Yoꞌoꞌ kaꞌán a̱ xaꞌa̱ꞌ sa̱a̱ xtani̱ Ndiosí ko̱o̱ ndi̱ti̱a̱ e̱ꞌ
58
Ni̱ kaꞌa̱n Ndiosí xiinꞌ i̱ ndii:
“Kaꞌa̱n tiꞌeꞌ va̱ u̱nꞌ xiinꞌ sa̱kuuꞌ ña̱ ndi̱e̱eꞌ u̱nꞌ,
te̱ kü̱ka̱ꞌa̱n nuu̱ꞌ u̱nꞌ.
Kaꞌa̱n tiꞌeꞌ xa̱va̱ꞌa̱ u̱nꞌ nde̱e̱ naa tiꞌeꞌ ndeꞌí nda̱tyuunꞌ tunꞌ niꞌiꞌ i̱tyiꞌ,
te̱ kaꞌa̱n u̱nꞌ xiinꞌ ne̱ vi̱ꞌe̱ Israel,
ne̱ nduuꞌ kuenta i̱,
xaꞌa̱ꞌ sa̱kuuꞌ ku̱a̱tyi̱ ni̱a̱.
Kaꞌa̱n u̱nꞌ xiinꞌ ne̱ vi̱ꞌe̱ Jacob ja̱a̱nꞌ xaꞌa̱ꞌ ña̱ ni̱a̱ꞌa ña̱ xaaꞌ ni̱a̱.
2 Sa̱kanꞌ ña̱ ne̱ ja̱a̱nꞌ ndii,
kuuꞌ ni̱a̱ nde̱e̱ naa ne̱ sa̱xinu̱ xna̱ꞌa̱ ña̱ kaꞌán tyuunꞌ i̱ xiinꞌ ni̱a̱,
te̱ ku̱a̱xi̱ ni̱a̱ yu̱kunꞌ sa̱a̱ kivi̱ꞌ,
te̱ xakuuꞌ ni̱a̱ ña̱ xtani̱ xa̱va̱ꞌa̱ ni̱a̱ sa̱kuaa̱n ni̱a̱ sa̱kuuꞌ ña̱ kaꞌán xaꞌa̱ꞌ yuꞌu̱.
Te̱ kuuꞌ ni̱a̱ nde̱e̱ naa ne̱ yivi̱ꞌ,
ne̱ xatyuunꞌ nda̱ku,
ne̱ köo̱ꞌ kivi̱ꞌ na̱ko̱o̱ tu̱ꞌu̱n nde̱iꞌ yuꞌu̱,
Ndiosí ña̱ xakaꞌnuꞌ ni̱a̱.
Te̱ xikán ni̱a̱ nuu̱ꞌ i̱ ña̱ tyi̱ndi̱e̱eꞌ ña̱ꞌaꞌ i̱,
te̱ xakuuꞌ tu̱ ni̱a̱ nde̱e̱ naa kuní xna̱ꞌa̱ ni̱a̱ ko̱o̱ ya̱ti̱n ni̱a̱ nuu̱ꞌ i̱.
3 Te̱ nde̱e̱ kaꞌán ku̱a̱tyi̱ ni̱a̱ nuu̱ꞌ i̱ ndii:
Köo̱ꞌ nde̱e̱ i̱i̱n xaꞌa̱ꞌ ña̱ yoo ndi̱ti̱a̱ ndu̱,
sa̱kanꞌ ña̱ nde̱e̱ xäaꞌ yoꞌó kuenta kuuꞌ vi̱ꞌ ndu̱,
te̱ ni̱ sa̱ndoꞌoꞌ xiinꞌ miiꞌ tu̱ ndu̱,
ndisu̱ ni̱ nde̱e̱ nï̱ tyu̱u̱n xaꞌaꞌ u̱nꞌ kuuꞌ vi̱ꞌ ndu̱,
katyi ni̱a̱.
’Kivi̱ꞌ ña̱ yoo ndi̱ti̱a̱ ndo̱ꞌ ja̱a̱nꞌ ndii,
xaꞌa̱ꞌ ña̱ va̱ꞌa̱ mi̱iꞌ ku̱i̱ti̱ꞌ ndo̱ꞌ xaaꞌ ndo̱ꞌ a̱,
te̱ sandoꞌoꞌ va̱ ndo̱ꞌ ne̱ xatyuunꞌ nuu̱ꞌ ndo̱ꞌ kivi̱ꞌ ja̱a̱nꞌ.
4 Ndoꞌó,
kivi̱ꞌ ña̱ yoo ndi̱ti̱a̱ ndo̱ꞌ ndii,
xa̱ nuu̱ꞌ kuntaꞌanꞌ ndo̱ꞌ,
te̱ kaniꞌ taꞌanꞌ tu̱ ndo̱ꞌ kuento.
Te̱ kunkiꞌ taꞌanꞌ sa̱ni̱ku̱u̱ xa̱tyiꞌ sa̱kuuꞌ ndo̱ꞌ kii̱ꞌ yoo ndi̱ti̱a̱ ndo̱ꞌ ja̱a̱nꞌ.
Te̱ naaꞌ kuní ndo̱ꞌ ña̱ ku̱ni̱ so̱ꞌo̱ yuꞌu̱ si̱u̱ꞌunꞌ ña̱ kaꞌán ndo̱ꞌ xiinꞌ i̱ ndii,
kö̱o̱ꞌ ndi̱ti̱a̱ ndo̱ꞌ naa xaaꞌ ndo̱ꞌ kivi̱ꞌ vi̱ti̱n.
Sa̱kanꞌ ña̱ sa̱a̱ xaaꞌ ndo̱ꞌ vi̱ti̱n te̱ yoo ndi̱ti̱a̱ ndo̱ꞌ ndii,
nde̱e̱ siee tyï̱ndi̱e̱eꞌ a̱ ndoꞌó.
5 Tee̱ꞌ xanini ndoꞌó ña̱ xtani̱ yuꞌu̱ ña̱ sandoꞌoꞌ xiinꞌ miiꞌ ndo̱ꞌ,
te̱ katandie tu̱ ndo̱ꞌ xíniꞌ ndo̱ꞌ nde̱e̱ naa tunꞌ yoo̱ꞌ,
tunꞌ yoo yu̱ꞌuꞌ i̱ti̱a̱ kii̱ꞌ yoo ndi̱ti̱a̱ ndo̱ꞌ.
Te̱ kixín tu̱ ndo̱ꞌ nuu̱ꞌ tunꞌ xto̱ nde̱iꞌ va̱,
te̱ ndieeꞌ tu̱ ndo̱ꞌ nuu̱ꞌ yaa̱ꞌ nuꞌu̱ kii̱ꞌ sa̱kanꞌ.
¿Ñáá tuu ndo̱ꞌ ña̱ ña̱ ja̱a̱nꞌ nduuꞌ ña̱ yoo ndi̱ti̱a̱ ndo̱ꞌ xiinꞌ kivi̱ꞌ ña̱ xtani̱ yuꞌu̱,
Yahvé?
6 ’Sü̱vi̱ xa̱tyiꞌ ña̱ ja̱a̱nꞌ.
Ña̱ yoo ndi̱ti̱a̱ ña̱ xtani̱ yuꞌu̱ ndii,
ña̱ sa̱ndoó ndiká ndo̱ꞌ te̱ ñuꞌuꞌ vi̱ꞌe̱ ka̱a̱,
te̱ köo̱ꞌ a̱ ni̱ xa̱a̱ xa̱tyiꞌ.
Te̱ tyi̱ndi̱e̱eꞌ tu̱ ndo̱ꞌ ne̱ xatyuunꞌ nuu̱ꞌ ndo̱ꞌ,
te̱ sa̱ndoó ndiká tu̱ ndo̱ꞌ ne̱ ñuꞌuꞌ vi̱ꞌe̱ ka̱a̱ xaꞌa̱ꞌ tu̱n vixi̱.
Te̱ xa̱ꞌaꞌ ndo̱ꞌ sa̱tyuunꞌ nda̱ku ndo̱ꞌ xaꞌa̱ꞌ sa̱kuuꞌ ne̱ yivi̱ꞌ sa̱kuatyiꞌ ndo̱ꞌ sa̱kuuꞌ ña̱ satiín ña̱ꞌaꞌ.
7 Ña̱ yo̱ꞌo̱ꞌ tuꞌ nduuꞌ ña̱ yoo ndi̱ti̱a̱ ña̱ xtani̱ yuꞌu̱,
ta̱xi̱ ndo̱ꞌ ña̱ ku̱xi̱ ne̱ xiꞌí so̱ko̱,
te̱ ta̱xi̱ tu̱ ndo̱ꞌ vi̱ꞌe̱ ku̱ndi̱e̱e̱ ne̱ köo̱ꞌ vi̱ꞌe̱.
Ta̱xi̱ tu̱ ndo̱ꞌ toto̱ ku̱i̱ꞌnu̱ ne̱ köo̱ꞌ toto̱,
te̱ tyi̱ndi̱e̱eꞌ tu̱ ndo̱ꞌ ndiaa ka̱ ne̱ yivi̱ꞌ xiinꞌ ndo̱ꞌ.
8 ’Naaꞌ sa̱a̱ ndo̱ꞌ sa̱kanꞌ ndii,
numi̱ꞌ va̱ te̱ xaa̱ ña̱ sa̱kakú ndoꞌó nde̱e̱ naa xaaꞌ kii̱ꞌ yatyi̱ va̱ nayiꞌé ketaꞌ ñu̱ꞌu̱ ku̱a̱xi̱ kitúꞌ.
Te̱ ña̱ xatyuunꞌ nda̱ku ndo̱ꞌ ki̱ꞌi̱n i̱tyiꞌ nuu̱ꞌ ndo̱ꞌ,
te̱ ña̱ yiꞌé nda̱tu̱nꞌ yuꞌu̱ Yahvé ko̱to̱ xata̱ꞌ ndo̱ꞌ kii̱ꞌ kuaꞌa̱n ndo̱ꞌ.
9 Sa̱kanꞌ te̱ kii̱ꞌ kaꞌa̱n ndaꞌvi ndo̱ꞌ xiinꞌ yuꞌu̱,
Yahvé ndii,
ku̱ni̱ so̱ꞌo̱ i̱ ña̱ kaꞌa̱n ndo̱ꞌ ja̱a̱nꞌ.
Kaꞌa̱n tiꞌeꞌ ndo̱ꞌ xiinꞌ i̱ te̱ na̱ku̱i̱i̱n i̱ ndii:
Yoꞌoꞌ iinꞌ i̱,
katyi̱ i̱.
Naaꞌ na̱ko̱o̱ ndo̱ꞌ sa̱kuuꞌ ña̱ sandoꞌoꞌ ndo̱ꞌ ne̱ yivi̱ꞌ xiinꞌ ña̱ sayi̱ꞌvi ndo̱ꞌ xiinꞌ ña̱ kaꞌán ndo̱ꞌ sa̱kuuꞌ nuu̱ꞌ ña̱ kuäsa̱ꞌ kuní.
10 ’Te̱ naaꞌ ta̱xi̱ ndo̱ꞌ ña̱ xixiꞌ ndo̱ꞌ ku̱xi̱ ne̱ xiꞌí so̱ko̱,
te̱ sa̱ndaꞌni ndo̱ꞌ ne̱ ndoꞌoꞌ nimá ndii,
ku̱ni̱ sa̱kuuꞌ ne̱ yivi̱ꞌ sa̱kuuꞌ ña̱ va̱ꞌa̱ ña̱ xaaꞌ ndo̱ꞌ.
Te̱ na̱yiꞌe̱ a̱ nde̱e̱ naa ñuꞌu̱ miiꞌ i̱i̱n yaví,
te̱ ña̱ i̱i̱n yaví ja̱a̱nꞌ ndii,
na̱yiꞌe̱ a̱ nde̱e̱ naa i̱i̱n keꞌinꞌ.
11 Mi̱iꞌ yuꞌu̱,
Yahvé,
ko̱to̱ ndoꞌó sa̱a̱ kivi̱ꞌ,
te̱ ta̱xi̱ tu̱ i̱ ti̱kui ko̱ꞌo̱ ndo̱ꞌ nuu̱ꞌ ñu̱ꞌuꞌ miiꞌ i̱tyi kaaꞌ.
Te̱ ta̱xi̱ tu̱ i̱ ndi̱e̱e̱ꞌ i̱kiꞌ ndo̱ꞌ,
te̱ ku̱ndu̱u̱ ndo̱ꞌ nde̱e̱ naa tunꞌ ta̱ta̱ tunꞌ kosó tyito̱ va̱ ne̱ yivi̱ꞌ,
te̱ ku̱ndu̱u̱ tu̱ ndo̱ꞌ nde̱e̱ naa ti̱ko̱ꞌyoꞌ miiꞌ yoo kuaꞌa̱ꞌ va̱ ti̱kui,
te̱ köo̱ꞌ kivi̱ꞌ ndokoꞌ raꞌ.
12 Mi̱iꞌ ndoꞌó na̱ka̱sa̱ꞌa̱ ñu̱u̱ miiꞌ ni̱ ndiee̱ ndo̱ꞌ ña̱ xa̱ ni̱ nduxi̱n ndo̱o̱ nde̱e̱ xta̱ꞌanꞌ i̱i̱n yivi̱ꞌ,
te̱ na̱ka̱sa̱ꞌa̱ tu̱ ndo̱ꞌ xaꞌa̱ꞌ nama̱ ya̱taꞌ ña̱ itaꞌ nde̱e̱ xta̱ꞌanꞌ vi̱ꞌ.
Xaꞌa̱ꞌ a̱ ja̱a̱nꞌ na ku̱na̱niꞌ ndo̱ꞌ te̱ ndasaꞌ va̱ꞌa̱ nama̱ ya̱taꞌ ña̱ xa̱ ni̱ ndu̱va̱.
Te̱ ku̱na̱niꞌ tu̱ ndo̱ꞌ te̱ ndaniꞌiꞌ xa̱aꞌ vi̱ꞌe̱ ña̱ xa̱ ni̱ nduxi̱n.
Yoꞌoꞌ kaꞌán a̱ xaꞌa̱ꞌ kivi̱ꞌ ña̱ xina̱ndiee̱ꞌ e̱ꞌ
13 ’Ko̱to̱ kaꞌnuꞌ ndo̱ꞌ kivi̱ꞌ ña̱ xina̱ndiee̱ꞌ ndo̱ꞌ,
te̱ sä̱a̱ ndo̱ꞌ tyu̱u̱n nuu̱ꞌ mi̱iꞌ ndo̱ꞌ kivi̱ꞌ su̱ꞌu̱n ña̱ nduuꞌ ndi̱ti̱a̱ yuꞌu̱.
Te̱ na kaꞌa̱n ndo̱ꞌ ña̱ i̱i̱n kivi̱ꞌ ña̱ ndiee̱ sii̱ꞌ ndo̱ꞌ nduuꞌ a̱,
te̱ kaꞌa̱n tu̱ ndo̱ꞌ ña̱ nduuꞌ tu̱ a̱ i̱i̱n kivi̱ꞌ su̱ꞌu̱n va̱,
ña̱ nda̱tu̱nꞌ va̱ kuenta yuꞌu̱,
Yahvé.
Ko̱to̱ kaꞌnuꞌ ndo̱ꞌ kivi̱ꞌ ja̱a̱nꞌ,
te̱ sä̱a̱ ndo̱ꞌ nde̱e̱ i̱i̱n tyu̱u̱n nuu̱ꞌ mi̱iꞌ ndo̱ꞌ,
ni̱ nde̱e̱ ndü̱kuꞌ tu̱ ndo̱ꞌ ña̱ va̱ꞌa̱ xaꞌa̱ꞌ mi̱iꞌ ndo̱ꞌ,
te̱ sa̱ta̱ꞌ ndo̱ꞌ ña̱ꞌa̱ te̱ na̱xiko̱ꞌ ndo̱ꞌ a̱.
14 Naaꞌ sa̱a̱ ndo̱ꞌ sa̱kanꞌ ndii,
ta̱xi̱ yuꞌu̱,
Yahvé,
ña̱ mani̱ꞌ ko̱o̱ xiinꞌ ndo̱ꞌ,
te̱ mi̱iꞌ yuꞌu̱ sa̱a̱ sa̱kanꞌ te̱ ku̱ndu̱u̱ ndo̱ꞌ ne̱ kaꞌnuꞌ va̱ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ ta̱xi̱ i̱ nda̱ꞌaꞌ ndo̱ꞌ ñu̱ꞌuꞌ ña̱ ni̱ ta̱xi̱ kuento i̱ nuu̱ꞌ Jacob,
te̱ xii̱ꞌ ya̱taꞌ ndo̱ꞌ,
ku̱ndu̱u̱ ña̱ꞌa̱ ra̱.
’Yuꞌu̱,
Yahvé nduuꞌ ña̱ kaꞌán ña̱ kaa̱ꞌ”,
ni̱ katyi̱ Ndiosí.