Yoꞌoꞌ kaꞌán a̱ xaꞌa̱ꞌ ña̱ sa̱ndoó ndiká Ndiosí ñu̱u̱ Jerusalén
52
Ndoꞌó,
ne̱ ndieeꞌ ñu̱u̱ Jerusalén,
ndo̱to̱ nuu̱ꞌ ndo̱ꞌ,
te̱ na̱tyi̱naá kiꞌi̱ꞌ ndo̱ꞌ ndi̱e̱e̱ꞌ ndo̱ꞌ.
Na̱kuiꞌnu̱ kiꞌi̱ꞌ ndo̱ꞌ toto̱ va̱ꞌa̱ nda̱tu̱nꞌ va̱,
ndoꞌó,
ne̱ ndieeꞌ ñu̱u̱ Jerusalén,
ña̱ nduuꞌ ñu̱u̱ su̱ꞌu̱n.
Sa̱kanꞌ ña̱ köo̱ꞌ kivi̱ꞌ ko̱ꞌni̱ ne̱ tukuꞌ,
ne̱ xaaꞌ ña̱ ki̱ni̱ miiꞌ ndieeꞌ ndo̱ꞌ.
2 Sa̱koyó ndo̱ꞌ ya̱kaꞌ toto̱ ndo̱ꞌ,
te̱ ndo̱koo̱ ndo̱ꞌ te̱ ka̱ꞌndi̱a̱ tyuunꞌ tu̱ku̱u̱ ndo̱ꞌ ñu̱u̱ Jerusalén.
Ndoꞌó,
ña̱ꞌaꞌ sa̱va̱,
ne̱ ndieeꞌ ñu̱u̱ Sión,
nda̱xinꞌ kiꞌi̱ꞌ ndo̱ꞌ karena ña̱ tiín suku̱nꞌ ndo̱ꞌ te̱ ndoo̱ ndiká ndo̱ꞌ.
3 Sa̱kanꞌ ña̱ ña̱ yo̱ꞌo̱ꞌ kaꞌán Yahvé:
“Ni̱ keꞌvi̱ saka ndo̱ꞌ,
te̱ köo̱ꞌ tu̱ xu̱ꞌunꞌ kuní te̱ sa̱ndoó ndiká i̱ ndoꞌó”,
katyi a̱.
4 Te̱ kaꞌán tu̱ Tákuiꞌe Yahvé ndii:
“Xta̱ꞌanꞌ va̱ ni̱ na̱kaa̱ꞌ ne̱ nduuꞌ kuenta i̱ nuu̱ꞌ ñu̱ꞌuꞌ Egipto te̱ ku̱ndi̱e̱e̱ ni̱a̱ i̱kanꞌ.
Ni̱ yaꞌa̱ te̱ ni̱ na̱ti̱i̱n ña̱ꞌaꞌ ne̱ ndieeꞌ nuu̱ꞌ ñu̱ꞌuꞌ Asiria,
te̱ ni̱ sa̱ndoꞌoꞌ ña̱ꞌaꞌ ni̱a̱ tee̱ꞌ ndee köo̱ꞌ nde̱e̱ i̱i̱n xaꞌa̱ꞌ”,
katyi a̱.
5 Te̱ kaꞌán ka̱ Yahvé ndii:
“Te̱ vi̱ti̱n ndii,
ne̱ Asiria sandoꞌoꞌ ña̱ꞌaꞌ,
köo̱ꞌ nde̱e̱ i̱i̱n xaꞌa̱ꞌ,
te̱ ni̱ xa̱ka̱ ni̱a̱ ne̱ nduuꞌ kuenta i̱ te̱ kuaꞌa̱n ni̱a̱ nuu̱ꞌ ñu̱ꞌuꞌ ja̱a̱nꞌ,
te̱ te̱ xaꞌndia tyuunꞌ nuu̱ꞌ ni̱a̱ ndii,
sakuakuꞌ ña̱ꞌaꞌ ra̱,
te̱ xandiꞌiꞌ ra̱ xiinꞌ ni̱a̱.
Te̱ sa̱a̱ kivi̱ꞌ kani̱a̱ꞌa ra̱ xaꞌa̱ꞌ i̱.
6 Xaꞌa̱ꞌ a̱ ja̱a̱nꞌ na kuiiꞌ kivi̱ꞌ ja̱a̱nꞌ ndii,
ku̱nda̱ni̱ ne̱ nduuꞌ kuenta i̱ kivi̱ꞌ i̱.
Te̱ ku̱nda̱ni̱ tu̱ ni̱a̱ ña̱ mi̱iꞌ yuꞌu̱ nduuꞌ ña̱ kaꞌa̱n xiinꞌ ni̱a̱.
Ko̱to̱ ndo̱ꞌ,
yoꞌoꞌ yoo i̱ xiinꞌ ndo̱ꞌ”,
katyi a̱.
7 Xa̱ nda̱tu̱nꞌ iinꞌ xaꞌa̱ꞌ ne̱ yivi̱ꞌ,
ne̱ ku̱a̱xi̱ xíniꞌ i̱kuꞌ niꞌiꞌ ni̱a̱ tu̱ꞌu̱n va̱ꞌa̱,
ne̱ ku̱a̱xi̱ kaꞌán ndo̱so̱ꞌ tu̱ꞌu̱n va̱ꞌa̱ ña̱ natandieeꞌ mani̱ꞌ ne̱ yivi̱ꞌ.
Ne̱ kaꞌán xaꞌa̱ꞌ ña̱ sa̱kakú Ndiosí ne̱ yivi̱ꞌ,
te̱ kaꞌán ni̱a̱ xiinꞌ ñu̱u̱ Sión ndii:
“Ndiosí,
ña̱ xakaꞌnuꞌ ndo̱ꞌ,
nduuꞌ rey”,
katyi ni̱a̱.
8 Ku̱ni̱ so̱ꞌo̱ ndo̱ꞌ,
ne̱ itaꞌ xitoꞌ ñu̱u̱ ndo̱ꞌ ndii,
kuaaꞌ tiꞌeꞌ ni̱a̱,
te̱ i̱i̱n ni̱ nda̱ꞌaꞌ kuaaꞌ sa̱kuuꞌ ni̱a̱ ña̱ va̱ꞌa̱ kuni ni̱a̱ ni̱ ke̱ta̱ va̱ꞌa̱ ni̱a̱.
Sa̱kanꞌ ña̱ xini ndu̱tyiꞌ nuu̱ꞌ ni̱a̱ Yahvé ña̱ nandikoꞌ a̱ ñu̱u̱ Sión ka̱ꞌndi̱a̱ tyuunꞌ a̱.
9 Ndoꞌó,
ne̱ ndieeꞌ ñu̱u̱,
ña̱ xa̱ ni̱ nduxi̱n ndo̱o̱,
nda̱sa̱ i̱i̱n ndo̱ꞌ tatyi̱ꞌ ndo̱ꞌ te̱ ka̱ta̱ sii̱ꞌ ndo̱ꞌ ya̱a̱ nuu̱ꞌ Yahvé,
sa̱kanꞌ ña̱ xa̱ ni̱ sa̱kiꞌví a̱ ne̱ nduuꞌ kuenta a̱,
te̱ ni̱ sa̱ndoó ndiká tu̱ a̱ ñu̱u̱ Jerusalén.
10 Ni̱ niaꞌa̱ Yahvé ña̱ ndi̱e̱eꞌ a̱ nuu̱ꞌ sa̱kuuꞌ ne̱ tukuꞌ,
te̱ ku̱ni̱ tu̱ sa̱kuuꞌ ne̱ yivi̱ꞌ i̱i̱n yivi̱ꞌ ña̱ ni̱ sa̱kakú Ndiosí,
ña̱ xakaꞌnuꞌ e̱ꞌ,
yooꞌ.
11 Ndoꞌó,
ne̱ xikoꞌ nda̱tyuunꞌ ña̱ yoo ti̱xi̱n yu̱kunꞌ Yahvé ndii,
kuaꞌan ki̱e̱e̱ kiꞌi̱ꞌ ndo̱ꞌ,
kuaꞌa̱n kiꞌi̱ꞌ ndo̱ꞌ ñu̱ꞌuꞌ ñaa̱ꞌ,
te̱ nda̱sa̱ ndo̱o̱ xiinꞌ miiꞌ ndo̱ꞌ,
te̱ tï̱i̱n ndo̱ꞌ nde̱e̱ i̱i̱n ña̱ꞌa̱ ña̱ ki̱ni̱ iinꞌ.
12 Ndisu̱ küní a̱ ku̱ndi̱ꞌni̱ ndo̱ꞌ,
ni̱ nde̱e̱ küní tu̱ a̱ ki̱e̱e̱ kiꞌi̱ꞌ va̱ ndo̱ꞌ,
sa̱kanꞌ ña̱ mi̱iꞌ Yahvé ki̱ꞌi̱n i̱tyiꞌ nuu̱ꞌ ndo̱ꞌ kii̱ꞌ kuꞌu̱n ndo̱ꞌ,
te̱ ko̱to̱ tu̱ Ndiosí,
ña̱ xakaꞌnuꞌ yooꞌ,
ne̱ vi̱ꞌe̱ Israel,
xata̱ꞌ ndo̱ꞌ kii̱ꞌ kuꞌu̱n ndo̱ꞌ i̱tyiꞌ.
Yoꞌoꞌ kaꞌán a̱ xaꞌa̱ꞌ ña̱ ku̱ndo̱ꞌo̱ te̱ xikaꞌ nuuꞌ nuu̱ꞌ Ndiosí
13 Kaꞌán Ndiosí ndii:
“Ko̱to̱ ndo̱ꞌ,
te̱ xikaꞌ nuuꞌ nuu̱ꞌ i̱ ndii,
ke̱ta̱ va̱ꞌa̱ ra̱,
te̱ kuaꞌa̱ꞌ va̱ ne̱ yivi̱ꞌ ki̱ꞌi̱n kaꞌnuꞌ ña̱ꞌaꞌ,
te̱ ko̱to̱ kaꞌnuꞌ tu̱ ña̱ꞌaꞌ ni̱a̱,
te̱ ku̱ndu̱u̱ tu̱ ra̱ i̱i̱n te̱ ku̱i̱so̱ tyuunꞌ viee̱ xa̱va̱ꞌa̱.
14 Te̱ kuaꞌa̱ꞌ va̱ ne̱ yivi̱ꞌ ni̱ na̱nda̱ni̱ kii̱ꞌ ni̱ xi̱ni̱ ña̱ꞌaꞌ ni̱a̱,
sa̱kanꞌ ña̱ ni̱ sa̱tu̱xuꞌví va̱ te̱ yivi̱ꞌ nuu̱ꞌ ra̱.
Te̱ nde̱e̱ tüviꞌ ka̱ naaꞌ te̱ yivi̱ꞌ vi̱ꞌ nduuꞌ ra̱,
te̱ nde̱e̱ näkuni ka̱ ña̱ꞌaꞌ e̱ꞌ naaꞌ te̱ yivi̱ꞌ nduuꞌ ra̱.
15 Te̱ sa̱kanꞌ tu̱ kuaꞌa̱ꞌ va̱ ne̱ yivi̱ꞌ i̱i̱n yivi̱ꞌ na̱nda̱ni̱ xaꞌa̱ꞌ ña̱ ndoꞌoꞌ ra̱ ja̱a̱nꞌ.
Te̱ nde̱e̱ rey ku̱u̱ iꞌinꞌ nuu̱ꞌ te̱ ja̱a̱nꞌ kii̱ꞌ ku̱ni̱ ña̱ꞌaꞌ ra̱,
sa̱kanꞌ ña̱ ku̱ni̱ ra̱ ña̱ köo̱ꞌ kivi̱ꞌ ni̱ kaꞌa̱n ne̱ yivi̱ꞌ xiinꞌ ra̱ xaꞌa̱ꞌ te̱ ja̱a̱nꞌ.
Te̱ ku̱nda̱ni̱ tu̱ ra̱ nde̱e̱ ña̱ köo̱ꞌ kivi̱ꞌ ni̱ xi̱ni̱ so̱ꞌo̱ ra̱ xaꞌa̱ꞌ te̱ ja̱a̱nꞌ”,
katyi a̱.