Yoꞌoꞌ kaꞌán a̱ xaꞌa̱ꞌ ña̱ ndani̱ Ndiosí ne̱ vi̱ꞌe̱ Israel nde̱e̱ ndiꞌiꞌ ni̱ kivi̱ꞌ
54
Ña̱ yo̱ꞌo̱ꞌ kaꞌán Yahvé:
“Ndoꞌó,
ne̱ nduuꞌ ña̱ꞌaꞌ ñaꞌ kü̱vi̱ ko̱o̱ siꞌe̱ ndii,
ka̱ta̱ tiꞌeꞌ sii̱ꞌ ndo̱ꞌ ya̱a̱ xaꞌa̱ꞌ a̱ ña̱ va̱ꞌa̱ kuni ndo̱ꞌ,
ndoꞌó,
ne̱ nduuꞌ ñaꞌ köo̱ꞌ kivi̱ꞌ ni̱ sa̱kakuꞌ nde̱e̱ i̱i̱n ña̱ kuañuꞌu̱.
Sa̱kanꞌ ña̱ kuaꞌa̱ꞌ ka̱ siꞌe̱ ña̱ꞌaꞌ ñaꞌ ni̱ ndoo̱ kuaa̱nꞌ te̱ sa̱kanꞌ siꞌe̱ ñaꞌ nduꞌu̱ꞌ xiinꞌ i̱i̱ꞌ aꞌ”,
katyi a̱.
2 Nda̱sa̱ tyiee̱ ndo̱ꞌ vi̱ꞌe̱ ndo̱ꞌ,
te̱ nda̱sa̱ ndiká tu̱ ndo̱ꞌ toto̱ ndiká ña̱ taꞌnuꞌ ti̱xi̱n vi̱ꞌe̱ ndo̱ꞌ ja̱a̱nꞌ,
te̱ vï̱kuii̱n ndo̱ꞌ xiinꞌ ña̱ ja̱a̱nꞌ.
Sa̱nakaá ka̱ ndo̱ꞌ yo̱ꞌoꞌ ña̱ tiín toto̱ ndiká ña̱ ndasi vi̱ꞌe̱ ndo̱ꞌ,
te̱ na̱ka̱ta̱ kutu̱ꞌ ndo̱ꞌ sa̱kuuꞌ ti̱kundu̱ tunꞌ tiín yo̱ꞌoꞌ ja̱a̱nꞌ.
3 Sa̱kanꞌ ña̱ sa̱a̱ kuaꞌa̱n nuu̱ꞌ ñu̱ꞌuꞌ miiꞌ ndieeꞌ ndo̱ꞌ ñaa̱ꞌ sa̱kutuꞌ ndo̱ꞌ.
Te̱ si̱a̱niꞌ xikaꞌ ndo̱ꞌ ndii,
na̱ꞌi̱ ni̱a̱ kiꞌinꞌ ñu̱ꞌu̱ꞌ naꞌnuꞌ ku̱ndu̱u̱ ña̱ꞌa̱ ni̱a̱,
te̱ kuꞌu̱n ku̱ndi̱e̱e̱ ni̱a̱ nde̱e̱ ñu̱u̱ ndo̱ꞌ ña̱ xa̱ ni̱ nduxi̱n xa̱tyiꞌ.
4 Kuäa̱n yiꞌvi ndo̱ꞌ,
sa̱kanꞌ ña̱ köo̱ꞌ kivi̱ꞌ ka̱ sa̱kaꞌanꞌ ne̱ yivi̱ꞌ ndoꞌó.
Ku̱kä̱ꞌa̱n nuu̱ꞌ ndo̱ꞌ sa̱kanꞌ ña̱ kä̱ni̱a̱ꞌa ka̱ ne̱ yivi̱ꞌ xiinꞌ ndo̱ꞌ.
Süu̱ꞌ ja̱a̱nꞌ ndii,
na̱ndoso̱ꞌ ndo̱ꞌ xaꞌa̱ꞌ sa̱kuuꞌ ña̱ ni̱ sa̱kaꞌanꞌ ne̱ yivi̱ꞌ ndoꞌó kii̱ꞌ ni̱ nduu̱ ndo̱ꞌ ne̱ sa̱va̱.
Te̱ na̱ndoso̱ꞌ tu̱ ndo̱ꞌ xaꞌa̱ꞌ ña̱ ni̱ ka̱ni̱a̱ꞌa ne̱ yivi̱ꞌ xiinꞌ ndo̱ꞌ xaꞌa̱ꞌ ña̱ ni̱ nduu̱ ndo̱ꞌ ne̱ kuaa̱nꞌ.
5 Sa̱kanꞌ ña̱ ña̱ ni̱ xa̱ꞌa̱ ndoꞌó nduuꞌ i̱i̱ꞌ ndo̱ꞌ,
te̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
nduuꞌ kivi̱ꞌ a̱.
Te̱ Ndiosí su̱ꞌu̱n ña̱ xakaꞌnuꞌ yooꞌ,
ne̱ vi̱ꞌe̱ Israel,
nduuꞌ ña̱ sandoó ndiká ndoꞌó.
Te̱ Ndiosí,
ña̱ xaꞌndia tyuunꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
nduuꞌ kivi̱ꞌ a̱.
6 Ni̱ nduu̱ ndo̱ꞌ nde̱e̱ naa i̱i̱n ña̱ꞌaꞌ ñaꞌ ni̱ ndoo̱ ni̱ xa̱a̱ i̱i̱ꞌ aꞌ,
te̱ ni̱ ndi̱ꞌni̱ va̱ nimá aꞌ.
Ndisu̱ ni̱ ka̱na̱ Yahvé ndoꞌó tee̱ꞌ ndee ni̱ nduu̱ ndo̱ꞌ nde̱e̱ naa i̱i̱n ña̱ꞌaꞌ ñaꞌ ni̱ tu̱ndaꞌa̱ꞌ kii̱ꞌ ñaꞌ sa̱va̱ va̱ nduuꞌ,
te̱ ni̱ ku̱nda̱siꞌ ña̱ꞌaꞌ i̱i̱ꞌ aꞌ,
kaꞌán Ndiosí,
ña̱ xakaꞌnuꞌ ndo̱ꞌ,
xiinꞌ ndo̱ꞌ ndii:
7 “I̱i̱n kani̱ꞌ ku̱i̱ti̱ꞌ ni̱ na̱ko̱o̱ i̱ ndoꞌó,
ndisu̱ xaꞌa̱ꞌ a̱ ña̱ kuvita va̱ i̱ni̱ i̱ xaꞌa̱ꞌ ndo̱ꞌ ndii,
na̱ka̱ tu̱ku̱u̱ i̱ ndoꞌó.
8 Te̱ xaꞌa̱ꞌ a̱ ña̱ ni̱ na̱saa̱ꞌ va̱ i̱ ni̱ xa̱a̱ ndo̱ꞌ na nï̱ xi̱to̱ ka̱ i̱ nuu̱ꞌ ndo̱ꞌ i̱i̱n xaꞌaꞌ.
Te̱ ndisu̱ xaꞌa̱ꞌ a̱ ña̱ köo̱ꞌ kivi̱ꞌ ndiꞌiꞌ ña̱ ndani̱ i̱ ndoꞌó ndii,
ni̱ yoo̱ kaꞌnuꞌ i̱ni̱ xaꞌa̱ꞌ ndo̱ꞌ,
katyi̱ yuꞌu̱,
Yahvé,
ña̱ sa̱ndoó ndiká ndoꞌó.
9 ’Sa̱kanꞌ ña̱ nuu̱ꞌ yuꞌu̱ ndii,
nduuꞌ a̱ nde̱e̱ naa kii̱ꞌ ni̱ xika̱ Noé,
kii̱ꞌ ni̱ ta̱xi̱ i̱ kuento i̱ nuu̱ꞌ ra̱ ña̱ köo̱ꞌ kivi̱ꞌ ka̱ sa̱ndo̱ñuꞌuꞌ i̱ i̱i̱n yivi̱ꞌ xiinꞌ ti̱kui saviꞌ.
Te̱ sa̱kanꞌ tu̱ taxiꞌ i̱ kuento i̱ nuu̱ꞌ ndoꞌó vi̱ti̱n ña̱ köo̱ꞌ kivi̱ꞌ ka̱ na̱saa̱ꞌ i̱ ku̱ni̱ i̱ ndoꞌó ni̱ nde̱e̱ sä̱ndoꞌoꞌ ka̱ tu̱ i̱ ndoꞌó.
10 Tee̱ꞌ ndee ka̱nda̱ sa̱kuuꞌ i̱kuꞌ naꞌnuꞌ,
te̱ na̱kaa̱ꞌ sa̱kuuꞌ xiki̱ꞌ ndii,
köo̱ꞌ kivi̱ꞌ na̱ko̱o̱ i̱ ña̱ kuvita i̱ni̱ i̱ xaꞌa̱ꞌ ndoꞌó,
ni̱ nde̱e̱ kuento ña̱ natandieeꞌ mani̱ꞌ ndoꞌó ña̱ ni̱ ta̱xi̱ i̱ nuu̱ꞌ ndo̱ꞌ ndii,
köo̱ꞌ kivi̱ꞌ kaꞌnu̱ i̱ a̱,
katyi̱ yuꞌu̱,
Yahvé,
ña̱ kuvita i̱ni̱ xaꞌa̱ꞌ ndo̱ꞌ.
11 ’Ndaꞌvi va̱ kuuꞌ ndoꞌó ñu̱u̱ ne̱ ndieeꞌ ñu̱u̱ ña̱ ni̱ nduxi̱n ndo̱o̱ ni̱ xa̱a̱ tatyi̱ꞌ ndi̱e̱eꞌ.
Te̱ ndoꞌoꞌ va̱ ndo̱ꞌ,
te̱ ndiꞌni̱ va̱ tu̱ nimá ndo̱ꞌ,
sa̱kanꞌ ña̱ köo̱ꞌ yoo sa̱kiꞌví ndoꞌó.
Ndisu̱ vi̱ti̱n ndii,
na̱ka̱sa̱ꞌa̱ xa̱aꞌ i̱ ñu̱u̱ ndo̱ꞌ xiinꞌ yuu̱ꞌ nda̱tu̱nꞌ va̱,
te̱ na̱ka̱sa̱ꞌa̱ tu̱ i̱ xaꞌa̱ꞌ nama̱ ña̱ ndasi i̱ꞌnu̱ ñu̱u̱ ndo̱ꞌ xiinꞌ yuu̱ꞌ ña̱ naniꞌ zafiro.
12 Te̱ xíniꞌ vi̱ꞌe̱ ndo̱ꞌ miiꞌ sukun ndii,
xiinꞌ mi̱iꞌ ndiꞌiꞌ yuu̱ꞌ nda̱tu̱nꞌ ña̱ naniꞌ rubí ka̱sa̱ꞌa̱ i̱ a̱.
Te̱ yiꞌeꞌ ñu̱u̱ ndo̱ꞌ ndii,
xiinꞌ yuu̱ꞌ nda̱tu̱nꞌ ña̱ naniꞌ carbunclo ka̱sa̱ꞌa̱ i̱ a̱.
Te̱ ka̱niiꞌ nama̱ ña̱ ndasi i̱ꞌnu̱ ñu̱u̱ ndo̱ꞌ ndii,
xiinꞌ mi̱iꞌ ndiꞌiꞌ yuu̱ꞌ nda̱tu̱nꞌ ka̱sa̱ꞌa̱ i̱ a̱.
13 Te̱ xa̱ mi̱iꞌ yuꞌu̱ Yahvé sa̱nia̱ꞌá sa̱kuuꞌ ne̱ ndieeꞌ ñu̱u̱ Jerusalén,
te̱ ku̱ndi̱e̱e̱ mani̱ꞌ va̱ sa̱kuuꞌ ni̱a̱ nde̱e̱ ndiꞌiꞌ ni̱ kivi̱ꞌ.
14 Te̱ ña̱ xatyuunꞌ nda̱ku ndo̱ꞌ ku̱ndu̱u̱ ndi̱e̱e̱ꞌ ndo̱ꞌ,
te̱ köo̱ꞌ sa̱ndoꞌoꞌ ka̱ ndoꞌó,
te̱ nde̱e̱ i̱i̱n ña̱ꞌa̱ sä̱yi̱ꞌvi ka̱ tu̱ ndoꞌó.
Te̱ ña̱ i̱yo̱ ndii,
ku̱xi̱o̱o̱ ndo̱o̱ a̱ nuu̱ꞌ ndo̱ꞌ,
te̱ köo̱ꞌ kivi̱ꞌ ka̱ ku̱ya̱ti̱n a̱.
15 Naaꞌ kuntaꞌanꞌ yo̱o̱ ka̱ xiinꞌ ndo̱ꞌ ndii,
süu̱ꞌ yuꞌu̱ ti̱ꞌviꞌ ña̱ꞌaꞌ.
Te̱ yo̱o̱ ka̱ ku̱ntaꞌanꞌ xiinꞌ ndo̱ꞌ ndii,
ka̱nandoo ña̱ꞌaꞌ ndo̱ꞌ.
16 ’Ko̱to̱ ndo̱ꞌ,
yuꞌu̱ ni̱ xa̱ꞌa̱ te̱ tuxiꞌ ka̱a̱,
te̱ sandatin ñuꞌu̱ ti̱kei̱ te̱ xaꞌa ra̱ ndiaa ka̱ nuu̱ꞌ ka̱a̱ xii̱nꞌ,
ña̱ tiinꞌ te̱ yivi̱ꞌ.
Te̱ yuꞌu̱ tu̱ ni̱ xa̱ꞌa̱ te̱ sanduxín,
te̱ sa̱nduxín ra̱ i̱i̱n yivi̱ꞌ.
17 Kü̱vi̱ ka̱ꞌni̱ꞌ te̱ yivi̱ꞌ ndoꞌó xiinꞌ nde̱e̱ i̱i̱n ka̱a̱ ña̱ xaꞌa te̱ ja̱a̱nꞌ.
Te̱ sa̱kuuꞌ ne̱ yivi̱ꞌ,
ne̱ tyi̱nduꞌu̱ꞌ ku̱a̱tyi̱ xaꞌa̱ꞌ ndo̱ꞌ ndii,
mi̱iꞌ ndoꞌó ka̱tunꞌ sa̱kuuꞌ ne̱ ja̱a̱nꞌ.
Ña̱ kaa̱ꞌ nduuꞌ ña̱ ndoo̱ nda̱ꞌaꞌ ne̱ xikaꞌ nuuꞌ nuu̱ꞌ yuꞌu̱,
Yahvé.
Yuꞌu̱,
Yahvé,
ña̱ sa̱kakú ndoꞌó,
nduuꞌ ña̱ kaꞌán ña̱ kaa̱ꞌ.