Yoꞌoꞌ kaꞌán a̱ xaꞌa̱ꞌ ña̱ i̱ni̱ e̱ꞌ ku̱ni̱ e̱ꞌ Ndiosí
3
Yu̱vaꞌ kuaꞌa mi̱iꞌ i̱,
nä̱ndoso̱ꞌ u̱nꞌ ña̱ ni̱ sa̱niaꞌá i̱ yoꞌó,
va̱ꞌa̱ ka̱ ti̱xi̱n nimá u̱nꞌ ta̱xa̱ꞌa̱ u̱nꞌ nde̱iꞌ ña̱ ni̱ kaꞌa̱n i̱ xiinꞌ u̱nꞌ.
2 Naaꞌ sa̱a̱ u̱nꞌ sa̱kanꞌ ndii,
na̱kaa̱ kivi̱ꞌ ñu̱u̱ u̱nꞌ,
te̱ kuaꞌa̱ꞌ kuiya̱ ku̱ti̱a̱ku̱ u̱nꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ ka̱ka̱ va̱ꞌa̱ tu̱ u̱nꞌ i̱i̱n yivi̱ꞌ.
3 Köo̱ꞌ kivi̱ꞌ na̱ko̱o̱ u̱nꞌ ña̱ vi̱ta i̱ni̱ u̱nꞌ xiinꞌ ña̱ nda̱tuꞌunꞌ nda̱ku u̱nꞌ,
satiín u̱nꞌ ña̱ ja̱a̱nꞌ ku̱ꞌu̱n suku̱nꞌ u̱nꞌ,
te̱ ke̱ꞌi̱ a̱ ti̱a̱ꞌni̱ u̱nꞌ miiꞌ naá nimá u̱nꞌ.
4 Naaꞌ sa̱a̱ u̱nꞌ sa̱kanꞌ ndii,
va̱ꞌa̱ kuni Ndiosí xiinꞌ ne̱ yivi̱ꞌ ku̱ni̱ ni̱a̱ yoꞌó,
te̱ kaꞌa̱n va̱ꞌa̱ nia̱ xaꞌa̱ꞌ u̱nꞌ.
5 I̱ni̱ u̱nꞌ ku̱ni̱ u̱nꞌ Yahvé xiinꞌ ka̱niiꞌ nimá u̱nꞌ,
te̱ tï̱i̱n ndi̱a̱a̱ u̱nꞌ ña̱ xini tuní mi̱iꞌ u̱nꞌ.
6 Xi̱ꞌna̱ ka̱ ña̱ kuní Ndiosí ndu̱kuꞌ u̱nꞌ i̱ꞌi̱n kivi̱ꞌ kuaꞌa̱n nuu̱ꞌ sa̱kuuꞌ ña̱ sa̱a̱ u̱nꞌ,
te̱ ña̱ ja̱a̱nꞌ niaꞌa̱ yoꞌó ndee ña̱ nduuꞌ i̱tyiꞌ va̱ꞌa̱ kuꞌu̱n u̱nꞌ.
7 Kä̱ni̱ni̱ u̱nꞌ ña̱ te̱ xini tuní ka̱ nduuꞌ mi̱iꞌ u̱nꞌ,
süu̱ꞌ ja̱a̱nꞌ ndii,
va̱ꞌa̱ ka̱ ku̱yi̱ꞌvi u̱nꞌ Yahvé,
te̱ ku̱xi̱o̱o̱ u̱nꞌ nuu̱ꞌ ña̱ ni̱a̱ꞌa.
8 Te̱ ña̱ ja̱a̱nꞌ ku̱ndu̱u̱ tata̱nꞌ xaꞌa̱ꞌ ñu̱ꞌuꞌ ndeꞌi̱ u̱nꞌ,
te̱ tyi̱ndi̱e̱eꞌ a̱ sa̱kuuꞌ i̱kiꞌ u̱nꞌ.
9 Ki̱ꞌi̱n kaꞌnuꞌ u̱nꞌ Yahvé xiinꞌ sa̱kuuꞌ ña̱ vikaꞌ u̱nꞌ,
te̱ xiinꞌ ña̱ saviꞌ nu̱uꞌ ña̱ nakuixaꞌ miiꞌ xikaꞌ u̱nꞌ na̱soko̱ꞌ u̱nꞌ nuu̱ꞌ a̱.
10 Sa̱kanꞌ te̱ sa̱kutuꞌ ka̱tiꞌi̱ꞌ a̱ yaka̱ miiꞌ taxaꞌa u̱nꞌ ña̱ saviꞌ u̱nꞌ,
te̱ sa̱kutuꞌ ka̱tiꞌi̱ꞌ tu̱ a̱ yo̱o̱ miiꞌ taxaꞌa u̱nꞌ vino xa̱aꞌ,
teꞌ xaꞌa u̱nꞌ.
11 Yu̱vaꞌ kuaꞌa i̱,
sä̱xi̱o̱o̱ u̱nꞌ ña̱ sandoꞌoꞌ Yahvé yoꞌó,
ni̱ nde̱e̱ nä̱saa̱ꞌ tu̱ u̱nꞌ kii̱ꞌ sakiꞌinꞌ kuento a̱ yoꞌó.
12 Sa̱kanꞌ ña̱ sandoꞌoꞌ Yahvé ne̱ ndani̱ a̱,
nde̱e̱ naa xaaꞌ i̱i̱n yu̱vaꞌ kutunꞌ ra̱ siꞌe̱ ra̱ ne̱ ndani̱ va̱ ra̱.
13 Va̱ꞌa̱ va̱ kuni ne̱ yivi̱ꞌ,
ne̱ ni̱ na̱ti̱i̱n ña̱ xini tuní,
te̱ va̱ꞌa̱ tu̱ kuni ne̱ yivi̱ꞌ,
ne̱ naniꞌí ña̱ ndityi.
14 Ku̱a̱tyi̱ ndii,
taxiꞌ ka̱ ña̱ xini tuní ja̱a̱nꞌ ña̱ ka̱nandoo e̱ꞌ te̱ sa̱kanꞌ xu̱ꞌunꞌ plata,
te̱ ndiaa yaꞌviꞌ ka̱ ña̱ kanandoo e̱ꞌ xaaꞌ ña̱ ja̱a̱nꞌ te̱ sa̱kanꞌ ña̱ kanandoo e̱ꞌ xaaꞌ oro.
15 Te̱ nda̱tu̱nꞌ ka̱ ña̱ xini tuní ja̱a̱nꞌ te̱ sa̱kanꞌ kuaꞌa̱ꞌ yuu̱ꞌ nda̱tu̱nꞌ,
te̱ nde̱e̱ i̱i̱n ña̱ kaꞌán nimá u̱nꞌ xaꞌa̱ꞌ kü̱vi̱ na̱kuita̱ xiinꞌ a̱.
16 Nda̱ꞌaꞌ ku̱a̱ꞌa̱ a̱ taxiꞌ ña̱ nakaá kivi̱ꞌ ñu̱u̱ e̱ꞌ,
te̱ nda̱ꞌaꞌ i̱ti̱n a̱ taxiꞌ ña̱ vikaꞌ xiinꞌ ña̱ kiꞌinꞌ kaꞌnuꞌ.
17 I̱tyiꞌ a̱ ndii,
i̱tyiꞌ miiꞌ yoo ña̱ sii̱ꞌ nduuꞌ a̱,
te̱ sa̱kuuꞌ i̱tyiꞌ a̱ ndii,
va̱ꞌa̱ kuni e̱ꞌ xikaꞌ e̱ꞌ e̱.
18 Ña̱ xini tuní ndii,
nduuꞌ a̱ nde̱e̱ naa i̱tunꞌ,
tunꞌ taxiꞌ kivi̱ꞌ ñu̱u̱ nuu̱ꞌ ne̱ natiinꞌ a̱,
va̱ꞌa̱ va̱ kuni sa̱kuuꞌ ne̱ natiinꞌ kutu̱ꞌ a̱ te̱ sä̱inꞌ ka̱ ni̱a̱ a̱.
19 Xiinꞌ ña̱ xini tuní ni̱ xa̱ꞌa̱ Yahvé ñu̱ꞌuꞌ i̱i̱n yivi̱ꞌ,
te̱ xiinꞌ ña̱ ndityi ni̱ tyi̱ka̱nduꞌu̱ꞌ a̱ ndi̱viꞌ.
20 Xiinꞌ ña̱ xini tuní Ndiosí ni̱ na̱ta̱ꞌviꞌ a̱ ti̱kui mi̱ni̱ kaꞌnuꞌ,
te̱ kuunꞌ ka̱xi̱n xaaꞌ viko̱ꞌ nuu̱ꞌ ñu̱ꞌuꞌ i̱i̱n yivi̱ꞌ ñu̱u.
21 Yu̱vaꞌ kuaꞌa i̱,
köo̱ꞌ kivi̱ꞌ na̱ko̱o̱ u̱nꞌ ña̱ ndityi xiinꞌ tu̱ꞌu̱n kava̱ꞌa̱,
süu̱ꞌ ja̱a̱nꞌ ndii,
ta̱xa̱ꞌa̱ va̱ꞌa̱ u̱nꞌ u̱n.
22 Sa̱kanꞌ ña̱ ta̱xi̱ a̱ kivi̱ꞌ ñu̱u̱ u̱nꞌ,
te̱ ku̱ndu̱u̱ a̱ nde̱e̱ naa i̱i̱n siki̱ nda̱tu̱nꞌ ku̱ꞌu̱n suku̱nꞌ u̱nꞌ.
23 Sa̱kanꞌ te̱ i̱ni̱ u̱nꞌ ka̱ka̱ u̱nꞌ i̱tyiꞌ miiꞌ ka̱ kuaꞌa̱n u̱nꞌ,
te̱ kë̱kiꞌi̱ tu̱ u̱nꞌ xiinꞌ nde̱e̱ i̱i̱n ña̱ꞌa̱.
24 Te̱ kii̱ꞌ na̱ka̱nduꞌu̱ꞌ u̱nꞌ te̱ na̱ndiee̱ꞌ u̱nꞌ ndii,
kuäsa̱ꞌ yiꞌvi u̱nꞌ,
süu̱ꞌ ja̱a̱nꞌ ndii,
i̱ni̱ u̱nꞌ te̱ kusu̱n u̱nꞌ.
25 Te̱ kü̱yi̱ꞌvi tu̱ u̱nꞌ kii̱ꞌ i̱i̱n xaa̱ kiꞌi̱ꞌ ku̱i̱ti̱ꞌ ña̱ i̱yo̱ va̱,
ni̱ nde̱e̱ kii̱ꞌ xaa̱ ña̱ nduxi̱n sa̱kuuꞌ ne̱ xaaꞌ ña̱ ni̱a̱ꞌa.
26 Sa̱kanꞌ ña̱ Yahvé ku̱ndu̱u̱ ña̱ i̱ni̱ u̱nꞌ ku̱ni̱ u̱nꞌ kii̱ꞌ sa̱kanꞌ,
te̱ ña̱ ja̱a̱nꞌ ko̱to̱ yoꞌó,
te̱ nä̱ma̱ u̱nꞌ nuu̱ꞌ ña̱ kuni se̱kun yoꞌó.
27 Käꞌa̱n yu̱ꞌuꞌ u̱nꞌ te̱ sa̱a̱ u̱nꞌ ña̱ va̱ꞌa̱ xaꞌa̱ꞌ sa̱kuuꞌ ne̱ yivi̱ꞌ,
ne̱ kuní xna̱ꞌa̱ ña̱ꞌa̱ nuu̱ꞌ kii̱ꞌ ku̱vi̱ sa̱a̱ u̱nꞌ u̱n.
28 Naaꞌ ku̱vi̱ tyi̱ndi̱e̱eꞌ u̱nꞌ ne̱ ndieeꞌ ya̱ti̱n vi̱ꞌe̱ u̱nꞌ kivi̱ꞌ vi̱ti̱n ndii,
käꞌa̱n u̱nꞌ xiinꞌ ni̱a̱ ndii:
“Kuaꞌan,
te̱ na̱ndi̱koꞌ u̱nꞌ tiaa̱n,
sa̱kanꞌ vi̱ꞌ te̱ tyi̱ndi̱e̱eꞌ i̱ yoꞌó”,
katyi̱ u̱nꞌ kii̱ꞌ ku̱vi̱ tyi̱ndi̱e̱eꞌ ña̱ꞌaꞌ u̱nꞌ.
29 Tyï̱tuní u̱nꞌ ña̱ sa̱a̱ u̱nꞌ ña̱ ni̱a̱ꞌa xiinꞌ ne̱ ndieeꞌ ya̱ti̱n vi̱ꞌe̱ u̱nꞌ,
sa̱kanꞌ ña̱ ne̱ ndieeꞌ ya̱ti̱n vi̱ꞌe̱ u̱nꞌ ja̱a̱nꞌ ndii,
i̱ni̱ ni̱a̱ xini ni̱a̱ yoꞌó.
30 Kü̱ntaꞌanꞌ u̱nꞌ xiinꞌ nde̱e̱ i̱i̱n ne̱ yivi̱ꞌ naaꞌ köo̱ꞌ nde̱e̱ i̱i̱n xaꞌa̱ꞌ,
naaꞌ köo̱ꞌ nde̱e̱ i̱i̱n ña̱ ni̱a̱ꞌa ni̱ xa̱a̱ ni̱a̱ xiinꞌ u̱nꞌ.
31 Ndiöo̱ꞌ i̱ni̱ u̱nꞌ xaꞌa̱ꞌ ña̱ kumiꞌ ne̱ ndi̱e̱ni va̱,
te̱ ni̱ nde̱e̱ nä̱ꞌi̱ tu̱ u̱nꞌ ña̱ xaaꞌ ni̱a̱ sa̱a̱ u̱nꞌ.
32 Sa̱kanꞌ ña̱ ndasiꞌ Yahvé ne̱ yivi̱ꞌ,
ne̱ xaaꞌ ña̱ ni̱a̱ꞌa nde̱e̱ naa ne̱ ja̱a̱nꞌ,
ndisu̱ ne̱ xatyuunꞌ nda̱ku ndii,
ndiakaꞌ taꞌanꞌ kutu̱ꞌ a̱ xiinꞌ ni̱a̱.
33 Yahvé ndii,
sanatyaꞌanꞌ a̱ vi̱ꞌe̱ ne̱ xaaꞌ ña̱ ni̱a̱ꞌa,
ndisu̱ sañuꞌuꞌ a̱ vi̱ꞌe̱ ne̱ xatyuunꞌ nda̱ku.
34 Ña̱ nda̱ku nduuꞌ a̱ ndii,
ku̱ndi̱ꞌi̱ Yahvé xiinꞌ ne̱ xandiꞌiꞌ xiinꞌ a̱,
ndisu̱ ne̱ maso nimá ndii,
sa̱ñuꞌuꞌ ña̱ꞌaꞌ a̱.
35 Ne̱ xini tuní ndii,
ña̱ kiꞌinꞌ kaꞌnuꞌ na̱ti̱i̱n ni̱a̱ sa̱a̱ Ndiosí,
ndisu̱ ne̱ küuꞌ kaxiꞌ ndii,
sa̱ku̱tyani ña̱ꞌaꞌ a̱.