Yoꞌoꞌ kaꞌán a̱ xaꞌa̱ꞌ tyu̱u̱n ña̱ ni̱ ta̱xi̱ Ndiosí nda̱ꞌaꞌ rey Ciro sa̱a̱ ra̱
45
Ña̱ yo̱ꞌo̱ꞌ nduuꞌ ña̱ kaꞌán Yahvé xaꞌa̱ꞌ rey Ciro,
te̱ ni̱ na̱ka̱xi̱n a̱ te̱ tyi̱ndi̱e̱eꞌ ña̱ꞌaꞌ a̱ te̱ ka̱nandoo ra̱ kiꞌinꞌ ñu̱u̱ naꞌnuꞌ.
Te̱ tu̱ꞌu̱n ra̱ ña̱ ndi̱e̱e̱ꞌ sa̱kuuꞌ i̱nga̱ rey,
te̱ nu̱niaꞌ ra̱ yiꞌeꞌ nu̱u̱ rey ja̱a̱nꞌ,
te̱ nde̱e̱ i̱i̱n köo̱ꞌ ku̱vi̱ nda̱si̱ ka̱ nde̱e̱ i̱i̱n yiꞌeꞌ ja̱a̱nꞌ.
2 “Yuꞌu̱ ki̱ꞌi̱n i̱tyiꞌ nuu̱ꞌ u̱nꞌ te̱ nda̱sa̱ ndaa̱ i̱ i̱tyiꞌ nuu̱ꞌ u̱nꞌ miiꞌ kuꞌu̱n u̱nꞌ.
Ta̱ꞌviꞌ i̱ sa̱kuuꞌ vitu̱ꞌ yiꞌeꞌ ña̱ ni̱ ku̱a̱ꞌa̱ xiinꞌ ka̱a̱ bronce,
te̱ sa̱kuatyiꞌ ndo̱o̱ tu̱ i̱ sa̱kuuꞌ ka̱a̱ ña̱ taꞌnuꞌ ndi̱xi̱n yiꞌeꞌ ja̱a̱nꞌ.
3 Ta̱xi̱ tu̱ i̱ nda̱ꞌaꞌ u̱nꞌ sa̱kuuꞌ ña̱ ndiaa yaꞌviꞌ ña̱ ñuꞌuꞌ si̱ꞌe,
te̱ ta̱xi̱ tu̱ i̱ nda̱ꞌaꞌ u̱nꞌ sa̱kuuꞌ ña̱ vikaꞌ ña̱ ñuꞌuꞌ va̱ꞌa̱ miiꞌ kasi̱ꞌe va̱.
Sa̱kanꞌ te̱ ku̱nda̱ni̱ u̱nꞌ ña̱ yuꞌu̱ nduuꞌ Yahvé Ndiosí,
ña̱ xakaꞌnuꞌ ne̱ vi̱ꞌe̱ Israel,
te̱ kaꞌán i̱ xiinꞌ u̱nꞌ xiinꞌ kivi̱ꞌ u̱nꞌ.
4 Xaꞌa̱ꞌ a̱ ña̱ ndani̱ va̱ i̱ Jacob,
te̱ xikaꞌ nuuꞌ nuu̱ꞌ i̱,
xiinꞌ xaꞌa̱ꞌ a̱ ña̱ ndani̱ va̱ i̱ ne̱ vi̱ꞌe̱ Israel,
ne̱ ni̱ na̱ka̱xi̱n i̱ ku̱ndu̱u̱ kuenta i̱,
sa̱kanꞌ na ni̱ ka̱na̱ i̱ yoꞌó xiinꞌ kivi̱ꞌ u̱nꞌ,
te̱ ni̱ ta̱xi̱ tu̱ i̱ ña̱ nduuꞌ u̱nꞌ i̱i̱n rey,
te̱ kaꞌnuꞌ va̱,
tee̱ꞌ ndee xïní u̱nꞌ yuꞌu̱.
5 Yuꞌu̱ ku̱i̱ti̱ꞌ nduuꞌ Yahvé,
te̱ köo̱ꞌ ka̱ i̱nga̱ ka̱ ndiosí nde̱e̱ naa yuꞌu̱,
te̱ köo̱ꞌ xa̱tyiꞌ ka̱ Ndiosí nde̱e̱ miiꞌ ka̱ i̱i̱n yivi̱ꞌ.
Yuꞌu̱ ta̱xi̱ ndi̱e̱e̱ꞌ u̱nꞌ kii̱ꞌ kuꞌu̱n ñuꞌu̱ tee̱ꞌ ndee xïní u̱nꞌ yuꞌu̱.
6 Sa̱kanꞌ te̱ ku̱nda̱ni̱ sa̱kuuꞌ ne̱ ndieeꞌ nde̱e̱ miiꞌ ku̱a̱xi̱ ke̱ta̱ ñu̱ꞌu̱ xiinꞌ sa̱kuuꞌ ne̱ ndieeꞌ nde̱e̱ miiꞌ ketá a̱ ña̱ köo̱ꞌ nde̱e̱ i̱i̱n Ndiosí nde̱e̱ naa yuꞌu̱ miiꞌ ka̱ i̱i̱n yivi̱ꞌ.
I̱i̱n nda̱a̱ꞌ yuꞌu̱ ku̱i̱ti̱ꞌ nduuꞌ Yahvé,
te̱ köo̱ꞌ ka̱ xa̱tyiꞌ ka̱ ndiosí nde̱e̱ naa yuꞌu̱.
7 Yuꞌu̱ nduuꞌ ña̱ xaꞌa ñuꞌu̱,
te̱ su̱vi̱ tu̱ i̱ xaꞌa ña̱ yoo i̱i̱n ni̱a̱a̱ꞌ.
Yuꞌu̱ nduuꞌ ña̱ xaaꞌ sa̱kanꞌ te̱ yoo ña̱ mani̱ꞌ,
te̱ su̱vi̱ tu̱ i̱ xaaꞌ sa̱kanꞌ te̱ yoo tu̱ndoꞌo̱ꞌ i̱i̱n yivi̱ꞌ.
Yuꞌu̱,
Yahvé,
nduuꞌ ña̱ xaaꞌ sa̱kuuꞌ ña̱ ja̱a̱nꞌ.
8 ’Mi̱iꞌ yuꞌu̱ ti̱ꞌviꞌ ña̱ xatyuunꞌ nda̱ku nde̱e̱ ndi̱viꞌ nde̱e̱ naa xaaꞌ a̱ kii̱ꞌ nduuꞌ viko̱ꞌ nuu̱ꞌ ndi̱viꞌ,
te̱ kuunꞌ savi̱ꞌ.
Te̱ yoꞌó ñu̱ꞌuꞌ,
nuni̱a̱ꞌ u̱nꞌ te̱ naku̱n ña̱ sakakú xiinꞌ ña̱ xatyuunꞌ nda̱ku.
Te̱ na ki̱e̱e̱ ingaꞌ uvi̱ sa̱aꞌ ña̱ ja̱a̱nꞌ.
Mi̱iꞌ yuꞌu̱ Yahvé nduuꞌ ña̱ ni̱ xa̱ꞌa̱ sa̱kuuꞌ ña̱ ja̱a̱nꞌ.
9 Ndaꞌvi va̱ ku̱ndo̱ꞌo̱ ne̱ yivi̱ꞌ,
ne̱ kuntaꞌanꞌ xiinꞌ Ndiosí,
ña̱ ni̱ xa̱ꞌa̱ ña̱ꞌaꞌ,
sa̱kanꞌ ña̱ i̱i̱n ki̱si̱ ña̱ ni̱ ku̱a̱ꞌa̱ xiinꞌ ñu̱ꞌuꞌ kixinꞌ ndii,
kuäsa̱ꞌ kuntaꞌanꞌ ña̱ ja̱a̱nꞌ xiinꞌ te̱ ni̱ xa̱ꞌa̱ ña̱ꞌaꞌ.
Xiní e̱ꞌ ña̱ köo̱ꞌ kivi̱ꞌ kaꞌán ñu̱ꞌuꞌ kixinꞌ xiinꞌ te̱ xatyuunꞌ xiinꞌ a̱ ndii:
Vä̱ꞌa̱ xa̱tyiꞌ yoo i̱ xaaꞌ u̱nꞌ,
katyi a̱.
’Te̱ köo̱ꞌ kivi̱ꞌ kaꞌán ki̱si̱ xiinꞌ te̱ xaꞌa ña̱ꞌaꞌ ndii:
Köo̱ꞌ tyuunꞌ xa̱tyiꞌ yoꞌó xiinꞌ tyu̱u̱n ña̱ xaaꞌ u̱nꞌ,
katyi a̱.
10 Te̱ köo̱ꞌ tu̱ nde̱e̱ i̱i̱n ña̱ kuañuꞌu̱ na̱a̱ꞌ kaꞌán xiinꞌ yu̱vaꞌ a̱ ndii:
¿Ndiotyun na ni̱ xa̱ꞌa̱ u̱nꞌ yuꞌu̱?,
katyi a̱.
Uun kaꞌa̱n a̱ xiinꞌ si̱ꞌiꞌ a̱ ndii:
¿Ndiotyun na ni̱ sa̱kakuꞌ u̱nꞌ yuꞌu̱?,
katyi a̱.”
11 Ña̱ yoꞌoꞌ kaꞌán Yahvé,
Ndiosí su̱ꞌu̱n ña̱ xakaꞌnuꞌ ne̱ vi̱ꞌe̱ e̱ Israel,
ña̱ ni̱ xa̱ꞌa̱ ña̱ꞌaꞌ,
kaꞌán a̱ ndii:
“¿Ñáá tuu ndoꞌó ña̱ vä̱ꞌa̱ ni̱ xaaꞌ i̱ xaꞌa̱ꞌ siꞌe̱ i̱?
Uun,
¿ñáá kuní ndo̱ꞌ kaꞌa̱n tyuunꞌ ndo̱ꞌ xiinꞌ i̱ xaꞌa̱ꞌ ña̱ xaaꞌ i̱?
12 Yuꞌu̱ ni̱ xa̱ꞌa̱ ñu̱ꞌuꞌ i̱i̱n yivi̱ꞌ,
te̱ ni̱ xa̱ꞌa̱ tu̱ i̱ ne̱ yivi̱ꞌ,
ne̱ ndieeꞌ nuu̱ꞌ a̱.
Xiinꞌ nda̱ꞌaꞌ i̱ ni̱ xa̱ꞌa̱ i̱ ka̱niiꞌ ndi̱viꞌ,
te̱ kaꞌán tyuunꞌ i̱ xiinꞌ sa̱kuuꞌ tiuu̱nꞌ tiꞌ ndieeꞌ nuu̱ꞌ a̱.
13 Mi̱iꞌ yuꞌu̱ ni̱ xa̱a̱ sa̱kanꞌ te̱ ni̱ tuvi̱ Ciro te̱ ke̱ta̱ va̱ꞌa̱ ra̱,
te̱ tyi̱ndi̱e̱eꞌ ña̱ꞌaꞌ i̱ nuu̱ꞌ sa̱kuuꞌ tyu̱u̱n ña̱ sa̱a̱ ra̱.
Te̱ ja̱a̱nꞌ na̱ka̱sa̱ꞌa̱ xa̱aꞌ ñu̱u̱ i̱ Jerusalén,
te̱ sa̱ndoó ndiká ra̱ sa̱kuuꞌ ne̱ ni̱ xi̱kuꞌu̱n xikaꞌ nuuꞌ so̱ꞌo̱,
te̱ käka̱n ra̱ xu̱ꞌunꞌ nuu̱ꞌ ni̱a̱ ni̱ nde̱e̱ tu̱mani̱ꞌ xaꞌa̱ꞌ ña̱ ja̱a̱nꞌ.”
Sa̱kuuꞌ ña̱ kaa̱ꞌ ni̱ kaꞌa̱n Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ.
14 Ña̱ yo̱ꞌo̱ꞌ kaꞌán Yahvé xiinꞌ e̱ꞌ,
ne̱ vi̱ꞌe̱ Israel:
“Sa̱kuuꞌ ña̱ vikaꞌ ne̱ ndieeꞌ nuu̱ꞌ ñu̱ꞌuꞌ Egipto,
xiinꞌ sa̱kuuꞌ ña̱ vikaꞌ ña̱ ni̱ ka̱nandoo ne̱ ndieeꞌ nuu̱ꞌ ñu̱ꞌuꞌ Etiopía,
xiinꞌ sa̱kuuꞌ ña̱ vikaꞌ ña̱ ni̱ ka̱nandoo ne̱ ndieeꞌ nuu̱ꞌ ñu̱ꞌuꞌ Sabá,
ne̱ sukun va̱ ndii,
nda̱ꞌaꞌ ndoꞌó ndoo̱ a̱,
te̱ ndoꞌó tu̱ ka̱ꞌndi̱a̱ tyuunꞌ nuu̱ꞌ sa̱kuuꞌ ne̱ ja̱a̱nꞌ.
Te̱ ku̱ndiku̱n ni̱a̱ ndoꞌó kuꞌu̱n ni̱a̱ nde̱e̱ naa ne̱ ni̱ xi̱kuꞌu̱n nda̱ꞌaꞌ te̱ xíinꞌ,
te̱ ku̱i̱ta̱ xitiꞌ ni̱a̱ nuu̱ꞌ ndo̱ꞌ ña̱ kiꞌinꞌ kaꞌnuꞌ ni̱a̱ ndoꞌó,
te̱ kaꞌa̱n ni̱a̱ xiinꞌ ndo̱ꞌ ndii:
Ndiosí yoo xiinꞌ ndoꞌó,
te̱ köo̱ꞌ ka̱ i̱nga̱ ndiosí,
ña̱ kooꞌ tyukuuꞌ ka̱ nde̱e̱ naa ña̱ ja̱a̱nꞌ,
katyi̱ ni̱a̱”,
katyi̱ Ndiosí.
15 Ña̱ ndi̱xa̱ xna̱ꞌa̱ nduuꞌ a̱ ndii,
Ndiosí,
ña̱ kü̱vi̱ ku̱ni̱ ndu̱ xiinꞌ ndu̱tyiꞌ nuu̱ꞌ ndu̱ nduuꞌ yoꞌó,
te̱ yoꞌó nduuꞌ Ndiosí,
ña̱ sa̱kakú nduꞌu̱,
ne̱ vi̱ꞌe̱ Israel.
16 Te̱ sa̱kuuꞌ ne̱ xaꞌa nda̱ꞌaꞌ ndiosí,
ña̱ nianiaꞌ ndii,
ku̱ka̱ꞌa̱n xa̱va̱ꞌa̱ nuu̱ꞌ ni̱a̱,
te̱ sa̱ndi̱e̱e̱ kuiꞌe tu̱ ña̱ꞌaꞌ ne̱ yivi̱ꞌ.
Te̱ i̱i̱n ni̱ nda̱ꞌaꞌ ku̱ndo̱ꞌo̱ sa̱kuuꞌ ne̱ xaꞌa ña̱ nianiaꞌ ja̱a̱nꞌ.
17 Ndisu̱ mi̱iꞌ Yahvé sa̱kakú yooꞌ,
ne̱ vi̱ꞌe̱ Israel,
ne̱ nduuꞌ kuenta a̱,
te̱ sa̱kakú a̱ yooꞌ nde̱e̱ ndiꞌiꞌ ni̱ kivi̱ꞌ,
te̱ köo̱ꞌ kivi̱ꞌ ka̱ ku̱ka̱ꞌa̱n nuu̱ꞌ e̱ꞌ,
ni̱ nde̱e̱ sä̱ndi̱e̱e̱ kuiꞌe ka̱ tu̱ ne̱ yivi̱ꞌ yooꞌ.
18 Sa̱kanꞌ ña̱ ña̱ yo̱ꞌo̱ꞌ kaꞌán Yahvé,
Ndiosí ña̱ ni̱ xa̱ꞌa̱ ndi̱viꞌ.
Ña̱ ni̱ xa̱ꞌa̱ ñu̱ꞌuꞌ i̱i̱n yivi̱ꞌ,
ña̱ ja̱a̱nꞌ nduu Ndiosí.
Te̱ ña̱ ja̱a̱nꞌ ni̱ xa̱ꞌa̱ ña̱ꞌaꞌ,
te̱ ni̱ tyi̱ka̱nduꞌu̱ꞌ ña̱ꞌaꞌ a̱ ku̱ndi̱e̱e̱ yooꞌ ne̱ yivi̱ꞌ,
süu̱ꞌ ni̱ xa̱ꞌa̱ saka ña̱ꞌaꞌ a̱.
Süu̱ꞌ ja̱a̱nꞌ ndii,
ni̱ xa̱ꞌa̱ ña̱ꞌaꞌ a̱ te̱ ku̱ndi̱e̱e̱ yooꞌ ne̱ yivi̱ꞌ nuu̱ꞌ a̱.
Te̱ kaꞌán ka̱ Ndiosí ndii:
“Yuꞌu̱ nduuꞌ Yahvé,
te̱ köo̱ꞌ i̱nga̱ ka̱ ndiosí.
19 Nï̱ kaꞌa̱n si̱ꞌe i̱ i̱i̱n xaanꞌ miiꞌ i̱i̱n yaví nuu̱ꞌ ñu̱ꞌuꞌ i̱i̱n yivi̱ꞌ,
köo̱ꞌ kivi̱ꞌ ni̱ kaꞌa̱n i̱ xiinꞌ ne̱ si̱a̱niꞌ xikaꞌ Jacob ña̱ nandukuꞌ saka ni̱a̱ yuꞌu̱.
Sa̱kanꞌ ña̱ yuꞌu̱ nduuꞌ Yahvé,
ña̱ kaꞌán ña̱ ndi̱xa̱,
te̱ kaꞌán nda̱ku tu̱ i̱.
Yoꞌoꞌ kaꞌán a̱ xaꞌa̱ꞌ Yahvé xiinꞌ xaꞌa̱ꞌ ndiosí saka ña̱ xakaꞌnuꞌ ne̱ ndieeꞌ nuu̱ ñu̱ꞌuꞌ Babilonia
20 ’Na̱kaya̱ sa̱kuuꞌ ndo̱ꞌ,
te̱ ki̱xi̱n ndo̱ꞌ nuu̱ꞌ i̱.
Sa̱kuuꞌ ndoꞌó,
ne̱ ni̱ kaku̱ nda̱ꞌaꞌ te̱ xíinꞌ,
ne̱ ni̱ ki̱e̱e̱ sa̱kuuꞌ xaanꞌ nuu̱ꞌ ñu̱ꞌuꞌ i̱i̱n yivi̱ꞌ.
Küuꞌ kaxiꞌ xa̱tyiꞌ ne̱ yivi̱ꞌ,
ne̱ kieeꞌ ndu̱u̱ xiinꞌ ndiosí i̱tunꞌ ña̱ xaꞌa ni̱a̱ xiinꞌ nda̱ꞌaꞌ mi̱iꞌ ni̱a̱,
te̱ sa̱kanꞌ tu̱ ne̱ kaꞌán si̱u̱ꞌunꞌ xiinꞌ ndiosí saka ña̱ kü̱vi̱ sa̱kakú ña̱ꞌaꞌ.
21 Kaꞌa̱n ndo̱ꞌ,
te̱ niaꞌa̱ tu̱ ndo̱ꞌ xiinꞌ ña̱ ku̱vi̱ ku̱ni̱ e̱ꞌ sa̱a̱ ni̱ xkaꞌndi̱a̱ a̱.
Te̱ ko̱ꞌni̱ sa̱kuuꞌ ndo̱ꞌ te̱ nda̱tuꞌu̱nꞌ taꞌanꞌ ndo̱ꞌ xaꞌa̱ꞌ ña̱ ja̱a̱nꞌ.
Xïní ndo̱ꞌ yo̱o̱ ni̱ kaꞌa̱n xaꞌa̱ꞌ ña̱ ja̱a̱nꞌ nde̱e̱ ña̱ nu̱uꞌ kii̱ꞌ ni̱ xi̱ka̱nduꞌu̱ꞌ i̱i̱n yivi̱ꞌ,
te̱ ni̱ nde̱e̱ xïní tu̱ ndo̱ꞌ yo̱o̱ ni̱ kaꞌa̱n ndo̱so̱ꞌ xaꞌa̱ꞌ ña̱ ko̱o̱ ña̱ ja̱a̱nꞌ nde̱e̱ xta̱ꞌanꞌ kivi̱ꞌ.
¿Ñáá xïní ndo̱ꞌ ña̱ yuꞌu̱,
Yahvé,
ni̱ xa̱a̱ ña̱ ja̱a̱nꞌ?
Te̱ köo̱ꞌ ka̱ nde̱e̱ i̱i̱n Ndiosí nde̱e̱ naa yuꞌu̱,
nde̱e̱ miiꞌ ka̱ i̱i̱n yivi̱ꞌ,
nde̱e̱ miiꞌ ka̱ nuu̱ꞌ ñu̱ꞌuꞌ i̱i̱n yivi̱ꞌ ndii.
Köo̱ꞌ ka̱ i̱nga̱ Ndiosí ña̱ kooꞌ tyukuuꞌ ni̱ nde̱e̱ ña̱ sakakú nde̱e̱ naa yuꞌu̱.
22 ’Sa̱kanꞌ na kuiiꞌ nuu̱ꞌ yuꞌu̱ ki̱xi̱n sa̱kuuꞌ ndoꞌó,
ne̱ ndieeꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ,
te̱ sa̱kakú i̱ ndoꞌó.
Sa̱kanꞌ ña̱ i̱i̱n nda̱a̱ꞌ yuꞌu̱ ku̱i̱ti̱ꞌ nduuꞌ Ndiosí,
te̱ köo̱ꞌ ka̱ nde̱e̱ i̱i̱n nda̱a̱ꞌ Ndiosí nde̱e̱ naa yuꞌu̱.
23 Ni̱ ta̱xi̱ i̱ kuento i̱ tiinꞌ ndiaa xiinꞌ miiꞌ mi̱iꞌ i̱,
te̱ xiinꞌ yu̱ꞌuꞌ mi̱iꞌ ni̱ kaꞌa̱n nda̱ku i̱,
te̱ sa̱xinu̱ i̱ kuento i̱ ña̱ ni̱ ta̱xi̱ ja̱a̱nꞌ ña̱ nuu̱ꞌ yuꞌu̱ ku̱i̱ta̱ xitiꞌ sa̱kuuꞌ ne̱ yivi̱ꞌ,
te̱ nuu̱ꞌ yuꞌu̱ tu̱ ta̱xi̱ sa̱kuuꞌ ni̱a̱ kuento ña̱ sa̱xinu̱ ni̱a̱ ña̱ kaꞌán tyuunꞌ i̱.
24 Te̱ ña̱ yo̱ꞌo̱ꞌ kaꞌa̱n ni̱a̱ xaꞌa̱ꞌ i̱:
Ña̱ ndi̱xa̱ nduuꞌ a̱ ndii,
i̱i̱n nda̱a̱ꞌ Yahvé ku̱i̱ti̱ꞌ nduuꞌ ña̱ xatyuunꞌ nda̱ku,
te̱ ña̱ ja̱a̱nꞌ ku̱i̱ti̱ꞌ tu̱ nduuꞌ ña̱ kumiꞌ ña̱ ndi̱e̱eꞌ,
katyi̱ ni̱a̱”,
katyi a̱.