53
Köo̱ꞌ ni̱ ka̱ndi̱xaꞌ xa̱tyiꞌ ña̱ ni̱ kaꞌa̱n ndo̱so̱ꞌ ndu̱.
Te̱ köo̱ꞌ ni̱ xi̱ni̱ xa̱tyiꞌ tu̱ tyu̱u̱n kaꞌnuꞌ ña̱ ni̱ xa̱a̱ Yahvé.
2 Nuu̱ꞌ Ndiosí ni̱ xa̱ꞌnu̱ te̱ xikaꞌ nuuꞌ ja̱a̱nꞌ nde̱e̱ naa xaꞌnuꞌ tunꞌ ta̱ta̱ iti̱a̱ꞌ kii̱ꞌ kiꞌví ti̱o̱ꞌo̱ nu̱ꞌ ti̱xi̱n ñu̱ꞌuꞌ i̱tyi.
Kuäsa̱ꞌ xa̱tyiꞌ lu̱vi̱ kaaꞌ ra̱,
ni̱ nde̱e̱ kuäsa̱ꞌ tu̱ nda̱tu̱nꞌ ra̱.
Te̱ köo̱ꞌ xa̱tyiꞌ ña̱ sa̱kuitaꞌ ra̱ yoo,
te̱ kaꞌa̱n nimá e̱ꞌ xaꞌa̱ꞌ ra̱.
3 Ne̱ yivi̱ꞌ i̱i̱n yivi̱ꞌ ndii,
ni̱ ku̱nda̱siꞌ ña̱ꞌaꞌ ni̱a̱,
te̱ ni̱ sa̱xi̱o̱o̱ tu̱ ña̱ꞌaꞌ ni̱a̱.
Kuaꞌa̱ꞌ va̱ ni̱ ndo̱ꞌo̱ ra̱,
sa̱kanꞌ na kuiiꞌ xiní ra̱ ña̱ uꞌvi̱ xini e̱ꞌ kii̱ꞌ ndoꞌoꞌ xa̱va̱ꞌa̱ e̱ꞌ.
Te̱ sa̱kuuꞌ e̱ꞌ ni̱ na̱ko̱o̱ ña̱ꞌaꞌ xata̱ꞌ e̱ꞌ,
te̱ ni̱ ku̱nda̱siꞌ ña̱ꞌaꞌ sa̱kuuꞌ ne̱ yivi̱ꞌ,
te̱ nï̱ na̱nda̱ni̱ e̱ꞌ kuuꞌ ra̱.
4 Ndisu̱ sa̱kuuꞌ ña̱ ni̱ ndo̱ꞌo̱ te̱ ja̱a̱nꞌ ndii,
xaꞌa̱ꞌ ña̱ uꞌvi̱ xini e̱ꞌ ni̱ ndo̱ꞌo̱ ra̱ a̱.
Te̱ ña̱ ni̱ kuni̱ a̱ ku̱ndo̱ꞌo̱ yooꞌ ja̱a̱nꞌ nduuꞌ ña̱ ni̱ ndo̱ꞌo̱ te̱ ja̱a̱nꞌ.
Te̱ yooꞌ ni̱ xa̱ni̱ni̱ ndii,
ndoꞌoꞌ ra̱ ña̱ ja̱a̱nꞌ xaaꞌ Ndiosí xaꞌa̱ꞌ ku̱a̱tyi̱ mi̱iꞌ ra̱,
ni̱ ka̱ni̱ ña̱ꞌaꞌ a̱,
te̱ ni̱ sa̱kaꞌanꞌ tu̱ ña̱ꞌaꞌ a̱ xaꞌa̱ꞌ ña̱ ni̱ xa̱a̱ mi̱iꞌ ra̱,
ni̱ xa̱ni̱ni̱ e̱ꞌ.
5 Ndisu̱ ni̱ tu̱vi̱ te̱ yivi̱ꞌ ka̱a̱ xíinꞌ i̱i̱nꞌ ra̱ xaꞌa̱ꞌ ña̱ so̱ꞌo̱ sa̱kuuꞌ yooꞌ.
Te̱ xaꞌa̱ꞌ ña̱ ni̱a̱ꞌa ña̱ xaaꞌ yooꞌ ni̱ sa̱ndoꞌoꞌ ña̱ꞌaꞌ te̱ yivi̱ꞌ.
Te̱ xaꞌa̱ꞌ a̱ ña̱ ni̱ ndo̱ꞌo̱ ra̱ na yoo mani̱ꞌ e̱ꞌ xiinꞌ Ndiosí,
te̱ ndieeꞌ va̱ꞌa̱ e̱ꞌ.
Te̱ xaꞌa̱ꞌ a̱ ña̱ ni̱ sa̱tu̱xuꞌví ña̱ꞌaꞌ te̱ yivi̱ꞌ na ni̱ nda̱ꞌa̱ yooꞌ.
6 Sa̱kuuꞌ yooꞌ ndii,
ni̱ xiti̱a̱ i̱ꞌnu̱ e̱ꞌ nde̱e̱ naa mbe̱e̱.
Te̱ xa̱ i̱ꞌi̱n xa̱ i̱ꞌi̱n e̱ꞌ ni̱ ki̱ꞌi̱n i̱tyiꞌ mi̱iꞌ e̱ꞌ kuaꞌa̱n e̱ꞌ.
Ndisu̱ ni̱ sa̱kuisoꞌ ku̱a̱tyi̱ Yahvé te̱ jaa̱nꞌ xaꞌa̱ꞌ ku̱a̱tyi̱ sa̱kuuꞌ yooꞌ.
7 Ni̱ ndi̱ꞌni̱ nimá ra̱,
te̱ mi̱iꞌ xa̱va̱ꞌa̱ ni̱ ku̱u̱ te̱ yivi̱ꞌ xiinꞌ ra̱,
ndisu̱ nï̱ kaꞌa̱n ra̱ nde̱e̱ i̱i̱n yu̱ꞌuꞌ.
Ni̱ xaꞌa̱n ndi̱a̱ka̱ ña̱ꞌaꞌ te̱ yivi̱ꞌ miiꞌ ku̱vi̱ ra̱ nde̱e̱ naa xaaꞌ ra̱ xiinꞌ mbe̱e̱.
Ni̱ xa̱a̱ ra̱ nde̱e̱ naa mbe̱e̱ ña̱ ndëꞌí riꞌ kii̱ꞌ xaꞌndia te̱ yivi̱ꞌ i̱xiꞌ riꞌ,
sa̱kanꞌ ña̱ nï̱ kaꞌa̱n ra̱ nde̱e̱ i̱i̱n yu̱ꞌuꞌ.
8 Te̱ kii̱ꞌ ni̱ na̱ti̱i̱n ña̱ꞌaꞌ te̱ yivi̱ꞌ,
te̱ ni̱ sa̱naꞌmá ña̱ꞌaꞌ ra̱ ndii,
köo̱ꞌ ni̱ xaꞌnu̱ nda̱ku xa̱tyiꞌ ku̱a̱tyi̱ xaꞌa̱ꞌ ra̱.
Te̱ köo̱ꞌ tu̱ ni̱ ndiꞌni̱ xaꞌa̱ꞌ ña̱ ni̱ xiꞌi̱ ra̱ tee̱ꞌ ndee nï̱ yoo̱ nde̱e̱ i̱i̱n si̱a̱niꞌ ra̱,
ni̱ nde̱e̱ köo̱ꞌ ni̱ ndiꞌni̱ tu̱ xaꞌa̱ꞌ ña̱ ni̱ xa̱ꞌni̱ꞌ ña̱ꞌaꞌ te̱ yivi̱ꞌ,
te̱ ni̱ xta̱ꞌniꞌ ña̱ꞌaꞌ ra̱ nuu̱ꞌ ñu̱ꞌuꞌ i̱i̱n yivi̱ꞌ.
Te̱ xaꞌa̱ꞌ ku̱a̱tyi̱ ne̱ ñu̱u̱ i̱ na ni̱ xa̱ꞌni̱ꞌ ña̱ꞌaꞌ te̱ yivi̱ꞌ.
9 Te̱ ja̱a̱nꞌ ndii,
köo̱ꞌ xa̱tyiꞌ ña̱ ni̱a̱ꞌa ni̱ xa̱a̱ ra̱,
te̱ nde̱e̱ i̱i̱n kivi̱ꞌ nï̱ xi̱ni̱ xaꞌanꞌ ra̱ nde̱e̱ i̱i̱n ne̱ yivi̱ꞌ.
Ndisu̱ ni̱ xa̱ꞌni̱ꞌ ña̱ꞌaꞌ te̱ yivi̱ꞌ te̱i̱n te̱ xaaꞌ ña̱ ni̱a̱ꞌa,
te̱ ni̱ na̱taa̱nꞌ ña̱ꞌaꞌ ra̱ i̱i̱n yavi̱ ndi̱i̱ ña̱ nduuꞌ kuenta i̱i̱n te̱ vikaꞌ.
10 Ni̱ kaꞌa̱n nimá mi̱iꞌ Yahvé sa̱ndoꞌoꞌ ña̱ꞌaꞌ a̱ xiinꞌ sa̱kuuꞌ tu̱ndoꞌo̱ꞌ ja̱a̱nꞌ,
te̱ ni̱ sa̱ndoꞌoꞌ xa̱va̱ꞌa̱ ña̱ꞌaꞌ a̱ xiinꞌ kuaꞌa̱ꞌ va̱ ña̱ uꞌvi̱.
Ndisu̱ kii̱ꞌ ndi̱ꞌi̱ sa̱na̱kuaꞌa ra̱ kivi̱ꞌ ñu̱u̱ ra̱ te̱ ku̱ndu̱u̱ a̱ nde̱e̱ naa ki̱tiꞌ,
tiꞌ xixí xaꞌa̱ꞌ ku̱a̱tyi̱ ne̱ yivi̱ꞌ i̱i̱n yivi̱ꞌ ndii,
ko̱o̱ kuaꞌa̱ꞌ si̱a̱niꞌ xikaꞌ ra̱.
Te̱ ku̱ti̱a̱ku̱ ra̱ nde̱e̱ ndiꞌiꞌ ni̱ kivi̱ꞌ,
te̱ xinu̱ sa̱kuuꞌ ña̱ kuní Yahvé sa̱a̱ ra̱.
11 Kii̱ꞌ ku̱ni̱ ra̱ sa̱kuuꞌ ña̱ va̱ꞌa̱ ña̱ ni̱ na̱ti̱i̱n ra̱ xaꞌa̱ꞌ sa̱kuuꞌ tu̱ndoꞌo̱ꞌ ña̱ ni̱ ndo̱ꞌo̱ ra̱ ja̱a̱nꞌ ndii,
ku̱nda̱ni̱ ra̱ ña̱ xa̱ ni̱ na̱koo̱ va̱ꞌa̱ ra̱,
te̱ na̱ku̱a̱tiaꞌ va̱ ra̱ kii̱ꞌ ku̱ni̱ ra̱ ña̱ ja̱a̱nꞌ.
Te̱ te̱ xatyuunꞌ nda̱ku,
te̱ xikaꞌ nuuꞌ nuu̱ꞌ Ndiosí ja̱a̱nꞌ ndii,
su̱vi̱ ra̱ sa̱a̱ sa̱kanꞌ te̱ kuaꞌa̱ꞌ va̱ ne̱ yivi̱ꞌ nduu̱ nda̱ku nimá,
sa̱kanꞌ ña̱ te̱ ja̱a̱nꞌ ni̱ na̱ku̱i̱so̱ sa̱kuuꞌ ku̱a̱tyi̱ ne̱ ja̱a̱nꞌ.
12 Xaꞌa̱ꞌ a̱ ja̱a̱nꞌ na kuiiꞌ tyi̱nduꞌu̱ꞌ tu̱ ña̱ꞌaꞌ yuꞌu̱ te̱i̱n te̱ kuuꞌ kaꞌnuꞌ,
te̱ na̱ti̱i̱n tu̱ ra̱ ña̱ꞌa̱ ña̱ na̱tyiꞌi̱ꞌ te̱ xíinꞌ kii̱ꞌ kuaꞌa̱n ra̱ ñuꞌu̱,
ña̱ natiinꞌ te̱ kuuꞌ kaꞌnuꞌ te̱ ndieeꞌ xiinꞌ ra̱ ja̱a̱nꞌ xaꞌa̱ꞌ a̱ ña̱ ni̱ sa̱na̱kuaꞌa ra̱ kivi̱ꞌ ñu̱u̱ ra̱,
te̱ ni̱ xiꞌi̱ ra̱ xaꞌa̱ꞌ ku̱a̱tyi̱ ne̱ yivi̱ꞌ.
Te̱ ni̱ xa̱ꞌni̱ꞌ ña̱ꞌaꞌ te̱ yivi̱ꞌ te̱i̱n te̱ xaaꞌ ña̱ ni̱a̱ꞌa,
te̱ ni̱ na̱ku̱i̱so̱ ra̱ ku̱a̱tyi̱ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ nduꞌu̱ꞌ ra̱ vi̱ti̱n xikuiꞌní ra̱ xaꞌa̱ꞌ ne̱ yivi̱ꞌ i̱i̱n yivi̱ꞌ.