64
Xa̱ va̱ꞌa̱ na sa̱kanꞌ te̱ ku̱a̱tyi̱ ndo̱o̱ ndi̱viꞌ miiꞌ nduꞌu̱ꞌ u̱nꞌ,
te̱ nu̱u̱ u̱nꞌ miiꞌ ndieeꞌ ndu̱,
te̱ ta̱a̱n sa̱kuuꞌ i̱kuꞌ naꞌnuꞌ kii̱ꞌ ki̱xi̱n u̱nꞌ.
2 Nde̱e̱ naa xaaꞌ ñuꞌu̱ xaꞌmiꞌ a̱ tu̱tunꞌ,
te̱ sakuisó tu̱ a̱ ti̱kui ndii,
niiꞌ sa̱kanꞌ tu̱ sa̱a̱ a̱ kii̱ꞌ ki̱xi̱n u̱nꞌ,
te̱ ku̱yi̱ꞌvi xa̱va̱ꞌa̱ sa̱kuuꞌ ne̱ tukuꞌ,
te̱ ku̱nda̱ni̱ tu̱ sa̱kuuꞌ ne̱ ndasiꞌ taꞌanꞌ xiinꞌ u̱nꞌ ndee xaꞌa̱ꞌ nduuꞌ a̱ na kuiiꞌ kaꞌán va̱ꞌa̱ ne̱ yivi̱ꞌ xaꞌa̱ꞌ u̱nꞌ.
3 Kii̱ꞌ ni̱ ki̱xi̱n u̱nꞌ xíniꞌ i̱kuꞌ xta̱ꞌanꞌ ndii,
ni̱ xa̱a̱ u̱nꞌ kuaꞌa̱ꞌ tyu̱u̱n kaꞌnuꞌ ña̱ köo̱ꞌ kivi̱ꞌ ni̱ xa̱ni̱ni̱ nduꞌu̱ꞌ xaꞌa̱ꞌ naaꞌ ko̱o̱ a̱.
Kii̱ꞌ ni̱ nu̱u̱ u̱nꞌ i̱kanꞌ ndii,
ni̱ ka̱nda̱ sa̱kuuꞌ i̱kuꞌ naꞌnuꞌ kii̱ꞌ ni̱ xi̱ni̱ a̱ yoꞌó.
4 Nde̱e̱ i̱i̱n kivi̱ꞌ köo̱ꞌ ni̱ xi̱ni̱ so̱ꞌo̱,
ni̱ nde̱e̱ nï̱ xi̱ni̱ tu̱ ni̱a̱ kuento,
ni̱ nde̱e̱ nï̱ xi̱ni̱ tu̱ ni̱a̱ xiinꞌ ndu̱tyiꞌ nuu̱ꞌ ni̱a̱ nde̱e̱ i̱i̱n ndiosí nde̱e̱ naa yoꞌó ña̱ xaaꞌ tyu̱u̱n kaꞌnuꞌ ja̱a̱nꞌ xaꞌa̱ꞌ ne̱ i̱ni̱ xini ña̱ꞌaꞌ.
5 Ku̱a̱xi̱ u̱nꞌ te̱ tyindieeꞌ u̱nꞌ sa̱kuuꞌ ne̱ va̱ꞌa̱ kuni te̱ xatyuunꞌ nda̱ku ni̱a̱,
te̱ nakaꞌanꞌ tu̱ ni̱a̱ xaꞌa̱ꞌ u̱nꞌ kii̱ꞌ xaaꞌ ni̱a̱ ndiaa ka̱ ña̱ꞌa̱.
Ndisu̱ ni̱ xiꞌe̱ xa̱va̱ꞌa̱ u̱nꞌ xini u̱nꞌ nduꞌu̱ꞌ ko̱to̱ ka̱ ni̱ xa̱a̱ ndu̱ ku̱a̱tyi̱.
Te̱ kuaꞌa̱ꞌ va̱ kivi̱ꞌ ni̱ xika̱ ndu̱ xaaꞌ ndu̱ ku̱a̱tyi̱ ja̱a̱nꞌ.
Xaꞌa̱ꞌ a̱ ja̱a̱nꞌ na kuiiꞌ,
¿sa̱a̱ ku̱vi̱ kaku̱ na̱ ndu̱ sa̱a̱ u̱nꞌ?
6 Sa̱kuuꞌ ndu̱ ndii,
ni̱ sa̱tíviꞌ ndooꞌ ku̱a̱tyi̱ nduꞌu̱ꞌ,
te̱ sa̱kuuꞌ ña̱ xatyuunꞌ nda̱ku ndu̱ nuu̱ꞌ mi̱iꞌ ndu̱ ndii,
nduuꞌ a̱ nde̱e̱ naa toto̱ ña̱ ndeꞌi̱ xa̱va̱ꞌa̱.
Te̱ sa̱kuuꞌ ndu̱ koyó nde̱e̱ naa yuku̱ i̱tyi,
te̱ ña̱ ni̱a̱ꞌa ña̱ xaaꞌ ndu̱ ni̱ na̱tyiꞌi̱ꞌ a̱ sa̱kuuꞌ ndu̱ nde̱e̱ naa xaaꞌ tatyi̱ꞌ.
7 Nde̱e̱ i̱i̱n ndu̱ kuäsa̱ꞌ ka̱ kaꞌán ndaꞌvi xiinꞌ u̱nꞌ,
ni̱ nde̱e̱ kuäsa̱ꞌ ka̱ tu̱ ndiꞌni̱ ndu̱ na̱ndu̱kuꞌ ndu̱ yoꞌó ku̱ndu̱u̱ kuei̱ ndu̱ kii̱ꞌ ndotoꞌ ndu̱.
Xaꞌa̱ꞌ a̱ ja̱a̱nꞌ na kuiiꞌ ni̱ na̱ko̱o̱ u̱nꞌ ndu̱ xata̱ꞌ u̱nꞌ,
te̱ xaꞌa̱ꞌ ña̱ ni̱a̱ꞌa ña̱ xaaꞌ ndu̱ na kuiiꞌ ni̱ na̱ko̱o̱ u̱nꞌ ndu̱ xaaꞌ ndu̱ ña̱ kuní mi̱iꞌ ndu̱.
8 Yahvé,
nde̱e̱ sa̱a̱ ka̱ ni̱ ndii,
yoꞌó nduuꞌ yu̱vaꞌ ndu̱,
te̱ nduꞌu̱ ndii,
nduuꞌ ndu̱ nde̱e̱ naa ñu̱ꞌuꞌ kixinꞌ ku̱i̱ti̱ꞌ nuu̱ꞌ yoꞌó.
Te̱ yoꞌó nduuꞌ ña̱ ni̱ xa̱ꞌa̱ sa̱kuuꞌ ndu̱,
sa̱kanꞌ na kuiiꞌ sa̱kuuꞌ ndu̱ ndii,
xiinꞌ nda̱ꞌaꞌ mi̱iꞌ u̱nꞌ ni̱ xa̱ꞌa̱ u̱nꞌ ndu̱.
9 Tákuiꞌe Yahvé,
sa̱a̱ u̱nꞌ ña̱ va̱ꞌa̱ te̱ nä̱saa̱ꞌ xa̱va̱ꞌa̱ u̱nꞌ ku̱ni̱ u̱nꞌ ndu̱.
Te̱ sa̱a̱ tu̱ u̱nꞌ ña̱ va̱ꞌa̱ te̱ nä̱ka̱ꞌanꞌ xa̱tyiꞌ ka̱ tu̱ u̱nꞌ xaꞌa̱ꞌ ña̱ ni̱a̱ꞌa ña̱ ni̱ xa̱a̱ ndu̱.
Ko̱to̱ u̱nꞌ vi̱ti̱n ndii,
sa̱kuuꞌ ndu̱ nduuꞌ kuenta u̱nꞌ.
10 Sa̱kuuꞌ ñu̱u̱ su̱ꞌu̱n ña̱ nduuꞌ kuenta u̱nꞌ ndii,
ni̱ nduxi̱n ndo̱o̱ a̱.
Ñu̱u̱ Sión ndii,
nde̱e̱ naa miiꞌ i̱tyi kaaꞌ xa̱tyiꞌ ni̱ na̱ndu̱u̱ a̱.
Uun ndo̱ꞌ,
ñu̱u̱ Jerusalén ndii,
xa̱ ni̱ nduxi̱n xa̱tyiꞌ a̱.
11 Te̱ yu̱kunꞌ su̱ꞌu̱n nda̱tu̱nꞌ miiꞌ ni̱ xa̱kaꞌnuꞌ te̱ xii̱ꞌ ya̱taꞌ ndu̱ yoꞌó ndii,
ni̱ xa̱ꞌmi̱ ndo̱o̱ te̱ yivi̱ꞌ a̱.
Te̱ sa̱kuuꞌ ña̱ ndiaa yaꞌviꞌ ña̱ ni̱ ku̱miꞌ ndu̱ ndii,
ndi̱ꞌi̱ a̱ ni̱ nduxi̱n.
12 Tákuiꞌe Yahvé,
te̱ vi̱ti̱n ña̱ ni̱ xi̱ni̱ u̱nꞌ sa̱kuuꞌ ña̱ ni̱ ndo̱ꞌo̱ ndu̱ ndii,
sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ u̱nꞌ ndu̱,
te̱ kö̱o̱ꞌ taxi̱nꞌ ka̱ u̱nꞌ,
ni̱ nde̱e̱ sä̱ndoꞌoꞌ ka̱ tu̱ u̱nꞌ ndu̱.