Tu̱tu̱ Salmos
Yoꞌoꞌ kaꞌán a̱ xaꞌa̱ꞌ ne̱ xatyuunꞌ nda̱ku xiinꞌ ne̱ xaaꞌ ku̱a̱tyi̱
1
Sañuꞌuꞌ va̱ Ndiosí ne̱ yivi̱ꞌ,
ne̱ ndïkún ña̱ vä̱ꞌa̱,
ña̱ kaꞌán nde̱iꞌ ne̱ xaaꞌ ña̱ ni̱a̱ꞌa,
ni̱ nde̱e̱ xïkaꞌ tu̱ ni̱a̱ i̱tyiꞌ ne̱ xaaꞌ ku̱a̱tyi̱,
ni̱ nde̱e̱ kïꞌinꞌ taꞌanꞌ tu̱ ni̱a̱ xiinꞌ ne̱ xandiꞌiꞌ xiinꞌ Ndiosí.
2 Süu̱ꞌ ja̱a̱nꞌ ndii,
ña̱ kaꞌán tu̱ꞌu̱n nde̱iꞌ Yahvé xtani̱ ni̱a̱ sa̱a̱ ni̱a̱,
te̱ xaꞌa̱ꞌ ña̱ ja̱a̱nꞌ ku̱i̱ti̱ꞌ xanini ndiꞌi̱ ni̱a̱ i̱ꞌi̱n kivi̱ꞌ kuaꞌa̱n ndu̱viꞌ xiinꞌ ñu̱u.
3 Ne̱ yivi̱ꞌ ja̱a̱nꞌ ndii,
nduuꞌ ni̱a̱ nde̱e̱ naa i̱i̱n i̱tunꞌ,
tunꞌ ni̱ tyi̱ꞌi̱ i̱i̱n te̱ yivi̱ꞌ yu̱ꞌuꞌ i̱ti̱a̱,
tunꞌ kuunꞌ nduu̱ꞌ nda̱ꞌaꞌ kii̱ꞌ xaá kivi̱ꞌ ña̱ kuní a̱ ku̱u̱n a̱ nda̱ꞌaꞌ nu̱ꞌ,
te̱ köo̱ꞌ kivi̱ꞌ xii yuku̱ nu̱ꞌ.
Te̱ ndee ka̱ ña̱ sa̱a̱ ne̱ yivi̱ꞌ ja̱a̱nꞌ ndii,
ki̱e̱e̱ va̱ꞌa̱ ni̱a̱ xiinꞌ a̱.
4 Ndisu̱ süu̱ꞌ sa̱kanꞌ xkaꞌndíá a̱ xiinꞌ ne̱ xaaꞌ ña̱ ni̱a̱ꞌa,
sa̱kanꞌ ña̱ ne̱ ja̱a̱nꞌ ndii,
nduuꞌ ni̱a̱ nde̱e̱ naa mi̱ꞌiꞌ i̱tyi,
ña̱ ndíátyiꞌ xaaꞌ tatyi̱ꞌ.
5 Sa̱kanꞌ na kuiiꞌ ne̱ xaaꞌ ña̱ ni̱a̱ꞌa ndii,
kë̱ta̱ va̱ꞌa̱ ne̱ ja̱a̱nꞌ kii̱ꞌ kuꞌu̱n ni̱a̱ vi̱ꞌe̱ ku̱a̱tyi̱ nuu̱ꞌ kuesí.
Te̱ ne̱ xaaꞌ ku̱a̱tyi̱ ja̱a̱nꞌ ndii,
köo̱ꞌ nde̱e̱ i̱i̱n ne̱ ja̱a̱nꞌ ku̱ndi̱e̱e̱ te̱i̱n ne̱ xatyuunꞌ nda̱ku,
ne̱ saxinú tu̱ꞌu̱n nde̱iꞌ Ndiosí ja̱a̱nꞌ.
6 Sa̱kanꞌ ña̱ xitoꞌ Yahvé ña̱ xaaꞌ ne̱ xatyuunꞌ nda̱ku,
ndisu̱ ne̱ xaaꞌ ña̱ ni̱a̱ꞌa ja̱a̱nꞌ ndii,
nduxi̱n xa̱tyiꞌ ni̱a̱,
sa̱kanꞌ ña̱ köo̱ꞌ Ndiosí xitoꞌ ña̱ꞌaꞌ.