Yoꞌoꞌ kaꞌán a̱ xaꞌa̱ꞌ kivi̱ꞌ xa̱aꞌ ñu̱u̱ Jerusalén
62
Xaꞌa̱ꞌ a̱ ña̱ ndani̱ i̱ ndoꞌó,
ne̱ ndieeꞌ ñu̱u̱ Sión ndii,
vï̱kuii̱n i̱ ña̱ kaꞌán ndo̱so̱ꞌ i̱ nuu̱ꞌ ndo̱ꞌ.
Te̱ xaꞌa̱ꞌ a̱ ña̱ ndani̱ i̱ ndoꞌó,
ne̱ ndieeꞌ ñu̱u̱ Jerusalén ndii,
nä̱ndiee̱ꞌ i̱ ña̱ kaꞌán ndo̱so̱ꞌ i̱ nuu̱ꞌ ndo̱ꞌ nde̱e̱ ska̱tyiꞌ xa̱ꞌaꞌ ndo̱ꞌ sa̱tyuunꞌ nda̱ku ndo̱ꞌ,
te̱ yiꞌe̱ vi̱ꞌ a̱ nde̱e̱ naa yiꞌé kii̱ꞌ ku̱a̱xi̱ kitúꞌ,
te̱ na̱tuu̱n tu̱ ña̱ sa̱kakú Ndiosí ndoꞌó,
nde̱e̱ naa tuún i̱i̱n tyoon.
2 Kii̱ꞌ sa̱kanꞌ ndii,
ku̱ni̱ sa̱kuuꞌ ne̱ tukuꞌ ña̱ xatyuunꞌ nda̱ku ndo̱ꞌ.
Te̱ sa̱kuuꞌ rey,
te̱ yoo nuu̱ꞌ ñu̱ꞌuꞌ i̱i̱n yivi̱ꞌ,
ku̱ni̱ ña̱ kaꞌnuꞌ ndo̱ꞌ.
Te̱ ndoꞌó ndii,
na̱ti̱i̱n ndo̱ꞌ i̱i̱n kivi̱ꞌ xa̱aꞌ sa̱a̱ Yahvé.
3 Te̱ ku̱ndu̱u̱ ndo̱ꞌ nda̱ꞌaꞌ Yahvé nde̱e̱ naa i̱i̱n corona nda̱tu̱nꞌ xa̱va̱ꞌa̱,
te̱ ku̱ndu̱u̱ tu̱ ndo̱ꞌ nde̱e̱ naa i̱i̱n tivi̱ ña̱ nduꞌu̱ꞌ xíniꞌ i̱i̱n rey nda̱ꞌaꞌ Ndiosí ña̱ xakaꞌnuꞌ ndo̱ꞌ.
4 Köo̱ꞌ kivi̱ꞌ ka̱ kaꞌa̱n ne̱ yivi̱ꞌ xiinꞌ ndo̱ꞌ ndii:
“Ne̱ ndieeꞌ ñu̱u̱ ña̱ ni̱ ndoo̱ i̱i̱n nda̱a̱ꞌ”,
katyi̱ ni̱a̱.
Ni̱ nde̱e̱ köo̱ꞌ kivi̱ꞌ kaꞌa̱n ka̱ tu̱ ni̱a̱ xiinꞌ ndo̱ꞌ ndii:
“Ne̱ ndieeꞌ ñu̱u̱ ña̱ xa̱ ni̱ nduxi̱n ndo̱o̱”,
katyi̱ ni̱a̱.
Süu̱ꞌ ja̱a̱nꞌ ndii,
kivi̱ꞌ xa̱aꞌ ndo̱ꞌ kaꞌa̱n ni̱a̱ xiinꞌ ndo̱ꞌ ndii:
“Hefzi-bá,
ne̱ ñu̱u̱ ña̱ va̱ꞌa̱ kuni Ndiosí xini a̱”,
katyi̱ ni̱a̱.
Te̱ kaꞌa̱n tu̱ ni̱a̱ xiinꞌ ñu̱ꞌuꞌ ndo̱ꞌ ndii:
“Beula,
ñaꞌ siꞌi Ndiosí”,
katyi̱ ni̱a̱.
Sa̱kanꞌ ña̱ ndani̱ va̱ Yahvé ndoꞌó,
te̱ tu̱ndaꞌa̱ꞌ Yahvé ja̱a̱nꞌ xiinꞌ ñu̱ꞌuꞌ ndo̱ꞌ ja̱a̱nꞌ.
5 Nde̱e̱ naa xaaꞌ i̱i̱n te̱ sa̱va̱ kii̱ꞌ tundaꞌáꞌ ra̱ xiinꞌ i̱i̱n ñaꞌ nduꞌu̱ꞌ siee ndii,
ni̱i̱ sa̱kanꞌ tu̱ tu̱ndaꞌa̱ꞌ Ndiosí ña̱ ni̱ xa̱ꞌa̱ ndoꞌó xiinꞌ ndo̱ꞌ.
Te̱ nde̱e̱ naa va̱ꞌa̱ kuni te̱ sa̱va̱ ja̱a̱nꞌ xini ra̱ ñaꞌ siꞌi ra̱ ndii,
niiꞌ sa̱kanꞌ tu̱ va̱ꞌa̱ kuni Ndiosí,
ña̱ xakaꞌnuꞌ e̱ꞌ,
ku̱ni̱ a̱ ndoꞌó.
6 Sa̱a̱ kuaꞌa̱n nuu̱ꞌ nama̱ ña̱ ndasi i̱ꞌnu̱ ñu̱u̱ ndo̱ꞌ ni̱ xa̱ta̱ i̱ te̱ xitoꞌ ñu̱u̱ ndo̱ꞌ ndu̱viꞌ xiinꞌ ñu̱u kaꞌa̱n ra̱ xiinꞌ Ndiosí,
te̱ köo̱ꞌ kivi̱ꞌ vi̱kuii̱n ra̱ ña̱ kaꞌán ra̱ xiinꞌ a̱.
Te̱ ndoꞌó ndii,
kaꞌa̱n ndaꞌvi ndo̱ xiinꞌ Yahvé,
te̱ nä̱ndiee̱ꞌ ndo̱ꞌ,
7 te̱ ni̱ nde̱e̱ tä̱xi̱ tu̱ ndo̱ꞌ na̱ndiee̱ꞌ Ndiosí nde̱e̱ ska̱tyiꞌ nda̱sa̱ va̱ꞌa̱ ñu̱u̱ ndo̱ꞌ Jerusalén,
te̱ sa̱na̱nduuꞌ tu̱ku̱u̱ ña̱ꞌaꞌ a̱ i̱i̱n ñu̱u̱ ña̱ kaꞌán va̱ꞌa̱ ne̱ yivi̱ꞌ xaꞌa̱ꞌ a̱.
8 Te̱ xiinꞌ ña̱ ndi̱e̱eꞌ mi̱iꞌ Yahvé ni̱ ta̱xi̱ a̱ kuento a̱ nuu̱ꞌ ne̱ ndieeꞌ ñu̱u̱ Jerusalén,
kaꞌán a̱ ndii:
“Köo̱ꞌ kivi̱ꞌ ka̱ ta̱xi̱ i̱ sa̱kuiꞌnaꞌ ne̱ yivi̱ꞌ ndi̱kinꞌ ña̱ xaxi̱ꞌ ndoꞌó te̱ ka̱xi̱ꞌ ni̱a̱ a̱,
ni̱ nde̱e̱ tä̱xi̱ ka̱ tu̱ i̱ sa̱kuiꞌnaꞌ ne̱ yivi̱ꞌ vino xa̱aꞌ teꞌ ni̱ xatyuunꞌ ndo̱ꞌ te̱ ni̱ xa̱ꞌa̱ ndo̱ꞌ ko̱ꞌo̱ ne̱ ndi̱va̱ꞌa̱.
9 Süu̱ꞌ ja̱a̱nꞌ ndii,
mi̱iꞌ ndo̱ꞌ tyi̱ꞌi̱ ndi̱kinꞌ trigo,
te̱ mi̱iꞌ tu̱ ndo̱ꞌ ka̱xi̱ꞌ a̱,
te̱ sa̱kaꞌnuꞌ ndo̱ꞌ yuꞌu̱,
Yahvé.
Te̱ ne̱ xatyuunꞌ xaꞌa̱ꞌ yoꞌó uva ko̱ꞌo̱ vino xa̱aꞌ nuu̱ꞌ ki̱ꞌe̱ yu̱kunꞌ kaꞌnuꞌ.
10 Kuaꞌa̱n ki̱e̱e̱ sa̱kuuꞌ ndo̱ꞌ yiꞌeꞌ,
te̱ nda̱sa̱ va̱ꞌa̱ ndo̱ꞌ i̱tyiꞌ miiꞌ ki̱xi̱n ne̱ nduuꞌ kuenta i̱ kii̱ꞌ na̱ndi̱koꞌ ni̱a̱.
Nda̱sa̱ ndaa̱ ndo̱ꞌ i̱tyiꞌ,
te̱ ta̱va̱ꞌ tu̱ ndo̱ꞌ yuu̱ꞌ,
te̱ ndo̱ni̱ꞌi̱ ndo̱ꞌ i̱i̱n bandera nuu̱ꞌ i̱tunꞌ sukun,
te̱ ku̱vi̱ ku̱ni̱ ña̱ꞌaꞌ sa̱kuuꞌ ne̱ tukuꞌ kii̱ꞌ xaa̱ ni̱a̱”,
ni̱ katyi̱ a̱.
11 Ña̱ yo̱ꞌo̱ꞌ kaꞌán Yahvé xiinꞌ sa̱kuuꞌ ne̱ yivi̱ꞌ i̱i̱n yivi̱ꞌ:
“Kaꞌa̱n ndo̱ꞌ xiinꞌ sa̱kuuꞌ ne̱ vi̱ꞌe̱ Israel ña̱ xa̱ ni̱ xa̱a̱ ña̱ sa̱kakú ña̱ꞌaꞌ.
Te̱ ko̱to̱ ndo̱ꞌ,
ndiakaꞌ a̱ ne̱ ni̱ sa̱kakú a̱ ku̱a̱xi̱ a̱,
ne̱ nduuꞌ nde̱e̱ naa tu̱mani̱ꞌ ña̱ ni̱ niꞌi̱ a̱,
te̱ tyu̱u̱n ña̱ ni̱ xa̱a̱ xaꞌa̱ꞌ ne̱ ja̱a̱nꞌ niꞌiꞌ i̱tyiꞌ nuu̱ꞌ a̱ ku̱a̱xi̱ a̱.
12 Ne̱ vi̱ꞌe̱ Israel ndii,
ne̱ su̱ꞌu̱n kuenta yuꞌu̱,
ne̱ ni̱ sa̱kakú yuꞌu̱,
Yahvé,
katyi̱ ne̱ yivi̱ꞌ xiinꞌ ni̱a̱.
Te̱ kaꞌa̱n tu ni̱a̱ ndii:
I̱i̱n ñu̱u̱ ña̱ xtani̱ va̱ ne̱ yivi̱ꞌ nduuꞌ yoꞌó.
Te̱ süu̱ꞌ i̱i̱n ñu̱u̱ ña̱ ni̱ ndoo̱ i̱i̱n nda̱a̱ꞌ ka̱ nduuꞌ u̱nꞌ,
katyi̱ ni̱a̱”,
ni̱ katyi̱ a̱.