Yoꞌoꞌ kaꞌán a̱ xaꞌa̱ꞌ kivi̱ꞌ ña̱ sa̱ndoꞌoꞌ Yahvé ne̱ ndasiꞌ taꞌanꞌ xiinꞌ a̱
63
¿Yo̱o̱ nduuꞌ te̱ ku̱a̱xi̱ kaa̱ꞌ ña̱ ni̱ ki̱e̱e̱ ra̱ nde̱e̱ ñu̱u̱ Bosra,
ña̱ nduuꞌ nda̱ꞌaꞌ ñu̱ꞌuꞌ Edom,
te̱ niꞌnuꞌ ra̱ toto̱ kuaꞌa níiꞌ?
¿Yo̱o̱ nduuꞌ tu̱ te̱ kaa̱ꞌ na kuiiꞌ nda̱tu̱nꞌ ni̱a̱ toto̱ niꞌnuꞌ ra̱,
te̱ ndi̱e̱eꞌ xa̱va̱ꞌa̱ ku̱a̱xi̱ ra̱?
Te̱ ni̱ kaꞌa̱n Ndiosí xiinꞌ i̱ ndii:
“Yuꞌu̱ nduuꞌ ña̱ ku̱a̱xi̱ ja̱a̱nꞌ,
te̱ kaꞌán i̱ ña̱ nda̱ku,
te̱ kumiꞌ i̱ ña̱ ndi̱e̱eꞌ te̱ sa̱kakú i̱ ne̱ yivi̱ꞌ”,
ni̱ katyi̱ a̱.
2 Te̱ ni̱ kaꞌa̱n i̱ xiinꞌ a̱ ndii:
“¿Ndiotyun na kuaꞌa toto̱ niꞌnuꞌ u̱nꞌ nde̱e̱ naa ne̱ ni̱ xeꞌni̱ uva te̱ ka̱sa̱ꞌa̱ ni̱a̱ vino?”,
ni̱ katyi̱ i̱.
3 Te̱ ni̱ kaꞌa̱n Ndiosí xiinꞌ i̱ ndii:
“I̱i̱n nda̱a̱ꞌ mi̱iꞌ i̱ ni̱ xeꞌni̱ nduu̱ꞌ uva,
te̱ nde̱e̱ i̱i̱n ne̱ ndieeꞌ ñu̱u̱ yoꞌoꞌ köo̱ꞌ ni̱ tyi̱ndi̱e̱eꞌ yuꞌu̱.
Te̱ xaꞌa̱ꞌ a̱ ña̱ xiꞌé i̱ na kuiiꞌ ni̱ xeꞌni̱ i̱ sa̱kuuꞌ ne̱ ndasiꞌ taꞌanꞌ xiinꞌ i̱ nde̱e̱ naa xeꞌní ne̱ yivi̱ꞌ uva.
Te̱ xaꞌa̱ꞌ a̱ ña̱ ni̱ na̱saa̱ꞌ va̱ i̱ na ni̱ xeꞌni̱ ndo̱so̱ꞌ i̱ sa̱kuuꞌ ne̱ ndasiꞌ taꞌanꞌ xiinꞌ i̱ ja̱a̱nꞌ,
te̱ ni̱ ko̱ndi̱a̱ va̱ níiꞌ ni̱a̱ toto̱ i̱,
te̱ ni̱ tyi̱tyi̱ ndo̱o̱ níiꞌ ka̱niiꞌ toto̱ i̱.
4 Sa̱kanꞌ ña̱ xa̱ nuu̱ꞌ xaꞌa̱ꞌ kivi̱ꞌ ña̱ ke̱ndiaa̱ꞌ yaꞌviꞌ i̱ nuu̱ꞌ ne̱ ndasiꞌ taꞌan xiinꞌ i̱ xanini i̱,
te̱ xa̱ ni̱ xa̱a̱ kuiya̱ ña̱ sa̱ndoó ndiká i̱ ne̱ nduuꞌ kuenta i̱.
5 Ni̱ xi̱to̱ i̱ sa̱a̱ kuaꞌa̱n,
ndisu̱ nï̱ yoo̱ nde̱e̱ i̱i̱n ne̱ tyi̱ndi̱e̱eꞌ yuꞌu̱,
te̱ ni̱ na̱nda̱ni̱ va̱ i̱ ña̱ köo̱ꞌ nde̱e̱ i̱i̱n ne̱ tyi̱ndi̱e̱eꞌ taꞌanꞌ xiinꞌ i̱.
Xiinꞌ ña̱ ndi̱e̱eꞌ mi̱iꞌ ku̱i̱ti̱ꞌ i̱ te̱ ni̱ ke̱ta̱ va̱ꞌa̱ i̱,
te̱ ña̱ xiꞌé i̱ ni̱ nduu̱ kuei̱ i̱ te̱ nï̱ sa̱nakoꞌ xiinꞌ mi̱iꞌ i̱.
6 Xaꞌa̱ꞌ a̱ ña̱ xiꞌé va̱ i̱ na ni̱ xa̱ꞌni̱ꞌ i̱ sa̱kuuꞌ ne̱ tukuꞌ,
te̱ ni̱ sa̱koꞌoꞌ ña̱ꞌaꞌ i̱ ña̱ ni̱ na̱saa̱ꞌ i̱ xini ña̱ꞌaꞌ i̱,
te̱ ni̱ xa̱ti̱a̱ i̱ níiꞌ ni̱a̱ ka̱niiꞌ nuu̱ꞌ ñu̱ꞌuꞌ”,
ni̱ katyi̱ a̱.
Yoꞌoꞌ kaꞌán a̱ xaꞌa̱ꞌ ña̱ kuvita i̱ni̱ Ndiosí xaꞌa̱ꞌ ne̱ vi̱ꞌe̱ Israel
7 Kuni kaꞌa̱n i̱ xaꞌa̱ꞌ ña̱ kuvita i̱ni̱ Yahvé xaꞌa̱ꞌ e̱ꞌ.
Te̱ kuni ka̱ta̱ tu̱ i̱ ya̱a̱ nuu̱ꞌ a̱ xaꞌa̱ꞌ sa̱kuuꞌ ña̱ va̱ꞌa̱ ña̱ ni̱ xa̱a̱ a̱ xaꞌa̱ꞌ e̱ꞌ xiinꞌ xaꞌa̱ꞌ ña̱ tyi̱ndi̱e̱eꞌ a̱ yooꞌ,
ne̱ vi̱ꞌe̱ Israel,
xaꞌa̱ꞌ a̱ ña̱ kuvita i̱ni̱ a̱ xaꞌa̱ꞌ e̱ꞌ xiinꞌ xaꞌa̱ꞌ ña̱ kuaꞌa̱ꞌ va̱ kundani̱ a̱ yooꞌ.
8 Sa̱kanꞌ ña̱ ni̱ kaꞌa̱n Ndiosí ndii:
“Ña̱ nda̱ku nduuꞌ a̱ ña̱ ne̱ nduuꞌ kuenta i̱ ja̱a̱nꞌ ndii,
siꞌe̱ i̱,
ne̱ kuäsa̱ꞌ xini xaꞌanꞌ yuꞌu̱,
nduuꞌ ni̱a̱”,
ni̱ katyi̱ a̱.
Te̱ mi̱iꞌ a̱ ni̱ sa̱kakú ña̱ꞌaꞌ a̱.
9 Te̱ kii̱ꞌ ndoꞌoꞌ ne̱ ja̱a̱nꞌ ndii,
ni̱ ndo̱ꞌo̱ tu̱ ña̱ ja̱a̱nꞌ.
Nï̱ ti̱ꞌviꞌ a̱ i̱nga̱ te̱ yivi̱ꞌ te̱ sa̱kakú ña̱ꞌaꞌ ra̱,
süu̱ꞌ ja̱a̱nꞌ ndii,
mi̱iꞌ a̱ ni̱ ki̱xi̱n.
Ni̱ sa̱kakú ña̱ꞌaꞌ a̱ xaꞌa̱ꞌ a̱ ña̱ ndani̱ ña̱ꞌaꞌ a̱ xiinꞌ xaꞌa̱ꞌ a̱ ña̱ kuvita i̱ni̱ a̱ xaꞌa̱ꞌ ni̱a̱.
Ni̱ ndo̱ni̱ꞌi̱ ña̱ꞌaꞌ a̱,
te̱ ni̱ ne̱ꞌi̱ ña̱ꞌaꞌ a̱ niꞌiꞌ a̱ sa̱a̱ niiꞌ xixaá a̱ sa̱kuuꞌ i̱tyiꞌ xiinꞌ ni̱a̱.
10 Ndisu̱ ne̱ xii̱ꞌ ya̱taꞌ e̱ꞌ ja̱a̱nꞌ ndii,
ni̱ xa̱teiꞌ ni̱a̱ nuu̱ꞌ a̱,
te̱ ni̱ sa̱na̱saáꞌ tu̱ ni̱a̱ Espíritu a̱,
ña̱ su̱ꞌu̱n.
Xaꞌa̱ꞌ a̱ ja̱a̱nꞌ na ni̱ na̱ndu̱u̱ a̱ ña̱ ndasiꞌ taꞌanꞌ xiinꞌ ni̱a̱,
te̱ mi̱iꞌ a̱ ni̱ ku̱ntaꞌanꞌ xiinꞌ ni̱a̱.
11 Sa̱kanꞌ ña̱ ni̱ na̱ka̱ꞌan ni̱a̱ xaꞌa̱ꞌ kivi̱ꞌ ña̱ ni̱ xika̱ ne̱ xii̱ꞌ ya̱taꞌ ni̱a̱ xta̱ꞌanꞌ kii̱ꞌ ni̱ ta̱va̱ꞌ Moisés ne̱ xii̱ꞌ ya̱taꞌ ni̱a̱ ja̱a̱nꞌ nuu̱ꞌ ñu̱ꞌuꞌ Egipto,
kaꞌán ni̱a̱ ndii:
“¿Miiꞌ kuaꞌa̱n Ndiosí,
ña̱ ni̱ sa̱xkaꞌndi̱a̱ ne̱ vi̱ꞌe̱ e̱ꞌ Israel nuu̱ꞌ mi̱ni̱ kuaꞌa,
kii̱ꞌ ni̱ nduu̱ Moisés te̱ pa̱xto nuu̱ꞌ ne̱ ja̱a̱nꞌ?
¿Miiꞌ kuaꞌa̱n Ndiosí ña̱ ni̱ ti̱ꞌviꞌ Espíritu a̱ ña̱ su̱ꞌu̱n te̱ ko̱o̱ a̱ xiinꞌ ne̱ nduuꞌ kuenta a̱?
12 ¿Miiꞌ kuaꞌa̱n Ndiosí ña̱ ni̱ ndiaka̱ ña̱ꞌaꞌ xiinꞌ nda̱ꞌaꞌ Moisés xiinꞌ ña̱ ndi̱e̱eꞌ nda̱tu̱nꞌ a̱?
Ndiosí ña̱ ni̱ na̱ta̱ꞌviꞌ ti̱kui mi̱ni̱ kuaꞌa nuu̱ꞌ sa̱kuuꞌ ne̱ nduuꞌ kuenta ja̱a̱nꞌ,
te̱ xiinꞌ ña̱ ja̱a̱nꞌ ki̱ꞌi̱n kaꞌnuꞌ ña̱ꞌaꞌ ne̱ yivi̱ꞌ nde̱e̱ ndiꞌiꞌ ni̱ kivi̱ꞌ.
13 Ndiosí,
ña̱ ni̱ ndiaka̱ ña̱ꞌaꞌ kii̱ꞌ ni̱ xkaꞌndi̱a̱ ni̱a̱ miiꞌ kunu xa̱va̱ꞌa̱ nde̱e̱ naa i̱i̱n kuei tiꞌ xikaꞌ miiꞌ i̱tyiꞌ kaaꞌ,
te̱ köo̱ꞌ kivi̱ꞌ ni̱ ka̱kiꞌi̱ ni̱a̱ i̱kanꞌ.
14 Sa̱kanꞌ ña̱ Espíritu Yahvé ni̱ nduu̱ ña̱ pa̱xto ni̱ xi̱to̱ ña̱ꞌaꞌ.
Ni̱ nduu̱ ni̱a̱ nde̱e̱ naa si̱ndiki̱ꞌ i̱kuꞌ,
tiꞌ ñuꞌuꞌ miiꞌ ndaá xaxi̱ꞌ riꞌ kuꞌu̱.
Sa̱kanꞌ ni̱ xi̱to̱ Ndiosí ne̱ nduuꞌ kuenta a̱,
te̱ ni̱ kaꞌa̱n va̱ꞌa̱ ne̱ yivi̱ꞌ xaꞌa̱ꞌ a̱,
te̱ ni̱ ki̱ꞌi̱n kaꞌnuꞌ tu̱ ña̱ꞌaꞌ ni̱a̱”,
ni̱ katyi̱ ni̱a̱.
15 Tákuiꞌe Ndiosí,
sa̱a̱ u̱nꞌ ña̱ va̱ꞌa̱ te̱ ko̱to̱ u̱nꞌ miiꞌ ndieeꞌ ndu̱ yoꞌoꞌ nde̱e̱ ndi̱viꞌ su̱ꞌu̱n miiꞌ nda̱tu̱nꞌ va̱ kaaꞌ miiꞌ nduꞌu̱ꞌ u̱nꞌ ñaa̱ꞌ.
¿Ñáá kuäsa̱ꞌ ka̱ kaꞌán u̱nꞌ xaꞌa̱ꞌ ndu̱?
¿Ñáá kuäsa̱ꞌ ka̱ ndani̱ xa̱tyiꞌ u̱nꞌ nduꞌu̱ uun ni̱ nde̱e̱ kuäsa̱ꞌ ka̱ tu̱ kuvita i̱ni̱ u̱nꞌ xaꞌa̱ꞌ ndu̱ xiinꞌ ña̱ ndi̱e̱eꞌ u̱nꞌ?
¿Ñáá xa̱ ni̱ ndi̱ꞌi̱ ndo̱o̱ ña̱ kuvita i̱ni̱ u̱nꞌ xaꞌa̱ꞌ ndu̱ ja̱a̱nꞌ?
16 Yoꞌó nduuꞌ yu̱vaꞌ ndu̱,
tee̱ꞌ ndee xäaꞌ tákuiꞌe Abraham kuenta kuuꞌ ndu̱,
te̱ xïní tákuiꞌe Jacob ndu̱.
Ndisu̱ yoꞌó,
Tákuiꞌe Yahvé,
nduuꞌ yu̱vaꞌ ndu̱,
te̱ yoꞌó tu̱ nduuꞌ ña̱ sandoó ndiká nduꞌu̱ nde̱e̱ ndiꞌiꞌ ni̱ kivi̱ꞌ.
17 Tákuiꞌe,
¿ndiotyun na kuiiꞌ ni̱ ta̱xi̱ u̱nꞌ ni̱ ku̱xi̱o̱o̱ ndu̱ nuu̱ꞌ i̱tyiꞌ u̱nꞌ,
te̱ ni̱ xa̱xi̱i̱ tu̱ u̱nꞌ nimá ndu̱,
te̱ sä̱xinu̱ ka̱ ndu̱ ña̱ kuní u̱nꞌ?
Sa̱a̱ u̱nꞌ ña̱ va̱ꞌa̱ te̱ tyi̱ndi̱e̱eꞌ kiꞌi̱ꞌ u̱nꞌ ndu̱,
ku̱a̱tyi̱ ndii ne̱ xikaꞌ nuuꞌ nuu̱ꞌ u̱nꞌ nduuꞌ ndu̱,
te̱ kuenta ti̱ꞌvi̱ ne̱ kaꞌán u̱nꞌ xaꞌa̱ꞌ ne̱ ndani̱ va̱ u̱nꞌ nduuꞌ ndu̱.
18 Köo̱ꞌ kuaꞌa̱ꞌ xa̱tyiꞌ kivi̱ꞌ ni̱ ku̱miꞌ nduꞌu̱ꞌ,
ne̱ nduuꞌ kuenta u̱nꞌ,
yu̱kunꞌ ña̱ nduuꞌ kuenta u̱nꞌ,
te̱ xa̱ ndi̱ꞌi̱ a̱ ni̱ sa̱nduxín te̱ ndasiꞌ taꞌanꞌ xiinꞌ ndu̱.
19 Te̱ vi̱ti̱n ndii,
ndieeꞌ ndu̱ꞌ nde̱e̱ naa ne̱ yivi̱ꞌ,
ne̱ köo̱ꞌ kivi̱ꞌ ni̱ xa̱ꞌndi̱a̱ tyuunꞌ yoꞌó nuu̱ꞌ uun ndieeꞌ ndu̱ nde̱e̱ naa ne̱ köo̱ꞌ kivi̱ꞌ ni̱ ki̱ꞌi̱n kaꞌnuꞌ yoꞌó.