi mi̱iꞌ ndo̱ꞌ,
te̱ vino teꞌ ni̱ na̱saka̱ ndo̱ꞌ ni̱ na̱soko̱ꞌ ndo̱ꞌ nuu̱ꞌ ndiosí ña̱ kaꞌán ndee ña̱ ku̱ndo̱ꞌo̱ ndo̱ꞌ nuu̱ꞌ kuꞌu̱n e̱ꞌ,
12 xaꞌa̱ꞌ a̱ ja̱a̱nꞌ na kuiiꞌ sa̱kanꞌ tu̱ yuꞌu̱ ndii,
kaꞌa̱n tuní ña̱ ka̱ꞌni̱ꞌ te̱ yivi̱ꞌ ndoꞌó xiinꞌ ityi̱ nuu̱ꞌ kuꞌu̱n e̱ꞌ.
Te̱ sa̱kuuꞌ ndo̱ꞌ ku̱i̱ta̱ xitiꞌ nuu̱ꞌ te̱ yivi̱ꞌ te̱ ka̱ndoso̱ꞌ ra̱ suku̱nꞌ ndo̱ꞌ.
Sa̱kanꞌ ña̱ ni̱ ka̱na̱ i̱ ndoꞌó,
ndisu̱ nï̱ na̱ku̱i̱i̱n ndo̱ꞌ,
ni̱ kaꞌa̱n i̱ xiinꞌ ndo̱ꞌ ndisu̱ nï̱ ta̱xi̱ so̱ꞌo̱ ndo̱ꞌ.
Süu̱ꞌ ja̱a̱nꞌ mi̱iꞌ ndiꞌiꞌ ña̱ ni̱a̱ꞌa ni̱ xa̱a̱ ndo̱ꞌ nuu̱ꞌ i̱,
te̱ ni̱ na̱ka̱xi̱n ndo̱ꞌ ña̱ xiní ndo̱ꞌ ndii,
ña̱ xtäni̱ yuꞌu̱ ni̱ xa̱a̱ ndo̱ꞌ”,
ni̱ katyi̱ a̱.
13 Xaꞌa̱ꞌ a̱ ja̱a̱nꞌ na kuiiꞌ ña̱ yo̱ꞌo̱ꞌ kaꞌán Tákuiꞌe Yahvé ndii:
“Ko̱to̱ ndo̱ꞌ,
ne̱ nduuꞌ kuenta i̱ ndii,
ko̱o̱ ña̱ ka̱xi̱ꞌ ni̱a̱,
ndisu̱ ndoꞌó ndii,
ku̱xiꞌi̱ va̱ ndo̱ꞌ so̱ko̱.
Ne̱ xikaꞌ nuuꞌ nuu̱ꞌ i̱ ndii,
ko̱o̱ ti̱kui ko̱ꞌo̱ ni̱a̱,
ndisu̱ ndoꞌó ndii,
ityi̱ va̱ ndo̱ꞌ ti̱kui.
Ko̱to̱ ndo̱ꞌ,
ne̱ xikaꞌ nuuꞌ nuu̱ꞌ i̱ ndii,
va̱ꞌa̱ va̱ ku̱ni̱ ni̱a̱,
ndisu̱ ndoꞌó ndii,
ku̱ka̱ꞌa̱n va̱ nuu̱ꞌ ndo̱ꞌ.
14 Ne̱ xikaꞌ nuuꞌ nuu̱ꞌ i̱ ndii,
va̱ꞌa̱ kuni ni̱a̱ ka̱ta̱ ni̱a̱ ya̱a̱ nuu̱ꞌ i̱,
ndisu̱ ndoꞌó ndii,
ku̱a̱aꞌ tiꞌeꞌ ndo̱ꞌ xaꞌa̱ꞌ a̱ ña̱ uꞌvi̱ xini nimá ndo̱ꞌ,
te̱ ku̱a̱ku̱ sutyiꞌ i̱ni̱ va̱ ndo̱ꞌ.
15 Kivi̱ꞌ ndoꞌó ndii,
ku̱ndu̱u̱ a̱ ña̱ ti̱i̱n ndi̱a̱a̱ ne̱ ni̱ na̱ka̱xi̱n i̱ sa̱na̱tyaꞌanꞌ ni̱a̱ ne̱ ndasiꞌ taꞌanꞌ xiinꞌ ni̱a̱.
Te̱ mi̱iꞌ yuꞌu̱,
Tákuiꞌe Yahvé,
ka̱ꞌni̱ꞌ sa̱kuuꞌ ndoꞌó,
ndisu̱ ne̱ xikaꞌ nuuꞌ nuu̱ꞌ i̱ ja̱a̱nꞌ ndii,
ta̱xi̱ i̱ i̱nga̱ kivi̱ꞌ xa̱aꞌ nda̱ꞌaꞌ ni̱a̱.
16 Yo̱o̱ ka̱ kuni sa̱ñuꞌuꞌ xiinꞌ miiꞌ nuu̱ꞌ ñu̱ꞌuꞌ i̱i̱n yivi̱ꞌ ndii,
na kaka̱n ni̱a̱ ña̱ ja̱a̱nꞌ nuu̱ꞌ yuꞌu̱ Ndiosí,
ña̱ xatyuunꞌ nda̱ku.
Te̱ yo̱o̱ kuni ta̱xi̱ kuento ni̱a̱ ndii,
kivi̱ꞌ yuꞌu̱,
Ndiosí,
ña̱ xatyuunꞌ nda̱ku,
kuní a̱ ti̱i̱n ndi̱a̱a̱ ni̱a̱ kii̱ꞌ sa̱a̱ ni̱a̱ ña̱ ja̱a̱nꞌ.
Sa̱kanꞌ ña̱ ña̱ ni̱ ndo̱ꞌo̱ nimá ni̱a̱ xta̱ꞌanꞌ ndii,
na̱ndoso̱ꞌ ni̱a̱ xaꞌa̱ꞌ ña̱ ja̱a̱nꞌ,
te̱ na̱ndoso̱ꞌ tu̱ ni̱a̱ xaꞌa̱ꞌ sa̱kuuꞌ a̱.
Yoꞌoꞌ kaꞌán Yahvé xaꞌa̱ꞌ ndi̱viꞌ xa̱aꞌ xiinꞌ ñu̱ꞌuꞌ xa̱aꞌ
17 ’Ko̱to̱ ndo̱ꞌ,
ka̱sa̱ꞌa̱ i̱ i̱i̱n ndi̱viꞌ xa̱aꞌ,
te̱ ka̱sa̱ꞌa̱ tu̱ i̱ i̱i̱n ñu̱ꞌuꞌ i̱i̱n yivi̱ꞌ xa̱aꞌ.
Te̱ sa̱kuuꞌ ña̱ ni̱ yoo̱ xta̱ꞌanꞌ ndii,
köo̱ꞌ na̱ka̱ꞌanꞌ xa̱tyiꞌ ka̱ xaꞌa̱ꞌ a̱,
te̱ ni̱ nde̱e̱ köo̱ꞌ na̱ka̱ni̱ni̱ ka̱ tu̱ xaꞌa̱ꞌ ña̱ ja̱a̱nꞌ.
18 Sa̱kanꞌ na kuiiꞌ na̱ku̱a̱tiaꞌ ndo̱ꞌ,
te̱ sii̱ꞌ tu̱ ku̱ni̱ ndo̱ꞌ xaꞌa̱ꞌ sa̱kuuꞌ ña̱ ka̱sa̱ꞌa̱ i̱ ja̱a̱nꞌ.
Sa̱kanꞌ ña̱ ko̱to̱ ndo̱ꞌ,
xa̱ ku̱a̱xi̱ i̱ xiinꞌ ña̱ ku̱ndi̱e̱e̱ sii̱ꞌ ne̱ ñu̱u̱ Jerusalén,
te̱ na̱ku̱a̱tiaꞌ nimá sa̱kuuꞌ ne̱ ñu̱u̱ ja̱a̱nꞌ sa̱a̱ i̱.
19 Na̱ku̱a̱tiaꞌ va̱ nimá i̱ xaꞌa̱ꞌ ne̱ ndieeꞌ ñu̱u̱ Jerusalén,
te̱ va̱ꞌa̱ tu̱ kuni i̱ xini i̱ ne̱ nduuꞌ kuenta i̱ kaa̱ꞌ.
Te̱ köo̱ꞌ kivi̱ꞌ ka̱ ku̱ni̱ so̱ꞌo̱ ne̱ yivi̱ꞌ ku̱a̱ku̱ ne̱ kaa̱ꞌ ni̱ nde̱e̱ kü̱ni̱ so̱ꞌo̱ ka̱ tu̱ ni̱a̱ ña̱ kaꞌán ndaꞌvi ne̱ kaa̱ꞌ xaꞌa̱ꞌ ni̱a̱.
20 ’Köo̱ꞌ kivi̱ꞌ ka̱ ku̱vi̱ ne̱ kuañuꞌu̱,
ne̱ saka̱nꞌ ni̱ tuvi̱.
Ni̱ nde̱e̱ kü̱vi̱ tu̱ ne̱ xi̱xa̱,
ne̱ tiäꞌa̱an xinuꞌ kuiya̱ ña̱ xikaꞌ ni̱a̱ i̱i̱n yivi̱ꞌ.
Sa̱kanꞌ tu̱ ne̱ xi̱xa̱ ndii,
siento kuiya̱ ku̱ti̱a̱ku̱ ni̱a̱ te̱ ku̱vi̱ ni̱a̱.
Te̱ ne̱ xaaꞌ ku̱a̱tyi̱ ndii,
ni̱ nde̱e̱ siento kuiya̱ kü̱ti̱a̱ku̱ ne̱ ja̱a̱nꞌ te̱ ku̱vi̱ ni̱a̱ xaꞌa̱ꞌ a̱ ña̱ sa̱na̱tyaꞌanꞌ ña̱ꞌaꞌ yuꞌu̱.
21 Ka̱sa̱ꞌa̱ ni̱a̱ vi̱ꞌe̱ te̱ mi̱iꞌ ni̱a̱ ku̱ndi̱e̱e̱ ti̱xi̱n a̱,
te̱ tyi̱ꞌi̱ ni̱a̱ yo̱ꞌoꞌ uva̱ te̱ ka̱xi̱ꞌ mi̱iꞌ ni̱a̱ nduu̱ꞌ a̱.
22 Köo̱ꞌ kivi̱ꞌ ka̱sa̱ꞌa̱ ka̱ ni̱a̱ vi̱ꞌe̱ te̱ ku̱ndi̱e̱e̱ i̱nga̱ ne̱ yivi̱ꞌ,
ni̱ nde̱e̱ tyï̱ꞌi̱ ka̱ tu̱ ni̱a̱ yo̱ꞌoꞌ uva te̱ ka̱xi̱ꞌ i̱nga̱ ne̱ yivi̱ꞌ nduu̱ꞌ a̱.
Sa̱kanꞌ ña̱ sa̱a̱ niiꞌ kuaꞌa̱ꞌ kivi̱ꞌ tiaku tunꞌ ta̱ta̱ ndii,
niiꞌ sa̱kanꞌ tu̱ kuaꞌa̱ꞌ kivi̱ꞌ ku̱ti̱a̱ku̱ ne̱ nduuꞌ kuenta i̱ ja̱a̱nꞌ.
Te̱ sa̱kuuꞌ ne̱ ni̱ na̱ka̱xi̱n i̱ ndii,
xi̱ñuꞌuꞌ mi̱iꞌ ni̱a̱ sa̱kuuꞌ ña̱ va̱ꞌa̱ ña̱ kumiꞌ ni̱a̱.
23 Sätyuunꞌ saka ka̱ ni̱a̱,
te̱ siꞌe̱ ni̱a̱ ndii,
köo̱ꞌ kivi̱ꞌ na̱tya̱ꞌa̱n ni̱a̱.
Sa̱kanꞌ ña̱ ne̱ si̱a̱niꞌ xikaꞌ ne̱ ni̱ sa̱ñuꞌuꞌ va̱ yuꞌu̱,
Yahvé,
nduuꞌ ni̱a̱,
te̱ sa̱kanꞌ tu̱ sa̱ñuꞌuꞌ a̱ sa̱kuuꞌ si̱a̱niꞌ mi̱iꞌ ni̱a̱.
24 Nde̱e̱ ña̱ kuní ka̱ ka̱na̱ ni̱a̱ yuꞌu̱,
te̱ na̱ku̱i̱i̱n i̱ ña̱ kaꞌán ni̱a̱ xiinꞌ i̱.
Te̱ kii̱ꞌ kusaaꞌ kaꞌán ka̱ ni̱a̱ xiinꞌ i̱,
te̱ xa̱ ni̱ xi̱ni̱ so̱ꞌo̱ i̱ ña̱ kaꞌán ni̱a̱ xiinꞌ i̱ ja̱a̱nꞌ.
25 Naya̱ꞌ i̱kuꞌ xiinꞌ mbe̱e̱ ndii,
ka̱xi̱ꞌ ingaꞌ riꞌ kuꞌu̱.
Te̱ lion ndii,
kuꞌu̱ ka̱xi̱ꞌ riꞌ nde̱e̱ naa xaaꞌ si̱ndiki̱ꞌ.
Te̱ koo̱ꞌ ndii,
ya̱kaꞌ ku̱i̱ti̱ꞌ ku̱ndu̱u̱ ña̱ ka̱xi̱ꞌ tiꞌ ja̱a̱nꞌ.
Te̱ nde̱e̱ i̱i̱n ne̱ yivi̱ꞌ,
ne̱ ndieeꞌ xíniꞌ i̱kuꞌ su̱ꞌu̱n,
ña̱ nduuꞌ kuenta i̱,
kü̱ndo̱ꞌo̱,
ni̱ nde̱e̱ köo̱ꞌ tu̱ ña̱ ni̱a̱ꞌa i̱kanꞌ”,
ni̱ katyi̱ Yahvé.