Yoꞌoꞌ kaꞌán Yahvé xaꞌa̱ꞌ i̱i̱n te̱ yivi̱ꞌ, te̱ ni̱ na̱ka̱xi̱n a̱ ka̱ꞌndi̱a̱ tyuunꞌ nuu̱ꞌ ñu̱ꞌuꞌ i̱i̱n yivi̱ꞌ
2
¿Ndiotyun na naku̱tyi ne̱ yivi̱ꞌ,
te̱ ndiotyun na tyituní ne̱ ndieeꞌ i̱ꞌi̱n ñu̱u̱ i̱i̱n yivi̱ꞌ sa̱a̱ ni̱a̱ ña̱ kuäsa̱ꞌ kuní?
2 Nduuꞌ iinꞌ sa̱kuuꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ
xiinꞌ sa̱kuuꞌ te̱ xaꞌndia tyuunꞌ kaꞌnuꞌ nuu̱ꞌ ne̱ yivi̱ꞌ,
te̱ i̱i̱n nda̱a̱ꞌ nanduuꞌ ra̱,
te̱ nakuitá teiꞌ ra̱ nuu̱ꞌ Yahvé
xiinꞌ nuu̱ꞌ te̱ ni̱ na̱ka̱xi̱n a̱ ku̱ndu̱u̱ rey nuu̱ꞌ ñu̱ꞌuꞌ i̱i̱n yivi̱ꞌ.
3 Te̱ kaꞌán xiinꞌ taꞌanꞌ ra̱ ndii:
“Va̱ꞌa̱ ka̱ sa̱ndoó ndiká xiinꞌ miiꞌ e̱ꞌ nda̱ꞌaꞌ ra̱,
te̱ tä̱xi̱ e̱ꞌ ña̱ vi̱ko̱niꞌiꞌ ka̱ Ndiosí yooꞌ”,
katyi ra̱.
4 Ndisu̱ Ndiosí,
ña̱ nduꞌu̱ꞌ ndi̱viꞌ ndii,
xakú ndi̱a̱a̱ ña̱ꞌaꞌ a̱,
te̱ xandiꞌiꞌ ku̱i̱ti̱ꞌ Tákuiꞌe Ndiosí xiinꞌ ra̱.
5 Te̱ kaꞌán xiꞌé a̱ xiinꞌ ra̱,
te̱ sayi̱ꞌvi ña̱ꞌaꞌ a̱ xiinꞌ ña̱ xiꞌé a̱ ja̱a̱nꞌ,
kaꞌán a̱ xiinꞌ ra̱ ndii:
6 “Xa̱ ni̱ tyi̱nduꞌu̱ꞌ i̱ rey nde̱e̱ ñu̱u̱ Jerusalén miiꞌ iinꞌ i̱kuꞌ Sión,
ña̱ su̱ꞌu̱n,
te̱ ka̱ꞌndi̱a̱ tyuunꞌ ra̱ i̱i̱n ka̱niiꞌ i̱i̱n yivi̱ꞌ”,
katyi̱ a̱.
7 Vi̱ti̱n kaꞌa̱n i̱ xaꞌa̱ꞌ ña̱ ni̱ kaꞌa̱n Yahvé xiinꞌ i̱,
kaꞌán a̱ ndii:
“Siꞌe̱ i̱ nduuꞌ yoꞌó,
te̱ kivi̱ꞌ vi̱ti̱n sa̱tuví i̱ ña̱ nduuꞌ i̱ yu̱vaꞌ u̱nꞌ.
8 Ku̱vi̱ kaka̱n u̱nꞌ yo̱o̱ ka̱ nduuꞌ a̱ kuní u̱nꞌ nuu̱ꞌ i̱,
te̱ ta̱xi̱ i̱ ne̱ tukuꞌ nda̱ꞌaꞌ u̱nꞌ ku̱ndu̱u̱ ña̱ꞌa̱ u̱nꞌ,
te̱ ta̱xi̱ tu̱ i̱ i̱i̱n ka̱niiꞌ ñu̱ꞌuꞌ i̱i̱n yivi̱ꞌ ku̱ndu̱u̱ ña̱ꞌa̱ u̱nꞌ.
9 Te̱ ka̱ꞌndi̱a̱ tyuunꞌ vie̱ u̱nꞌ nuu̱ꞌ ni̱a̱ xiinꞌ ta̱tunꞌ u̱nꞌ,
te̱ sakuatyiꞌ xiꞌe̱ ña̱ꞌaꞌ u̱nꞌ nde̱e̱ naa xaaꞌ te̱ yivi̱ꞌ sakuatyiꞌ xiꞌe̱ ra̱ i̱i̱n ki̱si̱”,
ni̱ katyi̱ a̱.
10 Sa̱kanꞌ na kuiiꞌ vi̱ti̱n ndii,
sa̱kuuꞌ ndoꞌó,
rey,
xiinꞌ ndoꞌó,
te̱ xaꞌndia tyuunꞌ ndii,
kuní a̱ ña̱ ka̱ꞌndi̱a̱ tyuunꞌ ndo̱ꞌ xiinꞌ ña̱ xini tuní,
xa̱ ni̱ ta̱xi̱ Ndiosí kuento a̱ nuu̱ꞌ sa̱kuuꞌ ndoꞌó,
te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ.
11 Ka̱ka̱ nu̱u̱ ndo̱ꞌ nuu̱ꞌ Yahvé xiinꞌ ña̱ yiꞌvi ña̱ꞌaꞌ ndo̱ꞌ,
te̱ sii̱ꞌ ku̱ni̱ ndo̱ꞌ nuu̱ꞌ a̱ xiinꞌ ña̱ kisiꞌ a̱ ndoꞌó.
12 Ko̱to̱ kaꞌnuꞌ ndo̱ꞌ siꞌe̱ a̱,
ko̱to̱ ka̱ na̱saa̱ꞌ a̱ ku̱ni̱ a̱ ndoꞌó,
te̱ ka̱ꞌni̱ꞌ a̱ ndoꞌó ña̱ kuní ka̱ na̱xaa̱ ndo̱ꞌ miiꞌ kuaꞌa̱n ndo̱ꞌ.
Sa̱kanꞌ ña̱ yatyi̱ va̱ nasaáꞌ a̱.
Ndisu̱ sañuꞌuꞌ va̱ Ndiosí sa̱kuuꞌ ne̱ i̱ni̱ xini ña̱ꞌaꞌ.