Yoꞌoꞌ ku̱a̱xi̱ ña̱ xini tuní ña̱ ni̱ ke̱ꞌi̱ Salomón
Yoꞌoꞌ kaꞌán a̱ xaꞌa̱ꞌ ndee ña̱ kuni katyi̱ ña̱ saniaꞌá tu̱tu̱ yoꞌoꞌ
1
Ña̱ yo̱ꞌo̱ꞌ nduuꞌ ña̱ xini tuní ña̱ kaꞌa̱n yuꞌu̱,
Salomón,
te̱ nduuꞌ rey nuu̱ꞌ ne̱ vi̱ꞌe̱ Israel,
te̱ siꞌe̱ David nduuꞌ i̱.
2 Kaꞌa̱n i̱ ña̱ yo̱ꞌo̱ꞌ te̱ sa̱niaꞌá i̱ yooꞌ xaꞌa̱ꞌ ña̱ xini tuní xiinꞌ xaꞌa̱ꞌ ña̱ kutu̱nꞌ e̱ꞌ sa̱a̱ Ndiosí,
te̱ sa̱xinu̱ e̱ꞌ ña̱ kaꞌa̱n a̱,
te̱ tyi̱ndi̱e̱eꞌ a̱ yooꞌ te̱ ku̱u̱ kaxiꞌ e̱ꞌ.
3 Te̱ na̱ti̱i̱n e̱ꞌ nde̱iꞌ ña̱ ku̱u̱ kaxiꞌ e̱ꞌ,
te̱ sa̱tyuunꞌ nda̱ku tu̱ e̱ꞌ,
te̱ ku̱naa̱ va̱ꞌa̱ tu̱ i̱ni̱ e̱ꞌ,
te̱ i̱i̱n katyi tu̱ ku̱u̱ e̱ꞌ xiinꞌ ne̱ yivi̱ꞌ.
4 Te̱ ña̱ kaꞌa̱n i̱ ja̱a̱nꞌ ta̱xi̱ ña̱ ku̱ndityi ne̱ na̱a̱ꞌ kuuꞌ,
te̱ ta̱xi̱ a̱ ña̱ ku̱ndityi ne̱ sa̱va̱,
te̱ ta̱xi̱ tu̱ a̱ ña̱ ku̱vi̱ ku̱nda̱ni̱ ni̱a̱ ña̱ va̱ꞌa̱ ka̱ sa̱a̱ ni̱a̱.
5 Na ku̱ni̱ so̱ꞌo̱ te̱ xini tuní ña̱ yo̱ꞌo̱ꞌ,
te̱ so̱ꞌo̱ ku̱u̱ xini tuní ka̱ ra̱,
te̱ na ku̱ni̱ so̱ꞌo̱ tu̱ ña̱ꞌaꞌ te̱ ndityi,
te̱ so̱ꞌo̱ ku̱u̱ ndityi ka̱ ra̱ sa̱a̱ a̱,
6 te̱ ku̱nda̱ni̱ ra̱ ndee ña̱ kaꞌán ña̱ xini tuní xiinꞌ ña̱ kaꞌán ndi̱a̱a̱ ña̱ kaꞌa̱n i̱ yoꞌoꞌ,
ña̱ nduu ña̱ kaꞌán te̱ xini tuní xiinꞌ ña̱ vixi ña̱ yoo si̱ꞌe,
ña̱ kaꞌán ra̱.
7 Xaꞌndu̱ ña̱ xini tuní ndii,
ña̱ kiꞌinꞌ kaꞌnuꞌ e̱ꞌ Yahvé nduuꞌ a̱,
ndisu̱ te̱ küuꞌ kaxiꞌ ndii,
nätiinꞌ ra̱ ña̱ xini tuní,
te̱ nätiinꞌ tu̱ ra̱ ña̱ kutu̱nꞌ ra̱ te̱ ku̱nda̱ni̱ va̱ꞌa̱ ra̱ ña̱ ja̱a̱nꞌ.
Yoꞌoꞌ kaꞌán a̱ xaꞌa̱ꞌ sa̱a̱ tyindieeꞌ ña̱ ndiaa yu̱ꞌuꞌ i̱i̱n yu̱vaꞌ siꞌe̱ ra̱
8 Yu̱vaꞌ kuaꞌa i̱,
ku̱ni̱ so̱ꞌo̱ u̱nꞌ nde̱iꞌ ña̱ kaꞌán yu̱vaꞌ u̱nꞌ xiinꞌ u̱nꞌ,
te̱ sä̱xi̱o̱o̱ xiinꞌ mi̱iꞌ u̱nꞌ nuu̱ꞌ ña̱ saniaꞌá si̱ꞌiꞌ u̱nꞌ yoꞌó.
9 Sa̱kanꞌ ña̱ ku̱ndu̱u̱ ña̱ ja̱a̱nꞌ nde̱e̱ naa i̱i̱n corona nda̱tu̱nꞌ va̱ ña̱ ku̱nduꞌu̱ꞌ xíniꞌ u̱nꞌ,
te̱ ku̱ndu̱u̱ tu̱ a̱ nde̱e̱ naa siki̱ nda̱tu̱nꞌ va̱ ña̱ ku̱ꞌu̱n suku̱nꞌ u̱nꞌ.
10 Yu̱vaꞌ kuaꞌa i̱,
naaꞌ kuni ku̱ni̱ xaꞌanꞌ i̱i̱n ti̱ꞌvi̱,
te̱ xaaꞌ ña̱ ni̱a̱ꞌa yoꞌó ndii,
kä̱ndi̱xaꞌ u̱nꞌ ña̱ kaꞌán ra̱.
11 Naaꞌ kaꞌa̱n sa̱kuuꞌ ra̱ xiinꞌ u̱nꞌ ndii:
“Ni̱a̱ꞌa̱ xiinꞌ ndu̱,
te̱ ti̱si̱ꞌe e̱ꞌ xaꞌa̱ꞌ kuꞌu̱,
te̱ ndiatuꞌ e̱ꞌ xkaꞌndi̱a̱ i̱i̱n te̱ yivi̱ꞌ,
te̱ köo̱ꞌ ku̱a̱tyi̱,
te̱ ka̱ꞌni̱ꞌ ndii̱ꞌ ña̱ꞌaꞌ e̱ꞌ.
12 Ko̱koꞌ tiaku e̱ꞌ ne̱ yivi̱ꞌ nde̱e̱ naa xaaꞌ yavi̱ ndi̱i̱,
te̱ ko̱koꞌ niiꞌ ña̱ꞌaꞌ e̱ꞌ nde̱e̱ naa xaaꞌ xitu̱n.
13 Ka̱ni̱ni̱ u̱nꞌ xaꞌa̱ꞌ sa̱a̱ vi̱ꞌ kuaꞌa̱ꞌ ña̱ vikaꞌ ku̱vi̱ ka̱nandoo e̱ꞌ,
sa̱kutuꞌ vi̱ꞌ e̱ꞌ vi̱ꞌe̱ e̱ꞌ xiinꞌ ña̱ꞌa̱ ña̱ ne̱ꞌi̱ kuiꞌnaꞌ e̱ꞌ.
14 Ni̱a̱ꞌa̱ te̱ ka̱ti̱n u̱nꞌ xiinꞌ ndu̱,
te̱ i̱i̱n katyi kuuꞌ xu̱ꞌunꞌ na̱ta̱ꞌviꞌ e̱ꞌ na̱ꞌi̱ sa̱kuuꞌ e̱ꞌ”,
katyi̱ ra̱.
15 Yu̱vaꞌ kuaꞌa i̱,
kä̱ka̱ u̱nꞌ i̱tyiꞌ ña̱ xikaꞌ te̱ ja̱a̱nꞌ.
Va̱ꞌa̱ ka̱ ku̱xi̱o̱o̱ u̱nꞌ nuu̱ꞌ i̱tyiꞌ ña̱ xikaꞌ te̱ ja̱a̱nꞌ.
16 Te̱ ja̱a̱nꞌ ndii,
numi̱ꞌ va̱ kuaꞌa̱n ra̱ te̱ sa̱a̱ ra̱ ña̱ ni̱a̱ꞌa,
te̱ kiꞌi̱ꞌ va̱ kuaꞌa̱n ra̱ te̱ ka̱ꞌni̱ꞌ ra̱ ne̱ yivi̱ꞌ.
17 Naa xini i̱i̱n sa̱a̱ kii̱ꞌ xataꞌ ne̱ yivi̱ꞌ miiꞌ vi̱kuꞌu̱n riꞌ ndii,
xiní riꞌ ña̱ kuní a̱ ku̱u̱ xikaꞌ riꞌ i̱kanꞌ.
18 Ndisu̱ te̱ yivi̱ꞌ ja̱a̱nꞌ ndii,
xa̱ mi̱iꞌ ra̱ nduuꞌ ra̱ te̱ níániꞌ xiinꞌ miiꞌ ra̱,
nde̱e̱ naa te̱ kuni ka̱ꞌni̱ꞌ xiinꞌ miiꞌ mi̱iꞌ nduuꞌ ra̱.
19 Sa̱kanꞌ ndoꞌoꞌ sa̱kuuꞌ te̱ ndioo̱ꞌ i̱ni̱ va̱ xaꞌa̱ꞌ xu̱ꞌunꞌ,
ña̱ ndioo̱ꞌ i̱ni̱ va̱ ra̱ xaꞌa̱ꞌ xu̱ꞌunꞌ ja̱a̱nꞌ xaꞌni̱ꞌ ña̱ꞌaꞌ.
Yoꞌoꞌ kaꞌán tiꞌeꞌ ña̱ xini tuní ya̱ꞌya̱
20 Kaꞌán tiꞌeꞌ ña̱ xini tuní sa̱kuuꞌ ya̱ꞌya̱,
te̱ ndeꞌí a̱ kaꞌán a̱ ma̱ꞌiꞌ ya̱ꞌvi̱.
21 Kaꞌán tiꞌeꞌ ña̱ xini tuní sa̱kuuꞌ xaanꞌ yiꞌeꞌ ñu̱u̱ miiꞌ nakayá ne̱ yivi̱ꞌ,
te̱ yiꞌeꞌ ñu̱u̱ miiꞌ koꞌniꞌ sa̱kuuꞌ ne̱ yivi̱ꞌ kaꞌán ndo̱so̱ꞌ a̱ ndii:
22 “Ndoꞌó,
ne̱ köo̱ꞌ a̱ xiní xa̱tyiꞌ,
¿a̱ma̱a̱ vi̱ꞌ kuꞌu̱n ndi̱koꞌ ndo̱ꞌ ña̱ nduuꞌ ndo̱ꞌ ne̱ köo̱ꞌ a̱ xiní?
Te̱ ndoꞌó,
ne̱ xandiꞌiꞌ,
¿a̱ma̱a̱ vi̱ꞌ kuꞌu̱n ndi̱koꞌ ndo̱ꞌ ña̱ va̱ꞌa̱ kuni ndo̱ꞌ nduuꞌ ndo̱ꞌ ne̱ xandiꞌiꞌ?
Te̱ ndoꞌó,
ne̱ küuꞌ kaxiꞌ,
¿a̱ma̱a̱ vi̱ꞌ kuꞌu̱n ndi̱koꞌ ndo̱ꞌ ña̱ ndasiꞌ ndo̱ꞌ ña̱ xini tuní?
23 Ni̱a̱ꞌa̱ ndo̱ꞌ te̱ ku̱ni̱ so̱ꞌo̱ ndo̱ꞌ nde̱iꞌ ña̱ kaꞌa̱n i̱ xiinꞌ ndo̱ꞌ.
Nu̱niaꞌ i̱ nimá i̱ te̱ ta̱xi̱ i̱ ku̱nda̱ni̱ ndo̱ꞌ sa̱kuuꞌ ña̱ xanini i̱.
24 Xa̱ ni̱ ka̱na̱ tyito̱ va̱ i̱ ndoꞌó,
ndisu̱ nï̱ xi̱i̱n ndo̱ꞌ ki̱xi̱n ndo̱ꞌ.
Ni̱ ka̱ta̱ni̱ nda̱ꞌaꞌ i̱ nuu̱ꞌ ndo̱ꞌ,
ndisu̱ nï̱ xa̱a̱ ndo̱ꞌ kuenta kuuꞌ i̱.
25 Süu̱ꞌ ja̱a̱nꞌ ndii,
ni̱ sa̱xi̱o̱o̱ ndo̱ꞌ sa̱kuuꞌ nde̱iꞌ ña̱ ni̱ kaꞌa̱n i̱ xiinꞌ ndo̱ꞌ,
te̱ ni̱ sa̱xi̱o̱o̱ tu̱ ndo̱ꞌ ña̱ ni̱ ka̱ni̱ kuento i̱ ndoꞌó.
26 Sa̱kanꞌ na kuiiꞌ kuaku̱ ndi̱a̱a̱ i̱ ndoꞌó kii̱ꞌ ko̱o̱ tu̱ndoꞌo̱ꞌ nuu̱ꞌ kivi̱ꞌ ñu̱u̱ ndo̱ꞌ,
te̱ ku̱ndi̱ꞌi̱ tu̱ i̱ xiinꞌ ndo̱ꞌ kii̱ꞌ xaa̱ ña̱ yiꞌvi va̱ ndo̱ꞌ ña̱ ku̱vi̱ ndo̱ꞌ.
27 Te̱ sa̱kanꞌ tu̱ sa̱a̱ i̱ xiinꞌ ndo̱ꞌ kii̱ꞌ xaa̱ kuiꞌe̱ ña̱ ku̱ndo̱ꞌo̱ ndo̱ꞌ nde̱e̱ naa xaaꞌ a̱ kii̱ꞌ kuunꞌ kuiꞌe̱ savi̱ꞌ,
xiinꞌ kii̱ꞌ ki̱xi̱n kuiꞌe̱ nuu̱ꞌ ndo̱ꞌ nde̱e̱ naa xaaꞌ a̱ kii̱ꞌ xikaꞌ tatyi̱ꞌ ndi̱e̱eꞌ,
xiinꞌ kii̱ꞌ ku̱ndi̱ꞌni̱ nimá ndo̱ꞌ,
te̱ ku̱ndo̱ꞌo̱ kuaꞌa̱ꞌ va̱ ndo̱ꞌ.
28 Kii̱ꞌ sa̱kanꞌ ndii,
ka̱na̱ ndo̱ꞌ yuꞌu̱,
ndisu̱ nä̱ku̱i̱i̱n i̱ kaꞌán ndo̱ꞌ,
na̱ndu̱kuꞌ ndo̱ꞌ yuꞌu̱ ni̱a̱ꞌa̱ va̱,
ndisu̱ kü̱ni̱ ndo̱ꞌ nuu̱ꞌ i̱.
29 Sa̱kanꞌ ña̱ ni̱ ku̱nda̱siꞌ ndo̱ꞌ ña̱ kundani̱,
te̱ nï̱ kuni̱ ndo̱ꞌ ku̱yi̱ꞌvi ndo̱ꞌ Yahvé.
30 Te̱ nï̱ kuni̱ tu̱ ndo̱ꞌ ta̱xi̱ so̱ꞌo̱ ndo̱ꞌ nde̱iꞌ ña̱ kaꞌán i̱,
te̱ nï̱ kuni̱ tu̱ ndo̱ꞌ tyu̱nxaꞌaꞌ ndo̱ꞌ kii̱ꞌ ni̱ ka̱ni̱ kuento i̱ ndoꞌó.
31 Xaꞌa̱ꞌ a̱ ja̱a̱nꞌ na na̱ti̱i̱n ndo̱ꞌ ña̱ xataꞌa̱n na̱ti̱i̱n ndo̱ꞌ xaꞌa̱ꞌ ña̱ ni̱a̱ꞌa ña̱ ni̱ xa̱a̱ ndo̱ꞌ ja̱a̱nꞌ,
te̱ kü̱ndi̱e̱eꞌ ka̱ ndo̱ꞌ sa̱a̱ ndo̱ꞌ ña̱ tyituní mi̱iꞌ ndo̱ꞌ ja̱a̱nꞌ.
32 Sa̱kanꞌ ña̱ te̱ na̱a̱ꞌ kuuꞌ ndii,
xaꞌni̱ꞌ xiinꞌ miiꞌ mi̱iꞌ ra̱ xaꞌa̱ꞌ a̱ ña̱ na̱a̱ꞌ kuuꞌ ra̱,
te̱ te̱ küuꞌ kaxiꞌ ndii,
ña̱ vikaꞌ ra̱ sa̱a̱ sa̱kanꞌ te̱ ndo̱ñuꞌuꞌ ra̱.
33 Ndisu̱ te̱ taxiꞌ so̱ꞌo̱ ña̱ kaꞌán i̱ ndii,
ku̱nduꞌu̱ꞌ ndi̱tu̱ni̱ ra̱,
te̱ ka̱ka̱ mani̱ꞌ ra̱ i̱i̱n yivi̱ꞌ,
te̱ kü̱ndi̱ꞌni̱ ra̱ ña̱ ku̱ndo̱ꞌo̱ ra̱ ña̱ i̱yo̱”,
katyi ña̱ xini tuní.