Yoꞌoꞌ kaꞌán a̱ xaꞌa̱ꞌ ku̱a̱tyi̱ ne̱ vi̱ꞌe̱ Israel xiinꞌ xaꞌa̱ꞌ ña̱ sa̱ndoꞌoꞌ ña̱ꞌaꞌ Ndiosí
59
Ko̱to̱ ndo̱ꞌ,
kuäsa̱ꞌ ndiꞌiꞌ ña̱ ndi̱e̱eꞌ Yahvé te̱ sa̱kakú a̱ ndoꞌó,
ni̱ nde̱e̱ kuäsa̱ꞌ tu̱ ni̱ ku̱soꞌoꞌ a̱ te̱ ku̱ni̱ so̱ꞌo̱ a̱ ña̱ kaꞌán ndo̱ꞌ xiinꞌ a̱.
2 Ña̱ ni̱a̱ꞌa ña̱ xaaꞌ mi̱iꞌ ndo̱ꞌ nduuꞌ ña̱ ni̱ sa̱xi̱o̱o̱ ndoꞌó nuu̱ꞌ Ndiosí.
Te̱ ku̱a̱tyi̱ ña̱ xaaꞌ ndo̱ꞌ ja̱a̱nꞌ ni̱ xa̱a̱ sa̱kanꞌ te̱ ni̱ ku̱xikaꞌ Ndiosí nuu̱ꞌ ndo̱ꞌ,
te̱ kü̱vi̱ ku̱ni̱ so̱ꞌo̱ a̱ ña̱ kaꞌán ndo̱ꞌ xiinꞌ a̱.
3 Sa̱kanꞌ ña̱ nda̱ꞌaꞌ ndo̱ꞌ ndii,
kuaꞌa̱ꞌ va̱ níiꞌ ne̱ yivi̱ꞌ,
ne̱ ni̱ xa̱ꞌni̱ꞌ ndo̱ꞌ,
ndisoꞌ a̱.
Te̱ sa̱kanꞌ tu̱ nuu̱ꞌ nda̱ꞌaꞌ ndo̱ꞌ ndii,
nde̱e̱ naa ni̱ ku̱ndeꞌi̱ vi̱ꞌ a̱ ña̱ kuaꞌa̱ꞌ va̱ ku̱a̱tyi̱ ndo̱ꞌ ndisoꞌ a̱.
Te̱ tyituꞌ vi̱ꞌ yu̱ꞌuꞌ ndo̱ꞌ ñuꞌuꞌ tu̱n vixi̱,
te̱ kuaꞌa̱ꞌ va̱ ña̱ ni̱a̱ꞌa kaꞌán ndo̱ꞌ xiinꞌ yaa̱ꞌ ndo̱ꞌ.
4 Nde̱e̱ i̱i̱n ndo̱ꞌ küni sa̱tyuunꞌ nda̱ku,
te̱ nde̱e̱ i̱i̱n tu̱ ndo̱ꞌ küni kaꞌnu̱ nda̱ku ku̱a̱tyi̱ ne̱ yivi̱ꞌ nuu̱ꞌ kuesí.
Te̱ kuento ña̱ kuäsa̱ꞌ kuní ku̱i̱ti̱ꞌ kandixaꞌ ndo̱ꞌ nde̱e̱ naa nakuisoꞌ ndo̱ꞌ xaaꞌ ña̱ ni̱a̱ꞌa,
te̱ sakakuꞌ ndo̱ꞌ ku̱a̱tyi̱.
5 Nde̱e̱ naa ne̱ kandiꞌiꞌ ndivi̱ꞌ koo̱ꞌ ka̱a̱ nduuꞌ ndo̱ꞌ,
te̱ nduuꞌ tu̱ ndo̱ꞌ nde̱e̱ naa ne̱ kunuꞌ xi̱nduꞌva̱ ti̱ndoo̱ꞌ.
Te̱ yo̱o̱ ka̱ ka̱xi̱ꞌ ndivi̱ꞌ ja̱a̱nꞌ ndii,
ku̱vi̱ ni̱a̱,
te̱ naaꞌ ku̱ꞌniꞌ yo̱o̱ ka̱ ndivi̱ꞌ ja̱a̱nꞌ ndii,
ke̱ta̱ koo̱ꞌ ka̱a̱ ti̱xi̱n a̱.
6 Yuꞌva̱ ti̱ndoo̱ꞌ ña̱ xaꞌa ne̱ ja̱a̱nꞌ ndii,
nde̱e̱ i̱i̱n nuu̱ꞌ toto̱ kü̱vi̱ ka̱sa̱ꞌa̱ e̱ꞌ xiinꞌ a̱.
Te̱ sa̱kuuꞌ toto̱ ña̱ kunuꞌ ni̱a̱ ndii,
kuäsa̱ꞌ kuní xa̱tyiꞌ a̱ nde̱e̱ i̱i̱n ne̱ yivi̱ꞌ kü̱vi̱ ku̱i̱ꞌnu̱ a̱.
Sa̱kanꞌ ña̱ ña̱ xaaꞌ ni̱a̱ ndii,
xa̱ mi̱iꞌ ndiꞌiꞌ ña̱ ni̱a̱ꞌa nduuꞌ a̱,
te̱ xa̱ mi̱iꞌ ndiꞌiꞌ tu̱ ña̱ i̱yo̱ xaaꞌ nda̱ꞌaꞌ ni̱a̱.
7 Taxtaꞌanꞌ ni̱a̱ kuaꞌa̱n sa̱a̱ ni̱a̱ ña̱ ni̱a̱ꞌa,
te̱ yatyi̱ va̱ kuaꞌa̱n ni̱a̱ te̱ xaꞌni̱ꞌ ni̱a̱ ne̱ yivi̱ꞌ,
ne̱ köo̱ꞌ ku̱a̱tyi̱.
Te̱ xa̱ nuu̱ꞌ xaꞌa̱ꞌ ña̱ ki̱ni̱ xanini ni̱a̱,
te̱ miiꞌ ka̱ kuaꞌa̱n ni̱a̱ ndii,
sanduxín ndo̱o̱ ni̱a̱,
te̱ sáti̱viꞌ ndo̱o̱ tu̱ ni̱a̱ ne̱ yivi̱ꞌ.
8 Xïní xa̱tyiꞌ ne̱ ja̱a̱nꞌ ku̱ndi̱e̱e̱ mani̱ꞌ ni̱a̱ xiinꞌ ne̱ yivi̱ꞌ ni̱ nde̱e̱ xätyuunꞌ nda̱ku tu̱ ni̱a̱.
Te̱ sa̱kuuꞌ i̱tyiꞌ ña̱ xikaꞌ ni̱a̱ ndii,
xa̱ mi̱iꞌ ndiꞌiꞌ ña̱ vä̱ꞌa̱ nduuꞌ a̱.
Te̱ yo̱o̱ ka̱ sa̱a̱ ña̱ xaaꞌ ne̱ ja̱a̱nꞌ ndii,
köo̱ꞌ kivi̱ꞌ ko̱o̱ ña̱ mani̱ꞌ nimá ni̱a̱.
9 Xaꞌa̱ꞌ a̱ ja̱a̱nꞌ na köo̱ꞌ ka̱ nde̱e̱ i̱i̱n yooꞌ,
ne̱ xatyuunꞌ nda̱ku.
Te̱ xïní xa̱tyiꞌ tu̱ e̱ꞌ ña̱ sa̱tyuunꞌ nda̱ku e̱ꞌ.
Ni̱ ndiatu̱ e̱ꞌ ñuꞌu̱ ña̱ ko̱tuu̱n nuu̱ꞌ e̱ꞌ,
ndisu̱ ni̱ ndoo̱ e̱ꞌ ndieeꞌ i̱i̱n yaví e̱ꞌ.
Ni̱ ndiatu̱ i̱ni̱ e̱ꞌ ka̱ka̱ e̱ꞌ miiꞌ tuviꞌ yiꞌé ñuꞌu̱,
ndisu̱ miiꞌ i̱i̱n yaví ku̱i̱ti̱ꞌ xikaꞌ e̱ꞌ.
10 Nama̱ vi̱ꞌe̱ ku̱i̱ti̱ꞌ tiinꞌ ndi̱a̱a̱ e̱ꞌ te̱ xikaꞌ e̱ꞌ nde̱e̱ naa ne̱ kuiꞌe nuu̱ꞌ,
te̱ kaku̱ nda̱ꞌaꞌ e̱ꞌ xikaꞌ e̱ꞌ nde̱e̱ naa ne̱ köo̱ꞌ ndu̱tyiꞌ nuu̱ꞌ nduuꞌ e̱ꞌ.
I̱i̱n keꞌinꞌ xa̱tyiꞌ kekiꞌí e̱ꞌ xikaꞌ e̱ꞌ nde̱e̱ naa ñu̱u tee̱ꞌ ndee tiaku e̱ꞌ ndii,
ndieeꞌ i̱i̱n yaví e̱ꞌ nde̱e̱ naa xa̱ ni̱ xiꞌi̱ xa̱tyiꞌ.
11 Sa̱kuuꞌ e̱ꞌ xiña nde̱e̱ naa oso,
tiꞌ xiꞌí so̱ko̱,
te̱ tanaꞌ e̱ꞌ nde̱e̱ naa paloma,
tiꞌ ni̱ tu̱xuꞌví.
Ndiatuꞌ i̱ni̱ e̱ꞌ xaꞌa̱ꞌ ña̱ xatyuunꞌ nda̱ku,
ndisu̱ köo̱ꞌ a̱ nuu̱ꞌ e̱ꞌ.
Ndiatuꞌ i̱ni̱ e̱ꞌ xaꞌa̱ꞌ ña̱ sa̱kakú yooꞌ,
ndisu̱ ni̱ ku̱xikaꞌ ndi̱ꞌi̱ a̱ nuu̱ꞌ e̱ꞌ.
12 Sa̱kanꞌ ña̱ ni̱ ku̱kuaꞌa̱ꞌ va̱ ku̱a̱tyi̱ ndu̱ nuu̱ꞌ yoꞌó,
Ndiosí,
te̱ xa̱ mi̱iꞌ ku̱a̱tyi̱ ndu̱ ja̱a̱nꞌ nduuꞌ ña̱ ndieeꞌ yu̱ꞌuꞌ xaꞌa̱ꞌ ndu̱ nuu̱ꞌ u̱nꞌ.
Sa̱kanꞌ ña̱ xiní kaxiꞌ ndu̱ ña̱ xaaꞌ te̱ xaaꞌ ndu̱ ña̱ ni̱a̱ꞌa,
te̱ xiní tu̱ ndu̱ ku̱a̱tyi̱ ña̱ ndisoꞌ ndu̱,
13 naa kuuꞌ ña̱ ni̱ xa̱ so̱ꞌo̱ ndu̱ nuu̱ꞌ yoꞌó,
Yahvé,
xiinꞌ ña̱ kaꞌán ndu̱ tu̱n vixi̱ nuu̱ꞌ u̱nꞌ,
xiinꞌ ña̱ ni̱ ku̱xi̱o̱o̱ ndu̱ꞌ nuu̱ꞌ yoꞌó ña̱ xakaꞌnuꞌ ndu̱,
xiinꞌ ña̱ kaꞌán ndu̱ tu̱n vixi̱ xata̱ꞌ ne̱ yivi̱ꞌ,
xiinꞌ ña̱ xateiꞌ ndu̱ nuu̱ꞌ u̱nꞌ,
xiinꞌ ña̱ ndatuꞌunꞌ tuní ndu̱ xaꞌa̱ꞌ ña̱ mi̱iꞌ kuuꞌ ndu̱ xiinꞌ ne̱ yivi̱ꞌ,
xiinꞌ xaꞌa̱ꞌ ña̱ tyituní ndu̱ ña̱ xini xaꞌanꞌ.
Te̱ nde̱e̱ ti̱xi̱n nimá ndu̱ tyituní ndu̱ sa̱kuuꞌ ña̱ xini xaꞌanꞌ ja̱a̱nꞌ,
te̱ sataꞌvíꞌ ndu̱ tu̱n vixi̱.
14 Ña̱ xatyuunꞌ nda̱ku ndu̱ ndii,
ni̱ sa̱xi̱o̱o̱ ndu̱ a̱,
te̱ ña̱ i̱i̱n nda̱a̱ꞌ nimá ndu̱ ndii,
ni̱ ku̱u̱ xikaꞌ a̱ nuu̱ꞌ ndu̱ ni̱ xa̱a̱ ndu̱.
Te̱ ña̱ ndi̱xa̱ ndii,
ni̱ ke̱kiꞌi̱ a̱ ya̱ꞌya̱ ma̱ꞌiꞌ ya̱ꞌvi̱.
Te̱ ña̱ i̱i̱n katyi kuuꞌ ndu̱ xiinꞌ ne̱ yivi̱ꞌ ndii,
nï̱ ku̱vi̱ ka̱ ki̱xi̱n a̱ miiꞌ ndieeꞌ ndu̱.
15 Kü̱vi̱ ka̱ ku̱ni̱ ndu̱ ña̱ ndi̱xa̱ nde̱e̱ i̱i̱n xaanꞌ.
Te̱ sa̱kuuꞌ ne̱ küni sa̱a̱ ka̱ ña̱ ni̱a̱ꞌa ndii,
xakuiꞌnaꞌ ne̱ yivi̱ꞌ sa̱kuuꞌ ña̱ꞌa̱ ña̱ kumiꞌ ni̱a̱.
Te̱ ni̱ xi̱ni̱ yoꞌó,
Yahvé,
sa̱kuuꞌ ña̱ ja̱a̱nꞌ,
te̱ nï̱ xtani̱ xa̱tyiꞌ u̱nꞌ ña̱ köo̱ꞌ ka̱ xa̱tyiꞌ ka̱ ne̱ xatyuunꞌ nda̱ku.
16 Ni̱ xi̱ni̱ Ndiosí ña̱ köo̱ꞌ nde̱e̱ i̱i̱n ne̱ yivi̱ꞌ,
ne̱ kuni tyi̱ndi̱e̱eꞌ ne̱ ndoꞌoꞌ xaaꞌ ne̱ yivi̱ꞌ.
Te̱ ni̱ na̱nda̱ni̱ va̱ a̱ xaꞌa̱ꞌ a̱ ja̱a̱nꞌ na mi̱iꞌ a̱ ni̱ sa̱kakú ña̱ꞌaꞌ xiinꞌ ña̱ ndi̱e̱eꞌ a̱.
Te̱ ña̱ xatyuunꞌ nda̱ku mi̱iꞌ a̱ ni̱ nduu̱ kuei̱ a̱ te̱ ni̱ xa̱a̱ ña̱ ja̱a̱nꞌ.
17 Ni̱ na̱kuiꞌnu̱ Ndiosí ña̱ xatyuunꞌ nda̱ku a̱ nde̱e̱ naa ka̱a̱ tiasi ti̱a̱ꞌni̱ a̱.
Te̱ ña̱ sakakú a̱ ne̱ yivi̱ꞌ ndii,
ni̱ tyi̱nduꞌu̱ꞌ ña̱ꞌaꞌ a̱ xíniꞌ a̱ nde̱e̱ naa tiꞌe̱ꞌ ña̱ tiasi xíniꞌ a̱.
Te̱ ña̱ nakán kuenta nuu̱ꞌ ne̱ yivi̱ꞌ nduuꞌ nde̱e̱ naa toto̱ nani̱ꞌ ña̱ tití a̱.
Te̱ ña̱ xakuiñu a̱ ne̱ nduuꞌ kuenta a̱ ndii,
nduuꞌ a̱ nde̱e̱ naa toto̱ nani̱ꞌ ña̱ niꞌnuꞌ a̱.
18 Mi̱iꞌ Ndiosí na̱tyaꞌvi̱ te̱ ndasiꞌ taꞌanꞌ xiinꞌ a̱ xaꞌa̱ꞌ i̱ꞌi̱n ña̱ ni̱a̱ꞌa ña̱ ni̱ xa̱a̱ ra̱.
Te̱ sa̱ndoꞌoꞌ a̱ sa̱kuuꞌ te̱ ndasiꞌ taꞌanꞌ xiinꞌ a̱ ja̱a̱nꞌ.
Te̱ na̱tyaꞌvi̱ tu̱ a̱ sa̱kuuꞌ te̱ ndasiꞌ ña̱ꞌaꞌ,
te̱ sa̱kanꞌ tu̱ sa̱a̱ a̱ xiinꞌ sa̱kuuꞌ ne̱ ndieeꞌ nde̱e̱ yu̱ꞌuꞌ mi̱ni̱ kaꞌnuꞌ.
19 Xaꞌa̱ꞌ a̱ ja̱a̱nꞌ na kuiiꞌ ku̱yi̱ꞌvi sa̱kuuꞌ ne̱ ndieeꞌ miiꞌ ketá ñu̱ꞌu̱ Yahvé,
te̱ ne̱ ndieeꞌ miiꞌ ku̱a̱xi̱ ke̱ta̱ ñu̱ꞌu̱ ku̱yi̱ꞌvi ña̱ kaꞌnuꞌ a̱.
Sa̱kanꞌ ña̱ ndi̱e̱eꞌ xa̱va̱ꞌa̱ ki̱xi̱n a̱ nde̱e̱ naa kuaꞌa̱ꞌ xa̱va̱ꞌa̱ te̱ ñuꞌu̱ꞌ i̱ti̱a̱ kii̱ꞌ kuunꞌ kuiꞌe̱ savi̱ꞌ,
te̱ ndi̱e̱eꞌ tyindaꞌaꞌ ña̱ꞌaꞌ tatyi̱ꞌ ndi̱e̱eꞌ ña̱ tiꞌviꞌ mi̱iꞌ Yahvé.
20 Ña̱ sandoó ndiká ne̱ vi̱ꞌe̱ Israel ndii,
xíniꞌ i̱kuꞌ Sión ki̱xi̱n a̱,
te̱ sakakú a̱ sa̱kuuꞌ ne̱ vi̱ꞌe̱ Jacob,
ne̱ ni̱ na̱ko̱o̱ ña̱ xaaꞌ ni̱a̱ ña̱ ni̱a̱ꞌa.
Ña̱ yo̱ꞌo̱ꞌ nduuꞌ ña̱ ni̱ kaꞌa̱n Yahvé.
21 Te̱ ni̱ kaꞌa̱n ka̱ Yahvé ndii:
“Ndoó i̱ kuento i̱ xiinꞌ ndo̱ꞌ vi̱ti̱n.
Nde̱e̱ vi̱ti̱n te̱ nde̱e̱ a̱ma̱a̱ ka̱ ndii,
ko̱o̱ naa ko̱o̱ Espíritu yuꞌu̱ xiinꞌ ndo̱ꞌ.
Te̱ sa̱kanꞌ tu̱ kuento i̱ ña̱ ni̱ ta̱xi̱ i̱ nda̱ꞌaꞌ ndo̱ꞌ vi̱ti̱n ndii,
kaꞌa̱n naa kaꞌa̱n ndo̱ꞌ a̱,
te̱ kaꞌa̱n naa kaꞌa̱n tu̱ ña̱ꞌaꞌ siꞌe̱ ndo̱ꞌ,
te̱ kaꞌa̱n naa kaꞌa̱n tu̱ ña̱ꞌaꞌ si̱a̱niꞌ ndo̱ꞌ nde̱e̱ ndiꞌiꞌ ni̱ kivi̱ꞌ”,
ni̱ katyi̱ a̱.