So̱ꞌo̱ ni̱ xa̱a̱ a̱ kii̱ꞌ ni̱ na̱ndu̱u̱ Mardoqueo i̱i̱n te̱ kaꞌnuꞌ
10
Te̱ nduuꞌ rey Asuero ndii,
ni̱ ti̱i̱n uꞌvi̱ ra̱ ne̱ ndieeꞌ nuu̱ꞌ ñu̱ꞌuꞌ miiꞌ xaꞌndia tyuunꞌ ra̱,
te̱ tya̱ꞌvi̱ ña̱ꞌaꞌ ni̱a̱ xu̱ꞌunꞌ xaniꞌ,
te̱ sa̱kanꞌ tu̱ ni̱ xa̱a̱ ra̱ xiinꞌ nde̱e̱ ne̱ ndieeꞌ nuu̱ꞌ ñu̱ꞌuꞌ ña̱ ñuꞌuꞌ i̱ꞌnu̱ ma̱ꞌiꞌ mi̱ni̱ kaꞌnuꞌ.
2 Te̱ sa̱kuuꞌ ña̱ ni̱ xa̱a̱ rey Asuero xiinꞌ ña̱ ndi̱e̱eꞌ ra̱,
xiinꞌ ña̱ ndi̱e̱ni ra̱,
te̱ sa̱kanꞌ tu̱ sa̱kuuꞌ ña̱ ni̱ ku̱u̱ kaꞌnuꞌ Mardoqueo,
xiinꞌ ña̱ ni̱ ki̱ꞌi̱n kaꞌnuꞌ ña̱ꞌaꞌ rey ja̱a̱nꞌ ndii,
yoso̱ꞌ a̱ nuu̱ꞌ tu̱tu̱ miiꞌ ni̱ na̱ko̱so̱ꞌ sa̱kuuꞌ ña̱ ni̱ xkaꞌndi̱a̱ nuu̱ꞌ ñu̱ꞌuꞌ Media xiinꞌ nuu̱ꞌ ñu̱ꞌuꞌ Persia miiꞌ ni̱ xa̱ꞌndi̱a̱ tyuunꞌ rey Asuero ja̱a̱nꞌ.
3 Te̱ Mardoqueo,
te̱ judío ja̱a̱nꞌ,
ni̱ nduu̱ te̱ ni̱ ndiso̱ tyuunꞌ kaꞌnuꞌ,
te̱ uvi̱ xata̱ꞌ rey Asuero.
I̱i̱n te̱ kaꞌnuꞌ va̱ ni̱ nduu̱ ra̱ nuu̱ꞌ ne̱ judío,
te̱ ni̱ ndani̱ va̱ ña̱ꞌaꞌ sa̱kuuꞌ ne̱ taꞌanꞌ ra̱,
sa̱kanꞌ ña̱ ni̱ xa̱tyuunꞌ ra̱ xaꞌa̱ꞌ ña̱ va̱ꞌa̱ ne̱ ñu̱u̱ ra̱,
te̱ ni̱ xa̱nduxa̱ꞌ ra̱ xaꞌa̱ꞌ ña̱ ku̱ndi̱e̱e̱ mani̱ꞌ ne̱ ñu̱u̱ ra̱ ja̱a̱nꞌ.