Yoꞌoꞌ kaꞌán Ndiosí xaꞌa̱ꞌ ña̱ nduxi̱n Babilonia
47
’Ndoꞌó,
ne̱ ndieeꞌ nuu̱ꞌ ñu̱ꞌuꞌ Babilonia,
nduuꞌ ndo̱ꞌ nde̱e̱ naa ña̱ꞌaꞌ sa̱va̱ ñaꞌ köo̱ꞌ kivi̱ꞌ ni̱ kanduꞌu̱ꞌ xiinꞌ te̱ yivi̱ꞌ.
Kuaꞌan nu̱u̱ ndo̱ꞌ ñu̱ꞌuꞌ te̱ ku̱ndi̱e̱e̱ ndo̱ꞌ nuu̱ꞌ ya̱kaꞌ.
Sa̱kanꞌ tu̱ ndoꞌó,
ña̱ꞌaꞌ siꞌe̱ te̱ vi̱ꞌe̱ caldeo,
kuaꞌan nu̱u̱ ndo̱ꞌ nuu̱ꞌ tei̱ kaꞌnuꞌ miiꞌ ndieeꞌ ndo̱ꞌ te̱ ku̱ndi̱e̱e̱ ndo̱ꞌ nuu̱ꞌ ya̱kaꞌ.
Sa̱kanꞌ ña̱ köo̱ꞌ kivi̱ꞌ ka̱ kaꞌa̱n ne̱ yivi̱ꞌ xiinꞌ ndo̱ꞌ ña̱ꞌaꞌ ñaꞌ nda̱tu̱nꞌ va̱,
te̱ ii̱ꞌ va̱ tu̱ kuuꞌ aꞌ.
2 Ki̱ꞌi̱n ndo̱ꞌ ka̱a̱ taxín xaꞌa te̱ ndi̱ko̱ ndo̱ꞌ yu̱tyiꞌ harina.
Xta̱ꞌniꞌ ndo̱ꞌ ndi̱kiꞌ ña̱ ndasi nuu̱ꞌ ndo̱ꞌ,
te̱ ndo̱ni̱ꞌi̱ tu̱ ndo̱ꞌ xi̱o̱o̱ niꞌnuꞌ ndo̱ꞌ,
te̱ na̱tuvi̱ ndo̱o̱ si̱ꞌi̱n ndo̱ꞌ,
kii̱ꞌ xkaꞌndi̱a̱ ndo̱ꞌ ti̱kui i̱ti̱a̱.
3 Ku̱ni̱ sa̱kuuꞌ ne̱ yivi̱ꞌ i̱i̱nꞌ vityiꞌ ndo̱ꞌ,
te̱ ku̱ni̱ tu̱ sa̱kuuꞌ ni̱a̱ limaꞌ ndo̱ꞌ.
Mi̱iꞌ yuꞌu̱ naka̱n kuenta nuu̱ꞌ sa̱kuuꞌ ndo̱ꞌ,
te̱ nde̱e̱ i̱i̱n ndo̱ꞌ kö̱o̱ꞌ kaꞌnuꞌ i̱ni̱ i̱ xaꞌa̱ꞌ”,
katyi a̱.
4 Ndiosí su̱ꞌu̱n,
ña̱ xakaꞌnuꞌ yooꞌ,
ne̱ vi̱ꞌe̱ Israel,
nduuꞌ ña̱ sandoó ndiká yooꞌ.
Te̱ Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
nduuꞌ kivi̱ꞌ a̱.
Kaꞌán a̱ ndii:
5 “Ndoꞌó,
siꞌe̱ te̱ vi̱ꞌe̱ caldeo,
ko̱o̱ taxi̱nꞌ yu̱ꞌuꞌ ndo̱ꞌ ku̱ndi̱e̱e̱ ndo̱ꞌ,
te̱ kuꞌu̱n ndo̱ꞌ miiꞌ i̱i̱n yaví,
sa̱kanꞌ ña̱ köo̱ꞌ kivi̱ꞌ ka̱ kaꞌa̱n ne̱ yivi̱ꞌ xiinꞌ ndo̱ꞌ ña̱ nduuꞌ ndo̱ꞌ ne̱ xaꞌndia tyuunꞌ nuu̱ꞌ sa̱kuuꞌ ne̱ yivi̱ꞌ.
6 Kii̱ꞌ ni̱ na̱saa̱ꞌ i̱ ni̱ xi̱ni̱ i̱ ne̱ nduuꞌ kuenta i̱ ndii,
ni̱ sa̱na̱kuaꞌa i̱ ne̱ nduuꞌ ña̱ꞌa̱ mi̱iꞌ i̱ ja̱a̱nꞌ nda̱ꞌaꞌ ndo̱ꞌ,
te̱ sa̱kaꞌanꞌ ña̱ꞌaꞌ ne̱ yivi̱ꞌ.
Ndisu̱ ndoꞌó ndii,
nï̱ ku̱vi̱ta i̱ni̱ ndo̱ꞌ ni̱ xi̱ni̱ ña̱ꞌaꞌ ndo̱ꞌ,
te̱ nde̱e̱ ne̱ xi̱xa̱ ni̱ ta̱xi̱ ndo̱ꞌ tyu̱u̱n viee̱ va̱ ni̱ xa̱a̱,
7 kaꞌán ndo̱ꞌ ndii:
Nde̱e̱ ndiꞌiꞌ ni̱ kivi̱ꞌ ku̱ndu̱u̱ ndu̱ ne̱ ka̱ꞌndi̱a̱ tyuunꞌ nuu̱ꞌ sa̱kuuꞌ ne̱ yivi̱ꞌ,
katyi̱ ndo̱ꞌ.
Ndisu̱ köo̱ꞌ kivi̱ꞌ ni̱ xa̱ni̱ni̱ ndo̱ꞌ xaꞌa̱ꞌ ña̱ yo̱ꞌo̱ꞌ,
ni̱ nde̱e̱ nï̱ na̱ka̱ꞌanꞌ tu̱ ndo̱ꞌ xaꞌa̱ꞌ sa̱a̱ kuꞌu̱n ndi̱koꞌ ndo̱ꞌ.
8 ’Xaꞌa̱ꞌ a̱ ja̱a̱nꞌ na kuiiꞌ vi̱ti̱n ndii,
ku̱ni̱ so̱ꞌo̱ ndoꞌó,
ne̱ xtani̱ va̱ ña̱ vikaꞌ,
ndoꞌó,
ne̱ i̱ni̱ ndieeꞌ nuu̱ꞌ tei̱ miiꞌ xaꞌndia tyuunꞌ ndo̱ꞌ.
Te̱ kaꞌán ndo̱ꞌ xiinꞌ nimá ndo̱ꞌ ndii:
I̱i̱n nda̱a̱ꞌ nduꞌu̱ ku̱i̱ti̱ꞌ nduuꞌ ne̱ kooꞌ tyukuuꞌ va̱,
te̱ köo̱ꞌ ka̱ nde̱e̱ i̱i̱n ne̱ yivi̱ꞌ nde̱e̱ naa nduꞌu̱,
te̱ köo̱ꞌ kivi̱ꞌ ndoo̱ kuaa̱nꞌ ndu̱,
ni̱ nde̱e̱ köo̱ꞌ kivi̱ꞌ tu̱ ku̱vi̱ siꞌe̱ ndu̱,
katyi ndo̱ꞌ.
9 Ndisu̱ i̱i̱n nda̱a̱ꞌ kivi̱ꞌ ku̱i̱ti̱ꞌ te̱ ku̱ndo̱ꞌo̱ ndo̱ꞌ uvi̱ sa̱aꞌ ña̱ yo̱ꞌo̱ꞌ:
ndoo̱ kuaa̱nꞌ ndo̱ꞌ,
te̱ i̱i̱n ku̱vi̱ ku̱i̱ti̱ꞌ tu̱ siꞌe̱ ndo̱ꞌ,
te̱ ku̱ndo̱ꞌo̱ xa̱va̱ꞌa̱ ndo̱ꞌ sa̱a̱ ña̱ ja̱a̱nꞌ tee̱ꞌ ndee xiní ndo̱ꞌ kuaꞌa̱ꞌ va̱ ña̱ kuini̱ꞌ,
te̱ xiní tu̱ ndo̱ꞌ kuaꞌa̱ꞌ va̱ ña̱ tu̱ꞌva̱.
10 Ndoꞌó ndii,
i̱ni̱ va̱ ndo̱ꞌ te̱ xaaꞌ ndo̱ꞌ ña̱ ni̱a̱ꞌa,
te̱ kaꞌán ndo̱ꞌ ndii:
Köo̱ꞌ xini xa̱tyiꞌ ña̱ xaaꞌ i̱,
katyi ndo̱ꞌ.
Ña̱ xini tuní mi̱iꞌ ndo̱ꞌ xiinꞌ ña̱ ndityi ndo̱ꞌ ni̱ xi̱ni̱ xaꞌanꞌ ndoꞌó.
Sa̱kanꞌ ña̱ ni̱ xa̱ni̱ni̱ ndo̱ꞌ xiinꞌ nimá ndo̱ꞌ ndii:
I̱i̱n nda̱a̱ꞌ yuꞌu̱ ku̱i̱ti̱ꞌ yoo,
te̱ köo̱ꞌ ka̱ nde̱e̱ i̱i̱n ne̱ yivi̱ꞌ nde̱e̱ naa yuꞌu̱,
katyi ndo̱ꞌ.
11 Ndisu̱ xaa̱ i̱i̱n kuiꞌe̱ ku̱ndo̱ꞌo̱ ndo̱ꞌ,
te̱ nde̱e̱ kü̱vi̱ sa̱ndaꞌa xiinꞌ miiꞌ ndo̱ꞌ nuu̱ꞌ kuiꞌe̱ ja̱a̱nꞌ xiinꞌ ña̱ kuini̱ꞌ ndo̱ꞌ.
I̱i̱n xaa̱ ku̱i̱ti̱ꞌ ña̱ sanduxín xatyiꞌ ndoꞌó,
te̱ kü̱vi̱ sa̱ndaꞌa xiinꞌ miiꞌ ndo̱ꞌ nuu̱ꞌ kuiꞌe̱ ja̱a̱nꞌ.
I̱i̱n ña̱ i̱yo̱ va̱ i̱i̱n ki̱xi̱n ku̱i̱ti̱ꞌ ku̱ndo̱ꞌo̱ ndo̱ꞌ kii̱ꞌ köo̱ꞌ a̱ naá nimá ndo̱ꞌ.
12 ’Vi̱ti̱n nduuꞌ kivi̱ꞌ ña̱ va̱ꞌa̱ ti̱i̱n ndo̱ꞌ ña̱ kuini̱ꞌ ña̱ xiní ndo̱ꞌ,
sa̱kuuꞌ ña̱ kuini̱ꞌ ña̱ ni̱ sa̱kuaa̱n ndo̱ꞌ nde̱e̱ kii̱ꞌ nduuꞌ ndo̱ꞌ ne̱ sa̱va̱.
Tee̱ꞌ kueinꞌ sa̱ndaꞌa na a̱ ndoꞌó uun tee̱ꞌ kueinꞌ ta̱xi̱ na a̱ ndi̱e̱e̱ꞌ ndo̱ꞌ.
13 Xa̱ kuaꞌa̱ꞌ te̱ kaꞌán nde̱iꞌ kumiꞌ ndo̱ꞌ nde̱e̱ ni̱ xa̱vi ndo̱ꞌ xini so̱ꞌo̱ ndo̱ꞌ ña̱ kaꞌán ra̱ xiinꞌ ndo̱ꞌ.
Te̱ vi̱ti̱n ndii,
na̱ndu̱kuꞌ ndo̱ꞌ te̱ xiní xaꞌa̱ꞌ tiuu̱nꞌ xiinꞌ te̱ xini tuní xaꞌa̱ꞌ yoo̱ꞌ,
te̱ kaꞌa̱n ra̱ xiinꞌ ndo̱ꞌ yo̱o̱ nduuꞌ a̱ kuaxi̱ ku̱ndo̱ꞌo̱ ndo̱ꞌ.
14 Ko̱to̱ ndo̱ꞌ.
Te̱ ja̱a̱nꞌ ndii,
nduuꞌ ra̱ nde̱e̱ naa kuꞌu̱ i̱tyiꞌ,
te̱ ka̱ꞌmi̱ ndo̱o̱ ña̱ꞌaꞌ ñuꞌu̱,
te̱ nde̱e̱ i̱i̱n ra̱ käku̱ sa̱a̱ a̱,
ndöo̱ nde̱e̱ i̱i̱n ñuꞌu̱ ti̱kei̱ miiꞌ ku̱vi̱ ku̱ndi̱e̱e̱ ndo̱ꞌ ku̱tuni̱ꞌ ndo̱ꞌ.
15 Sa̱kuuꞌ ña̱ ja̱a̱nꞌ ku̱ndo̱ꞌo̱ te̱ kuini̱ꞌ,
te̱ ni̱ xa̱tyuunꞌ xaꞌa̱ꞌ ndo̱ꞌ kuaꞌa̱ꞌ va̱ kivi̱ꞌ.
Te̱ i̱ꞌi̱n ra̱ ki̱ꞌi̱n i̱tyiꞌ mi̱iꞌ ra̱ kuꞌu̱n ra̱ te̱ köo̱ꞌ ka̱ nde̱e̱ i̱i̱n te̱ sa̱kakú ndoꞌó nuu̱ꞌ tu̱ndoꞌo̱ꞌ ja̱a̱nꞌ”,
ni̱ katyi̱ a̱.