Yoꞌoꞌ kaꞌán a̱ xaꞌa̱ꞌ ña̱ sa̱mani̱ꞌ Ndiosí sa̱kuuꞌ ne̱ sa̱xinu̱ kuento ña̱ ni̱ ndoo̱ a̱
56
Ña̱ yo̱ꞌo̱ꞌ kaꞌán Yahvé:
“Sa̱tyuunꞌ nda̱ku ndo̱ꞌ,
te̱ i̱i̱n ni̱ nda̱ꞌaꞌ ku̱u̱ ndo̱ꞌ xiinꞌ sa̱kuuꞌ ne̱ yivi̱ꞌ.
Sa̱kanꞌ ña̱ nä̱ꞌaꞌ ka̱ te̱ ki̱xi̱n i̱ te̱ sa̱kakú i̱ ndoꞌó,
te̱ niaꞌa̱ i̱ ña̱ xatyuunꞌ nda̱ku i̱ te̱i̱n ndo̱ꞌ.
2 Va̱ꞌa̱ va̱ kuni ne̱ yivi̱ꞌ,
ne̱ sa̱xinu̱ ña̱ yo̱ꞌo̱ꞌ te̱ sa̱kanꞌ tu̱ sa̱kuuꞌ ne̱ natiinꞌ va̱ꞌa̱ nde̱iꞌ ja̱a̱nꞌ.
Te̱ va̱ꞌa̱ va̱ tu̱ kuni ne̱ xitoꞌ kaꞌnuꞌ kivi̱ꞌ ña̱ xina̱ndiee̱ꞌ,
te̱ xäꞌnú ni̱a̱ kivi̱ꞌ ja̱a̱nꞌ,
te̱ xäaꞌ tu̱ ni̱a̱ nde̱e̱ i̱i̱n nuu̱ꞌ ña̱ ni̱a̱ꞌa kivi̱ꞌ ja̱a̱nꞌ”,
katyi a̱.
3 Tä̱xi̱ ndo̱ꞌ kaꞌa̱n te̱ tukuꞌ,
te̱ ndikún Yahvé ndii:
“Sa̱siinꞌ xa̱tyiꞌ Yahvé yuꞌu̱ nuu̱ꞌ ne̱ nduuꞌ kuenta a̱”,
katyi̱ ra̱.
Ni̱ nde̱e̱ tä̱xi̱ tu̱ ndo̱ꞌ kaꞌa̱n te̱ ñaꞌma ndii:
“Yuꞌu̱ ndii,
nduuꞌ i̱ nde̱e̱ naa i̱i̱n i̱tunꞌ i̱tyiꞌ ku̱i̱ti̱ꞌ,
sa̱kanꞌ ña̱ köo̱ꞌ nde̱e̱ i̱i̱n siꞌe̱ i̱”,
katyi̱ ra̱.
4 Sa̱kanꞌ ña̱ ña̱ yo̱ꞌo̱ꞌ kaꞌán Yahvé xiinꞌ te̱ ñaꞌma ja̱a̱nꞌ:
“Naaꞌ ko̱to̱ kaꞌnuꞌ sa̱kuuꞌ te̱ ñaꞌma ja̱a̱nꞌ kivi̱ꞌ ña̱ xina̱ndiee̱ꞌ ndo̱ꞌ,
te̱ naa sa̱xinu̱ tu̱ ra̱ sa̱kuuꞌ ña̱ kaꞌán nimá i̱.
Te̱ na̱ti̱i̱n va̱ꞌa̱ ra̱ kuento i̱ ña̱ taxiꞌ i̱ nda̱ꞌaꞌ ra̱ ndii,
5 ta̱xi̱ i̱ ku̱ndi̱e̱e̱ ra̱ ti̱xi̱n vi̱ꞌe̱ i̱,
te̱ ta̱xi̱ tu̱ i̱ ku̱ndi̱e̱e̱ ra̱ ti̱xi̱n nama̱ ñu̱u̱ i̱,
te̱ ña̱ kaꞌnuꞌ ka̱ nduuꞌ ña̱ ja̱a̱nꞌ te̱ sa̱kanꞌ ña̱ ko̱o̱ kiꞌinꞌ tiaa̱ siꞌe̱ ra̱ uun kiꞌinꞌ ña̱ꞌaꞌ siꞌe̱ ra̱.
Te̱ ta̱xi̱ tu̱ i̱ i̱i̱n kivi̱ꞌ ra̱ ña̱ köo̱ꞌ kivi̱ꞌ na̱ndoso̱ꞌ ne̱ yivi̱ꞌ.
6 Te̱ sa̱kanꞌ tu̱ sa̱kuuꞌ ne̱ tukuꞌ,
ne̱ sa̱xinu̱ ña̱ kuní yuꞌu̱,
Yahvé,
xikaꞌ nuuꞌ ni̱a̱ nuu̱ꞌ i̱,
te̱ ndani̱ tu̱ ni̱a̱ yuꞌu̱.
Te̱ nduuꞌ ni̱a̱ ne̱ xikaꞌ nuuꞌ nuu̱ꞌ i̱,
te̱ sa̱kanꞌ tu̱ ne̱ xitoꞌ kaꞌnuꞌ kivi̱ꞌ ña̱ xina̱ndiee̱ꞌ ndo̱ꞌ,
te̱ xäꞌnú ni̱a̱ kivi̱ꞌ ja̱a̱nꞌ.
Te̱ natiinꞌ va̱ꞌa̱ ni̱a̱ kuento ña̱ ni̱ ta̱xi̱ i̱ nda̱ꞌaꞌ ni̱a̱ ndii,
7 ku̱ndi̱a̱ka̱ ña̱ꞌaꞌ i̱ kuꞌu̱n ni̱a̱ xiinꞌ i̱ xíniꞌ i̱kuꞌ su̱ꞌu̱n,
ña̱ nduuꞌ kuenta i̱.
Te̱ ku̱ndi̱e̱e̱ mani̱ꞌ ni̱a̱ ti̱xi̱n vi̱ꞌe̱ miiꞌ kaꞌán ne̱ yivi̱ꞌ si̱u̱ꞌunꞌ xiinꞌ i̱.
Na̱ti̱i̱n va̱ꞌa̱ i̱ ki̱tiꞌ,
tiꞌ ka̱ꞌmi̱ ni̱a̱ nuu̱ꞌ i̱,
xiinꞌ tu̱mani̱ꞌ ña̱ na̱soko̱ꞌ ni̱a̱ nuu̱ꞌ i̱ nuu̱ꞌ altar.
Sa̱kanꞌ ña̱ vi̱ꞌe̱ i̱ ja̱a̱nꞌ ndii,
vi̱ꞌe̱ miiꞌ ndatuꞌunꞌ ne̱ yivi̱ꞌ xiinꞌ i̱ ku̱na̱niꞌ a̱ nuu̱ꞌ sa̱kuuꞌ ne̱ yivi̱ꞌ”,
katyi̱ a̱.
8 Ña̱ yo̱ꞌo̱ꞌ kaꞌán tu̱ Tákuiꞌe Yahvé,
ña̱ nakaya sa̱kuuꞌ ne̱ vi̱ꞌe̱ Israel,
ne̱ ni̱ xiti̱a̱ i̱ꞌnu̱:
“Na̱ka̱ya̱ tu̱ i̱ i̱nga̱ ne̱ taꞌanꞌ ndo̱ꞌ,
te̱ ndu̱i̱i̱n ni̱a̱ xiinꞌ ne̱ xa̱ ni̱ nda̱sa̱ i̱i̱n i̱”,
katyi a̱.
Yoꞌoꞌ kaꞌán a̱ xaꞌa̱ꞌ ña̱ tiinꞌ ku̱a̱tyi̱ Ndiosí te̱ kuuꞌ nu̱uꞌ nuu̱ꞌ ne̱ vi̱ꞌe̱ Israel
9 Sa̱kuuꞌ ndoꞌó,
ne̱ tukuꞌ,
ne̱ nduuꞌ nde̱e̱ naa ki̱tiꞌ i̱kuꞌ,
tiꞌ yoo xaꞌa̱ꞌ kuꞌu̱,
ni̱a̱ꞌa̱ ndo̱ꞌ te̱ ka̱ꞌni̱ꞌ ndo̱ꞌ ne̱ nduuꞌ kuenta i̱,
te̱ ka̱xi̱ꞌ ndo̱ꞌ nde̱i̱ꞌ ni̱a̱ nde̱e̱ naa xaaꞌ ki̱tiꞌ i̱kuꞌ ja̱a̱nꞌ.
10 Te̱ xitoꞌ ne̱ vi̱ꞌe̱ Israel ndii,
nde̱e̱ naa te̱ kuiꞌe ndu̱tyiꞌ nuu̱ꞌ nduuꞌ ra̱,
te̱ xïní xa̱tyiꞌ ra̱ ña̱ xaaꞌ ra̱.
Te̱ sa̱kuuꞌ ra̱ nduuꞌ nde̱e̱ naa naya̱ꞌ iꞌinꞌ,
tiꞌ kü̱vi̱ ndeꞌi̱.
Xa̱nuu̱ꞌ kixín ku̱i̱ti̱ꞌ riꞌ ndieeꞌ riꞌ,
te̱ xtani̱ va̱ riꞌ kusu̱n riꞌ.
11 Te̱ nduuꞌ ra̱ nde̱e̱ naa naya̱ꞌ,
tiꞌ xtani̱ va̱ ku̱xi̱,
te̱ köo̱ꞌ kivi̱ꞌ ndaꞌni riꞌ.
Te̱ pa̱xto,
te̱ köo̱ꞌ a̱ xiní xa̱tyiꞌ,
nduuꞌ ra̱.
Te̱ i̱ꞌi̱n ra̱ xaaꞌ ña̱ kuní mi̱iꞌ ra̱,
te̱ i̱ꞌi̱n tu̱ ra̱ ndukuꞌ ña̱ va̱ꞌa̱ xaꞌa̱ꞌ mi̱iꞌ ra̱,
te̱ i̱ꞌi̱n ra̱ kuaꞌa̱n miiꞌ ka̱ kuní mi̱iꞌ ra̱.
12 Te̱ kaꞌán tiꞌeꞌ sa̱kuuꞌ ra̱ ndii:
“Ni̱a̱ꞌa̱ ndo̱ꞌ te̱ na̱ndu̱kuꞌ e̱ꞌ vino ko̱ꞌo̱ e̱ꞌ nde̱e̱ xi̱ni̱ sa̱kuuꞌ e̱ꞌ.
Te̱ sa̱kanꞌ tu̱ sa̱a̱ e̱ꞌ tiaa̱n uun nde̱e̱ tyiee̱ ka̱ ko̱o̱ vi̱koꞌ sa̱a̱ e̱ꞌ tiaa̱n te̱ sa̱kanꞌ vi̱ti̱n”,
katyi ra̱.