Yoꞌoꞌ kanaꞌ Ndiosí sa̱kuuꞌ ne̱ yivi̱ꞌ te̱ sa̱kakú so̱ꞌo̱ ña̱ꞌaꞌ a̱
55
’Sa̱kuuꞌ ndoꞌó,
ne̱ ityí i̱ni̱,
ni̱a̱ꞌa̱ ndo̱ꞌ te̱ ko̱ꞌo̱ ndo̱ꞌ ti̱kui.
Te̱ sa̱kanꞌ tu̱ sa̱kuuꞌ ndoꞌó,
ne̱ ndoꞌoꞌ köo̱ꞌ xu̱ꞌunꞌ,
ni̱a̱ꞌa̱ ndo̱ꞌ te̱ sa̱ta̱ꞌ ndo̱ꞌ ña̱ꞌa̱ te̱ ka̱xi̱ꞌ ndo̱ꞌ a̱.
Ni̱a̱ꞌa̱ ndo̱ꞌ te̱ sa̱ta̱ꞌ ndo̱ꞌ tee̱ꞌ ndee kö̱o̱ꞌ xu̱ꞌunꞌ ndo̱ꞌ,
te̱ nde̱e̱ siee tyä̱ꞌvi̱ ndo̱ꞌ xaꞌa̱ꞌ vino xiinꞌ letyin.
2 ¿Ndiotyun na kuiiꞌ xaꞌni̱ꞌ ndii̱ꞌ ndo̱ꞌ xu̱ꞌunꞌ ndo̱ꞌ te̱ sata̱ꞌ ndo̱ꞌ ña̱ xaxi̱ꞌ ña̱ kuäsa̱ꞌ tyindieeꞌ ñu̱ꞌuꞌ ndeꞌi̱ ndo̱ꞌ?
¿Te̱ ndiotyun na kuiiꞌ xaꞌni̱ꞌ ndo̱ꞌ xu̱ꞌunꞌ ña̱ xikuꞌún yaꞌviꞌ ndo̱ꞌ xaꞌa̱ꞌ ña̱ kuäsa̱ꞌ sandaꞌni ndoꞌó?
Tyu̱nxaꞌaꞌ ndo̱ꞌ ña̱ kaꞌán i̱ xiinꞌ ndo̱ꞌ,
te̱ ka̱xi̱ꞌ ndo̱ꞌ ña̱ xaxi̱ꞌ va̱ꞌa̱,
te̱ ka̱xi̱ꞌ tu̱ ndo̱ꞌ ña̱ xaxi̱ꞌ ña̱ asi̱nꞌ xa̱va̱ꞌa̱.
3 Ni̱a̱ꞌa̱ ndo̱ꞌ nuu̱ꞌ i̱ te̱ ku̱ni̱ so̱ꞌo̱ kaxiꞌ va̱ ndo̱ꞌ ña̱ kaꞌa̱n i̱ xiinꞌ ndo̱ꞌ.
Tyu̱nxaꞌaꞌ va̱ ndo̱ꞌ ña̱ kaꞌa̱n i̱ xiinꞌ ndo̱ꞌ te̱ ku̱ti̱a̱ku̱ ndo̱ꞌ.
Te̱ ndoo̱ i̱ kuento i̱ xiinꞌ ndo̱ꞌ te̱ ko̱o̱ a̱ nde̱e̱ ndiꞌiꞌ ni̱ kivi̱ꞌ.
Te̱ xiinꞌ ña̱ ja̱a̱nꞌ sa̱xinu̱ i̱ kuento i̱ ña̱ ni̱ ta̱xi̱ i̱ nuu̱ꞌ David xaꞌa̱ꞌ a̱ ña̱ ndani̱ ña̱ꞌaꞌ i̱.
4 Te̱ ja̱a̱nꞌ ndii,
ni̱ tyi̱nduꞌu̱ꞌ ña̱ꞌaꞌ i̱ nduuꞌ ra̱ nde̱e̱ naa te̱ ndieeꞌ yu̱ꞌuꞌ xaꞌa̱ꞌ i̱ nuu̱ꞌ ne̱ yivi̱ꞌ.
Te̱ ku̱ndu̱u̱ tu̱ ra̱ te̱ ka̱ꞌndi̱a̱ tyuunꞌ nuu̱ꞌ ne̱ yivi̱ꞌ xiinꞌ te̱ saniaꞌá nuu̱ꞌ ne̱ tukuꞌ.
5 Te̱ xaꞌa̱ꞌ a̱ ña̱ kiꞌinꞌ kaꞌnuꞌ yuꞌu̱,
Yahvé,
Ndiosí ña̱ xakaꞌnuꞌ ndo̱ꞌ ndoꞌó ndii,
ka̱na̱ ndo̱ꞌ ne̱ yivi̱ꞌ,
ne̱ xïní ndo̱ꞌ.
Te̱ ne̱ yivi̱ꞌ,
ne̱ xïní ndoꞌó ndii,
taxtaꞌanꞌ ni̱a̱ ki̱xi̱n ni̱a̱ nuu̱ꞌ ndo̱ꞌ xaꞌa̱ꞌ a̱ ña̱ xa̱ sa̱kanꞌ kuní mi̱iꞌ yuꞌu̱,
Ndiosí su̱ꞌu̱n ña̱ xakaꞌnuꞌ ndoꞌó,
ne̱ vi̱ꞌe̱ Israel.
6 ’Na̱ndu̱kuꞌ ndo̱ꞌ yuꞌu̱ꞌ,
Yahvé,
vi̱ti̱n ña̱ taniꞌ ka̱ kivi̱ꞌ nuu̱ꞌ ndo̱ꞌ,
te̱ ka̱na̱ ndo̱ꞌ yuꞌu̱ vi̱ti̱n ña̱ yoo i̱ ya̱ti̱n nuu̱ꞌ ndo̱ꞌ.
7 Te̱ na na̱ko̱o̱ ndoꞌó,
ne̱ xaaꞌ ña̱ ni̱a̱ꞌa,
ña̱ ni̱a̱ꞌa ña̱ xaaꞌ ndo̱ꞌ,
te̱ na na̱ko̱o̱ tu̱ ndo̱ꞌ ña̱ xanini ki̱ni̱ ndo̱ꞌ,
te̱ na na̱ndi̱koꞌ ndo̱ꞌ nuu̱ꞌ yuꞌu̱,
Yahvé,
te̱ ku̱vi̱ta i̱ni̱ i̱ xaꞌa̱ꞌ ndo̱ꞌ.
Na̱ndi̱koꞌ ndo̱ꞌ nuu̱ꞌ yuꞌu̱ꞌ,
Ndiosí ña̱ xakaꞌnuꞌ ndo̱ꞌ,
te̱ ko̱o̱ kaꞌnuꞌ kuaꞌa̱ꞌ i̱ni̱ i̱ xaꞌa̱ꞌ ku̱a̱tyi̱ ndo̱ꞌ”,
ni̱ katyi̱ a̱.
8 Te̱ kaꞌán ka̱ Yahvé ndii:
“Sa̱kanꞌ ña̱ näkuitá xa̱tyiꞌ ña̱ xanini yuꞌu̱ xiinꞌ ña̱ xanini ndoꞌó,
ni̱ nde̱e̱ näkuitá tu̱ ña̱ xaaꞌ i̱ xiinꞌ ña̱ xaaꞌ ndoꞌó.
9 Sa̱a̱ niiꞌ sukun va̱ kanduꞌu̱ꞌ ndi̱viꞌ nuu̱ꞌ ñu̱ꞌuꞌ i̱i̱n yivi̱ꞌ ndii,
niiꞌ sa̱kanꞌ tu̱ sukun va̱ yoo ña̱ xaaꞌ i̱ te̱ sa̱kanꞌ ña̱ xaaꞌ ndoꞌó,
te̱ sa̱kanꞌ tu̱ ña̱ xanini i̱ ndii,
sukun ka̱ yoo a̱ te̱ sa̱kanꞌ ña̱ xanini ndoꞌó.
10 Sa̱a̱ niiꞌ xaaꞌ savi̱ꞌ xiinꞌ ka̱xi̱n kieeꞌ a̱ nde̱e̱ ndi̱viꞌ te̱ koyó a̱ nuu̱ꞌ ñu̱ꞌuꞌ,
te̱ nändikoꞌ a̱ i̱kanꞌ nde̱e̱ koso̱ a̱ nuu̱ꞌ ñu̱ꞌuꞌ i̱i̱n yivi̱ꞌ,
te̱ sa̱nakún a̱ sa̱kuuꞌ nuu̱ꞌ ndi̱kinꞌ ña̱ tyiꞌiꞌ te̱ yivi̱ꞌ,
te̱ nakooꞌ a̱ ndi̱kinꞌ nda̱ꞌaꞌ ne̱ tyiꞌiꞌ a̱,
te̱ nakooꞌ tu̱ a̱ ña̱ xaxi̱ꞌ nda̱ꞌaꞌ ne̱ xixiꞌ a̱ ndii,
11 niiꞌ sa̱kanꞌ tu̱ xaaꞌ tu̱ꞌu̱n ña̱ kieeꞌ yu̱ꞌuꞌ i̱ ndii,
nä̱ndi̱koꞌ so̱ꞌo̱ a̱ nda̱ꞌaꞌ i̱.
Süu̱ꞌ ja̱a̱nꞌ ndii,
sa̱xinu̱ a̱ sa̱kuuꞌ ña̱ kuní i̱,
te̱ ke̱ta̱ va̱ꞌa̱ a̱ sa̱kuuꞌ xaanꞌ miiꞌ ti̱ꞌviꞌ ña̱ꞌaꞌ i̱ kuꞌu̱n a̱.
12 ’Ndoꞌó ndii,
va̱ꞌa̱ kuni ndo̱ꞌ ki̱e̱e̱ ndo̱ꞌ,
te̱ na̱ndi̱koꞌ mani̱ꞌ ndo̱ꞌ ñu̱u̱ ndo̱ꞌ.
Te̱ sa̱kuuꞌ i̱kuꞌ naꞌnuꞌ xiinꞌ xiki̱ꞌ ndii,
ka̱ta̱ a̱ ya̱a̱ nuu̱ꞌ ndo̱ꞌ,
te̱ sa̱kanꞌ tu̱ sa̱kuuꞌ i̱tunꞌ itaꞌ xaꞌa̱ꞌ kuꞌu̱ ndii,
ka̱tu̱ꞌ nda̱ꞌaꞌ nu̱ꞌ nuu̱ꞌ ndo̱ꞌ.
13 Nuu̱ꞌ ñu̱ꞌuꞌ ndo̱ꞌ miiꞌ ni̱ ita̱ i̱ñu̱ꞌ kuii̱ꞌ ndii,
tu̱nxaꞌ naku̱n.
Te̱ miiꞌ ni̱ ita̱ kuꞌu̱ xiti̱nꞌ ndii,
mi̱iꞌ ndiꞌiꞌ tunꞌ i̱ta̱ naku̱n.
Te̱ ña̱ ja̱a̱nꞌ sa̱a̱ sa̱kanꞌ te̱ ki̱ꞌi̱n kaꞌnuꞌ ne̱ yivi̱ꞌ yuꞌu̱,
Yahvé,
te̱ ku̱ndu̱u̱ a̱ ña̱ niaꞌá nde̱e̱ ndiꞌiꞌ ni̱ kivi̱ꞌ ña̱ köo̱ꞌ kivi̱ꞌ ndiꞌiꞌ ña̱ ndani̱ i̱ ndoꞌó”,
katyi a̱.