Yoꞌoꞌ kaꞌán a̱ xaꞌa̱ꞌ ña̱ sa̱ñuꞌuꞌ Yahvé ñu̱u̱ Sión
66
Ña̱ yo̱ꞌo̱ꞌ kaꞌán Yahvé:
“Ndi̱viꞌ nduuꞌ miiꞌ nduꞌu̱ꞌ i̱,
te̱ ñu̱ꞌuꞌ i̱i̱n yivi̱ꞌ nduuꞌ miiꞌ itaꞌ xaꞌa̱ꞌ i̱.
Sa̱kanꞌ na kuiiꞌ köo̱ꞌ nde̱e̱ i̱i̱n vi̱ꞌe̱ ku̱vi̱ ka̱sa̱ꞌa̱ ndoꞌó ku̱nduꞌu̱ꞌ yuꞌu̱,
te̱ köo̱ꞌ tu̱ nde̱e̱ i̱i̱n xaanꞌ miiꞌ ku̱vi̱ ku̱nduꞌu̱ꞌ i̱ ta̱xi̱ ndo̱ꞌ nda̱ꞌaꞌ i̱.
2 Nda̱ꞌaꞌ miiꞌ yuꞌu̱ ni̱ xa̱ꞌa̱ sa̱kuuꞌ ña̱ ja̱a̱nꞌ,
sa̱kanꞌ na kuiiꞌ yoo a̱.
Te̱ ndani̱ va̱ i̱ ne̱ ndaꞌvi kuuꞌ nimá,
te̱ kuvita tu̱ i̱ni̱ ni̱a̱ xaꞌa̱ꞌ ne̱ yivi̱ꞌ,
te̱ kiꞌinꞌ kaꞌnuꞌ ni̱a̱ tu̱ꞌu̱n i.
Yuꞌu̱ Yahvé nduuꞌ ña̱ kaꞌán ña̱ kaa̱ꞌ”,
ni̱ katyi̱ Ndiosí.
3 Kaꞌán ka̱ Ndiosí ndii:
“Ne̱ xaꞌni̱ꞌ ki̱tiꞌ te̱ nasoko̱ꞌ ni̱a̱ riꞌ nuu̱ꞌ i̱ ndii,
nduuꞌ ni̱a̱ nde̱e̱ naa ne̱ xaꞌni̱ꞌ ne̱ yivi̱ꞌ.
Te̱ ne̱ nasoko̱ꞌ mbe̱e̱ ndii,
nduuꞌ ni̱a̱ nde̱e̱ naa ne̱ kendoso̱ꞌ suku̱nꞌ naya̱ꞌ.
Te̱ ne̱ nasoko̱ꞌ ndi̱kinꞌ trigo ndii,
nduuꞌ ni̱a̱ nde̱e̱ naa ne̱ nasoko̱ꞌ níiꞌ kini̱.
Te̱ ne̱ xaꞌmiꞌ su̱xa̱ tyu̱ꞌma ndii,
nduuꞌ ni̱a̱ nde̱e̱ naa ne̱ xakaꞌnuꞌ ndiosí saka.
Sa̱kanꞌ ña̱ ne̱ ja̱a̱nꞌ ndii,
ña̱ xaaꞌ mi̱iꞌ ni̱a̱ ni̱ na̱ka̱xi̱n ni̱a̱,
te̱ nakuatiaꞌ ni̱a̱ nuu̱ꞌ ña̱ ki̱ni̱ ña̱ xaaꞌ ni̱a̱ ja̱a̱nꞌ.
4 Xaꞌa̱ꞌ a̱ ja̱a̱nꞌ na sa̱kanꞌ tu̱ yuꞌu̱ ndii,
na̱ka̱xi̱n i̱ tu̱ndoꞌo̱ꞌ ña̱ sa̱ndoꞌoꞌ ña̱ꞌaꞌ i̱,
te̱ ti̱ꞌviꞌ i̱ ña̱ yiꞌvi xa̱va̱ꞌa̱ ne̱ ja̱a̱nꞌ ku̱ndo̱ꞌo̱ ni̱a̱.
Sa̱kanꞌ ña̱ nde̱e̱ i̱i̱n köo̱ꞌ ni̱ na̱ku̱i̱i̱n kii̱ꞌ ni̱ ka̱na̱ ña̱ꞌaꞌ i̱.
Te̱ kii̱ꞌ ni̱ kaꞌa̱n i̱ xiinꞌ ni̱a̱ ndii,
nde̱e̱ i̱i̱n ni̱a̱ nï̱ ta̱xi̱ so̱ꞌo̱.
Süu̱ꞌ ja̱a̱nꞌ ndii,
nuu̱ꞌ niꞌnuꞌ i̱ ni̱ xa̱a̱ ni̱a̱ ña̱ ni̱a̱ꞌa,
te̱ ni̱ na̱ka̱xi̱n ni̱a̱ ña̱ xtäni̱ yuꞌu̱ xaaꞌ ni̱a̱.
Yoꞌoꞌ kaꞌán xaꞌa̱ꞌ ña̱ sa̱nduxín Ndiosí sa̱kuuꞌ ne̱ xaaꞌ ña̱ ni̱a̱ꞌa
5 ’Ndoꞌó,
ne̱ xitoꞌ kaꞌnuꞌ va̱ tu̱ꞌu̱n yu̱ꞌuꞌ,
Yahvé,
kii̱ꞌ xini so̱ꞌo̱ ndo̱ꞌ a̱ ndii,
ku̱ni̱ so̱ꞌo̱ ndo̱ꞌ ña̱ kaꞌán a̱ xiinꞌ ndo̱ꞌ.
Xa̱ ne̱ taꞌanꞌ mi̱iꞌ ndo̱ꞌ,
ne̱ ndasiꞌ ndoꞌó,
te̱ saxiooꞌ tu̱ ni̱a̱ ndoꞌó xaꞌa̱ꞌ a̱ ña̱ xitoꞌ kaꞌnuꞌ ndo̱ꞌ yuꞌu̱,
kaꞌán ndii:
Na ki̱ꞌi̱n kaꞌnuꞌ e̱ꞌ Yahvé,
te̱ ku̱ni̱ e̱ꞌ ña̱ va̱ꞌa̱ kuni ndoꞌ,
katyi ni̱a̱.
’Ndisu̱ mi̱iꞌ ni̱a̱ ndii,
ku̱ka̱ꞌa̱n ndi̱ꞌi̱ nuu̱ꞌ ni̱a̱.
6 Tiakú kuaaꞌ ne̱ yivi̱ꞌ ñu̱u̱ Jerusalén.
Te̱ nde̱e̱ ti̱xi̱n yu̱kunꞌ kaꞌnuꞌ tiakú kuaaꞌ i̱yo̱ va̱ ne̱ yivi̱ꞌ.
Tatyi̱ꞌ yu̱ꞌuꞌ,
Yahvé,
nduuꞌ a̱,
sa̱kanꞌ ña̱ te̱ ndasiꞌ taꞌanꞌ xiinꞌ a̱ sandoꞌoꞌ a̱.
7 ’Ña̱ kuní ka̱ xa̱ꞌaꞌ uꞌvi̱ xini ñu̱u̱ Jerusalén,
te̱ xa̱ ni̱ tuvi̱ i̱i̱n siꞌe̱ a̱.
Te̱ ña̱ kuní ka̱ taꞌvi̱ꞌ ti̱kui su̱ntiaꞌ te̱ kuañuꞌu̱,
te̱ ni̱ sa̱kakuꞌ a̱ i̱i̱n tiaa̱ nde̱e̱ naa ndoꞌoꞌ i̱i̱n ña̱ꞌaꞌ kii̱ꞌ sakakuꞌ aꞌ.
8 Köo̱ꞌ kivi̱ꞌ ni̱ xi̱ni̱ so̱ꞌo̱ nde̱e̱ i̱i̱n ne̱ yivi̱ꞌ naa ña̱ ja̱a̱nꞌ sa̱aꞌ.
Te̱ köo̱ꞌ kivi̱ꞌ tu̱ ni̱ xi̱ni̱ nde̱e̱ i̱i̱n ne̱ yivi̱ꞌ naa ña̱ ja̱a̱nꞌ.
Xiní e̱ꞌ ndii,
kü̱vi̱ ka̱ku̱ i̱i̱n ñu̱u̱ tyiee̱ i̱i̱n nda̱a̱ꞌ soꞌoꞌ kivi̱ꞌ ku̱i̱ti̱ꞌ ni̱ nde̱e̱ kü̱vi̱ tu̱ ka̱ku̱ i̱i̱n ñu̱ꞌuꞌ i̱i̱n kani̱ꞌ ku̱i̱ti̱ꞌ.
Ndisu̱ kii̱ꞌ xa̱ꞌaꞌ uꞌvi̱ xini ñu̱u̱ Jerusalén ndii,
xa̱ ni̱ tuvi̱ kiꞌinꞌ tiaa̱ siꞌe̱ a̱.”
9 Kaꞌán yuꞌu̱ Yahvé ndii:
“Xaꞌa̱ꞌ a̱ ña̱ yuꞌu̱ nduuꞌ ña̱ nuniaꞌ sokoꞌ ña̱ꞌaꞌ te̱ kakuꞌ siꞌe̱ aꞌ ndii,
köo̱ꞌ kivi̱ꞌ nu̱niaꞌ i̱ sokoꞌ i̱i̱n ña̱ꞌaꞌ te̱ tä̱xi̱ i̱ tuvi̱ siꞌe̱ aꞌ,
ni̱ nde̱e̱ köo̱ꞌ kivi̱ꞌ tu̱ nda̱si̱ i̱ sokoꞌ i̱i̱n ña̱ꞌaꞌ te̱ kü̱vi̱ tuvi̱ siꞌe̱ aꞌ.
Sa̱kanꞌ ña̱ yuꞌu̱ nduuꞌ ña̱ xaaꞌ sa̱kanꞌ te̱ kakuꞌ siꞌe̱ aꞌ”,
katyi Ndiosí ña̱ xakaꞌnuꞌ e̱ꞌ.
10 Ndisu̱ sa̱kuuꞌ ndoꞌó,
ne̱ ndani̱ ñu̱u̱ Jerusalén ndii,
na̱ku̱a̱tiaꞌ nimá ndo̱ꞌ xiinꞌ a̱,
te̱ va̱ꞌa̱ tu̱ ku̱ni̱ ndo̱ꞌ xiinꞌ a̱.
Te̱ sa̱kanꞌ tu̱ sa̱kuuꞌ ndoꞌó,
ne̱ ni̱ ku̱su̱tyiꞌ i̱ni̱ xaꞌa̱ꞌ a̱ ndii,
va̱ꞌa̱ xa̱va̱ꞌa̱ kuni ndo̱ꞌ xaꞌa̱ꞌ a̱.
11 Sa̱kanꞌ te̱ na̱ti̱i̱n ndo̱ꞌ kuaꞌa̱ꞌ va̱ ña̱ va̱ꞌa̱ ña̱ yoo ñu̱u̱ Jerusalén ja̱a̱nꞌ nde̱e̱ nda̱ꞌni̱ ndo̱ꞌ nde̱e̱ naa xaaꞌ i̱i̱n te̱ kuañuꞌu̱ kii̱ꞌ tyityinꞌ ra̱ ndo̱soꞌ si̱ꞌiꞌ ra̱ nde̱e̱ ndaꞌni ra̱,
te̱ xiinꞌ ña̱ ja̱a̱nꞌ sakiꞌví ña̱ꞌaꞌ si̱ꞌiꞌ ra̱.
12 Ña̱ yo̱ꞌo̱ꞌ kaꞌán Yahvé ndii:
“Mi̱iꞌ yuꞌu̱ ta̱xi̱ kuaꞌa̱ꞌ ña̱ mani̱ꞌ ko̱o̱ xiinꞌ ne̱ ndieeꞌ ñu̱u̱ Jerusalén.
Te̱ ta̱xi̱ tu̱ i̱ ko̱o̱ kuaꞌa̱ꞌ ña̱ vikaꞌ ni̱a̱,
te̱ sa̱kuuꞌ ña̱ vikaꞌ ne̱ tukuꞌ na̱xaa̱ nda̱ꞌaꞌ ne̱ ja̱a̱nꞌ.
Te̱ ne̱ tukuꞌ ja̱a̱nꞌ sa̱mani̱ꞌ siꞌe̱ ne̱ ndieeꞌ ñu̱u̱ Jerusalén ja̱a̱nꞌ.
Te̱ ne̱ ja̱a̱nꞌ tu̱ ko̱ni̱ꞌi̱ siꞌe̱ ni̱a̱ kii̱ꞌ kuꞌu̱n ni̱a̱,
te̱ nuu̱ꞌ kondo̱ ni̱a̱ ku̱ndi̱e̱e̱ ne̱ ja̱a̱nꞌ sakuatiaꞌ ña̱ꞌaꞌ ni̱a̱.
13 Mi̱iꞌ yuꞌu̱ sa̱kiꞌví ndoꞌó,
ne̱ ndieeꞌ ñu̱u̱ Jerusalén,
nde̱e̱ naa xaaꞌ i̱i̱n ña̱ꞌaꞌ kii̱ꞌ sakiꞌví aꞌ siꞌe̱ aꞌ,
te̱ ñu̱u̱ ja̱a̱nꞌ sa̱kiꞌví i̱ sa̱kuuꞌ ndo̱ꞌ”,
ni̱ katyi̱ a̱.
14 Kii̱ꞌ ku̱ni̱ ndo̱ꞌ sa̱kuuꞌ ña̱ ja̱a̱nꞌ ndii,
va̱ꞌa̱ va̱ ku̱ni̱ nimá ndo̱ꞌ.
Te̱ na̱ku̱naa̱ tu̱ ndi̱e̱e̱ꞌ sa̱kuuꞌ ndo̱ꞌ nde̱e̱ naa kuꞌu̱.
Te̱ miiꞌ Yahvé niaꞌa̱ ña̱ ndi̱e̱eꞌ a̱ te̱i̱n yooꞌ,
ne̱ xikaꞌ nuuꞌ nuu̱ꞌ a̱.
Ndisu̱ te̱i̱n ne̱ ndasiꞌ taꞌanꞌ xiinꞌ a̱ ndii,
ña̱ xiꞌé ku̱i̱ti̱ꞌ a̱ niaꞌa̱ a̱ te̱i̱n ne̱ ja̱a̱nꞌ.
15 Sa̱kanꞌ ña̱ Yahvé ndii,
te̱i̱n ñuꞌu̱ ndatin naá a̱ ku̱a̱xi̱ a̱.
Te̱ karreta,
tunꞌ naá a̱ ku̱a̱xi̱ a̱ ndii,
ka̱ma̱ nu̱ꞌ nde̱e̱ naa ti̱katyi̱ꞌ vi̱ꞌ.
Ku̱a̱xi̱ a̱ te̱ sa̱ndoꞌoꞌ a̱ sa̱kuuꞌ ne̱ ndasiꞌ taꞌanꞌ xiinꞌ a̱,
te̱ ña̱ sa̱ndoꞌoꞌ ña̱ꞌaꞌ a̱ ndii,
nduuꞌ a̱ nde̱e̱ naa ñuꞌu̱ ndatin.
16 Ñuꞌu̱ xiinꞌ ityi̱ tiinꞌ Yahvé,
te̱ sa̱naꞌmá a̱ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ kuaꞌa̱ꞌ xa̱va̱ꞌa̱ ne̱ yivi̱ꞌ ka̱ꞌni̱ꞌ Yahvé xiinꞌ ityi̱ kivi̱ꞌ ja̱a̱nꞌ.
17 Te̱ kaꞌán Ndiosí ndii:
“Sa̱kuuꞌ ne̱ ndasaꞌ ndooꞌ xiinꞌ miiꞌ xiinꞌ ne̱ sañuꞌuꞌ xiinꞌ miiꞌ xaꞌa̱ꞌ ña̱ ta̱ta̱ nuu̱ꞌ ndiosí saka xixiꞌ ni̱a̱ nde̱i̱ꞌ kini̱ xiinꞌ nde̱i̱ꞌ ti̱inꞌ xiinꞌ sa̱kuuꞌ nuu̱ꞌ i̱nga̱ nde̱i̱ꞌ ña̱ täxiꞌ tu̱ꞌu̱n nde̱iꞌ yuꞌu̱,
Ndiosí,
ka̱xi̱ꞌ ni̱a̱ ndii,
ka̱ꞌni̱ꞌ ndooꞌ yuꞌu̱,
Yahvé,
sa̱kuuꞌ ne̱ ja̱a̱nꞌ.
18 ’Xaꞌa̱ꞌ a̱ ña̱ xiní kaxiꞌ yuꞌu̱ sa̱kuuꞌ ña̱ xaaꞌ ne̱ jaa̱nꞌ xiinꞌ ña̱ xanini ni̱a̱,
sa̱kan na kuiiꞌ xaa̱ i̱i̱n kivi̱ꞌ ña̱ nda̱sa̱ i̱i̱n i̱ sa̱kuuꞌ ne̱ yivi̱ꞌ i̱i̱n yivi̱ꞌ xiinꞌ sa̱kuuꞌ ne̱ yoo tu̱ꞌu̱n mi̱iꞌ,
te̱ ki̱xi̱n ni̱a̱ te̱ ku̱ni̱ ni̱a̱ ña̱ kaꞌnuꞌ i̱.
19 Te̱ sa̱a̱ i̱ i̱i̱n tyu̱u̱n kaꞌnuꞌ te̱i̱n ne̱ ja̱a̱nꞌ.
Te̱ ne̱ kaku̱ te̱i̱n ne̱ ja̱a̱nꞌ ti̱ꞌviꞌ i̱ kuꞌu̱n xiinꞌ tu̱ꞌu̱n yu̱ꞌuꞌ i̱ te̱i̱n ne̱ tukuꞌ sa̱kuuꞌ ñu̱u̱,
naa kuuꞌ ñu̱u̱ Tarsis,
xiinꞌ ñu̱u̱ Fut,
xiinꞌ ñu̱u̱ Lud,
te̱ ñu̱u̱ ja̱a̱nꞌ ndieeꞌ te̱ yivi̱ꞌ,
te̱ tyu̱u̱n va̱ ka̱ti̱a̱ kuxi̱,
xiinꞌ ñu̱u̱ Tubal,
xiinꞌ ñu̱u̱ Javán,
xiinꞌ ñu̱u̱ ña̱ ñuꞌuꞌ sa̱a̱ kuaꞌa̱n yu̱ꞌuꞌ mi̱ni̱ miiꞌ tiäꞌa̱an ku̱ni̱ so̱ꞌo̱ ne̱ yivi̱ꞌ xaꞌa̱ꞌ i̱,
ni̱ nde̱e̱ tiäꞌa̱an ku̱ni̱ tu̱ ni̱a̱ ña̱ kaꞌnuꞌ i̱,
te̱ kaꞌa̱n ndo̱so̱ꞌ ni̱a̱ xaꞌa̱ꞌ ña̱ kaꞌnuꞌ i̱ te̱i̱n ne̱ tukuꞌ ja̱a̱nꞌ.
20 Te̱ sa̱kuuꞌ ne̱ taꞌanꞌ ndo̱ꞌ,
ne̱ ndieeꞌ te̱i̱n ne̱ tukuꞌ ndii,
na̱ka̱ ña̱ꞌaꞌ ndo̱ꞌ te̱ ki̱xi̱n ni̱a̱ xíniꞌ i̱kuꞌ su̱ꞌu̱n ña̱ nduuꞌ kuenta i̱,
ña̱ iinꞌ ñu̱u̱ Jerusalén,
te̱ ku̱ndu̱u̱ ni̱a̱ ndi̱ti̱a̱ i̱.
Te̱ ki̱xi̱n ni̱a̱ xata̱ꞌ kuei xiinꞌ xata̱ꞌ carreta xiinꞌ nuu̱ꞌ tunꞌ xi̱to̱ xiinꞌ xata̱ꞌ mola xiinꞌ xata̱ꞌ camello.
Te̱ ku̱ndu̱u̱ ni̱a̱ nde̱e̱ naa tu̱mani̱ꞌ ña̱ ñuꞌuꞌ ti̱xi̱n i̱i̱n nda̱tyuunꞌ ña̱ va̱ꞌa̱ va̱ ni̱ ndo̱o̱,
ña̱ niꞌiꞌ ne̱ vi̱ꞌe̱ Israel kii̱ꞌ ku̱a̱xi̱ ni̱a̱ yu̱kunꞌ yuꞌu̱.
21 Te̱ te̱i̱n ne̱ ja̱a̱nꞌ tu̱ na̱ka̱xi̱n i̱ sa̱va̱ te̱ yivi̱ꞌ,
te̱ ku̱ndu̱u̱ sutu̱,
xiinꞌ te̱ ku̱ndu̱u̱ te̱ nakuatuꞌ.
Yuꞌu̱ Yahvé nduuꞌ ña̱ kaꞌán ña ka̱a̱ꞌ.
22 ’Sa̱kanꞌ ña̱ nde̱e̱ naa köo̱ꞌ kivi̱ꞌ kuꞌu̱n ndi̱koꞌ ña̱ ko̱o̱ ndi̱viꞌ xa̱aꞌ xiinꞌ ñu̱ꞌuꞌ i̱i̱n yivi̱ꞌ xa̱aꞌ ña̱ ka̱sa̱ꞌa̱ i̱ ja̱a̱nꞌ ndii,
niiꞌ sa̱kanꞌ tu̱ ne̱ si̱a̱niꞌ xikaꞌ ndo̱ꞌ ndii,
köo̱ꞌ kivi̱ꞌ ndi̱ꞌi̱ ni̱a̱,
te̱ köo̱ꞌ kivi̱ꞌ tu̱ kuꞌu̱n ndi̱koꞌ kivi̱ꞌ ndo̱ꞌ.
23 Te̱ sa̱a̱ ña̱ nakuiín kivi̱ꞌ ña̱ nduxa̱aꞌ yoo̱ꞌ xiinꞌ sa̱a̱ kivi̱ꞌ ña̱ xina̱ndiee̱ꞌ ndo̱ꞌ ndii,
ki̱xi̱n sa̱kuuꞌ ndo̱ꞌ te̱ sa̱kaꞌnuꞌ ndo̱ꞌ yuꞌu̱,
katyi̱ yuꞌu̱,
Yahvé.
24 Sa̱kanꞌ te̱ kii̱ꞌ ki̱e̱e̱ ndo̱ꞌ ki̱ꞌe̱ ndii,
ku̱ni̱ ndo̱ꞌ ndieeꞌ ñu̱ꞌuꞌ ndeꞌi̱ ne̱ ni̱ xa̱teiꞌ nuu̱ꞌ i̱,
ne̱ ni̱ xa̱ꞌni̱ꞌ i̱.
Sa̱kanꞌ ña̱ köo̱ꞌ kivi̱ꞌ ku̱vi̱ ti̱ku̱xiꞌ,
tiꞌ xaxi̱ꞌ ña̱ꞌaꞌ,
te̱ köo̱ꞌ kivi̱ꞌ ndaꞌva̱ tu̱ ñuꞌu̱ ña̱ xaꞌmiꞌ ña̱ꞌaꞌ.
Te̱ ku̱nda̱siꞌ va̱ sa̱kuuꞌ ne̱ yivi̱ꞌ kii̱ꞌ ku̱ni̱ ni̱a̱ ndieeꞌ ñu̱ꞌuꞌ ndeꞌi̱ ne̱ ja̱a̱nꞌ,
katyi yuꞌu̱,
Yahvé Ndiosí”,
ni̱ katyi̱ a̱.