Yoꞌoꞌ kaꞌán a̱ xaꞌa̱ꞌ ndiosí saka ña̱ xakaꞌnuꞌ ne̱ ndieeꞌ nuu̱ꞌ ñu̱ꞌuꞌ Babilonia
46
Ndiosí ña̱ naniꞌ Bel ndii,
ni̱ taꞌnu̱ a̱,
te̱ ndiosí Nebo ndii,
ni̱ ndu̱va̱ a̱ ñu̱ꞌuꞌ.
Ña̱ nianiaꞌ ña̱ xakaꞌnuꞌ ne̱ ndieeꞌ nuu̱ꞌ ñu̱ꞌuꞌ Babilonia ndii,
xata̱ꞌ ki̱tiꞌ sakaaꞌ ni̱a̱ a̱ te̱ kuaꞌa̱n ni̱a̱ xiinꞌ a̱,
te̱ viee̱ xa̱va̱ꞌa̱ ña̱ ja̱a̱nꞌ ndisoꞌ riꞌ kuaꞌa̱n riꞌ ki̱tiꞌ,
tiꞌ xa̱ ni̱ xa̱vi va̱ ndisoꞌ a̱ kuaꞌa̱n riꞌ.
2 Ni̱ sa̱na̱kuaꞌa xiinꞌ miiꞌ sa̱kuuꞌ ña̱ nianiaꞌ ja̱a̱nꞌ,
te̱ i̱i̱n ni̱ nda̱ꞌaꞌ ni̱ ndu̱va̱ sa̱kuuꞌ a̱,
te̱ nï̱ sa̱kakú xiinꞌ miiꞌ a̱,
te̱ nï̱ ku̱vi̱ tu̱ sa̱kakú a̱ te̱ ndisoꞌ ña̱ꞌaꞌ,
sa̱kanꞌ na ni̱ xi̱kuꞌu̱n ndo̱o̱ a̱ xiinꞌ ra̱ nda̱ꞌaꞌ te̱ xíinꞌ te̱ kuaꞌa̱n ingaꞌ a̱ xiinꞌ ra̱ tu̱ku̱ ñu̱ꞌuꞌ.
3 “Ku̱ni̱ so̱ꞌo̱ sa̱kuuꞌ ndoꞌó,
ne̱ vi̱ꞌe̱ Jacob,
ne̱ i̱tyiꞌ ne̱ Israel,
ne̱ ni̱ ndoo̱ ndieeꞌ ñu̱u̱ Jerusalén.
Xitoꞌ i̱ ndoꞌó nde̱e̱ ña̱ kuuꞌ ni̱ tuvi̱ ndo̱ꞌ,
te̱ nde̱e̱ kii̱ꞌ ñuꞌuꞌ ndo̱ꞌ ti̱xi̱n si̱ꞌiꞌ ndo̱ꞌ te̱ xa̱ xitoꞌ i̱ ndoꞌó.
4 Te̱ ko̱to̱ i̱ ndoꞌó nde̱e̱ ku̱i̱xa̱ ndo̱ꞌ,
te̱ ko̱to̱ tu̱ i̱ ndoꞌó nde̱e̱ kii̱ꞌ ku̱ya̱a̱ i̱xiꞌ xíniꞌ ndo̱ꞌ.
Yuꞌu̱ ni̱ xa̱ꞌa̱ ndoꞌó,
te̱ yuꞌu̱ tu̱ ko̱to̱ ndoꞌó.
Yuꞌu̱ ta̱xi̱ ña̱ ku̱ti̱a̱ku̱ ndo̱ꞌ,
te̱ yuꞌu̱ tu̱ sa̱kakú ndoꞌó.
5 ’Köo̱ꞌ nde̱e̱ i̱i̱n ña̱ ku̱vi̱ na̱ka̱ta̱ ndo̱ꞌ xiinꞌ yuꞌu̱,
kü̱vi̱ na̱ka̱ta̱ ndo̱ꞌ yuꞌu̱ xiinꞌ nde̱e̱ i̱i̱n ña̱ꞌa̱,
te̱ i̱i̱n katyi ko̱o̱ ndu̱.
6 Yoo sa̱va̱ ne̱ yivi̱ꞌ ndii,
xasiki̱ꞌ saka ni̱a̱ oro xiinꞌ plata ni̱a̱ ña̱ ñuꞌuꞌ va̱ꞌa̱ xaaꞌ ni̱a̱,
te̱ ndukuꞌ ni̱a̱ i̱i̱n te̱ xatyuunꞌ xiinꞌ ka̱a̱ ja̱a̱nꞌ te̱ xaꞌa ra̱ i̱i̱n ndiosí ni̱a̱.
Ndi̱ꞌi̱ ja̱a̱nꞌ te̱ xikuitá xitiꞌ ni̱a̱ nuu̱ꞌ ndiosí ja̱a̱nꞌ,
te̱ xakaꞌnuꞌ ni̱a̱ a̱.
7 Tyindieeꞌ ni̱a̱ ndiosí ja̱a̱nꞌ soko̱ ni̱a̱ te̱ niꞌiꞌ ni̱a̱ ña̱ ja̱a̱nꞌ kuaꞌa̱n ni̱a̱,
te̱ kii̱ꞌ xaa̱ ni̱a̱ xiinꞌ a̱ miiꞌ ku̱i̱i̱n a̱ ndii,
xaniꞌ ni̱a̱ a̱ i̱kanꞌ,
te̱ xa̱ i̱kanꞌ ndoo̱ a̱ iinꞌ a̱,
te̱ kü̱vi̱ ka̱nda̱ a̱ xa̱tyiꞌ ka̱ a̱ miiꞌ iinꞌ a̱ ja̱a̱nꞌ.
Tee̱ꞌ ndee tiꞌeꞌ ndeꞌí ni̱a̱ kaꞌán ndaꞌvi ni̱a̱ xiinꞌ a̱ te̱ tyi̱ndi̱e̱eꞌ ña̱ꞌaꞌ a̱ ndii,
kü̱vi̱ na̱ku̱i̱i̱n a̱,
te̱ ni̱ nde̱e̱ kü̱vi̱ tu̱ sa̱kakú ña̱ꞌaꞌ a̱ nuu̱ꞌ ña̱ sa̱ndoꞌoꞌ ña̱ꞌaꞌ.
8 ’Ndoꞌó,
ne̱ xaaꞌ ku̱a̱tyi̱,
na̱ka̱ꞌanꞌ ndo̱ꞌ xaꞌa̱ꞌ ña̱ yo̱ꞌo̱ꞌ,
te̱ ku̱ka̱ꞌa̱n nuu̱ꞌ ndo̱ꞌ,
te̱ na̱tyi̱naá kaxiꞌ ndo̱ꞌ nimá ndo̱ꞌ.
9 Na̱ka̱ꞌanꞌ ndo̱ꞌ xaꞌa̱ꞌ tyu̱u̱n kaꞌnuꞌ ña̱ ni̱ xa̱a̱ i̱ xta̱ꞌanꞌ kivi̱ꞌ.
Sa̱kanꞌ ña̱ yuꞌu̱ ku̱i̱ti̱ꞌ nduuꞌ Ndiosí,
te̱ köo̱ꞌ ka̱ i̱nga̱ ndiosí,
te̱ ni̱ nde̱e̱ köo̱ꞌ tu̱ i̱nga̱ ña̱ nakuitá xiinꞌ yuꞌu̱.
10 Yuꞌu̱ kaꞌán a̱ma̱a̱ kuꞌu̱n ndi̱koꞌ i̱i̱n yivi̱ꞌ nde̱e̱ kii̱ꞌ ni̱ xi̱ka̱nduꞌu̱ꞌ a̱.
Kaꞌán tu̱ i̱ xaꞌa̱ꞌ sa̱kuuꞌ ña̱ ko̱o̱ nde̱e̱ kii̱ꞌ kuní kuaꞌa̱ꞌ va̱ ko̱o̱ a̱,
kaꞌán i̱ ndii:
Ña̱ tyituní i̱ ndii,
xinu̱ sa̱kuuꞌ a̱,
te̱ sa̱a̱ i̱ sa̱kuuꞌ ña̱ kuní i̱.
11 Nde̱e̱ miiꞌ ketaꞌ ñu̱ꞌu̱ ka̱na̱ i̱ i̱i̱n te̱ yivi̱ꞌ,
te̱ sa̱xinu̱ ña̱ kaꞌán tyuunꞌ i̱,
te̱ ku̱ndu̱u̱ ra̱ nde̱e̱ naa i̱i̱n sa̱a̱,
tiꞌ kuiꞌnaꞌ.
Xa̱ ni̱ kaꞌa̱n tuní i̱ xaꞌa̱ꞌ ña̱ ja̱a̱nꞌ,
te̱ sa̱xinu̱ i̱ sa̱kuuꞌ a̱,
xa̱ ni̱ ndoo̱ i̱ kuento sa̱a̱ i̱ ña̱ ja̱a̱nꞌ,
te̱ sa̱xinu̱ xna̱ꞌa̱ i̱ a̱.
12 Ku̱ni̱ so̱ꞌo̱ ndoꞌó,
ne̱ xi̱i̱ va̱ nimá ña̱ kaꞌán i̱,
ndoꞌó,
ne̱ köo̱ꞌ kivi̱ꞌ xanini sa̱tyuunꞌ nda̱ku.
13 Sa̱kanꞌ ña̱ xa̱ yoo tu̱ꞌva̱ i̱ te̱ sa̱kaꞌán i̱ nimá ndo̱ꞌ te̱ sa̱tyuunꞌ nda̱ku ndo̱ꞌ,
te̱ nä̱ꞌaꞌ ka̱ te̱ sa̱a̱ i̱ ña̱ ja̱a̱nꞌ.
Nda̱sa̱ xa̱aꞌ i̱ ñu̱u̱ Sión,
te̱ ka̱niiꞌ nuu̱ꞌ ñu̱ꞌuꞌ Israel ku̱ni̱ ne̱ yivi̱ꞌ ña̱ sakakú i̱ ne̱ Israel,
katyi i̱.