Yoꞌoꞌ kaꞌán a̱ xaꞌa̱ꞌ ña̱ ti̱ꞌviꞌ Ndiosí ki̱xi̱n i̱i̱n yivi̱ꞌ
49
Sa̱kuuꞌ ndoꞌó,
ne̱ ndieeꞌ sa̱a̱ kuaꞌa̱n yu̱ꞌuꞌ mi̱ni̱ kaꞌnuꞌ xiinꞌ sa̱kuuꞌ ndoꞌó,
ne̱ ndieeꞌ ñu̱u̱ naꞌnuꞌ xikaꞌ i̱i̱n yivi̱ꞌ,
ku̱ni̱ so̱ꞌo̱ sa̱kuuꞌ ndo̱ꞌ ña̱ kaꞌán i̱.
Mi̱iꞌ Yahvé ni̱ ka̱na̱ yuꞌu̱ nde̱e̱ ti̱xi̱n si̱ꞌiꞌ i̱ ña̱ kuní ka̱ tuvi̱ i̱.
Nde̱e̱ kii̱ꞌ ndisoꞌ ka̱ si̱ꞌiꞌ i̱ yuꞌu̱ te̱ xa̱ ni̱ kaꞌa̱n a̱ kivi̱ꞌ i̱.
2 Ni̱ nda̱sa̱ nduuꞌ a̱ yaa̱ꞌ i̱ nde̱e̱ naa i̱i̱n ityi̱ xíinꞌ va̱ kii̱ꞌ xaꞌnú i̱ ku̱a̱tyi̱ ne̱ yivi̱ꞌ,
te̱ ni̱ xi̱to̱ a̱ yuꞌu̱ xiinꞌ nda̱ꞌaꞌ a̱,
te̱ ku̱ndu̱u̱ i̱ nde̱e̱ naa i̱i̱n kuxi̱ tunꞌ xíinꞌ va̱ nuu̱ꞌ,
te̱ ni̱ ta̱xa̱ꞌa̱ a̱ yuꞌu̱ ti̱xi̱n mata̱ miiꞌ ñuꞌuꞌ kuxi̱ a̱.
3 Ni̱ kaꞌa̱n a̱ xiinꞌ i̱ ndii:
“Ne̱ vi̱ꞌe̱ Israel,
ndoꞌó nduuꞌ ne̱ xikaꞌ nuuꞌ nuu̱ꞌ i̱,
te̱ ndoꞌó sa̱a̱ sa̱kanꞌ te̱ sa̱kaꞌnuꞌ ne̱ yivi̱ꞌ yuꞌu̱”,
ni̱ katyi̱ a̱.
4 Ni̱ kaꞌa̱n yuꞌu̱ ndii:
“Ni̱ xa̱tyuunꞌ saka i̱,
te̱ ni̱ xa̱ꞌni̱ꞌ saka tu̱ i̱ ña̱ ndi̱e̱eꞌ i̱,
te̱ köo̱ꞌ xa̱tyiꞌ a̱ ni̱ ka̱nandoo i̱.
Ndisu̱ sa̱kuuꞌ ña̱ ndoꞌoꞌ i̱ ja̱a̱nꞌ ndii,
nda̱ꞌaꞌ Yahvé yoo a̱,
te̱ nda̱ꞌaꞌ Ndiosí,
ña̱ xakaꞌnuꞌ i̱ ja̱a̱nꞌ,
yoo tu̱ tu̱mani̱ꞌ ña̱ ta̱xi̱ a̱ nda̱ꞌaꞌ i̱”,
ni̱ katyi̱ i̱.
5 Ndisu̱ vi̱ti̱n ndii,
ña̱ yo̱ꞌo̱ꞌ kaꞌán Yahvé,
ña̱ ni̱ nda̱sa̱ nduuꞌ yuꞌu̱ te̱ xikaꞌ nuuꞌ nuu̱ꞌ a̱ nde̱e̱ ña̱ kuní ka̱ tuvi̱ i̱,
te̱ sa̱na̱ndikoꞌ i̱ nuu̱ꞌ a̱ sa̱kuuꞌ ne̱ vi̱ꞌe̱ Jacob,
te̱ na̱ka̱ya̱ i̱ sa̱kuuꞌ ne̱ vi̱ꞌe̱ Israel nuu̱ꞌ a̱.
Sa̱kanꞌ ña̱ ni̱ ki̱ꞌi̱n kaꞌnuꞌ Yahvé yuꞌu̱,
te̱ ni̱ ta̱xi̱ tu̱ Ndiosí,
ña̱ xakaꞌnuꞌ i̱ ja̱a̱nꞌ,
ndi̱e̱e̱ꞌ i̱.
6 Kaꞌán Ndiosí ndii:
“Köo̱ꞌ kuaꞌa̱ꞌ xa̱tyiꞌ tyu̱u̱n nduuꞌ a̱ nuu̱ꞌ yuꞌu̱ ña̱ ku̱ndu̱u̱ u̱nꞌ te̱ ka̱ka̱ nu̱u̱ nuu̱ꞌ i̱ ku̱i̱ti̱ꞌ,
ña̱ na̱tyi̱ndi̱e̱e̱ va̱ꞌa̱ u̱nꞌ ne̱ vi̱ꞌe̱ Jacob xiinꞌ ña̱ sa̱na̱ndikoꞌ u̱nꞌ ne̱ vi̱ꞌe̱ Israel nuu̱ꞌ ñu̱ꞌuꞌ ni̱a̱.
Mi̱iꞌ yuꞌu̱ sa̱na̱nduuꞌ tu̱ yoꞌó ndee naa ñuꞌu̱ nuu̱ꞌ ne̱ tukuꞌ,
te̱ kuꞌu̱n kaꞌa̱n ndo̱so̱ꞌ u̱nꞌ nde̱e̱ miiꞌ xaꞌa̱n ndi̱ꞌi̱ ñu̱ꞌuꞌ i̱i̱n yivi̱ꞌ xaꞌa̱ꞌ ña̱ sa̱kakú ña̱ꞌaꞌ i̱”,
katyi a̱.
7 Ña̱ yo̱ꞌo̱ꞌ kaꞌán Yahvé,
ña̱ sandoó ndiká ne̱ vi̱ꞌe̱ Israel,
Ndiosí su̱ꞌu̱n ña̱ xakaꞌnuꞌ ni̱a̱.
Ne̱ vi̱ꞌe̱ Israel ja̱a̱nꞌ ndii,
ni̱ sa̱xi̱o̱o̱ ña̱ꞌaꞌ ne̱ tukuꞌ,
te̱ ni̱ ku̱nda̱siꞌ tu̱ ña̱ꞌaꞌ ni̱a̱,
te̱ ni̱ nduu̱ tu̱ ne̱ ja̱a̱nꞌ ne̱ xikaꞌ nuuꞌ so̱ꞌo̱ nuu̱ꞌ te̱ ni̱a̱ꞌa.
Kaꞌán Ndiosí xiinꞌ ni̱a̱ ndii:
“Kii̱ꞌ ku̱ni̱ te̱ xaꞌndia tyuunꞌ ku̱a̱xi̱ u̱nꞌ ndii,
vi̱kuita̱ ndi̱tyi̱ ra̱.
Te̱ kii̱ꞌ ku̱ni̱ te̱ kuuꞌ nu̱uꞌ ku̱a̱xi̱ u̱nꞌ ndii,
na̱ka̱nduꞌu̱ꞌ ndi̱e̱e̱ ra̱ nde̱e̱ nuu̱ꞌ ñu̱ꞌuꞌ nuu̱ꞌ u̱nꞌ xaꞌa̱ꞌ a̱ ña̱ kiꞌinꞌ kaꞌnuꞌ ra̱ yuꞌu̱ Yahvé,
Ndiosí su̱ꞌu̱n ña̱ xakaꞌnuꞌ ndoꞌó,
ne̱ vi̱ꞌe̱ Israel,
Ndiosí,
ña̱ xatyuunꞌ nda̱ku,
ña̱ ni̱ na̱ka̱xi̱n ndoꞌó”,
katyi a̱.
Yoꞌoꞌ kaꞌán a̱ xaꞌa̱ꞌ ña̱ nda̱sa̱ xa̱aꞌ Ndiosí ñu̱u̱ Sión
8 Ña̱ yo̱ꞌo̱ꞌ kaꞌán Yahvé:
“Sa̱va̱ ni̱ kivi̱ꞌ ña̱ kuní a̱ tyi̱ndi̱e̱eꞌ i̱ ndoꞌó,
te̱ ni̱ xi̱ni̱ so̱ꞌo̱ i̱ ña̱ kaꞌán ndo̱ꞌ xiinꞌ i̱.
Te̱ kivi̱ꞌ ña̱ ni̱ kuni̱ a̱ sa̱kakú i̱ ndoꞌó,
te̱ ni̱ sa̱kakú i̱ ndoꞌó.
Ko̱to̱ i̱ ndoꞌó,
te̱ ni̱ na̱ka̱xi̱n i̱ ndoꞌó te̱ ku̱ndu̱u̱ ndo̱ꞌ nde̱e̱ naa i̱i̱n kuento ña̱ ndoó i̱ xiinꞌ ndo̱ꞌ,
te̱ nda̱sa̱ va̱ꞌa̱ꞌ i̱ ñu̱u̱ ndo̱ꞌ,
te̱ na̱ta̱ꞌviꞌ ndo̱ꞌ ñu̱ꞌuꞌ ña̱ xa̱ ni̱ nduxi̱n xa̱tyiꞌ ku̱ndu̱u̱ ña̱ꞌa̱ ndo̱ꞌ.
9 Te̱ kaꞌa̱n i̱ xiinꞌ ne̱ ñuꞌuꞌ vi̱ꞌe̱ ka̱a̱ ndii:
Kuaꞌa̱n ki̱e̱e̱ ndo̱ꞌ ñaa̱ꞌ,
katyi̱ i̱.
’Te̱ kaꞌa̱n tu̱ i̱ xiinꞌ ne̱ yoo ni̱a̱a̱ꞌ i̱i̱n yivi̱ꞌ ndii:
Ni̱a̱ꞌa̱ ndo̱ꞌ miiꞌ nayiꞌé ñuꞌu̱,
katyi̱ i̱ xiinꞌ ni̱a̱.
Te̱ ne̱ ja̱a̱nꞌ ku̱ndu̱u̱ nde̱e̱ naa mbe̱e̱,
tiꞌ xaxi̱ꞌ kuꞌu̱ kuii̱ꞌ yu̱ꞌuꞌ i̱tyiꞌ,
te̱ xaxi̱ꞌ riꞌ kuꞌu̱ kuii̱ꞌ xíniꞌ i̱kuꞌ miiꞌ ni̱ nduxi̱n ndo̱o̱ xta̱ꞌanꞌ.
10 Ne̱ ja̱a̱nꞌ ndii,
köo̱ꞌ kivi̱ꞌ ku̱xiꞌi̱ ni̱a̱ so̱ko̱,
ni̱ nde̱e̱ köo̱ꞌ kivi̱ꞌ tu̱ ityi̱ ni̱a̱ ti̱kui,
ni̱ nde̱e̱ kä̱ꞌmi̱ xa̱tyiꞌ tu̱ ña̱ꞌaꞌ ñu̱ꞌu̱.
Sa̱kanꞌ ña̱ yuꞌu̱,
ña̱ ndani̱ ña̱ꞌaꞌ,
nduuꞌ ña̱ ko̱to̱ ña̱ꞌaꞌ,
te̱ kuꞌu̱n i̱ xiinꞌ ni̱a̱ miiꞌ yoo kuaꞌa̱ꞌ ti̱kui ko̱ꞌo̱ ni̱a̱.
11 Sa̱kuuꞌ i̱kuꞌ ña̱ nduuꞌ kuenta i̱ nda̱sa̱ nduuꞌ i̱ i̱tyiꞌ miiꞌ ndaa̱ va̱ ka̱ka̱ ne̱ ja̱a̱nꞌ,
te̱ sa̱kuuꞌ i̱tyiꞌ miiꞌ ki̱ni̱ kaaꞌ ndii,
nda̱sa̱ ndaa̱ ndo̱o̱ i̱ a̱.
12 Ko̱to̱ ndo̱ꞌ,
xikaꞌ va̱ ki̱e̱e̱ ne̱ nduuꞌ kuenta i̱ te̱ na̱ndi̱koꞌ ni̱a̱.
Sa̱va̱ ni̱a̱ ki̱xi̱n xíniꞌ ñu̱ꞌuꞌ i̱i̱n yivi̱ꞌ ni̱nu̱,
te̱ sa̱va̱ tu̱ku̱ ni̱a̱ ki̱xi̱n nde̱e̱ nuu̱ꞌ ñu̱ꞌuꞌ xtoꞌniꞌ miiꞌ ketá ñu̱ꞌu̱,
te̱ sa̱va̱ tu̱ku̱ ni̱a̱ ki̱xi̱n nde̱e̱ nuu̱ꞌ ñu̱ꞌuꞌ Sinim”,
katyi̱ a̱.
13 Ndoꞌó,
ndi̱viꞌ,
ka̱ta̱ tiꞌeꞌ sii̱ꞌ ndo̱ꞌ.
Te̱ yoꞌó,
ñu̱ꞌuꞌ,
na̱ku̱a̱tiaꞌ u̱nꞌ.
Te̱ ndoꞌó,
i̱kuꞌ,
ka̱ta̱ ndo̱ꞌ ya̱a̱,
sa̱kanꞌ ña̱ xa̱ ni̱ sa̱kiꞌví Yahvé ne̱ nduuꞌ kuenta a̱,
te̱ ku̱ndaꞌvi tu̱ i̱ni̱ a̱ xaꞌa̱ꞌ ni̱a̱ kii̱ꞌ ndoꞌoꞌ ni̱a̱.
14 Ndisu̱ ñu̱u̱ Sión kaꞌán ndii:
“Xa̱ ni̱ na̱ko̱o̱ ndi̱ꞌi̱ Yahvé yuꞌu̱,
te̱ xa̱ ni̱ na̱ndoso̱ꞌ Xto̱ꞌo̱ i̱ xaꞌa̱ꞌ i̱”,
katyi a̱.
15 Te̱ ni̱ kaꞌa̱n Ndiosí ndii:
“Köo̱ꞌ kivi̱ꞌ na̱ndoso̱ꞌ i̱i̱n ña̱ꞌaꞌ xaꞌa̱ꞌ siꞌe̱ aꞌ ña̱ ni̱ sa̱kakuꞌ aꞌ.
Te̱ köo̱ꞌ kivi̱ꞌ tu̱ na̱ko̱o̱ aꞌ ña̱ ndani̱ ña̱ꞌaꞌ aꞌ.
Ndisu̱ tee̱ꞌ ndee na̱ndoso̱ꞌ i̱i̱n ña̱ꞌaꞌ xaꞌa̱ꞌ siꞌe̱ aꞌ ndii,
köo̱ꞌ kivi̱ꞌ na̱ndoso̱ꞌ yuꞌu̱ xaꞌa̱ꞌ yoꞌó.
16 Ko̱to̱ u̱nꞌ,
yoꞌoꞌ yoso̱ꞌ kivi̱ꞌ u̱nꞌ ti̱xi̱n nda̱ꞌaꞌ i̱.
Te̱ sa̱kuuꞌ kivi̱ꞌ xitoꞌ i̱ nama̱ ña̱ ndasi i̱ꞌnu̱ sa̱a̱ kuaꞌa̱n xi̱i̱nꞌ u̱nꞌ.
17 Nä̱ꞌaꞌ ka̱ te̱ na̱ndi̱koꞌ kiꞌi̱ꞌ va̱ te̱ na̱ka̱sa̱ꞌa̱ yoꞌó.
Te̱ te̱ sa̱ndo̱ñuꞌuꞌ yoꞌó xiinꞌ te̱ sanduxín yoꞌó ndii,
ki̱e̱e̱ ndo̱o̱ ra̱ kuꞌu̱n ra̱.
18 Ndo̱ni̱ꞌi̱ nuu̱ꞌ u̱nꞌ te̱ ko̱to̱ u̱nꞌ sa̱a̱ kuaꞌa̱n xi̱i̱nꞌ u̱nꞌ sa̱kuuꞌ ne̱ yivi̱ꞌ kaa̱ꞌ,
te̱ so̱ꞌo̱ ku̱a̱xi̱ ni̱a̱ miiꞌ yoo u̱nꞌ yoꞌoꞌ.
Ña̱ ndi̱xa̱ nduuꞌ ña̱ kaa̱ꞌ nde̱e̱ naa ña̱ ndi̱xa̱ nduuꞌ a̱ ña̱ tiaku xna̱ꞌa̱ yuꞌu̱,
katyi yuꞌu̱,
Yahvé.
Te̱ sa̱kuuꞌ ne̱ yivi̱ꞌ kaa̱ꞌ ku̱ndu̱u̱ nde̱e̱ naa toto̱ va̱ꞌa̱ va̱ ña̱ ku̱i̱ꞌnu̱ u̱nꞌ,
te̱ ku̱ndu̱u̱ tu̱ ni̱a̱ nde̱e̱ naa toto̱ nda̱tu̱nꞌ ña̱ niꞌnuꞌ i̱i̱n ña̱ꞌaꞌ ñaꞌ tundaꞌáꞌ.
19 ’Tee̱ꞌ ndee ni̱ sa̱nduxín ndo̱o̱ te̱ yivi̱ꞌ ñu̱ꞌuꞌ ña̱ nduu kuenta u̱nꞌ,
te̱ ni̱ ndoo̱ i̱i̱n nda̱a̱ꞌ xa̱tyiꞌ a̱ ni̱ xa̱a̱ ra̱,
ndisu̱ vi̱ti̱n ndii,
nde̱e̱ ni̱ä̱ni̱ ka̱ nuu̱ꞌ a̱ ku̱ndi̱e̱e̱ ne̱ yivi̱ꞌ kuaꞌa̱ꞌ xa̱va̱ꞌa̱ ne̱ ni̱ na̱ndi̱koꞌ ñu̱u̱ ni̱a̱.
Te̱ te̱ yivi̱ꞌ te̱ sa̱nduxín yoꞌó ndii,
ku̱nu̱ ndo̱o̱ ra̱ kuꞌu̱n xikaꞌ ra̱.
20 Te̱ sa̱kuuꞌ ne̱ yivi̱ꞌ,
ne̱ ni̱ tuvi̱ miiꞌ i̱tyi kaaꞌ,
te̱ ni̱ xa̱ni̱ni̱ u̱nꞌ ña̱ köo̱ꞌ kivi̱ꞌ ka̱ na̱ndi̱koꞌ ndii,
na̱ndi̱koꞌ ni̱a̱ yoꞌoꞌ te̱ kaꞌa̱n ni̱a̱ xiinꞌ u̱nꞌ ndii:
Kateinꞌ va̱ kaaꞌ yoꞌoꞌ te̱ ni̱ä̱ni̱ ka̱ ku̱ndi̱e̱e̱ ndu̱ꞌ,
sa̱kanꞌ ña̱ kuaꞌa̱ꞌ va̱ ne̱ yivi̱ꞌ ndieeꞌ.
Sa̱a̱ u̱nꞌ ña̱ va̱ꞌa̱ te̱ ta̱xi̱ u̱nꞌ kuaꞌa̱ꞌ ka̱ ñu̱ꞌuꞌ miiꞌ ku̱ndi̱e̱e̱ ndu̱,
katyi̱ ni̱a̱.
21 Te̱ xa̱ꞌaꞌ u̱nꞌ kaꞌa̱n u̱nꞌ xiinꞌ nimá u̱nꞌ ndii:
¿Yo̱o̱ tu̱ siꞌe̱ nduuꞌ ne̱ kaa̱ꞌ?
Sa̱kanꞌ ña̱ köo̱ꞌ nde̱e̱ i̱i̱n siꞌe̱ i̱,
sa̱kanꞌ ña̱ ñaꞌ kü̱vi̱ ko̱o̱ siꞌe̱ nduuꞌ i̱.
Te̱ ni̱ xika̱ ndo̱so̱ꞌ i̱ i̱i̱n yivi̱ꞌ,
te̱ ni̱ ndoo̱ i̱i̱n nda̱a̱ꞌ tilu̱ꞌ i̱ sa̱kanꞌ.
Xaꞌa̱ꞌ a̱ ja̱a̱nꞌ na kuiiꞌ,
¿yo̱o̱ ni̱ sa̱kuaꞌnuꞌ ne̱ kaa̱ꞌ?
Ñaꞌ nduꞌu̱ꞌ i̱i̱n nda̱a̱ꞌ nduuꞌ yuꞌu̱ ndisu̱,
¿miiꞌ ni̱ ki̱e̱e̱ sa̱kuuꞌ ne̱ kaa̱ꞌ?,
katyi̱ u̱nꞌ”,
katyi Ndiosí.
22 Ña̱ yo̱ꞌo̱ꞌ kaꞌán Tákuiꞌe Yahvé:
“Ko̱to̱ ndo̱ꞌ,
yuꞌu̱ ndii,
kaꞌa̱n tyuunꞌ i̱ xiinꞌ ne̱ tukuꞌ,
ne̱ kändixaꞌ Ndiosí,
te̱ ko̱ni̱ꞌi̱ ni̱a̱ tiaa̱ siꞌe̱ u̱nꞌ ki̱xi̱n ni̱a̱,
te̱ ña̱ꞌaꞌ siꞌe̱ u̱nꞌ ku̱ndo̱so̱ꞌ soko̱ ni̱a̱ ki̱xi̱n ni̱a̱.
23 Te̱ sa̱kuuꞌ rey na̱ti̱i̱n ndoꞌó ko̱to̱ ra̱ nde̱e̱ naa siꞌe̱ mi̱iꞌ ra̱,
ña̱ siꞌi ra̱ reina ku̱ndu̱u̱ ñaꞌ ko̱to̱ ndoꞌó nde̱e̱ naa si̱ꞌiꞌ ndaꞌvi ndo̱ꞌ.
Na̱ku̱ndiee̱ ndi̱e̱e̱ ni̱a̱ nuu̱ꞌ ndo̱ꞌ nde̱e̱ tondi̱a̱ nuu̱ꞌ ni̱a̱ nuu̱ꞌ ñu̱ꞌuꞌ xaꞌa̱ꞌ ña̱ kiꞌinꞌ kaꞌnuꞌ ni̱a̱ ndoꞌó,
te̱ na̱ku̱a̱ꞌa̱ ni̱a̱ ya̱kaꞌ xaꞌa̱ꞌ ndo̱ꞌ xiinꞌ yaa̱ꞌ ni̱a̱.
Te̱ na̱ku̱ni̱ ndo̱ꞌ ña̱ yuꞌu̱ nduuꞌ Yahvé,
te̱ ku̱nda̱ni̱ tu̱ ndo̱ꞌ ña̱ ne̱ i̱ni̱ xini yuꞌu̱ ndii,
köo̱ꞌ kivi̱ꞌ ku̱ka̱ꞌa̱n nuu̱ꞌ ni̱a̱.”
24 Xiní e̱ꞌ ña̱ i̱i̱n te̱ ni̱ xaꞌa̱n ti̱i̱n ñuꞌu̱ ndii,
kü̱vi̱ tu̱ꞌu̱n e̱ꞌ ña̱ꞌa̱ ña̱ ni̱ ka̱nandoo ra̱ miiꞌ ni̱ xaꞌa̱n ti̱i̱n ra̱ ñuꞌu̱ ja̱a̱nꞌ nda̱ꞌaꞌ ra̱.
Te̱ xiní tu̱ e̱ꞌ ña̱ kü̱vi̱ ndi̱a̱ꞌni̱ i̱i̱n te̱ ni̱ xi̱kuꞌu̱n nda̱ꞌaꞌ te̱ xíinꞌ ni̱a̱ꞌa.
25 Ndisu̱ ña̱ yo̱ꞌo̱ꞌ kaꞌán Yahvé:
“Ña̱ nda̱ku nduuꞌ a̱ ndii,
ku̱vi̱ kaku̱ te̱ ni̱ xi̱kuꞌu̱n nda̱ꞌaꞌ te̱ xíinꞌ ni̱a̱ꞌa,
te̱ ku̱vi̱ tu̱ tu̱ꞌu̱n te̱ yivi̱ꞌ ña̱ꞌa̱ nda̱ꞌaꞌ te̱ ni̱ xaꞌa̱n ti̱i̱n ñuꞌu̱.
Ndisu̱ mi̱iꞌ yuꞌu̱ ku̱ntaꞌanꞌ xiinꞌ te̱ kuntaꞌanꞌ xiinꞌ yoꞌó,
te̱ mi̱iꞌ tu̱ i̱ sa̱kakú sa̱kuuꞌ siꞌe̱ u̱nꞌ.
26 Te̱ ni̱ sa̱ndoꞌoꞌ yoꞌó ndii,
sa̱kaxi̱ꞌ ña̱ꞌaꞌ i̱ nde̱i̱ꞌ mi̱iꞌ ra̱,
te̱ ko̱ꞌo̱ tu̱ ra̱ níiꞌ ra̱ nde̱e̱ xi̱ni̱ ra̱ sa̱a̱ a̱ nde̱e̱ naa xaaꞌ a̱ kii̱ꞌ xiꞌiꞌ ra̱ vino.
Te̱ sa̱kuuꞌ ne̱ yivi̱ꞌ ku̱nda̱ni̱ ña̱ yuꞌu̱,
Yahvé,
nduuꞌ ña̱ sa̱kakú ndoꞌó,
te̱ sandoó ndiká tu̱ i̱ ndoꞌó,
Ndiosí ña̱ sa̱kuuꞌ a̱ ku̱vi̱,
ña̱ xakaꞌnuꞌ ne̱ vi̱ꞌe̱ Jacob”,
katyi a̱.