Yoꞌoꞌ kaꞌán a̱ ña̱ sa̱ndoꞌoꞌ Yahvé ne̱ vi̱ꞌe̱ Israel i̱i̱n kani̱ꞌ xaꞌa̱ꞌ ku̱a̱tyi̱ ni̱a̱
50
Ña̱ yo̱ꞌo̱ꞌ kaꞌán Yahvé:
“Tee̱ꞌ xanini ndo̱ꞌ ña̱ ni̱ na̱ko̱o̱ yuꞌu̱,
ñu̱u̱ Jerusalén,
ña̱ nduuꞌ nde̱e̱ naa si̱ꞌiꞌ ndo̱ꞌ,
nde̱e̱ naa xaaꞌ i̱i̱n te̱ yivi̱ꞌ kii̱ꞌ nakooꞌ ra̱ ñaꞌ siꞌi ra̱.
Uun tee̱ꞌ xanini ndo̱ꞌ ña̱ ni̱ xi̱ko̱ꞌ i̱ ndoꞌó te̱ ku̱ndu̱u̱ ndo̱ꞌ ne̱ ka̱ka̱ nu̱u̱ so̱ꞌo̱,
te̱ tya̱ꞌvi̱ a̱ kuenta i̱ miiꞌ ndisoꞌ i̱kaꞌ i̱.
Ndoꞌó ndii,
xaꞌa̱ꞌ ku̱a̱tyi̱ mi̱iꞌ ndo̱ꞌ ni̱ keꞌvi̱ ndo̱ꞌ,
ne̱ ñu̱u̱ Jerusalén,
ña̱ nduuꞌ nde̱e̱ naa si̱ꞌiꞌ ndo̱ꞌ ndii,
xaꞌa̱ꞌ ña̱ ni̱a̱ꞌa ña̱ xaaꞌ ndoꞌó ni̱ ndoo̱ i̱i̱n nda̱a̱ꞌ a̱.
2 ¿Ndiotyun na kuiiꞌ köo̱ꞌ ndieeꞌ xa̱tyiꞌ kii̱ꞌ ni̱ ki̱xi̱n i̱,
te̱ sa̱kanꞌ tu̱ kii̱ꞌ ni̱ ka̱na̱ i̱ ndoꞌó ndii,
nde̱e̱ i̱i̱n köo̱ꞌ ni̱ na̱ku̱i̱i̱n?
Kuäsa̱ꞌ ni̱ ndi̱ꞌi̱ ña̱ ndi̱e̱e̱ꞌ nda̱ꞌaꞌ i̱ te̱ sa̱ndoó ndiká i̱ ndoꞌó.
Ko̱to̱ ndo̱ꞌ,
xiinꞌ ña̱ ni̱ kaꞌa̱n tyuunꞌ ku̱i̱ti̱ꞌ i̱ te̱ ni̱ na̱ya̱a̱ ndo̱o̱ ti̱kui mi̱ni̱ kaꞌnuꞌ,
te̱ ni̱ ndo̱ko̱ tu̱ ti̱kui i̱ti̱a̱,
te̱ ni̱ na̱ndu̱u̱ a̱ nde̱e̱ naa miiꞌ i̱tyi kaaꞌ,
te̱ ni̱ xiꞌi̱ ndo̱o̱ ti̱a̱kaꞌ ña̱ köo̱ꞌ ti̱kui ko̱ꞌo̱ riꞌ,
te̱ xa̱ ni̱ ndi̱ꞌi̱ ndo̱o̱ riꞌ ni̱ teꞌi̱,
ña̱ ityí riꞌ ti̱kui.
3 Yuꞌu̱ ndasaꞌ ndiaaꞌ ka̱niiꞌ ndi̱viꞌ,
te̱ tisaꞌví ña̱ꞌaꞌ i̱ xiinꞌ yaa̱ꞌ nuꞌu̱”,
ni̱ katyi̱ a̱.
Yoꞌoꞌ kaꞌán a̱ xaꞌa̱ꞌ i̱i̱n te̱ xikaꞌ nuuꞌ nuu̱ꞌ Yahvé, te̱ i̱ni̱ xini ña̱ꞌaꞌ tee̱ꞌ ndee yoo tu̱ndoꞌo̱ꞌ nuu̱ꞌ ra̱
4 Tákuiꞌe Yahvé ni̱ ta̱xi̱ tu̱ꞌu̱n yu̱ꞌuꞌ a̱ ña̱ xini tuní nda̱ꞌaꞌ i̱,
te̱ ku̱nda̱ni̱ i̱ sa̱a̱ ku̱vi̱ sa̱kiꞌví i̱ ne̱ ni̱ xa̱vi va̱.
Sa̱a̱ ni̱a̱ꞌa̱ xakiꞌi̱ꞌ a̱ so̱ꞌo̱ i̱ te̱ ku̱ni̱ so̱ꞌo̱ i̱ ña̱ kaꞌán a̱ nde̱e̱ naa xaaꞌ te̱ sakuaa̱n tyunxaꞌaꞌ ra̱.
5 Tákuiꞌe Yahvé ni̱ nu̱niaꞌ so̱ꞌo̱ i̱,
te̱ yuꞌu̱ ndii,
nï̱ xa̱ so̱ꞌo̱ i̱ ña̱ kaꞌán a̱ xiinꞌ i̱ ni̱ nde̱e̱ nï̱ ku̱xikaꞌ tu̱ i̱ nuu̱ꞌ a̱.
6 Ni̱ sa̱na̱kuaꞌa i̱ ñu̱ꞌuꞌ ndeꞌi̱ i̱ nda̱ꞌaꞌ te̱ ni̱ ku̱tunꞌ yuꞌu̱,
te̱ ni̱ sa̱na̱kuaꞌa tu̱ i̱ si̱ti̱n i̱ nda̱ꞌaꞌ ra̱ te̱ ni̱ tu̱ꞌu̱n ra̱ i̱xiꞌ nuu̱ꞌ i̱,
te̱ nï̱ ti̱si̱ꞌe i̱ nuu̱ꞌ i̱ nuu̱ꞌ te̱ ni̱ xa̱ndi̱ꞌi̱ xiinꞌ i̱,
te̱ ni̱ ko̱ndi̱a̱ tiasi̱ꞌi tu̱ ra̱ yuꞌu̱.
7 Te̱ xaꞌa̱ꞌ a̱ ña̱ mi̱iꞌ Tákuiꞌe Yahvé tyindieeꞌ yuꞌu̱ ndii,
kü̱ka̱ꞌa̱n nuu̱ꞌ i̱ sa̱a̱ ña̱ xandiꞌiꞌ ne̱ yivi̱ꞌ xiinꞌ i̱.
Sa̱kanꞌ na kuiiꞌ ni̱ xa̱tiꞌeꞌ i̱ nuu̱ꞌ i̱ nde̱e̱ naa yuu̱ꞌ,
te̱ xiní i̱ ña̱ köo̱ꞌ kivi̱ꞌ ku̱ka̱ꞌa̱n nuu̱ꞌ i̱.
8 Ya̱ti̱n xi̱i̱nꞌ i̱ yoo ña̱ nakaꞌán xaꞌa̱ꞌ i̱,
köo̱ꞌ nde̱e̱ i̱i̱n ne̱ ku̱vi̱ tyi̱nduꞌu̱ꞌ ku̱a̱tyi̱ xaꞌa̱ꞌ i̱.
Naaꞌ yoo ne̱ tiinꞌ ku̱a̱tyi̱ yuꞌu̱ ndii,
na ki̱xi̱n kiꞌi̱ꞌ ni̱a̱ yoꞌoꞌ vi̱ti̱n.
9 Ko̱to̱ ndo̱ꞌ,
Tákuiꞌe Yahvé tyindieeꞌ yuꞌu̱,
xaꞌa̱ꞌ a̱ ja̱a̱nꞌ na köo̱ꞌ nde̱e̱ i̱i̱n ne̱ ku̱vi̱ ka̱tunꞌ yuꞌu̱.
Ko̱to̱ ndo̱ꞌ,
ndo̱ñuꞌuꞌ sa̱kuuꞌ ne̱ ndasiꞌ taꞌanꞌ xiinꞌ i̱ nde̱e̱ naa xaaꞌ toto̱ kii̱ꞌ kuyataꞌ a̱,
te̱ tyatyiꞌ a̱ xaaꞌ ndi̱kiꞌndiꞌ.
10 Sa̱kuuꞌ ndoꞌó,
ne̱ xitoꞌ kaꞌnuꞌ Yahvé,
te̱ xini so̱ꞌo̱ tu̱ ndo̱ꞌ tatyi̱ꞌ yu̱ꞌuꞌ te̱ xikaꞌ nuuꞌ nuu̱ꞌ a̱.
Naaꞌ yoo sa̱va̱ ndo̱ꞌ xikaꞌ i̱i̱n yaví,
te̱ köo̱ꞌ ñuꞌu̱ tuún nuu̱ꞌ ndo̱ꞌ ndii,
i̱ni̱ ndo̱ꞌ ku̱ni̱ ndo̱ꞌ ña̱ ndi̱e̱eꞌ Yahvé,
saka̱nꞌ ña̱ Ndiosí,
ña̱ xitoꞌ kaꞌnuꞌ ndo̱ꞌ ja̱a̱nꞌ,
ku̱ndu̱u̱ kuei̱ ndo̱ꞌ.
11 Ndisu̱ sa̱kuuꞌ ndoꞌó,
ne̱ xikaꞌ sa̱a̱ kuní nimá mi̱iꞌ,
te̱ nde̱e̱ naa xituni̱ꞌ ndo̱ꞌ nuu̱ꞌ ñuꞌu̱ ña̱ naꞌmiꞌ mi̱iꞌ ndo̱ꞌ ndii,
ña̱ yo̱ꞌo̱ꞌ nduuꞌ tu̱mani̱ꞌ ña̱ na̱ti̱i̱n ndo̱ꞌ nda̱ꞌaꞌ yuꞌu̱.
Nä̱ꞌaꞌ ka̱ te̱ koyo̱ ndo̱ꞌ i̱i̱n tu̱ndoꞌo̱ꞌ tyiee̱ va̱.