Tu̱tu̱ ña̱ ni̱ ke̱ꞌi̱ te̱ ni̱ na̱niꞌ Nehemías
Yoꞌoꞌ kaꞌán a̱ xaꞌa̱ꞌ ña̱ kaꞌán Nehemías xiinꞌ Ndiosí
1
Ña̱ yo̱ꞌo̱ꞌ nduuꞌ ña̱ ni̱ ke̱ꞌi̱ Nehemías,
siꞌe̱ Hacalías,
xaꞌa̱ꞌ ña̱ ni̱ ndo̱ꞌo̱ ra̱,
xiinꞌ ne̱ ñu̱u̱ ra̱.
Untaꞌ,
yoo̱ꞌ Quisleu kii̱ꞌ xa̱ kuaꞌa̱n oko̱ kuiya̱ ña̱ xaꞌndia tyuunꞌ rey Artajerje,
te̱ yuꞌu̱,
Nehemías ndii,
ñu̱u̱ Susa,
ña̱ nduuꞌ ñu̱u̱ kaꞌnuꞌ miiꞌ ndieeꞌ kiꞌinꞌ te̱ xaꞌndia tyuunꞌ vie̱,
nduꞌu̱ꞌ i̱ kii̱ꞌ sa̱kanꞌ.
2 Ni̱ xa̱a̱ ña̱ni̱ i̱ Hanani vi̱ꞌe̱ i̱ xiinꞌ i̱nga̱ ndiaꞌviꞌ te̱ yivi̱ꞌ,
te̱ ni̱ ki̱e̱e̱ nuu̱ꞌ ñu̱ꞌuꞌ Judá.
Sa̱kanꞌ te̱ ni̱ nda̱tuꞌu̱nꞌ ña̱ꞌaꞌ i̱ xaꞌa̱ꞌ sa̱a̱ ndieeꞌ ne̱ Israel,
ne̱ taꞌanꞌ ndu̱,
ne̱ ni̱ na̱ndi̱koꞌ,
xiinꞌ ne̱ ni̱ kaku̱ nda̱ꞌaꞌ te̱ xíinꞌ kii̱ꞌ ni̱ xi̱kuꞌu̱n ni̱a̱.
Te̱ ni̱ nda̱tuꞌu̱nꞌ tu̱ ña̱ꞌaꞌ i̱ xaꞌa̱ꞌ ñu̱u̱ Jerusalén.
3 Te̱ ni̱ kaꞌa̱n ra̱ xiinꞌ i̱ ndii:
―Sa̱kuuꞌ ne̱ taꞌanꞌ e̱ꞌ,
ne̱ judío,
ne̱ ni̱ ndoo̱ ndieeꞌ nuu̱ꞌ ñu̱ꞌuꞌ Judá kii̱ꞌ ni̱ ti̱i̱n te̱ xíinꞌ kiꞌinꞌ ni̱a̱,
xiinꞌ ne̱ ni̱ na̱ndi̱koꞌ kii̱ꞌ ni̱ xi̱kuꞌu̱n ni̱a̱ nda̱ꞌaꞌ te̱ xíinꞌ ndii,
yaꞌa̱ yoo tu̱ndoꞌo̱ꞌ nuu̱ꞌ kivi̱ꞌ ñu̱u̱ ni̱a̱ te̱ ndieeꞌ ni̱a̱,
te̱ sakaꞌanꞌ va̱ tu̱ ña̱ꞌaꞌ te̱ yivi̱ꞌ.
Te̱ nama̱ ña̱ ndasi ñu̱u̱ Jerusalén,
ña̱ ni̱ ndu̱va̱ ndii,
kusaaꞌ ndieeꞌ ka̱ a̱ ñu̱ꞌuꞌ,
te̱ vitu̱ꞌ yiꞌeꞌ ñu̱u̱ ndii,
ni̱ ndi̱ꞌi̱ ndoo nu̱ꞌ ni̱ xixi̱ ni̱ xa̱a̱ ñuꞌu̱ ―ni̱ katyi̱ ra̱.
4 Kii̱ꞌ ni̱ xi̱ni̱ so̱ꞌo̱ i̱ ña̱ ni̱ kaꞌa̱n ra̱ ja̱a̱nꞌ ndii,
ni̱ xi̱ku̱nduꞌu̱ꞌ i̱ ñu̱ꞌuꞌ,
te̱ ni̱ xa̱ku̱ va̱ i̱,
te̱ ni̱ xika̱ sutyiꞌ i̱ni̱ va̱ i̱ ndiaꞌviꞌ kivi̱ꞌ.
Ndi̱ꞌi̱ ja̱a̱nꞌ,
te̱ ni̱ yoo̱ ndi̱ti̱a̱ i̱ nuu̱ꞌ Ndiosí,
te̱ ni̱ kaꞌa̱n i̱ si̱ꞌunꞌ xiinꞌ Ndiosí,
nduꞌu̱ꞌ ndi̱viꞌ,
5 kaꞌán i̱ xiinꞌ a̱ ndii:
―Kaꞌán ndaꞌvi i̱ xiinꞌ yoꞌó,
Yahvé,
ña̱ nduꞌu̱ ndi̱viꞌ,
ña̱ ndi̱e̱eꞌ va̱ nduuꞌ u̱nꞌ,
te̱ kooꞌ tyukuuꞌ va̱ tu̱ u̱nꞌ,
te̱ saxinu̱ tu̱ u̱nꞌ ña̱ kaꞌán u̱nꞌ,
te̱ kuvita tu̱ i̱ni̱ u̱nꞌ xaꞌa̱ꞌ ne̱ ndani̱ yoꞌó,
te̱ saxinu̱ ni̱a̱ tu̱ꞌu̱n nde̱iꞌ u̱nꞌ.
6 Xaꞌa̱ꞌ a̱ ja̱a̱nꞌ na kaꞌán ndaꞌvi yuꞌu̱,
te̱ xikaꞌ nuuꞌ nuu̱ꞌ u̱nꞌ,
xiinꞌ u̱nꞌ ña̱ sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ ndu̱viꞌ xiinꞌ ñu̱u xaꞌa̱ꞌ ne̱ nduuꞌ kuenta u̱nꞌ,
ña̱ tyu̱nxaꞌaꞌ u̱nꞌ ña̱ kaꞌán yuꞌu̱,
te̱ xikaꞌ nuuꞌ nuu̱ꞌ u̱nꞌ,
xiinꞌ u̱nꞌ xaꞌa̱ꞌ nduꞌu̱,
ne̱ vi̱ꞌe̱ Israel,
ne̱ nduuꞌ kuenta u̱nꞌ.
Naꞌmá i̱ sa̱kuuꞌ ku̱a̱tyi̱ mi̱iꞌ i̱ xiinꞌ sa̱kuuꞌ ku̱atyi ña̱ xaaꞌ ne̱ vi̱ꞌe̱ Israel,
taꞌanꞌ i̱.
Ña̱ nda̱ku nduuꞌ a̱ ndii,
xa̱ ni̱ xa̱a̱ ndu̱ kuaꞌa̱ꞌ va̱ ku̱a̱tyi̱ nuu̱ꞌ yoꞌó.
7 Nduꞌu̱,
ne̱ vi̱ꞌe̱ Israel ndii,
xa̱ kuaꞌa̱ꞌ va̱ ku̱a̱tyi̱ ni̱ xa̱a̱ ndu̱ nuu̱ꞌ yoꞌó,
Ndiosí,
te̱ nï̱ sa̱xinú ndu̱ ña̱ kaꞌán tyuunꞌ u̱nꞌ xiinꞌ ndu̱,
ni̱ nde̱e̱ tu̱ꞌu̱n nde̱iꞌ u̱nꞌ xiinꞌ ña̱ tyituní u̱nꞌ,
ña̱ ni̱ sa̱yaꞌá u̱nꞌ nda̱ꞌaꞌ ndu xiinꞌ nda̱ꞌaꞌ Moisés,
te̱ xikaꞌ nuuꞌ nuu̱ꞌ u̱nꞌ.
8 Kaꞌán ndaꞌvi i̱ xiinꞌ u̱nꞌ vi̱ti̱n ña̱ sa̱a̱ u̱nꞌ ña̱ va̱ꞌa̱ te̱ na̱ka̱ꞌanꞌ u̱nꞌ ña̱ ni̱ ta̱xi̱ u̱nꞌ kuento u̱nꞌ,
ña̱ ni̱ kaꞌa̱n u̱nꞌ xiinꞌ Moisés,
te̱ xikaꞌ nuuꞌ nuu̱ꞌ u̱nꞌ,
kii̱ꞌ ni̱ kaꞌa̱n u̱nꞌ ndii:
“Naaꞌ sa̱a̱ ndo̱ꞌ ku̱a̱tyi̱ nuu̱ꞌ i̱ ndii,
ki̱ku̱ꞌ i̱ sa̱kuuꞌ ndo̱ꞌ sa̱a̱ kuaꞌa̱n nuu̱ꞌ ñu̱ꞌuꞌ i̱i̱n yivi̱ꞌ,
9 ndisu̱ naaꞌ na̱ndi̱koꞌ ndo̱ꞌ nuu̱ꞌ i̱,
te̱ ka̱ndi̱xaꞌ ndo̱ꞌ tu̱ꞌu̱n nde̱iꞌ i̱,
te̱ sa̱xinu̱ tu̱ ndo̱ꞌ a̱ ndii,
tee̱ꞌ ndee kiku̱ ndo̱ꞌ nde̱e̱ miiꞌ ni̱ xaꞌa̱n ndi̱ꞌi̱ i̱i̱n yivi̱ꞌ ndii,
mi̱iꞌ yuꞌu̱ kuꞌu̱n na̱ka̱ ndoꞌó nde̱e̱ i̱kanꞌ,
te̱ sa̱na̱ndikoꞌ i̱ ndoꞌó nuu̱ꞌ ñu̱ꞌuꞌ miiꞌ ni̱ na̱ka̱xi̱n i̱ ku̱ndi̱e̱e̱ ndo̱ꞌ te̱ sa̱kaꞌnuꞌ ndo̱ꞌ yuꞌu̱,”
ni̱ katyi̱ u̱nꞌ.
10 Te̱ nduꞌu̱ ndii,
ne̱ xikaꞌ nuuꞌ nuu̱ꞌ u̱nꞌ nduuꞌ ndu̱,
te̱ nduuꞌ tu̱ ndu̱ kuenta u̱nꞌ,
ne̱ ni̱ sa̱kakú u̱nꞌ xiinꞌ kuaꞌa̱ꞌ va̱ ña̱ ndi̱e̱eꞌ u̱nꞌ xiinꞌ ña̱ kooꞌ tyukuuꞌ va̱ u̱nꞌ.
11 Tákuiꞌe Yahvé,
kaꞌán ndaꞌvi i̱ xiinꞌ u̱nꞌ ña̱ sa̱a̱ u̱nꞌ ña̱ va̱ꞌa̱ te̱ ku̱ni̱ so̱ꞌo̱ u̱nꞌ si̱u̱ꞌunꞌ ña̱ kaꞌán i̱ xiinꞌ u̱nꞌ vi̱ti̱n,
te̱ ku̱ni̱ so̱ꞌo̱ tu̱ u̱nꞌ si̱u̱ꞌunꞌ ña̱ kaꞌán ne̱ xikaꞌ nuuꞌ nuu̱ꞌ u̱nꞌ xiinꞌ u̱nꞌ,
sa̱kanꞌ ña̱ kaꞌán nimá ni̱a̱ ki̱ꞌi̱n kaꞌnuꞌ ni̱a̱ yoꞌó.
Sa̱a̱ u̱nꞌ ña̱ va̱ꞌa̱ te̱ sa̱vi̱ta u̱nꞌ nimá rey ku̱ni̱ ra̱ yuꞌu̱,
te̱ xikaꞌ nuuꞌ nuu̱ꞌ u̱nꞌ,
te̱ ta̱xi̱ u̱nꞌ ña̱ ki̱e̱e̱ va̱ꞌa̱ i̱ nuu̱ꞌ ra̱ ―ni̱ katyi̱ i̱ xiinꞌ Ndiosí.
Te̱ kivi̱ꞌ ja̱a̱nꞌ ndii,
yuꞌu̱ ni̱ nduu̱ te̱ taa̱nꞌ vino copa xiꞌiꞌ rey.