Yoꞌoꞌ ku̱a̱xi̱ tu̱ꞌu̱n Ndiosí ña̱ sakiꞌví ne̱ ndieeꞌ ñu̱u̱ Sión
51
Kaꞌán Ndiosí ndii:
“Ku̱ni̱ so̱ꞌo̱ sa̱kuuꞌ ndoꞌó,
ne̱ ndiatuꞌ i̱ni̱ kaku̱ sa̱a̱ yuꞌu̱,
Ndiosí,
sa̱kuuꞌ ndoꞌó,
ne̱ xikaꞌ nandukuꞌ Yahvé.
Ko̱to̱ ndo̱ꞌ xata̱ꞌ yuu̱ꞌ miiꞌ ni̱ ki̱e̱e̱ ndo̱ꞌ,
te̱ tyu̱nxaꞌaꞌ tu̱ ndo̱ꞌ xata̱ꞌ yuu̱ꞌ miiꞌ ni̱ ndondi̱a̱ ndo̱ꞌ nde̱e̱ naa yuu̱ꞌ nunuꞌ,
te̱ ni̱ ki̱e̱e̱ ndo̱ꞌ.
2 Tyu̱nxaꞌaꞌ ndo̱ꞌ sa̱a̱ ni̱ xa̱a̱ te̱ xii̱ꞌ ya̱taꞌ ndo̱ꞌ Abraham,
te̱ tyu̱nxaꞌaꞌ tu̱ ndo̱ꞌ sa̱a̱ ni̱ xa̱a̱ Sara,
ñaꞌ ni̱ sa̱kakuꞌ ndoꞌó.
I̱i̱n nda̱a̱ꞌ ku̱i̱ti̱ꞌ kuuꞌ ra̱ kii̱ꞌ ni̱ ka̱na̱ ña̱ꞌaꞌ i̱,
ndisu̱ kii̱ꞌ ni̱ sa̱ñuꞌuꞌ ña̱ꞌaꞌ i̱ ndii,
ni̱ na̱ndu̱u̱ kuaꞌa̱ꞌ xa̱va̱ꞌa̱ ne̱ si̱a̱niꞌ xikaꞌ ra̱”,
katyi a̱.
3 Ña̱ nda̱ku nduuꞌ a̱ ndii,
sa̱kiꞌví Yahvé ne̱ ndieeꞌ ñu̱u̱ Sión,
te̱ ku̱ndaꞌvi i̱ni̱ a̱ xaꞌa̱ꞌ ni̱a̱ te̱ nda̱sa̱ va̱ꞌa̱ ka̱niiꞌ ñu̱u̱ ni̱a̱,
ña̱ xa̱ ni̱ nduxi̱n ndo̱o̱.
Te̱ ñu̱ꞌuꞌ miiꞌ i̱tyi kaaꞌ ndieeꞌ ni̱a̱ ndii,
nda̱sa̱ nduuꞌ ña̱ꞌaꞌ a̱ miiꞌ ko̱o̱ ña̱ ta̱ta̱ Yahvé.
Te̱ i̱kanꞌ ndii,
ko̱o̱ kuaꞌa̱ꞌ ña̱ va̱ꞌa̱ kuni ne̱ yivi̱ꞌ,
xiinꞌ ña̱ sii̱ꞌ kuni ni̱a̱,
xiinꞌ ña̱ ka̱ta̱ ni̱a̱ ya̱a̱ taxiꞌ ni̱a̱ ña̱ tyi̱nda̱ni Ndiosí.
4 Kaꞌán ka̱ Ndiosí ndii:
“Ndoꞌó,
ne̱ nduuꞌ kuenta i̱,
tyu̱nxaꞌaꞌ va̱ ndo̱ꞌ ña̱ kaꞌán i̱ xiinꞌ ndo̱ꞌ.
Te̱ sa̱kanꞌ tu̱ sa̱kuuꞌ ndoꞌó,
ne̱ tukuꞌ,
ku̱ni̱ so̱ꞌo̱ kaxiꞌ va̱ ndo̱ꞌ ña̱ kaꞌán i̱ xiinꞌ ndo̱ꞌ.
Sa̱kanꞌ ña̱ mi̱iꞌ yuꞌu̱ ta̱xi̱ tu̱ꞌu̱n nde̱iꞌ nda̱ꞌaꞌ ndo̱ꞌ,
te̱ ña̱ xatyuunꞌ nda̱ku i̱ ku̱ndu̱u̱ nde̱e̱ naa ñuꞌu̱ ña̱ ko̱tuu̱n nuu̱ꞌ ne̱ tukuꞌ.
5 Ña̱ xatyuunꞌ nda̱ku i̱ ndii,
nä̱ꞌaꞌ ka̱ te̱ xaa̱ a̱,
te̱ ña̱ sa̱kakú i̱ ndoꞌó ndii,
xa̱ i̱tyiꞌ yoo a̱ kuaxi̱ a̱.
Te̱ xiinꞌ nda̱ꞌaꞌ i̱ ña̱ ndi̱e̱eꞌ kooꞌ tyukuuꞌ ka̱ꞌndi̱a̱ tyuunꞌ i̱ nuu̱ꞌ ne̱ tukuꞌ.
Te̱ sa̱kuuꞌ ñu̱ꞌuꞌ ña̱ ñuꞌuꞌ yu̱ꞌuꞌ mi̱ni̱ kaꞌnuꞌ ndii,
xa̱ ndiatuꞌ a̱ ña̱ yuꞌu̱ ka̱ꞌndi̱a̱ tyuunꞌ nuu̱ꞌ a̱,
te̱ i̱ni̱ a̱ ña̱ ka̱ꞌndi̱a̱ tyuunꞌ va̱ꞌa̱ i̱ xiinꞌ ña̱ ndi̱e̱eꞌ i̱.
6 Ndo̱ni̱ꞌi̱ ndo̱ꞌ nuu̱ꞌ ndo̱ꞌ te̱ ko̱to̱ ndo̱ꞌ ndi̱viꞌ,
te̱ sa̱nuuꞌ ndo̱ꞌ nuu̱ꞌ ndo̱ꞌ te̱ ko̱to̱ ndo̱ꞌ nuu̱ꞌ ñu̱ꞌuꞌ i̱i̱n yivi̱ꞌ.
Ndi̱viꞌ ndii,
i̱i̱n ndi̱ꞌi̱ a̱ so̱ꞌo̱ nde̱e̱ naa xaaꞌ ñuꞌma̱,
te̱ ñu̱ꞌuꞌ i̱i̱n yivi̱ꞌ ndii,
ku̱ya̱taꞌ a̱ nde̱e̱ naa kuyataꞌ toto̱ ña̱ niꞌnuꞌ ne̱ yivi̱ꞌ.
Te̱ ne̱ yivi̱ꞌ,
ne̱ ndieeꞌ nuu̱ꞌ a̱ ndii,
ku̱vi̱ ndo̱o̱ ni̱a̱ nde̱e̱ naa ndi̱ka̱ma̱.
Ndisu̱ ña̱ sakakú i̱ ne̱ yivi̱ꞌ ndii,
yoo a̱ nde̱e̱ ndiꞌiꞌ ni̱ kivi̱ꞌ,
te̱ ña̱ xatyuunꞌ nda̱ku i̱ ndii,
köo̱ꞌ kivi̱ꞌ kuꞌu̱n ndi̱koꞌ a̱.
7 ’Ku̱ni̱ so̱ꞌo̱ ndoꞌó,
ne̱ xa̱ xatyuunꞌ nda̱ku,
ndoꞌó,
ne̱ xa̱ xiní tu̱ꞌu̱n nde̱iꞌ.
Kuäa̱n yiꞌvi ndo̱ꞌ ña̱ kaꞌán kuiꞌe ne̱ yivi̱ꞌ xiinꞌ ndo̱ꞌ,
te̱ ni̱ nde̱e̱ kä̱ka̱ tu̱ nimá ndo̱ꞌ xaꞌa̱ꞌ ña̱ ka̱ni̱a̱ꞌa ni̱a̱ xiinꞌ ndo̱ꞌ.
8 Sa̱kanꞌ ña̱ ne̱ yivi̱ꞌ ja̱a̱nꞌ ndii,
ka̱xi̱ꞌ ndo̱o̱ ña̱ꞌaꞌ ndi̱kiꞌndiꞌ nde̱e̱ naa xaaꞌ riꞌ xaxi̱ꞌ riꞌ toto̱ ña̱ niꞌnuꞌ ne̱ yivi̱ꞌ,
te̱ ka̱xi̱ꞌ tu̱ ña̱ꞌaꞌ ti̱ku̱xiꞌ nde̱e̱ naa xaaꞌ riꞌ xaxi̱ꞌ riꞌ katyi̱ꞌ.
Ndisu̱ ña̱ xatyuunꞌ nda̱ku i̱ xaꞌa̱ꞌ ndo̱ꞌ ndii,
ko̱o̱ a̱ nde̱e̱ ndiꞌiꞌ ni̱ kivi̱ꞌ.
Te̱ ña̱ sa̱kakú i̱ ndoꞌó ndii,
köo̱ꞌ kivi̱ꞌ kuꞌu̱n ndi̱ꞌi̱ a̱”,
katyi a̱.
9 Tákuiꞌe Ndiosí,
ndo̱to̱ nuu̱ꞌ u̱nꞌ.
Ndo̱to̱ nuu̱ꞌ u̱nꞌ te̱ na̱tyi̱naá u̱nꞌ ndi̱e̱e̱ꞌ nda̱ꞌaꞌ u̱nꞌ.
Ndo̱to̱ nuu̱ꞌ u̱nꞌ naa ni̱ xa̱a̱ u̱nꞌ xta̱ꞌanꞌ,
naa ni̱ xa̱a̱ u̱nꞌ kuiya̱ ña̱ ni̱ xkaꞌndi̱a̱,
sa̱kanꞌ ña̱ yoꞌó nduuꞌ ña̱ ni̱ xa̱ꞌni̱ꞌ ku̱a̱kuꞌ,
tiꞌ naniꞌ Rahab,
kii̱ꞌ ni̱ sa̱tu̱xuꞌví u̱nꞌ riꞌ.
10 Yoꞌó nduuꞌ ña̱ ni̱ nu̱niaꞌ ti̱kui mi̱ni̱ kaꞌnuꞌ miiꞌ kunu va̱,
te̱ yoꞌó tu̱ nduuꞌ ña̱ ni̱ xa̱ꞌa̱ i̱tyiꞌ ti̱xi̱n mi̱ni̱ miiꞌ kunu va̱,
te̱ ni̱ xkaꞌndi̱a̱ ne̱ ni̱ sa̱kakú u̱nꞌ.
11 Ña̱ nda̱ku nduuꞌ a̱ ndii,
na̱ndi̱koꞌ ne̱ ni̱ sa̱kakú Yahvé.
Na̱ndi̱koꞌ ni̱a̱ ñu̱u̱ Sión xitaꞌ ni̱a̱,
te̱ ña̱ va̱ꞌa̱ kuni ni̱a̱ ndii,
nde̱e̱ ndiꞌiꞌ ni̱ kivi̱ꞌ ko̱o̱ a̱,
te̱ kuatiaꞌ nimá ni̱a̱,
te̱ sii̱ꞌ tu̱ ku̱ni̱ ni̱a̱,
te̱ ña̱ uꞌvi̱ xini ni̱a̱,
xiinꞌ ña̱ sutyiꞌ i̱ni̱ ni̱a̱ ndii,
ndi̱ꞌi̱ sa̱kuuꞌ ña̱ ja̱a̱nꞌ nuu̱ꞌ ni̱a̱.
12 Te̱ ni̱ kaꞌa̱n Ndiosí ndii:
“Yuꞌu̱,
mi̱iꞌ yuꞌu̱ nduuꞌ ña̱ sakiꞌví ndoꞌó,
sa̱kanꞌ na kuiiꞌ köo̱ꞌ nde̱e̱ i̱i̱n xaꞌa̱ꞌ ña̱ yiꞌvi ndo̱ꞌ ne̱ yivi̱ꞌ i̱i̱n yivi̱ꞌ xiinꞌ ndo̱ꞌ.
Ne̱ xiꞌí nde̱e̱ naa kuꞌu̱ i̱tyiꞌ ku̱i̱ti̱ꞌ ndii,
ndoñuꞌuꞌ ni̱a̱ so̱ꞌo̱.
13 Tee̱ꞌ xa̱ ni̱ na̱ndoso̱ꞌ ndo̱ꞌ xaꞌa̱ꞌ yuꞌu̱,
Yahvé,
ña̱ ni̱ xa̱ꞌa̱ ndoꞌó,
ña̱ ni̱ tyi̱ka̱nduꞌu̱ꞌ ndi̱viꞌ,
te̱ ni̱ xa̱ꞌa̱ tu̱ i̱ ñu̱ꞌuꞌ i̱i̱n yivi̱ꞌ.
Köo̱ꞌ nde̱e̱ i̱i̱n xaꞌa̱ꞌ ña̱ xikaꞌ yiꞌvi ndo̱ꞌ sa̱a̱ kivi̱ꞌ xaꞌa̱ꞌ a̱ ña̱ xiꞌé te̱ sa̱ndoꞌoꞌ ndoꞌó xini ra̱ ndoꞌó,
te̱ kaꞌán xatu̱ ra̱ ña̱ ka̱ꞌni̱ꞌ xa̱tyiꞌ ra̱ sa̱kuuꞌ ndo̱ꞌ.
Ndisu̱ ña̱ xiꞌé ra̱ xini ra̱ ndoꞌó ja̱a̱nꞌ ndii,
xa̱ ni̱ nduxi̱n ndo̱o̱ a̱.
14 Nä̱ꞌaꞌ ka̱ te̱ ki̱e̱e̱ ne̱ ñuꞌuꞌ vi̱ꞌe̱ ka̱a̱,
te̱ nde̱e̱ i̱i̱n ni̱a̱ kü̱vi̱ ti̱xi̱n vi̱ꞌe̱ ka̱a̱ miiꞌ yoo ni̱a̱ tu̱ndoꞌo̱ꞌ,
ni̱ nde̱e̱ kü̱vi̱ tu̱ ni̱a̱ so̱ko̱.
15 Yuꞌu̱ nduuꞌ Yahvé,
ña̱ kisiꞌ ti̱kui mi̱ni̱ kaꞌnuꞌ,
te̱ saniꞌi̱ tu̱ i̱ ko̱o̱ nuu̱ꞌ mi̱ni̱ ja̱a̱nꞌ.
Yuꞌu̱ nduuꞌ Ndiosí,
ña̱ naniꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
16 Yuꞌu̱ ni̱ sa̱kaꞌán ndoꞌó,
te̱ ni̱ xi̱to̱ i̱ ndoꞌó xiinꞌ nda̱ꞌaꞌ i̱.
Ni̱ tyi̱ka̱nduꞌu̱ꞌ i̱ ndi̱viꞌ,
te̱ ni̱ tyi̱ka̱nduꞌu̱ꞌ tu̱ i̱ ñu̱ꞌuꞌ i̱i̱n yivi̱ꞌ.
Te̱ ni̱ kaꞌa̱n i̱ xiinꞌ ñu̱u̱ Sión ndii:
Kuenta mi̱iꞌ i̱ nduuꞌ ndo̱ꞌ,
ni̱ katyi̱ i̱”,
ni̱ katyi̱ Ndiosí.
17 Ndoꞌó,
ne̱ ndieeꞌ ñu̱u̱ Jerusalén,
ndo̱to̱ nuu̱ꞌ ndo̱ꞌ.
Ndo̱to̱ nuu̱ꞌ ndo̱ꞌ te̱ ndo̱koo̱ kiꞌi̱ꞌ ndo̱ꞌ,
ndoꞌó ne̱ ni̱ koyo̱ nuu̱ꞌ ña̱ xiꞌé va̱ Yahvé xini a̱ ndoꞌó.
Sa̱kanꞌ ña̱ xa̱ ni̱ xi̱ꞌi̱ ndo̱ꞌ sa̱kuuꞌ ña̱ xiꞌé Ndiosí xini a̱ ndoꞌó,
ni̱ xi̱ꞌi̱ ndo̱ꞌ a̱ nde̱e̱ ni̱ xi̱ni̱ xa̱tyiꞌ ndo̱ꞌ.
18 Nde̱e̱ i̱i̱n siꞌe̱ ndo̱ꞌ,
ne̱ ni̱ sa̱kakuꞌ ndo̱ꞌ ndii,
köo̱ꞌ nde̱e̱ i̱i̱n ni̱a̱ ku̱ndi̱a̱ka̱ ndoꞌó te̱ kuꞌu̱n ndo̱ꞌ.
Te̱ nde̱e̱ i̱i̱n siꞌe̱ ndo̱ꞌ,
ne̱ ni̱ sa̱kuaꞌnuꞌ ndo̱ꞌ ndii,
köo̱ꞌ nde̱e̱ i̱i̱n ni̱a̱ ti̱i̱n nda̱ꞌaꞌ ndo̱ꞌ te̱ kuꞌu̱n ndo̱ꞌ.
19 Uvi̱ taꞌan nuu̱ꞌ tu̱ndoꞌo̱ꞌ yoꞌoꞌ nduuꞌ ña̱ ni̱ ndo̱ꞌo̱ ndo̱ꞌ,
ña̱ ni̱ nduxi̱n xa̱tyiꞌ miiꞌ ndieeꞌ ndo̱ꞌ,
xiinꞌ ña̱ ni̱ xa̱kuiꞌnaꞌ ne̱ yivi̱ꞌ sa̱kuuꞌ ña̱ꞌa̱ ndo̱ꞌ.
Ña̱ ni̱ yoo̱ va̱ so̱ko̱ ñu̱u̱ ndo̱ꞌ xiinꞌ ña̱ ni̱ yoo̱ ñuꞌu̱ ñu̱u̱ ndo̱ꞌ ja̱a̱nꞌ.
Te̱ nï̱ ndoo̱ ka̱ nde̱e̱ i̱i̱n ne̱ yivi̱ꞌ,
ne̱ ku̱ndaꞌvi i̱ni̱ xaꞌa̱ꞌ ndo̱ꞌ,
ni̱ nde̱e̱ köo̱ꞌ ka̱ tu̱ ne̱ sa̱kiꞌví ndoꞌó.
20 Sa̱kuuꞌ tiaa̱ siꞌe̱ ndo̱ꞌ ndii,
xa̱ ni̱ ndi̱ꞌi̱ ndo̱o̱ ndi̱e̱e̱ꞌ ra̱,
te̱ ni̱ ndu̱va̱ ra̱ ndieeꞌ ra̱ sa̱a̱ kuaꞌa̱n xiki̱ꞌ ya̱ꞌya̱,
nde̱e̱ naa i̱su̱,
tiꞌ ni̱ xi̱kuꞌu̱n ti̱xi̱n tunꞌ ii̱ꞌ,
xa̱ ni̱ ndi̱ꞌi̱ ndo̱o̱ ni̱ sa̱ndoꞌoꞌ Yahvé,
xiinꞌ ña̱ xiꞌé Ndiosí,
ña̱ xakaꞌnuꞌ ndo̱ꞌ ja̱a̱nꞌ xiniꞌ ña̱ꞌaꞌ a̱.
21 Xaꞌa̱ꞌ a̱ ja̱a̱nꞌ na kuiiꞌ ndoꞌó,
ne̱ ndoꞌoꞌ ndii,
ku̱ni̱ so̱ꞌo̱ ndo̱ꞌ ña̱ yo̱ꞌo̱ꞌ vi̱ti̱n nde̱e̱ naa ne̱ xini̱ nduuꞌ ndo̱ꞌ,
tee̱ꞌ ndee köo̱ꞌ ndi̱xi̱ ni̱ xi̱ꞌi̱ ndo̱ꞌ.
22 Ña̱ yo̱ꞌo̱ꞌ kaꞌán Tákuiꞌe Yahvé,
Ndiosí ña̱ xakaꞌnuꞌ ndo̱ꞌ,
ña̱ nakaꞌán xaꞌa̱ꞌ ndo̱ꞌ,
kaꞌán a̱ ndii:
“Ko̱to̱ ndo̱ꞌ,
xa̱ ni̱ ta̱va̱ꞌ i̱ sa̱kuuꞌ nuu̱ꞌ ña̱ sandoꞌoꞌ i̱ ndoꞌó nda̱ꞌaꞌ ndo̱ꞌ.
Xa̱ ni̱ ta̱va̱ꞌ tu̱ i̱ ña̱ xiꞌé i̱ xini i̱ ndoꞌó,
te̱ köo̱ꞌ kivi̱ꞌ ka̱ sa̱ndoꞌoꞌ i̱ ndoꞌó.
23 Ndisu̱ vi̱ti̱n ndii,
sa̱kuuꞌ ña̱ ja̱a̱nꞌ sa̱ndoꞌoꞌ i̱ ne̱ ni̱ sa̱ndoꞌoꞌ ndoꞌó,
ne̱ kaꞌán xiinꞌ ndo̱ꞌ ndii:
Ku̱ndi̱e̱e̱ ndi̱e̱e̱ ndo̱ꞌ nuu̱ꞌ ñu̱ꞌuꞌ te̱ kueꞌni̱ ndo̱so̱ꞌ ndu̱ xata̱ꞌ ndo̱ꞌ,
ni̱ katyi̱ ni̱a̱.
’Te̱ ndoꞌó ndii,
ni̱ xi̱ku̱ndiee̱ ndi̱e̱e̱ ndo̱ꞌ te̱ ni̱ xkaꞌndi̱a̱ ndo̱so̱ꞌ sa̱kuuꞌ ne̱ yivi̱ꞌ ja̱a̱nꞌ xata̱ꞌ ndo̱ꞌ”,
ni̱ katyi̱ Ndiosí.