Yoꞌoꞌ kaꞌán a̱ xaꞌa̱ꞌ ña̱ sa̱kakú Ndiosí ne̱ vi̱ꞌe̱ Israel
61
Espíritu Tákuiꞌe Yahvé yoo xiinꞌ i̱,
sa̱kanꞌ ña̱ mi̱iꞌ Yahvé ja̱a̱nꞌ ni̱ ta̱xi̱ ndi̱e̱e̱ꞌ i̱,
te̱ ni̱ ti̱ꞌviꞌ a̱ yuꞌu̱ te̱ kaꞌa̱n ndo̱so̱ꞌ i̱ tu̱ꞌu̱n va̱ꞌa̱ nuu̱ꞌ ne̱ ndaꞌvi kuuꞌ.
Te̱ ni̱ ti̱a̱nu̱ꞌ a̱ yuꞌu̱ te̱ na̱tyi̱naá va̱ꞌa̱ i̱ nimá ne̱ sutyiꞌ va̱ i̱ni̱.
Te̱ ni̱ ti̱a̱nu̱ꞌ tu̱ a̱ yuꞌu̱ te̱ kaꞌa̱n ndo̱so̱ꞌ i̱ ña̱ xa̱ ku̱vi̱ ndoo̱ ndiká ne̱ ni̱ xi̱kuꞌu̱n nda̱ꞌaꞌ ña̱ ndi̱va̱ꞌa̱.
Te̱ ni̱ ti̱a̱nu̱ꞌ tu̱ a̱ yuꞌu̱ te̱ sa̱ndoó ndiká i̱ ne̱ ñuꞌuꞌ vi̱ꞌe̱ ka̱a̱.
2 Te̱ ni̱ ti̱a̱nu̱ꞌ tu̱ a̱ yuꞌu̱ te̱ kaꞌa̱n ndo̱so̱ꞌ i̱ ña̱ xa̱ ni̱ tondi̱a̱ kivi̱ꞌ ña̱ tyi̱ndi̱e̱eꞌ Tákuiꞌe Yahvé yooꞌ.
Te̱ kaꞌa̱n tu̱ i̱ xaꞌa̱ꞌ kivi̱ꞌ ña̱ naka̱n Ndiosí,
ña̱ xakaꞌnuꞌ e̱ꞌ ja̱a̱nꞌ,
kuenta nuu̱ꞌ ne̱ ndasiꞌ taꞌanꞌ xiinꞌ a̱.
Te̱ ni̱ ti̱a̱nu̱ꞌ tu̱ a̱ yuꞌu̱ te̱ sa̱kiꞌví i̱ sa̱kuuꞌ ne̱ sutyiꞌ i̱ni̱ xaꞌa̱ꞌ a̱ ña̱ ni̱ xiꞌi̱ i̱i̱n taꞌanꞌ ni̱a̱.
3 Te̱ sa̱kuuꞌ ne̱ ndoꞌoꞌ ndieeꞌ ñu̱u̱ Jerusalén ndii,
ta̱xi̱ i̱ ña̱ nda̱tu̱nꞌ ko̱o̱ ni̱a̱,
nuu̱ꞌ a̱ ña̱ sa̱kaaꞌ i̱ yaa̱ꞌ nuꞌu̱ i̱i̱nꞌ ni̱a̱,
ña̱ va̱ꞌa̱ kuni ni̱a̱ ta̱xi̱ i̱ nda̱ꞌaꞌ ni̱a̱ nuu̱ꞌ a̱ ña̱ ku̱ndi̱e̱e̱ sutyiꞌ i̱ni̱ ni̱a̱,
toto̱ ña̱ niꞌnuꞌ ni̱a̱ kii̱ꞌ xaꞌa ni̱a̱ vi̱koꞌ ta̱xi̱ i̱ ku̱i̱ꞌnu̱ ni̱a̱ nuu̱ꞌ a̱ ña̱ ndiꞌni̱ nimá ni̱a̱ ndieeꞌ ni̱a̱.
Te̱ xaꞌa̱ꞌ a̱ ña̱ xatyuunꞌ nda̱ku ni̱a̱ ndii,
kaꞌa̱n ne̱ yivi̱ꞌ ña̱ nduuꞌ ni̱a̱ nde̱e̱ naa tunꞌ koo̱ꞌ naꞌnuꞌ xa̱va̱ꞌa̱ tunꞌ ni̱ tyi̱ꞌi̱ Yahvé,
te̱ niaꞌa̱ a̱ ña̱ ndi̱e̱eꞌ kooꞌ tyukuuꞌ a̱.
4 Te̱ na̱ka̱sa̱ꞌa̱ tu̱ ni̱a̱ ñu̱u̱ ña̱ xa̱ ni̱ nduxi̱n ndo̱o̱ xta̱ꞌanꞌ kivi̱ꞌ,
te̱ na̱ka̱ta̱ tu̱ ni̱a̱ sa̱kuuꞌ vi̱ꞌe̱ naꞌnuꞌ ña̱ xa̱ ni̱ ndu̱va̱ ndo̱o̱.
Te̱ nda̱sa̱ va̱ꞌa̱ tu̱ ni̱a̱ sa̱kuuꞌ ñu̱u̱ ña̱ xa̱ ni̱ nduxi̱n ndo̱o̱ ña̱ nduuꞌ ndee xiꞌe̱ ku̱i̱ti̱ꞌ miiꞌ ni̱ ndiee̱ i̱ꞌi̱n ti̱ꞌvi̱ ne̱ yivi̱ꞌ.
5 Sa̱kuuꞌ ne̱ tukuꞌ ko̱to̱ mbe̱e̱ sana̱ ndo̱ꞌ,
te̱ sa̱tyuunꞌ tu̱ ni̱a̱ xaꞌa̱ꞌ yo̱ꞌoꞌ uva ndo̱ꞌ,
te̱ ta̱ꞌviꞌ tu̱ ni̱a̱ ñu̱ꞌuꞌ miiꞌ xikaꞌ ndo̱ꞌ.
6 Ndisu̱ ndoꞌó ndii,
sutu̱ xikaꞌ nuuꞌ nuu̱ꞌ Yahvé katyi̱ ne̱ yivi̱ꞌ ja̱a̱nꞌ xiinꞌ ndo̱ꞌ.
Te̱ kaꞌa̱n tu̱ ni̱a̱ ne̱ xikaꞌ nuuꞌ nuu̱ꞌ Ndiosí,
ña̱ xakaꞌnuꞌ e̱ꞌ,
nduuꞌ ndo̱ꞌ,
katyi̱ ni̱a̱.
Te̱ sa̱kuuꞌ ña̱ vikaꞌ ne̱ tukuꞌ ndoo̱ nda̱ꞌaꞌ ndo̱ꞌ ku̱ndu̱u̱ ña̱ꞌa̱ ndo̱ꞌ xiinꞌ ña̱ vikaꞌ ne̱ ja̱a̱nꞌ ka̱ni̱ꞌi̱ xiinꞌ miiꞌ ndo̱ꞌ.
7 Kuaꞌa̱ꞌ ka̱ ña̱ ki̱ꞌi̱n kaꞌnuꞌ ne̱ yivi̱ꞌ na̱ti̱i̱n ndoꞌó nuu̱ꞌ a̱ ña̱ sa̱kaꞌanꞌ ni̱a̱ ndoꞌó xiinꞌ ña̱ sa̱ndi̱e̱e̱ kuiꞌe ni̱a̱ ndoꞌó.
Uvi̱ i̱tyiꞌ kuaꞌa̱ꞌ ka̱ ñu̱ꞌuꞌ ndoo̱ nda̱ꞌaꞌ ndo̱ꞌ,
te̱ sa̱kanꞌ tu̱ ña̱ sii̱ꞌ kuni ndo̱ꞌ ndii,
köo̱ꞌ kivi̱ꞌ kuꞌu̱n ndi̱koꞌ a̱.
8 “Sa̱kanꞌ ña̱ yuꞌu̱,
Yahvé ndii,
xtani̱ va̱ i̱ ña̱ xatyuunꞌ nda̱ku,
te̱ ndasiꞌ va̱ i̱ ña̱ kuiꞌnaꞌ xiinꞌ ña̱ ni̱a̱ꞌa.
Xaꞌa̱ꞌ a̱ ña̱ xatyuunꞌ nda̱ku i̱ ndii,
na̱ta̱xi̱ nda̱ꞌaꞌ ne̱ nduuꞌ kuenta i̱ ña̱ xa̱ta̱ꞌa̱n na̱ti̱i̱n ni̱a̱ xaꞌa̱ꞌ a̱ ña̱ ndoꞌoꞌ ni̱a̱,
te̱ ndoo̱ tu̱ i̱ xiinꞌ ni̱a̱ i̱i̱n kuento ña̱ köo̱ꞌ kivi̱ꞌ ndi̱ꞌi̱.
9 Te̱ sa̱kuuꞌ si̱a̱niꞌ xikaꞌ ni̱a̱ ndii,
ku̱nda̱ni̱ ne̱ tukuꞌ ña̱ yoo ni̱a̱,
te̱ ki̱ꞌi̱n kaꞌnuꞌ ña̱ꞌaꞌ ni̱a̱,
te̱ sa̱kuuꞌ ne̱ yivi̱ꞌ i̱i̱n yivi̱ꞌ ku̱nda̱ni̱ ña̱ i̱i̱n ti̱ꞌvi̱ ne̱ yivi̱ꞌ,
ne̱ ni̱ sa̱ñuꞌuꞌ va̱ Yahvé,
nduuꞌ ni̱a̱.”
10 Va̱ꞌa̱ kuni i̱ xini i̱ Yahvé,
te̱ nakuatiaꞌ va̱ nimá i̱ ni̱ xa̱a̱ Ndiosí,
ña̱ xakaꞌnuꞌ i̱,
sa̱kanꞌ ña̱ ni̱ sa̱na̱kuiꞌnú a̱ yuꞌu̱ ña̱ sa̱kakú a̱,
te̱ ni̱ ti̱suku̱ꞌ a̱ yuꞌu̱ ña̱ xatyuunꞌ nda̱ku,
te̱ nduuꞌ a̱ nde̱e̱ naa toto̱ niꞌnuꞌ i̱.
Ni̱ sa̱kooꞌ tu̱ꞌva̱ a̱ yuꞌu̱ nde̱e̱ naa i̱i̱n te̱ tundaꞌáꞌ ña̱ nakuiꞌnú ra̱ toto̱ va̱ꞌa̱ va̱,
uun nde̱e̱ naa i̱i̱n ñaꞌ tundaꞌáꞌ ña̱ nakiꞌí ka̱a̱ va̱ꞌa̱ va̱ nda̱ꞌaꞌ aꞌ xiinꞌ suku̱nꞌ aꞌ te̱ tu̱ndaꞌa̱ꞌ aꞌ.
11 Sa̱kanꞌ ña̱ sa̱a̱ niiꞌ xaaꞌ ñu̱ꞌuꞌ nakún kuꞌu̱ nuu̱ꞌ a̱,
uun nde̱e̱ naa xaaꞌ ña̱ ta̱ta̱ nakún ndi̱kinꞌ a̱ ña̱ tyiꞌiꞌ ne̱ yivi̱ꞌ ndii,
niiꞌ sa̱kanꞌ sa̱a̱ tu̱ Tákuiꞌe Yahvé ña̱ ko̱o̱ ña̱ xatyuunꞌ nda̱ku ne̱ yivi̱ꞌ ka̱niiꞌ i̱i̱n yivi̱ꞌ xiinꞌ ña̱ sa̱kaꞌnuꞌ ña̱ꞌaꞌ ni̱a̱ nuu̱ꞌ sa̱kuuꞌ ne̱ tukuꞌ.