Yoꞌoꞌ kaꞌán ndi̱e̱eꞌ Ndiosí xiinꞌ ne̱ Israel xaꞌa̱ꞌ a̱ ña̱ xi̱i̱ va̱ nimá ni̱a̱
48
Ku̱ni̱ so̱ꞌo̱ ndoꞌó,
ne̱ vi̱ꞌe̱ Jacob,
ne̱ kaꞌán ña̱ naniꞌ ndo̱ꞌ ne̱ vi̱ꞌe̱ Israel,
ne̱ nduuꞌ si̱a̱niꞌ xikaꞌ Judá.
Tiinꞌ ndo̱ꞌ kivi̱ꞌ Yahvé te̱ taxiꞌ ndo̱ꞌ kuento ndo̱ꞌ,
te̱ kaꞌán ndo̱ꞌ xiinꞌ Ndiosí,
ña̱ xakaꞌnuꞌ ne̱ vi̱ꞌe̱ Israel,
ne̱ taꞌanꞌ yooꞌ,
ndisu̱ süu̱ꞌ xiinꞌ ña̱ ndi̱xa̱ xaaꞌ ndo̱ꞌ a̱,
ni̱ nde̱e̱ süu̱ꞌ xiinꞌ i̱i̱n kaniiꞌ nimá ndo̱ꞌ xaaꞌ ndo̱ꞌ ña̱ ja̱a̱nꞌ,
2 tee̱ꞌ ndee kaꞌán ndo̱ꞌ ña̱ ne̱ ndieeꞌ ñu̱u̱ su̱ꞌu̱n nduuꞌ ndo̱ꞌ,
te̱ i̱ni̱ ndo̱ꞌ xini ndo̱ꞌ Ndiosí,
ña̱ xakaꞌnuꞌ ne̱ vi̱ꞌe̱ Israel,
taꞌanꞌ e̱ꞌ,
ña̱ naniꞌ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
3 “Nde̱e̱ xta̱ꞌanꞌ kivi̱ꞌ ni̱ kaꞌa̱n i̱ xiinꞌ ndo̱ꞌ xaꞌa̱ꞌ ña̱ ni̱ yoo̱ sa̱aꞌ,
mi̱iꞌ yuꞌu̱ ni̱ kaꞌa̱n tiakú a̱ xiinꞌ ndo̱ꞌ.
Numi̱ꞌ va̱ ni̱ xa̱a̱ i̱ ña̱ ja̱a̱nꞌ,
te̱ ni̱ xinu̱ xna̱ꞌa̱ a̱ sa̱a̱ niiꞌ ni̱ kaꞌa̱n i̱.
4 Sa̱kanꞌ ña̱ xiní yuꞌu̱ ña̱ ne̱ xi̱i̱ va̱ nimá nduuꞌ ndo̱ꞌ,
te̱ tiꞌeꞌ tu̱ nimá ndo̱ꞌ nde̱e̱ naa i̱i̱n ka̱a̱ tiꞌeꞌ va̱,
te̱ tiꞌeꞌ va̱ xíniꞌ ndo̱ꞌ nde̱e̱ naa ka̱a̱ bronce.
5 Xaꞌa̱ꞌ a̱ ja̱a̱nꞌ na ni̱ kaꞌa̱n tiakú i̱ xiinꞌ ndo̱ꞌ xaꞌa̱ꞌ ña̱ ku̱ndo̱ꞌo̱ ndo̱ꞌ nde̱e̱ xta̱ꞌanꞌ vi̱ꞌ,
nde̱e̱ ña̱ kuní ka̱ ku̱ndo̱ꞌo̱ ndo̱ꞌ ña̱ ja̱a̱nꞌ.
Te̱ ni̱ sakuniꞌ i̱ ndoꞌó kuento xaꞌa̱ꞌ a̱,
sa̱kanꞌ te̱ käꞌa̱n ndo̱ꞌ ndii:
Ña̱ nianiaꞌ ña̱ nduuꞌ ndiosí e̱ꞌ ni̱ xa̱a̱ sa̱kuuꞌ ña̱ kaa̱ꞌ,
ndiosí ña̱ ni̱ xa̱ꞌa̱ nda̱ꞌaꞌ e̱ꞌ,
uun ña̱ ni̱ ta̱vi̱ e̱ꞌ nuu̱ꞌ ñuꞌu̱ nduuꞌ ña̱ ni̱ ti̱ꞌviꞌ sa̱kuuꞌ tu̱ndoꞌo̱ꞌ kaa̱ꞌ,
katyi̱ ndo̱ꞌ.
6 Ni̱ xi̱ni̱ ndo̱ꞌ kuento xaꞌa̱ꞌ sa̱kuuꞌ ña̱ ja̱a̱nꞌ,
te̱ küni ka̱ndi̱xaꞌ ndo̱ꞌ a̱.
Sa̱kanꞌ na kuiiꞌ vi̱ti̱n ndii,
kaꞌa̱n i̱ xiinꞌ ndo̱ꞌ xaꞌa̱ꞌ ña̱ xa̱aꞌ ña̱ ku̱ni̱ ndo̱ꞌ ña̱ yooꞌ si̱ꞌe köo̱ꞌ kivi̱ꞌ ni̱ xi̱ni̱ ndo̱ꞌ.
7 Ña̱ xa̱aꞌ nduuꞌ ña̱ kaꞌán i̱ xiinꞌ ndo̱ꞌ vi̱ti̱n,
te̱ süu̱ꞌ ña̱ ya̱taꞌ nduuꞌ a̱.
Sa̱kanꞌ ña̱ tiäꞌa̱an ku̱ni̱ so̱ꞌo̱ ndo̱ꞌ ña̱ ja̱a̱nꞌ nde̱e̱ kivi̱ꞌ vi̱ti̱n.
Xaꞌa̱ꞌ a̱ ja̱a̱nꞌ na kü̱vi̱ kaꞌa̱n ndo̱ꞌ xiinꞌ i̱ ndii:
Xa̱ xiní ndu̱ xaꞌa̱ꞌ ña̱ ja̱a̱nꞌ,
katyi̱ ndo̱ꞌ.
8 Köo̱ꞌ kivi̱ꞌ ni̱ xi̱ni̱ so̱ꞌo̱ ndo̱ꞌ xaꞌa̱ꞌ ña̱ ja̱a̱nꞌ,
ni̱ nde̱e̱ köo̱ꞌ kivi̱ꞌ tu̱ ni̱ ku̱nda̱ni̱ ndo̱ꞌ xaꞌa̱ꞌ a̱,
sa̱kanꞌ ña̱ ni̱ yoo̱ ndasi yavi̱ so̱ꞌo̱ ndo̱ꞌ.
Te̱ xiní kaxiꞌ yuꞌu̱ ña̱ ne̱ so̱ꞌo̱ va̱ nduuꞌ ndo̱ꞌ,
te̱ xa̱ ne̱ teiꞌ katyi i̱ xiinꞌ ndo̱ꞌ nde̱e̱ kii̱ꞌ kuní ka̱ ka̱ku̱ vi̱ꞌ ndo̱ꞌ.”
9 Kaꞌán ka̱ Ndiosí ndii:
“Xaꞌa̱ꞌ a̱ ña̱ xitoꞌ kaꞌnuꞌ i̱ kivi̱ꞌ i̱ ndii,
ku̱ndi̱e̱ni xíniꞌ i̱ xini i̱ ndoꞌó,
te̱ xaꞌa̱ꞌ a̱ ña̱ kuní i̱ ña̱ sa̱kaꞌnuꞌ tu̱ku̱u̱ ne̱ yivi̱ꞌ yuꞌu̱ ndii,
nï̱ xa̱ꞌni̱ꞌ ndi̱ꞌi̱ i̱ ndoꞌó.
10 Ko̱to̱ ndo̱ꞌ,
xa̱ ni̱ nda̱sa̱ ndo̱o̱ i̱ ndoꞌó,
ndisu̱ nï̱ nda̱sa̱ ndo̱o̱ i̱ ndoꞌó nde̱e̱ naa plata.
Süu̱ꞌ ja̱a̱nꞌ ndii,
ni̱ nda̱sa̱ ndo̱o̱ i̱ ndoꞌó xiinꞌ i̱i̱n nuu̱ꞌ tu̱ndoꞌo̱ꞌ ña̱ ndi̱e̱eꞌ va̱ ña̱ nduuꞌ nde̱e̱ naa ñuꞌu̱ ña̱ ndatin vi̱ꞌe̱ nde̱yaꞌ.
11 Te̱ sa̱a̱ i̱ ña̱ ja̱a̱nꞌ xaꞌa̱ꞌ ndo̱ꞌ xaꞌa̱ꞌ a̱ ña̱ xitoꞌ kaꞌnuꞌ i̱ kivi̱ꞌ i̱,
sa̱kanꞌ te̱ kä̱ni̱a̱ꞌa ne̱ yivi̱ꞌ xaꞌa̱ꞌ i̱.
Te̱ ña̱ kiꞌinꞌ kaꞌnuꞌ ne̱ yivi̱ꞌ yuꞌu̱ ndii,
köo̱ꞌ kivi̱ꞌ na̱ta̱ꞌviꞌ i̱ a̱ nda̱ꞌaꞌ nde̱e̱ i̱i̱n ña̱ꞌa̱.
Yoꞌoꞌ kaꞌán a̱ xaꞌa̱ꞌ rey Ciro
12 ’Ku̱ni̱ so̱ꞌo̱ ndoꞌó,
ne̱ vi̱ꞌe̱ Jacob,
ne̱ nduuꞌ ne̱ vi̱ꞌe̱ Israel,
ne̱ ni̱ na̱ka̱xi̱n i̱ ku̱ndu̱u̱ kuenta i̱.
Yuꞌu̱ nduuꞌ ña̱ nduuꞌ i̱.
Yuꞌu̱ nduuꞌ ña̱ nu̱uꞌ,
te̱ yuꞌu̱ tu̱ nduuꞌ ña̱ soꞌo̱ꞌ ndiꞌiꞌ.
13 Xiinꞌ nda̱ꞌaꞌ mi̱iꞌ i̱ ni̱ xa̱ꞌa̱ i̱i̱n yivi̱ꞌ,
te̱ xiinꞌ nda̱ꞌaꞌ tu̱ i̱ ni̱ sa̱na̱kaá i̱ ndi̱viꞌ.
Te̱ kii̱ꞌ ni̱ kaꞌa̱n tyuunꞌ i̱ ña̱ ko̱o̱ a̱ ndii,
i̱i̱n ni̱ xi̱koo̱ ku̱i̱ti̱ꞌ sa̱kuuꞌ a̱ nuu̱ꞌ i̱”,
katyi a̱.
14 Ndu̱i̱i̱n sa̱kuuꞌ ndoꞌó te̱ ku̱ni̱ so̱ꞌo̱ ndo̱ꞌ ña̱ kaꞌán i̱ xiinꞌ ndo̱ꞌ:
Kö̱o̱ꞌ nde̱e̱ i̱i̱n ndiosí,
ña̱ xakaꞌnuꞌ ndo̱ꞌ ja̱a̱nꞌ,
ni̱ kaꞌa̱n ndo̱so̱ꞌ xaꞌa̱ꞌ ña̱ ko̱o̱ ña̱ ja̱a̱nꞌ.
Xaꞌa̱ꞌ i̱i̱n te̱ yivi̱ꞌ,
te̱ ndani̱ va̱ Yahvé,
ni̱ na̱ka̱xi̱n a̱,
te̱ sa̱a̱ ra̱ ña̱ kuní a̱ xiinꞌ ne̱ ndieeꞌ nuu̱ꞌ ñu̱ꞌuꞌ Babilonia,
sa̱kanꞌ ña̱ sa̱ndo̱ñuꞌuꞌ a̱ ne̱ vi̱ꞌe̱ caldeo.
15 Kaꞌán Ndiosí ndii:
“I̱i̱n nda̱a̱ꞌ yuꞌu̱ ku̱i̱ti̱ꞌ ni̱ kaꞌa̱n,
te̱ ni̱ ka̱na̱ i̱ ra̱,
te̱ ni̱ ki̱xi̱n ra̱ ni̱ xa̱a̱ i̱,
te̱ ja̱a̱nꞌ ndii,
ke̱ta̱ va̱ꞌa̱ ra̱ xiinꞌ sa̱kuuꞌ ña̱ sa̱a̱ ra̱.
16 Ni̱a̱ꞌa̱ ndo̱ꞌ nuu̱ꞌ i̱,
te̱ ku̱ni̱ so̱ꞌo̱ ndo̱ꞌ ña̱ kaꞌa̱n i̱.
Nde̱e̱ ña̱ nu̱uꞌ ndii,
köo̱ꞌ kivi̱ꞌ ni̱ kaꞌa̱n si̱ꞌe i̱ xaꞌa̱ꞌ ña̱ ja̱a̱nꞌ nde̱e̱ kii̱ꞌ ni̱ yoo̱ ña̱ ja̱a̱nꞌ ndii,
i̱kanꞌ ni̱ yoo̱ yuꞌu̱ xatyuunꞌ i̱”,
katyi Ndiosí.
Te̱ vi̱ti̱n ndii,
ni̱ ti̱ꞌviꞌ Yahvé,
Xto̱ꞌo̱ e̱ꞌ,
yuꞌu̱,
te̱ kaꞌa̱n i̱ xiinꞌ ndo̱ꞌ xiinꞌ ndi̱e̱e̱ꞌ Espíritu a̱.
17 Ña̱ yo̱ꞌo̱ꞌ kaꞌán Yahvé,
ña̱ ni̱ sa̱ndoó ndiká ndoꞌó,
Ndiosí su̱ꞌu̱n ña̱ xakaꞌnuꞌ yooꞌ,
ne̱ vi̱ꞌe̱ Israel:
“Yuꞌu̱ nduuꞌ Yahvé,
Ndiosí ña̱ xakaꞌnuꞌ ndo̱ꞌ,
ña̱ saniaꞌá ndoꞌó ña̱ va̱ꞌa̱ nuu̱ꞌ ndo̱ꞌ,
te̱ yuꞌu̱ tu̱ niaꞌá ndoꞌó ndee ña̱ nduuꞌ i̱tyiꞌ va̱ꞌa̱ ña̱ kuní a̱ ka̱ka̱ ndo̱ꞌ.
18 Naa sa̱kanꞌ te̱ ni̱ tyu̱nxaꞌaꞌ ndo̱ꞌ ña̱ kaꞌán tu̱ꞌu̱n nde̱iꞌ i̱ ndii,
ko̱o̱ kuaꞌa̱ꞌ ña̱ ndieeꞌ mani̱ꞌ ndo̱ꞌ,
nde̱e̱ naa ti̱kui i̱ti̱a̱ teꞌ nakaá kuaꞌa̱n,
te̱ sa̱kanꞌ tu̱ ña̱ xatyuunꞌ nda̱ku ndo̱ꞌ ndii,
ku̱ndu̱u̱ a̱ nde̱e̱ naa ko̱o̱ ti̱kui ña̱ yoo nuu̱ꞌ mi̱ni̱ kaꞌnuꞌ.
19 Naaꞌ sa̱kanꞌ nduuꞌ a̱ ndii,
ku̱kuaꞌa̱ꞌ xa̱va̱ꞌa̱ ne̱ si̱a̱niꞌ xikaꞌ ndo̱ꞌ nde̱e̱ naa ñu̱tiꞌ ña̱ ndieeꞌ yu̱ꞌuꞌ mi̱ni̱ kaꞌnuꞌ,
te̱ sa̱kanꞌ tu̱ ku̱kuaꞌa̱ꞌ siꞌe̱ ndo̱ꞌ nde̱e̱ naa ñu̱tiꞌ ja̱a̱nꞌ.
Te̱ köo̱ꞌ kivi̱ꞌ ndo̱ñuꞌuꞌ sa̱kuuꞌ ni̱a̱ nuu̱ꞌ ñu̱ꞌuꞌ i̱i̱n yivi̱ꞌ ni̱ nde̱e̱ köo̱ꞌ kivi̱ꞌ tu̱ ki̱e̱e̱ ni̱a̱ nuu̱ꞌ i̱ miiꞌ yoo i̱.
20 ’Kuaꞌa̱n ki̱e̱e̱ ndo̱ꞌ nuu̱ꞌ ñu̱ꞌuꞌ Babilonia.
Ku̱nu̱ ndo̱ꞌ nuu̱ꞌ ne̱ vi̱ꞌe̱ caldeo ja̱a̱nꞌ.
Kaꞌa̱n ndo̱so̱ꞌ kuatiaꞌ ndo̱ꞌ xaꞌa̱ꞌ ña̱ yo̱ꞌo̱ꞌ nuu̱ꞌ ne̱ yivi̱ꞌ,
te̱ sa̱kuniꞌ tu̱ꞌu̱n ndo̱ꞌ xaꞌa̱ꞌ ña̱ ja̱a̱nꞌ nde̱e̱ miiꞌ xaꞌa̱n ndi̱ꞌi̱ ñu̱ꞌuꞌ i̱i̱n yivi̱ꞌ,
kaꞌa̱n ndo̱ꞌ ndii:
¡Ni̱ sa̱kakú Yahvé ne̱ vi̱ꞌe̱ Jacob,
ne̱ xikaꞌ nuuꞌ nuu̱ꞌ a̱!,
katyi̱ ndo̱ꞌ.”
21 Te̱ kii̱ꞌ ni̱ ndiaka̱ ña̱ꞌaꞌ Ndiosí,
te̱ ni̱ xkaꞌndi̱a̱ ni̱a̱ miiꞌ i̱tyiꞌ kaaꞌ ndii,
nï̱ ityi̱ ni̱a̱ ti̱kui,
sa̱kanꞌ ña̱ ni̱ nu̱niaꞌ a̱ xata̱ꞌ ka̱va̱ꞌ,
te̱ ni̱ ta̱va̱ꞌ a̱ ti̱kui ni̱ xi̱ꞌi̱ ni̱a̱,
ni̱ na̱kaa̱ raꞌ kuaꞌa̱n raꞌ nde̱e̱ naa ti̱kui i̱ti̱a̱.
22 Kaꞌán Yahvé ndii:
“Köo̱ꞌ kivi̱ꞌ ndieeꞌ mani̱ꞌ ne̱ xaaꞌ ña̱ ni̱a̱ꞌa”,
katyi a̱.