Yoꞌoꞌ kaꞌán a̱ xaꞌa̱ꞌ ña̱ sa̱ndoꞌoꞌ Ndiosí ne̱ vi̱ꞌe̱ Israel xaꞌa̱ꞌ a̱ ña̱ xakaꞌnuꞌ ni̱a̱ ndiosí saka
57
Kii̱ꞌ xiꞌí ne̱ xatyuunꞌ nda̱ku ndii,
nde̱e̱ i̱i̱n köo̱ꞌ nandani̱ xaꞌa̱ꞌ ni̱a̱.
Te̱ kii̱ꞌ xiꞌí ne̱ xikaꞌ nda̱ku i̱tyiꞌ u̱nꞌ ndii,
nde̱e̱ i̱i̱ köo̱ꞌ ku̱ndani̱.
Sa̱kanꞌ ña̱ mi̱iꞌ Ndiosí nakaꞌ ña̱ꞌaꞌ te̱ kü̱ndo̱ꞌo̱ ni̱a̱ ña̱ i̱yo̱ va̱ ña̱ ko̱o̱ nuu̱ꞌ ñu̱ꞌuꞌ i̱i̱n yivi̱ꞌ.
2 Sa̱kuuꞌ ne̱ sa̱xinu̱ ña̱ kuní Ndiosí ndii,
na̱ndiee̱ꞌ mani̱ꞌ ni̱a̱ nda̱ꞌaꞌ a̱ kii̱ꞌ xiꞌí ni̱a̱,
te̱ vikuii̱n ña̱ ndoꞌoꞌ nimá ni̱a̱ ti̱xi̱n yavi̱ ndi̱i̱.
3 Kaꞌán Ndiosí ndii:
“Ndoꞌó,
ne̱ nduuꞌ si̱a̱niꞌ xikaꞌ ñaꞌ kuini̱ꞌ xiinꞌ si̱a̱niꞌ xikaꞌ te̱ yivi̱ꞌ,
te̱ xikaꞌ xiinꞌ kuaꞌa̱ꞌ ña̱ꞌaꞌ,
xiinꞌ si̱a̱niꞌ xikaꞌ ña̱ꞌaꞌ ñaꞌ xiko̱ꞌ xiinꞌ miiꞌ ndii,
ni̱a̱ꞌa̱ ndo̱ꞌ nuu̱ꞌ i̱ yoꞌoꞌ.
4 ¿Yo̱o̱ xiinꞌ xandiꞌiꞌ ndo̱ꞌ kii̱ꞌ sakuiyoꞌ ndo̱ꞌ yu̱ꞌuꞌ ndo̱ꞌ,
te̱ xtáꞌniꞌ tu̱ ndo̱ꞌ yaa̱ꞌ ndo̱ꞌ?
Ndoꞌó ndii,
siꞌe̱ ne̱ xaaꞌ ku̱a̱tyi̱ nduuꞌ ndo̱ꞌ,
te̱ vixi̱ va̱ ndo̱ꞌ.
5 Ndoꞌó ndii,
kii̱ꞌ xaꞌa ndo̱ꞌ vi̱koꞌ ndiosí saka,
ña̱ xakaꞌnuꞌ ndo̱ꞌ ndii,
kuaꞌa̱n ndo̱ꞌ xaꞌa̱ꞌ tunꞌ koo̱ꞌ xiinꞌ xaꞌa̱ꞌ sa̱kuuꞌ nuu̱ꞌ i̱tunꞌ tunꞌ koꞌó nda̱ꞌaꞌ,
te̱ yoso̱ꞌ taꞌanꞌ ndo̱ꞌ,
te̱ xaaꞌ ndo̱ꞌ sa̱kuuꞌ nuu̱ꞌ ña̱ xeꞌnaꞌ.
Te̱ nasoko̱ꞌ tu̱ ndo̱ꞌ siꞌe̱ ndo̱ꞌ nuu̱ꞌ ndiosí saka,
ña̱ xakaꞌnuꞌ ndo̱ꞌ ja̱a̱nꞌ,
yo̱soꞌ ya̱ti̱n yu̱ꞌuꞌ yivi̱ xiinꞌ te̱i̱n yuu̱ꞌ miiꞌ ni̱ ndata̱ꞌ a̱.
6 Ndoꞌó ndii,
yuu̱ꞌ ndi̱i̱ꞌ ña̱ ndieeꞌ yo̱soꞌ yu̱ꞌuꞌ i̱ti̱a̱ ku̱i̱ti̱ꞌ nduuꞌ ndiosí,
ña̱ xakaꞌnuꞌ ndo̱ꞌ.
Xakaꞌnuꞌ ndo̱ꞌ ña̱ ja̱a̱nꞌ xiinꞌ tu̱mani̱ꞌ ña̱ yoo vixaꞌ xiinꞌ sa̱kuuꞌ nuu̱ꞌ ndi̱kinꞌ.
Sa̱kanꞌ na kuiiꞌ ña̱ ja̱a̱nꞌ ku̱i̱ti̱ꞌ nduuꞌ ña̱ ndoo̱ nda̱ꞌaꞌ ndo̱ꞌ,
te̱ kä̱ni̱ni̱ ndo̱ꞌ na sä̱ndoꞌoꞌ i̱ ndoꞌó xaꞌa̱ꞌ ña̱ ki̱ni̱ ja̱a̱nꞌ.
7 Xíniꞌ sa̱kuuꞌ i̱kuꞌ miiꞌ sukun va̱,
te̱ ndi̱tyi̱ va̱ tu̱ ni̱ nduu̱ nde̱e̱ naa tunꞌ xi̱to̱ miiꞌ ni̱ yo̱so̱ꞌ taꞌanꞌ ndo̱ꞌ.
Te̱ i̱kanꞌ tu̱ ni̱ ka̱a̱ ndo̱ꞌ,
te̱ ni̱ na̱soko̱ꞌ ndo̱ꞌ ña̱ꞌa̱ nuu̱ꞌ ndiosí saka ña̱ xakaꞌnuꞌ ndo̱ꞌ.
8 Xata̱ꞌ vitu̱ꞌ yiꞌeꞌ ndo̱ꞌ ni̱ ka̱ta̱xkoꞌ ndo̱ꞌ ndiosí ña̱ xakaꞌnuꞌ ndo̱ꞌ.
Ni̱ na̱ndoso̱ꞌ ndo̱ꞌ xaꞌa̱ꞌ yuꞌu̱,
te̱ ni̱ ta̱va̱ꞌ ndo̱ꞌ toto̱ ndo̱ꞌ,
te̱ ni̱ na̱ka̱nduꞌu̱ꞌ ndo̱ꞌ nuu̱ꞌ tunꞌ xi̱to̱ tyiee̱ ndo̱ꞌ,
te̱ ni̱ yo̱so̱ꞌ taꞌanꞌ ndo̱ꞌ,
te̱ xitoꞌ ndiꞌe̱ꞌ ndo̱ꞌ nuu̱ꞌ ndiosí ña̱ xakaꞌnuꞌ ndo̱ꞌ ja̱a̱nꞌ kii̱ꞌ ta̱va̱ꞌ ndo̱ꞌ toto̱ ndo̱ꞌ te̱ ni̱ xa̱a̱ ndo̱ꞌ ña̱ ki̱ni̱ ja̱a̱nꞌ.
9 ’Ni̱ xaꞌa̱n ndo̱ꞌ nuu̱ꞌ ndiosí ña̱ naniꞌ Moloc ndisoꞌ ndo̱ꞌ kuaꞌa̱ꞌ va̱ xaꞌa̱n oliva xavixínꞌ,
te̱ ndisoꞌ tu̱ ndo̱ꞌ kuaꞌa̱ꞌ xa̱va̱ꞌa̱ ti̱kui xavixínꞌ.
Te̱ ni̱ ti̱ꞌviꞌ ndo̱ꞌ te̱ yivi̱ꞌ xikaꞌ xa̱va̱ꞌa̱,
sa̱kanꞌ ña̱ ni̱ xaꞌa̱n ra̱ xikaꞌ va̱ i̱i̱n yivi̱ꞌ nde̱e̱ naa nde̱ma̱aꞌ ti̱xi̱n ñu̱ꞌuꞌ xaꞌa̱ꞌ ña̱ ni̱a̱ꞌa ña̱ kuní ndoꞌó sa̱a̱ ndo̱.
10 Ni̱ xa̱vi xa̱va̱ꞌa̱ ndo̱ꞌ xaꞌa̱ꞌ a̱ ña̱ kuaꞌa̱ꞌ i̱tyiꞌ ni̱ xaꞌa̱n ndo̱ꞌ nandukuꞌ ndo̱ꞌ ndiosí ja̱a̱nꞌ,
ndisu̱ köo̱ꞌ kivi̱ꞌ ni̱ xi̱kuii̱n ndo̱ꞌ ña̱ nandukuꞌ ndo̱ꞌ ndiosí ja̱a̱nꞌ.
Süu̱ꞌ ja̱a̱nꞌ ndii,
ni̱ na̱tyi̱naá tu̱ku̱u̱ ndo̱ꞌ ndi̱e̱e̱ꞌ ndo̱ꞌ te̱ köo̱ꞌ kivi̱ꞌ ni̱ xa̱vi ndo̱ꞌ.
11 ’¿Ñáá yiꞌvi ndo̱ꞌ te̱ xíinꞌ?
¿Ñáá xikaꞌ nimá ndo̱ꞌ ña̱ ka̱ꞌni̱ ra̱ ndoꞌó?
Sa̱kanꞌ na kuiiꞌ ï̱ni̱ ka̱ ndo̱ꞌ xini ndo̱ꞌ yuꞌu̱,
te̱ ni̱ na̱ndoso̱ꞌ ndo̱ꞌ xaꞌa̱ꞌ i̱ xiinꞌ xaꞌa̱ꞌ tu̱ꞌu̱n i̱.
Tee̱ꞌ kueinꞌ ko̱to̱ ka̱ na̱ꞌaꞌ va̱ ni̱ yoo̱ taxi̱nꞌ yu̱ꞌuꞌ i̱ na kuiiꞌ xïtoꞌ kaꞌnuꞌ ka̱ ndo̱ꞌ yuꞌu̱.
12 Ndisu̱ mi̱iꞌ yuꞌu̱ tyi̱nduꞌu̱ꞌ ku̱a̱tyi̱ xaꞌa̱ꞌ ndo̱ꞌ xaꞌa̱ꞌ ña̱ kaꞌán ndo̱ꞌ xatyuunꞌ nda̱ku ndo̱ꞌ.
Te̱ ku̱ni̱ ndo̱ꞌ ña̱ nde̱e̱ i̱i̱n ña̱ ja̱a̱nꞌ tyï̱ndi̱e̱eꞌ ndoꞌó.
13 Te̱ kii̱ꞌ ndeꞌi̱ tiꞌeꞌ ndo̱ꞌ xikán ndo̱ꞌ ña̱ tyi̱ndi̱e̱eꞌ ndiosí saka ja̱a̱nꞌ ndoꞌó ndii,
na ki̱xi̱n sa̱kuuꞌ ndiosí,
ña̱ ni̱ ka̱ya̱ ndo̱ꞌ xakaꞌnuꞌ ndo̱ꞌ ja̱a̱nꞌ,
te̱ sa̱kakú a̱ ndoꞌó,
ndisu̱ sa̱kuuꞌ ña̱ ja̱a̱nꞌ ndi̱a̱tyiꞌ sa̱a̱ tatyi̱ꞌ.
Untaꞌ ku̱i̱ti̱ꞌ ki̱xi̱n tatyi̱ꞌ te̱ ndi̱a̱tyiꞌ sa̱kuuꞌ ña̱ ja̱a̱nꞌ.
Ndisu̱ sa̱kuuꞌ ne̱ i̱ni̱ xini yuꞌu̱ ndii,
ndoo̱ ñu̱ꞌuꞌ i̱i̱n yivi̱ꞌ nda̱ꞌaꞌ ni̱a̱ ku̱ndu̱u̱ ña̱ꞌa̱ ni̱a̱,
te̱ ndoo̱ ni̱a̱ ku̱ndi̱e̱e̱ ni̱a̱ i̱kuꞌ su̱ꞌu̱n,
ña̱ nduuꞌ kuenta i̱”,
ni̱ katyi̱ a̱.
Yoꞌoꞌ kaꞌán a̱ xaꞌa̱ꞌ ña̱ yoo kaꞌnuꞌ i̱ni̱ Ndiosí xaꞌa̱ꞌ ne̱ nakooꞌ ña̱ ni̱a̱ꞌa
14 Kaꞌán ka̱ Ndiosí ndii:
“Nda̱sa̱ va̱ꞌa̱ kiꞌi̱ꞌ ndo̱ꞌ i̱tyiꞌ,
te̱ ndu̱ndaa̱ a̱ sa̱a̱ ndo̱ꞌ.
Na̱ti̱ꞌviꞌ ndo̱ꞌ i̱tyiꞌ,
te̱ nda̱sa̱ i̱i̱n katyi ndo̱ꞌ a̱ te̱ ku̱vi̱ xkaꞌndi̱a̱ ne̱ nduuꞌ kuenta i̱”,
katyi a̱.
15 Sa̱kanꞌ ña̱ Ndiosí kaꞌnuꞌ,
ña̱ nduꞌu̱ꞌ ndi̱e̱nu̱ miiꞌ sukun va̱,
ña̱ tiaku nde̱e̱ ndiꞌiꞌ ni̱ kivi̱ꞌ,
ña̱ nduuꞌ ña̱ su̱ꞌu̱n ndi̱ꞌi̱,
kaꞌán a̱ ndii:
“Yuꞌu̱ ndii,
ndi̱viꞌ miiꞌ sukun xa̱va̱ꞌa̱ nduꞌu̱ꞌ i̱,
te̱ miiꞌ su̱ꞌu̱n xa̱va̱ꞌa̱ nduuꞌ i̱kanꞌ.
Te̱ yoo i̱ xiinꞌ ne̱ ndaꞌvi kuuꞌ nimá,
te̱ sutyiꞌ va̱ tu̱ i̱ni̱ ni̱a̱.
Te̱ taxiꞌ i̱ ndi̱e̱e̱ꞌ nimá ni̱a̱,
te̱ sakiꞌví tu̱ i̱ nimá ne̱ sutyiꞌ va̱ i̱ni̱ ja̱a̱nꞌ.
16 Sa̱kanꞌ ña̱ küntaꞌanꞌ i̱ xiinꞌ ndo̱ꞌ nde̱e̱ ndiꞌiꞌ ni̱ kivi̱ꞌ,
ni̱ nde̱e̱ nä̱saa̱ꞌ tu̱ i̱ ku̱ni̱ i̱ ndoꞌó nde̱e̱ a̱ma̱a̱ ka̱ kivi̱ꞌ.
Sa̱kanꞌ ña̱ naaꞌ sa̱a̱ i̱ sa̱kanꞌ ndii,
ndo̱ñuꞌuꞌ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ ndoñuꞌuꞌ tu̱ sa̱kuuꞌ nimá ne̱ yivi̱ꞌ i̱i̱n yivi̱ꞌ ne̱ ni̱ xa̱ꞌa̱ i̱ naaꞌ sa̱a̱ i̱ sa̱kanꞌ.
17 Te̱ xaꞌa̱ꞌ ña̱ ni̱a̱ꞌa ña̱ ni̱ xa̱a̱ ndoꞌó,
ne̱ vi̱ꞌe̱ Israel,
ne̱ nduuꞌ kuenta i̱,
xaꞌa̱ꞌ a̱ ña̱ ndioo̱ꞌ i̱ni̱ va̱ ndo̱ꞌ xaꞌa̱ꞌ ña̱ꞌa̱,
na ni̱ na̱saa̱ꞌ i̱ ni̱ xi̱ni̱ ndoꞌó.
Ni̱ ka̱ni̱ ndoꞌó,
te̱ ni̱ ku̱xi̱o̱o̱ tu̱ i̱ nuu̱ꞌ ndo̱ꞌ.
Ni̱ na̱saa̱ꞌ va̱ i̱ ni̱ xi̱ni̱ i̱ ndoꞌó,
ndisu̱ nï̱ xi̱kuii̱n ndo̱ꞌ ña̱ xateiꞌ ndo̱ꞌ nuu̱ꞌ i̱,
te̱ ni̱ xa̱a̱ ndo̱ꞌ ña̱ kaꞌán nimá mi̱iꞌ ndo̱ꞌ.
18 Xa̱ xiní ndo̱o̱ i̱ sa̱kuuꞌ ña̱ xaaꞌ ndo̱ꞌ,
ndisu̱ nde̱e̱ sa̱a̱ ka̱ ni̱ ndii,
sa̱ndaꞌa i̱ ndoꞌó.
Te̱ ko̱to̱ tu̱ i̱ ndoꞌó,
te̱ sa̱kiꞌví i̱ ndoꞌó,
te̱ sa̱kiꞌví tu̱ i̱ sa̱kuuꞌ taꞌanꞌ ndo̱ꞌ ne̱ xakuꞌ.
19 Sa̱kanꞌ ña̱ sa̱kataꞌ ña̱ꞌaꞌ i̱ ya̱a̱ ña̱ kaꞌán ndii:
Na ko̱o̱ ña̱ mani̱ꞌ xiinꞌ ne̱ ndieeꞌ xikaꞌ,
te̱ na ko̱o̱ tu̱ ña̱ mani̱ꞌ xiinꞌ ne̱ ndieeꞌ ya̱ti̱n,
katyi̱ ni̱a̱”,
katyi Yahvé.
Te̱ kaꞌán tu̱ a̱ ndii:
“Mi̱iꞌ yuꞌu̱ sa̱ndaꞌa ña̱ꞌaꞌ.
20 Ndisu̱ ne̱ xaaꞌ ña̱ ni̱a̱ꞌa ndii,
nduuꞌ ni̱a̱ nde̱e̱ naa mi̱ni̱ kaꞌnuꞌ ña̱ kuunꞌ kuiꞌe̱ savi̱ꞌ nuu̱ꞌ,
te̱ kü̱vi̱ ku̱naa̱ taxi̱nꞌ ti̱kui a̱,
te̱ ti̱kui mi̱ni̱ ja̱a̱nꞌ ndii,
xatia raꞌ mi̱ꞌiꞌ xiinꞌ ndeꞌi̱.
21 Ne̱ xaaꞌ ña̱ ni̱a̱ꞌa ja̱a̱nꞌ ndii,
köo̱ꞌ kivi̱ꞌ ndieeꞌ mani̱ꞌ ni̱a̱”,
katyi Ndiosí ña̱ xakaꞌnuꞌ yuꞌu̱.