Yoꞌoꞌ kaꞌán a̱ xaꞌa̱ꞌ ña̱ va̱ꞌa̱ ña̱ kanandoo e̱ꞌ xaaꞌ ña̱ xini tuní
2
Yu̱vaꞌ kuaꞌa i̱,
tyu̱u̱n xaꞌaꞌ u̱nꞌ ña̱ kaꞌán i̱ xiinꞌ u̱nꞌ,
te̱ ta̱xa̱ꞌa̱ u̱nꞌ tu̱ꞌu̱n nde̱iꞌ ña̱ kaꞌán i̱ ti̱xi̱n nimá u̱nꞌ.
2 Ku̱ni̱ so̱ꞌo̱ kaxiꞌ u̱nꞌ ña̱ xini tuní,
te̱ sa̱na̱ kuaꞌa u̱nꞌ nimá u̱nꞌ nuu̱ꞌ ña̱ kuuꞌ kaxiꞌ.
3 Kaꞌa̱n tiꞌeꞌ u̱nꞌ ndukuꞌ u̱nꞌ ña̱ xini tuní,
te̱ kaka̱n tu̱ u̱nꞌ ña̱ ku̱ndani̱.
4 Ndu̱kuꞌ u̱nꞌ u̱n nde̱e̱ naa te̱ ndukuꞌ xu̱ꞌunꞌ plata,
uun nde̱e̱ naa te̱ ndukuꞌ i̱i̱n ña̱ ndiaa yaꞌviꞌ va̱ ña̱ naá si̱ꞌe.
5 Sa̱kanꞌ vi̱ꞌ te̱ ku̱nda̱ni̱ u̱nꞌ sa̱a̱ yoo a̱ ña̱ ki̱ꞌi̱n kaꞌnuꞌ e̱ꞌ Yahvé,
te̱ ku̱nda̱ni̱ tu̱ u̱nꞌ sa̱a̱ yoo ña̱ xini tuní mi̱iꞌ Ndiosí.
6 Ku̱a̱tyi̱ ndii,
mi̱iꞌ Yahvé taxiꞌ ña̱ xini tuní,
te̱ yu̱ꞌuꞌ a̱ ku̱a̱xi̱ ña̱ kundani̱ xiinꞌ ña̱ ndityi.
7 Sa̱kanꞌ ña̱ taxiꞌ Yahvé ña̱ xini tuní a̱ nda̱ꞌaꞌ ne̱ xatyuunꞌ nda̱ku,
te̱ xitoꞌ a̱ ne̱ i̱i̱n nda̱a̱ꞌ nimá.
8 Xitoꞌ a̱ i̱tyiꞌ miiꞌ xikaꞌ ne̱ xatyuunꞌ nda̱ku,
te̱ kataniꞌ nda̱ꞌaꞌ tu̱ a̱ i̱tyiꞌ miiꞌ kuaꞌa̱n ne̱ nduuꞌ kuenta a̱.
9 Sa̱kanꞌ te̱ ku̱nda̱ni̱ u̱nꞌ ndee ña̱ nduuꞌ ña̱ va̱ꞌa̱,
xiinꞌ ña̱ xatyuunꞌ nda̱ku,
xiinꞌ ña̱ i̱i̱n katyi kuuꞌ e̱ꞌ xiinꞌ sa̱kuuꞌ nuu̱ꞌ ne̱ yivi̱ꞌ,
te̱ ku̱nda̱ni̱ tu̱ u̱nꞌ ndee ña̱ nduuꞌ i̱tyiꞌ va̱ꞌa̱ ña̱ kuní a̱ ka̱ka̱ u̱nꞌ.
10 Sa̱kanꞌ ña̱ ña̱ xini tuní ko̱ꞌni̱ nde̱e̱ ti̱xi̱n nimá u̱nꞌ,
te̱ ku̱ni̱ u̱nꞌ ña̱ asi̱nꞌ va̱ ña̱ xini tuní ja̱a̱nꞌ.
11 Naaꞌ xi̱ꞌna̱ ka̱ na̱ka̱ni̱ni̱ u̱nꞌ ña̱ kuní ka̱ kaꞌa̱n u̱nꞌ ndiaa ka̱ ña̱ꞌa̱ ndii,
tyi̱ndi̱e̱eꞌ a̱ yoꞌó,
te̱ ña̱ xanini va̱ꞌa̱ u̱nꞌ ko̱to̱ yoꞌó.
12 Ña̱ xini tuní sa̱kakú yoꞌó nuu̱ꞌ ne̱ yivi̱ꞌ ni̱a̱ꞌa,
ne̱ ndatuꞌunꞌ xaꞌa̱ꞌ ña̱ kuäsa̱ꞌ kuní.
13 Ne̱ yivi̱ꞌ ja̱a̱nꞌ ndii,
kuxiooꞌ ni̱a̱ nuu̱ꞌ i̱tyiꞌ nda̱ku,
te̱ nakakaꞌ ni̱a̱ i̱tyiꞌ i̱i̱n yaví.
14 Va̱ꞌa̱ kuni ni̱a̱ kii̱ꞌ xaaꞌ ni̱a̱ ña̱ ni̱a̱ꞌa,
te̱ nakuatiaꞌ nimá ni̱a̱ kii̱ꞌ xaaꞌ ni̱a̱ ña̱ kuäsa̱ꞌ kuní.
15 Sa̱kuuꞌ ña̱ xaaꞌ ni̱a̱ ndii,
ña̱ ni̱a̱ꞌa nduuꞌ a̱,
te̱ xïní ni̱a̱ miiꞌ kuaꞌa̱n i̱tyiꞌ ña̱ xikaꞌ ni̱a̱.
16 Ña̱ xini tuní ja̱a̱nꞌ sa̱kakú yoꞌó nuu̱ꞌ ñaꞌ siꞌi tu̱ku̱ te̱ yivi̱ꞌ,
saka̱nꞌ ña̱ sa̱kakú a̱ yoꞌó nuu̱ꞌ ña̱ꞌaꞌ ñaꞌ xakuitaꞌ te̱ yivi̱ꞌ xiinꞌ ña̱ nda̱tu̱nꞌ kaꞌán aꞌ.
17 Ñaꞌ ja̱a̱nꞌ ndii,
ni̱ na̱ko̱o̱ aꞌ i̱i̱ꞌ aꞌ,
te̱ nï̱ sa̱xinu̱ aꞌ kuento aꞌ ña̱ ni̱ ta̱xi̱ aꞌ nuu̱ꞌ Ndiosí kii̱ꞌ ni̱ tu̱ndaꞌa̱ꞌ aꞌ xiinꞌ i̱i̱ꞌ aꞌ ja̱a̱nꞌ.
18 Sa̱kanꞌ na kuiiꞌ te̱ yivi̱ꞌ,
te̱ kuaꞌa̱n vi̱ꞌe̱ ñaꞌ ja̱a̱nꞌ ndii,
ku̱vi̱ ra̱,
sa̱kanꞌ ña̱ vi̱ꞌe̱ aꞌ ndii,
nduuꞌ a̱ nde̱e̱ naa i̱tyiꞌ ña̱ kuaꞌa̱n nuu̱ ñu̱u̱ ndi̱i.
19 Te̱ te̱ yivi̱ꞌ,
te̱ kuaꞌa̱n vi̱ꞌe̱ aꞌ ndii,
te̱ xa̱ yoo ku̱vi̱ nduuꞌ ra̱,
te̱ köo̱ꞌ kivi̱ꞌ ka̱ na̱ka̱ka̱ ra̱ i̱tyiꞌ ña̱ kuaꞌa̱n miiꞌ yoo kivi̱ꞌ ñu̱u̱.
20 Ndisu̱ yoꞌó ndii,
i̱tyiꞌ ña̱ ni̱ xika̱ te̱ yivi̱ꞌ va̱ꞌa̱ ka̱ka̱ u̱nꞌ,
te̱ kuꞌu̱n naa kuꞌu̱n u̱nꞌ i̱tyiꞌ ña̱ xikaꞌ te̱ xa̱tyuunꞌ nda̱ku.
21 Sa̱kanꞌ ña̱ te̱ xatyuunꞌ nda̱ku ku̱i̱ti̱ꞌ ndoo̱ ku̱ndi̱e̱e̱ nuu̱ꞌ ñu̱ꞌuꞌ i̱i̱n yivi̱ꞌ,
te̱ te̱ i̱i̱n nda̱a̱ꞌ nimá ku̱i̱ti̱ꞌ ku̱ndi̱e̱e̱ nde̱e̱ ndiꞌiꞌ ni̱ kivi̱ꞌ nuu̱ꞌ a̱.
22 Ndisu̱ ne̱ xaaꞌ ña̱ ni̱a̱ꞌa ndii,
ta̱va̱ꞌ ña̱ꞌaꞌ Ndiosí nuu̱ꞌ ñu̱ꞌuꞌ i̱i̱n yivi̱ꞌ,
te̱ ne̱ tiinꞌ sikiꞌ ne̱ yivi̱ꞌ ndii,
sa̱nduxín xa̱tyiꞌ ña̱ꞌaꞌ a̱ nuu̱ꞌ ñu̱ꞌuꞌ i̱i̱n yivi̱ꞌ.