Yoꞌoꞌ kaꞌán a̱ ña̱ i̱i̱n nda̱a̱ꞌ Yahvé ku̱i̱ti̱ꞌ nduuꞌ Ndiosí
44
’Ndoꞌó,
ne̱ Israel,
ne̱ si̱a̱niꞌ xikaꞌ Jacob,
ne̱ ni̱ na̱ka̱xi̱n i̱ xikaꞌ nuuꞌ nuu̱ꞌ i̱.
2 Ña̱ yo̱ꞌo̱ꞌ nduuꞌ ña̱ kaꞌán yuꞌu̱,
Yahvé,
xiinꞌ ndo̱ꞌ vi̱ti̱n.
Yuꞌu̱ nduuꞌ ña̱ ni̱ xa̱ꞌa̱ ndoꞌó nde̱e̱ ña̱ kuní ka̱ tuvi̱ ndo̱ꞌ i̱i̱n yivi̱ꞌ,
te̱ tyindieeꞌ tu̱ i̱ ndoꞌó.
Sa̱kanꞌ na kuiiꞌ kuäa̱n yiꞌvi ndoꞌó,
ne̱ vi̱ꞌe̱ Israel,
ne̱ si̱a̱niꞌ xikaꞌ Jacob,
ne̱ xikaꞌ nuuꞌ nuu̱ꞌ i̱,
ne̱ ndani̱ va̱ i̱,
ne̱ ni̱ na̱ka̱xi̱n i̱.
3 Sa̱kanꞌ ña̱ sa̱kuunꞌ i̱ savi̱ꞌ te̱ koso̱ i̱ miiꞌ i̱tyi kaaꞌ te̱ ko̱o̱ ti̱kui ko̱ꞌo̱ ndo̱ꞌ.
Sko̱ꞌniꞌ Espíritu i̱ nimá si̱a̱niꞌ xikaꞌ ndo̱ꞌ,
te̱ sa̱ñuꞌuꞌ i̱ sa̱kuuꞌ siꞌe̱ ndo̱ꞌ.
4 Te̱ ku̱a̱ꞌnu̱ ni̱a̱ nde̱e̱ naa kuꞌu̱ ña̱ va̱ꞌa̱ va̱ kuunꞌ savi̱ꞌ xaꞌa̱ꞌ uun nde̱e̱ naa tunꞌ i̱ñu̱ꞌ yivi̱ꞌ,
tunꞌ itaꞌ yu̱ꞌuꞌ i̱ti̱a̱.
5 Sa̱va̱ ni̱a̱ kaꞌa̱n ndii:
Kuenta Yahvé nduuꞌ i̱,
katyi̱ ni̱a̱.
’Te̱ i̱nga̱ ni̱a̱ kaꞌa̱n ndii:
Si̱a̱niꞌ xikaꞌ Jacob nduuꞌ i̱,
katyi̱ ni̱a̱.
’Te̱ i̱nga̱ ka̱ ni̱a̱ ke̱ꞌi̱ kivi̱ꞌ yuꞌu̱ xata̱ꞌ nda̱ꞌaꞌ ni̱a̱ ndii:
Kuenta Yahvé nduuꞌ i̱,
katyi̱ ni̱a̱.
Te̱ na̱tyi̱nduꞌu̱ꞌ tu̱ ni̱a̱ kivi̱ꞌ ne̱ vi̱ꞌe̱ Israel xiinꞌ kivi̱ꞌ ni̱a̱”,
katyi a̱.
6 Ña̱ yo̱ꞌo̱ꞌ kaꞌán Yahvé,
ña̱ xaꞌndia tyuunꞌ nuu̱ꞌ sa̱kuuꞌ te̱ xíinꞌ ndieeꞌ ndi̱viꞌ,
ña̱ nduuꞌ rey nuu̱ꞌ ne̱ vi̱ꞌe̱ e̱ꞌ Israel,
ña̱ ni̱ sa̱kakú ña̱ꞌaꞌ:
“Yuꞌu̱ nduuꞌ ña̱ nu̱uꞌ,
te̱ su̱vi̱ tu̱ i̱ nduuꞌ ña̱ soꞌo̱ꞌ ndiꞌiꞌ,
te̱ nde̱e̱ i̱i̱n ndiosí köo̱ꞌ ka̱,
süu̱ꞌ ja̱a̱nꞌ ndii,
i̱i̱n nda̱a̱ꞌ yuꞌu̱ ku̱i̱ti̱ꞌ nduuꞌ Ndiosí.
7 Köo̱ꞌ nde̱e̱ i̱i̱n ne̱ yivi̱ꞌ,
ne̱ ku̱vi̱ nakuitá xiinꞌ yuꞌu̱.
Naaꞌ yoo ni̱a̱ ndii,
na ki̱xi̱n ni̱a̱ te̱ kaꞌa̱n tiakú ni̱a̱ ña̱ ko̱o̱ nuu̱ꞌ kuꞌu̱n e̱ꞌ,
na kaꞌa̱n tiakú ni̱a̱ xaꞌa̱ꞌ a̱,
te̱ na kaꞌa̱n yuku̱n ni̱a̱ sa̱kuuꞌ a̱ nuu̱ꞌ i̱ nde̱e̱ naa xaaꞌ yuꞌu̱ nuu̱ꞌ ndoꞌó nde̱e̱ kii̱ꞌ ni̱ tyi̱ndi̱e̱e̱ i̱ ne̱ yivi̱ꞌ xta̱ꞌanꞌ nuu̱ꞌ ñu̱ꞌuꞌ i̱i̱n yivi̱ꞌ.
Na kaꞌa̱n ni̱a̱ xiinꞌ ndo̱ꞌ xaꞌa̱ꞌ ña̱ ko̱o̱ nuu̱ꞌ kuꞌu̱n e̱ꞌ xiinꞌ xaꞌa̱ꞌ ña̱ nä̱ꞌaꞌ ka̱ te̱ xkaꞌndi̱a̱.
8 Kuäa̱n yiꞌvi ndo̱ꞌ ni̱ nde̱e̱ kä̱ka̱ tu̱ nimá ndo̱ꞌ.
Xiní ndo̱ꞌ ña̱ xa̱ ni̱ kaꞌa̱n ndo̱so̱ꞌ i̱,
te̱ xa̱ ni̱ kaꞌa̱n tiakú tu̱ i̱ xaꞌa̱ꞌ a̱ nuu̱ꞌ ndo̱ꞌ nde̱e̱ xta̱ꞌanꞌ i̱i̱n yivi̱ꞌ.
Te̱ ndoꞌó nduuꞌ ne̱ ni̱ xi̱ni̱ ndu̱tyiꞌ nuu̱ꞌ sa̱kuuꞌ ña̱ ni̱ xa̱a̱ i̱ kii̱ꞌ sa̱kanꞌ.
Xiní ndo̱ꞌ ña̱ köo̱ꞌ i̱nga̱ ndiosí,
süu̱ꞌ ja̱a̱nꞌ ndii i̱i̱n nda̱a̱ꞌ yuꞌu̱ ku̱i̱ti̱ꞌ nduuꞌ Ndiosí.
Köo̱ꞌ tu̱ nde̱e̱ i̱i̱n ndiosí ña̱ ndi̱e̱eꞌ kooꞌ tyukuuꞌ nde̱e̱ naa yuꞌu̱,
sa̱kanꞌ ña̱ xïní yuꞌu̱ nde̱e̱ i̱i̱n a̱”,
katyi a̱.
Yoꞌoꞌ kaꞌán a̱ xaꞌa̱ꞌ ña̱ küuꞌ kaxiꞌ ne̱ xaꞌa nda̱ꞌaꞌ ndiosí, ña̱ xakaꞌnuꞌ ni̱a̱
9 Ne̱ xaꞌa nda̱ꞌaꞌ ndiosí ndii,
kuäsa̱ꞌ kuní xa̱tyiꞌ ni̱a̱,
te̱ tee̱ꞌ ndee ndiaa yaꞌviꞌ xa̱va̱ꞌa̱ ña̱ xaꞌa nda̱ꞌaꞌ ni̱a̱ ja̱a̱nꞌ nuu̱ꞌ mi̱iꞌ ni̱a̱ ndii,
kuäsa̱ꞌ kuní xa̱tyiꞌ a̱.
Te̱ ne̱ xakaꞌnuꞌ ña̱ ja̱a̱nꞌ ndii,
nduuꞌ ni̱a̱ nde̱e̱ naa ne̱ kuiꞌe ndu̱tyiꞌ nuu̱ꞌ,
te̱ ne̱ küuꞌ kaxiꞌ tu̱ nduuꞌ ni̱a̱,
sa̱kanꞌ na kuiiꞌ ndoo̱ kuiꞌe ni̱a̱ xaꞌa̱ꞌ ña̱ ja̱a̱nꞌ xaꞌa̱ꞌ a̱ ña̱ tüviꞌ nuu̱ꞌ a̱ te̱ kü̱vi̱ tu̱ kaꞌa̱n a̱.
10 Ne̱ xaꞌa nda̱ꞌaꞌ i̱i̱n ña̱ nianiaꞌ te̱ sa̱kaꞌnuꞌ ni̱a̱ nde̱e̱ naa ndiosí ni̱a̱ ndii,
tyïndieeꞌ xa̱tyiꞌ ña̱ꞌaꞌ ña̱ ja̱a̱nꞌ.
11 Te̱ sa̱kuuꞌ ne̱ xakaꞌnuꞌ ña̱ ja̱a̱nꞌ xiinꞌ ne̱ xaꞌa ña̱ ja̱a̱nꞌ ndii,
ku̱ka̱ꞌa̱n nuu̱ꞌ ni̱a̱,
sa̱kanꞌ ña̱ ne̱ yivi̱ꞌ ku̱i̱ti̱ꞌ nduuꞌ ni̱a̱.
Na na̱kaya̱ sa̱kuuꞌ ne̱ ja̱a̱nꞌ te̱ ki̱xi̱n ni̱a̱ nuu̱ꞌ i̱ ndii,
na̱nda̱ni̱ xa̱va̱ꞌa̱ ni̱a̱,
te̱ ku̱ka̱ꞌa̱n xa̱va̱ꞌa̱ tu̱ nuu̱ꞌ i̱ꞌi̱n ni̱a̱.
12 Te̱ tuxiꞌ ka̱a̱ ndii,
xaꞌndia ra̱ ka̱a̱ te̱ tiinꞌ ra̱ xinda̱ꞌ te̱ koꞌniꞌ ra̱ ka̱a̱ ja̱a̱nꞌ nuu̱ꞌ ñuꞌu̱,
ndiꞌiꞌ ja̱a̱nꞌ te̱ xtáꞌniꞌ ra̱ a̱ tuxiꞌ ra̱ a̱ xiinꞌ ka̱a̱ viee̱ xiinꞌ nda̱ꞌaꞌ ra̱.
Te̱ kii̱ꞌ ndiꞌiꞌ xaaꞌ ra̱ tyu̱u̱n ja̱a̱nꞌ ndii,
xiꞌí va̱ ra̱ so̱ko̱,
ndiꞌiꞌ ndooꞌ tu̱ ndi̱e̱e̱ꞌ ra̱.
Te̱ naaꞌ köo̱ꞌ ti̱kui xiꞌiꞌ ra̱ ndii,
kuni̱a̱a̱ꞌ xa̱tyiꞌ ra̱.
13 Te̱ tuxiꞌ i̱tunꞌ ndii,
kiꞌinꞌ ku̱ꞌva̱ ra̱ i̱tunꞌ,
te̱ keꞌi ra̱ nu̱ꞌ xiinꞌ i̱i̱n lapi kuaꞌa,
te̱ yákun ra̱ i̱tunꞌ ja̱a̱nꞌ xiinꞌ ka̱a̱ xíinꞌ nuu̱ꞌ,
te̱ xaꞌa ra̱ i̱i̱n ña̱ nianiaꞌ xiinꞌ nu̱ꞌ,
te̱ nda̱tu̱nꞌ ña̱ nianiaꞌ ja̱a̱nꞌ nde̱e̱ naa kaaꞌ i̱i̱n te̱ yivi̱ꞌ,
te̱ nda̱tu̱nꞌ va̱,
te̱ xaniꞌ ra̱ a̱ ti̱xi̱n i̱i̱n yu̱kunꞌ.
14 Te̱ kii̱ꞌ xaꞌa ra̱ ña̱ nianiaꞌ ja̱a̱nꞌ ndii,
ni̱ xa̱ꞌndi̱a̱ ra̱ tunꞌ naniꞌ cedro,
uun tunꞌ naniꞌ ciprés,
uun ta̱ntaꞌ tunꞌ xaꞌnuꞌ te̱i̱n i̱tunꞌ tunꞌ itaꞌ xaꞌa̱ꞌ kuꞌu̱ xi̱xa̱.
Tyiꞌiꞌ ra̱ tu̱nxaꞌ te̱ sakuaꞌnuꞌ ña̱ꞌaꞌ savi̱ꞌ kii̱ꞌ kuunꞌ a̱.
15 Te̱ tunꞌ ja̱a̱nꞌ xaꞌndia te̱ yivi̱ꞌ xaꞌmiꞌ ra̱ kii̱ꞌ ku̱i̱xa̱ nu̱ꞌ,
te̱ xiinꞌ tunꞌ ja̱a̱nꞌ tu̱ xituni̱ꞌ ra̱,
te̱ xiinꞌ tunꞌ ja̱a̱nꞌ naꞌmiꞌ ra̱ ñuꞌu̱ te̱ taviꞌ ra̱ xita̱ꞌ va̱ꞌa̱.
Te̱ xiinꞌ tunꞌ ja̱a̱nꞌ tu̱ xaꞌa ra̱ i̱i̱n ndiosí,
te̱ xakaꞌnuꞌ ra̱ a̱.
Xiinꞌ tunꞌ ja̱a̱nꞌ xaꞌa ra̱ i̱i̱n ña̱ nianiaꞌ te̱ xikuiín xitiꞌ ra̱ nuu̱ꞌ ña̱ ja̱a̱nꞌ te̱ xakaꞌnuꞌ ña̱ꞌaꞌ ra̱.
16 Taꞌvíꞌ sa̱va̱ i̱tunꞌ ja̱a̱nꞌ xaꞌmiꞌ ra̱ te̱ taviꞌ ra̱ nde̱i̱ꞌ xixiꞌ ra̱ nde̱e̱ ndaꞌni ra̱.
Ndi̱ꞌi̱ ja̱a̱nꞌ te̱ xituni̱ꞌ tu̱ ra̱ xiinꞌ tunꞌ ja̱a̱nꞌ te̱ kaꞌán ra̱ ndii:
“Va̱ꞌa̱ va̱ kuni i̱ xituni̱ꞌ xiinꞌ ñuꞌu̱ yoꞌoꞌ xa̱ ni̱ na̱saa̱ꞌ i̱”,
katyi ra̱.
17 Te̱ xiinꞌ tunꞌ ndoó ndo̱so̱ꞌ nda̱ꞌaꞌ ra̱ xaꞌa ra̱ i̱i̱n ndiosí,
i̱i̱n ña̱ xakaꞌnuꞌ mi̱iꞌ ra̱.
Xikuiín xitiꞌ ra̱ nuu̱ꞌ ña̱ ja̱a̱nꞌ xakaꞌnuꞌ ña̱ꞌaꞌ ra̱ te̱ kaꞌán ndaꞌvi ra̱ xiinꞌ a̱ ndii:
“Sa̱a̱ u̱nꞌ ña̱ va̱ꞌa̱ te̱ sa̱kakú u̱nꞌ yuꞌu̱,
sa̱kanꞌ ña̱ yoꞌó nduuꞌ ndiosí ña̱ xakaꞌnuꞌ i̱”,
katyi ra̱.
18 Ne̱ yivi̱ꞌ ja̱a̱nꞌ ndii,
xïní xa̱tyiꞌ ni̱a̱ ndee ña̱ xaaꞌ ni̱a̱,
ni̱ nde̱e̱ kündani̱ tu̱ ni̱a̱ ña̱ xaaꞌ ni̱a̱ ja̱a̱nꞌ,
nde̱e̱ naa ndasi ndu̱tyiꞌ nuu̱ꞌ ni̱a̱,
te̱ kü̱vi̱ ku̱ni̱ ni̱a̱,
uun nde̱e̱ naa ndasi tu̱ nimá ni̱a̱ te̱ kü̱vi̱ ku̱nda̱ni̱ kaxiꞌ ni̱a̱.
19 Kü̱vi̱ na̱ka̱ni̱ni̱ va̱ꞌa̱ ne̱ yivi̱ꞌ ja̱a̱nꞌ,
te̱ köo̱ꞌ tu̱ ña̱ xini tuní kumiꞌ ni̱a̱,
ni̱ nde̱e̱ köo̱ꞌ tu̱ ña̱ xanini kumiꞌ ni̱a̱ te̱ kaꞌa̱n ni̱a̱ ndii:
“I̱tunꞌ,
tunꞌ ni̱ ndoo̱ ndo̱so̱ꞌ nda̱ꞌaꞌ i̱ kii̱ꞌ ni̱ xa̱ꞌa̱ i̱ ña̱ kaa̱ꞌ ndii,
ni̱ xa̱ꞌmi̱ i̱ nu̱ꞌ,
te̱ nuu̱ꞌ ñuꞌu̱ ti̱kei̱ ni̱ sko̱ꞌniꞌ i̱ nu̱ꞌ ni̱ ta̱vi̱ i̱ xita̱ꞌ va̱ꞌa̱,
ni̱ ta̱vi̱ tu̱ i̱ nde̱i̱ꞌ ni̱ xi̱xi̱ i̱.
Sa̱kanꞌ na kuiiꞌ köo̱ꞌ nde̱e̱ i̱i̱n xaꞌa̱ꞌ ña̱ ka̱ni̱ni̱ i̱ ña̱ ndiosí nduuꞌ i̱tunꞌ ja̱a̱nꞌ.
Te̱ köo̱ꞌ tu̱ nde̱e̱ i̱i̱n xaꞌa̱ꞌ ña̱ ku̱i̱i̱n xitiꞌ i̱ nuu̱ꞌ ña̱ nianiaꞌ i̱tunꞌ ja̱a̱nꞌ te̱ sa̱kaꞌnuꞌ ña̱ꞌaꞌ i̱”,
katyi ni̱a̱.
20 Ne̱ yivi̱ꞌ ja̱a̱nꞌ ndii,
nde̱e̱ naa ne̱ xaxi̱ꞌ yaa̱ꞌ nuꞌu̱ ku̱i̱ti̱ꞌ nduuꞌ ni̱a̱,
sa̱kanꞌ ña̱ nimá ni̱a̱ xini xaꞌanꞌ ña̱ꞌaꞌ xiinꞌ ña̱ xanini sikiꞌ,
te̱ kuxiooꞌ ni̱a̱,
te̱ käku̱ ni̱a̱.
Sa̱kanꞌ na kuiiꞌ kü̱vi̱ ku̱nda̱ni̱ ni̱a̱ ña̱ ndiosí,
ña̱ ni̱ xa̱ꞌa̱ nda̱ꞌaꞌ ni̱a̱ xakaꞌnuꞌ ni̱a̱ ja̱a̱nꞌ ndii,
ña̱ xini xaꞌanꞌ ku̱i̱ti̱ꞌ nduuꞌ a̱.
Yoꞌoꞌ kaꞌán a̱ ña̱ Yahvé nduuꞌ ña̱ sakakú ne̱ vi̱ꞌe̱ Israel
21 Kaꞌán Ndiosí ndii:
“Ndoꞌó,
ne̱ vi̱ꞌe̱ Israel,
na̱ka̱ꞌanꞌ va̱ ndo̱ꞌ xaꞌa̱ꞌ ña̱ ni̱ kaꞌa̱n i̱ xiinꞌ ndo̱ꞌ xaꞌa̱ꞌ ña̱ ja̱a̱nꞌ,
sa̱kanꞌ ña̱ ne̱ xikaꞌ nuuꞌ nuu̱ꞌ i̱ nduuꞌ ndo̱ꞌ.
Yuꞌu̱ ni̱ xa̱ꞌa̱ ndoꞌó,
sa̱kanꞌ na kuiiꞌ ne̱ xikaꞌ nuuꞌ nuu̱ꞌ i̱ nduuꞌ ndo̱ꞌ.
Ndoꞌó,
ne̱ vi̱ꞌe̱ Israel,
nä̱ndoso̱ꞌ i̱ xaꞌa̱ꞌ ndo̱ꞌ.
22 Yuꞌu̱ ni̱ sa̱ndoyoꞌ sa̱kuuꞌ ña̱ ni̱a̱ꞌa ña̱ ni̱ xa̱a̱ ndo̱ꞌ nde̱e̱ naa xaaꞌ a̱ kii̱ꞌ ndíátyiꞌ viko̱ꞌ,
te̱ ni̱ sa̱ndoyoꞌ tu̱ i̱ sa̱kuuꞌ ku̱a̱tyi̱ ndo̱ꞌ nde̱e̱ naa xaaꞌ a̱ kii̱ꞌ xinuꞌ viko̱ꞌ nu̱ꞌuꞌ”,
ni̱ katyi̱ Ndiosí.
23 Ndoꞌó,
ndi̱viꞌ,
ka̱ta̱ sii̱ꞌ ndo̱ꞌ ya̱a̱ nuu̱ꞌ Yahvé xaꞌa̱ꞌ sa̱kuuꞌ ña̱ ni̱ xa̱a̱ a̱.
Te̱ ndoꞌó,
nde̱e̱ ma̱aꞌ ti̱xi̱n ñu̱ꞌuꞌ ndeꞌi̱ tiꞌeꞌ sii̱ꞌ ndo̱ꞌ xaꞌa̱ꞌ a̱ ña̱ va̱ꞌa̱ kuni ndo̱ꞌ.
Te̱ ndoꞌó,
i̱kuꞌ naꞌnuꞌ,
ka̱ta̱ ndo̱ꞌ ya̱a̱ nuu̱ꞌ Yahvé xaꞌa̱ꞌ a̱ ña̱ va̱ꞌa̱ kuni ndo̱ꞌ.
Te̱ sa̱kanꞌ tu̱ sa̱a̱ sa̱kuuꞌ ndoꞌó kuꞌu̱ xi̱xa̱ va̱ xiinꞌ sa̱kuuꞌ nuu̱ꞌ i̱tunꞌ naꞌnuꞌ tunꞌ itaꞌ i̱kanꞌ.
Sa̱kanꞌ ña̱ xa̱ ni̱ sa̱kakú Yahvé yooꞌ,
ne̱ vi̱ꞌe̱ Jacob,
te̱ vi̱ti̱n xakaꞌnuꞌ ña̱ꞌaꞌ yooꞌ,
ne̱ vi̱ꞌe̱ Israel.
24 Ña̱ yo̱ꞌo̱ꞌ kaꞌán Yahvé,
ña̱ ni̱ sa̱ndoó ndiká ndoꞌó,
te̱ su̱vi̱ tu̱ a̱ ni̱ xa̱ꞌa̱ ndoꞌó nde̱e̱ ti̱xi̱n si̱ꞌiꞌ ndo̱ꞌ kaꞌán a̱ ndii:
“I̱i̱n nda̱a̱ꞌ mi̱iꞌ yuꞌu̱,
Yahvé,
ni̱ xaꞌa sa̱kuuꞌ ña̱ yoo,
su̱vi̱ i̱ ni̱ xa̱ꞌa̱ ndi̱viꞌ,
te̱ su̱vi̱ tu̱ i̱ ni̱ xa̱ꞌa̱ ñu̱ꞌuꞌ i̱i̱n yivi̱ꞌ.
25 Yuꞌu̱ nduuꞌ ña̱ sandoñuꞌuꞌ ña̱ tava̱ꞌ tuni̱ te̱ tuviꞌ i̱ni̱,
te̱ sasanaꞌ tu̱ i̱ te̱ tu̱ꞌva̱.
Te̱ su̱vi̱ tu̱ i̱ sasanaꞌ xíniꞌ te̱ xini tuní,
te̱ sandiꞌiꞌ i̱ sa̱kuuꞌ ña̱ xini tuní ra̱.
26 Yuꞌu̱ xaaꞌ sa̱kanꞌ te̱ xinú ña̱ kaꞌán te̱ xikaꞌ nuuꞌ nuu̱ꞌ i̱,
te̱ su̱vi̱ tu̱ i̱ xaaꞌ sa̱kanꞌ te̱ kieeꞌ va̱ꞌa̱ ña̱ tyituní,
te̱ tiꞌviꞌ i̱ kuaꞌa̱n tyu̱u̱n nuu̱ꞌ i̱.
Te̱ yuꞌu̱ nduuꞌ tu̱ ña̱ sakaꞌán ña̱ꞌaꞌ,
te̱ kaꞌán ra̱ ndii:
Ñu̱u̱ Jerusalén ndii,
na̱ku̱ndiee̱ tu̱ku̱u̱ ne̱ yivi̱ꞌ,
te̱ sa̱kuuꞌ ñu̱u̱ ña̱ ñuꞌuꞌ nuu̱ꞌ ñu̱ꞌuꞌ Judá ndii,
na̱ka̱sa̱ꞌa̱ xa̱aꞌ tu̱ku̱u̱ te̱ yivi̱ꞌ a̱,
te̱ na̱ka̱ta̱ xa̱aꞌ tu̱ ndo̱ꞌ sa̱kuuꞌ vi̱ꞌe̱,
xiinꞌ nama̱,
ña̱ xa̱ ni̱ nduxi̱n ndo̱o̱ ñu̱u̱ ja̱a̱nꞌ,
katyi ra̱.
27 Yuꞌu̱ nduuꞌ ña̱ kaꞌán tyuunꞌ xiinꞌ nde̱ma̱aꞌ ti̱xi̱n mi̱ni̱ kaꞌnuꞌ ndii:
Na̱ya̱a̱ ndo̱ꞌ,
sa̱kanꞌ ña̱ sa̱ndokoꞌ i̱ ti̱kui sa̱kuuꞌ i̱ti̱a̱ ña̱ sakutuꞌ ndoꞌó,
katyi i̱.
28 Yuꞌu̱ nduuꞌ ña̱ kaꞌán xiinꞌ ndo̱ꞌ xaꞌa̱ꞌ rey Ciro ndii:
Te̱ ja̱a̱nꞌ nduuꞌ te̱ pa̱xto i̱.
Te̱ sa̱xinu̱ ra̱ sa̱kuuꞌ ña̱ kuní i̱.
Te̱ kaꞌán i̱ xiinꞌ ndoꞌó,
ne̱ ndieeꞌ ñu̱u̱ Jerusalén ndii:
Na̱ka̱sa̱ꞌa̱ xa̱aꞌ tu̱ku̱u̱ te̱ yivi̱ꞌ ñu̱u̱ ndo̱ꞌ,
te̱ na̱ka̱sa̱ꞌa̱ xa̱aꞌ tu̱ ra̱ xaꞌa̱ꞌ yu̱kunꞌ kaꞌnuꞌ ña̱ iinꞌ ñu̱u̱ ndo̱ꞌ,
katyi i̱”,
ni̱ katyi̱ a̱.