Yoꞌoꞌ kaꞌán Isaías ña̱ ii̱n nda̱a̱ꞌ Yahvé ku̱i̱ti̱ꞌ nduuꞌ ña̱ sakakú yooꞌ
43
Te̱ vi̱ti̱n kaꞌán Yahvé,
ña̱ ni̱ xa̱ꞌa̱ yooꞌ,
ne̱ vi̱ꞌe̱ Israel,
ne̱ nduuꞌ si̱a̱niꞌ xikaꞌ Jacob,
xiinꞌ e̱ꞌ ndii:
“Kuäa̱n yiꞌvi ndo̱ꞌ,
sa̱kanꞌ ña̱ xa̱ ni̱ tya̱ꞌvi̱ i̱ xaꞌa̱ꞌ ndo̱ꞌ,
te̱ ni̱ sa̱kakú i̱ ndoꞌó,
te̱ ni̱ tyi̱nduꞌu̱ꞌ i̱ kivi̱ꞌ ndo̱ꞌ,
xaꞌa̱ꞌ a̱ ja̱a̱nꞌ na kuenta mi̱iꞌ i̱ nduuꞌ ndo̱ꞌ.
2 Kii̱ꞌ xkaꞌndi̱a̱ ndo̱ꞌ nuu̱ꞌ ti̱kui kunu va̱ ndii,
yuꞌu̱ ko̱o̱ xiinꞌ ndo̱ꞌ,
uun kii̱ꞌ xkaꞌndi̱a̱ ndo̱ꞌ nuu̱ꞌ kuaꞌa̱ꞌ va̱ te̱ñuꞌu̱ꞌ i̱ti̱a̱ ndii,
ndë̱kaꞌnu̱ ndo̱ꞌ sa̱a̱ raꞌ.
Te̱ naa xkaꞌndíá ndo̱ꞌ nuu̱ꞌ ñuꞌu̱ ndatin ndii,
kä̱ꞌmi̱ a̱ ndoꞌó,
ni̱ nde̱e̱ ndä̱ti̱n tu̱ ñu̱ꞌuꞌ ndeꞌi̱ ndo̱ꞌ.
3 Sa̱kanꞌ ña̱ yuꞌu̱,
Yahvé Ndiosí ndo̱ꞌ,
ña̱ su̱ꞌu̱n,
ña̱ xakaꞌnuꞌ ndoꞌó,
ne̱ vi̱ꞌe̱ Israel,
nduuꞌ ña̱ sakakú ndoꞌó.
Te̱ xa̱ ni̱ sa̱na̱kuaꞌa i̱ sa̱kuuꞌ ne̱ ndieeꞌ nuu̱ꞌ ñu̱ꞌuꞌ Egipto xiinꞌ ne̱ ndieeꞌ nuu̱ꞌ ñu̱ꞌuꞌ Etiopía xiinꞌ ne̱ ndieeꞌ ñu̱u̱ Seba ku̱ndu̱u̱ ña̱ tya̱ꞌvi̱ i̱ xaꞌa̱ꞌ ndo̱ꞌ,
te̱ sa̱kakú i̱ ndoꞌó.
4 Sa̱kanꞌ ña̱ nuu̱ꞌ yuꞌu̱ ndii,
nda̱tu̱nꞌ xa̱va̱ꞌa̱ ndo̱ꞌ,
te̱ ndiaa yaꞌviꞌ xa̱va̱ꞌa̱ tu̱ ndo̱ꞌ,
te̱ ndani̱ xa̱va̱ꞌa̱ i̱ ndoꞌó.
Xaꞌa̱ꞌ a̱ ja̱a̱nꞌ na kuiiꞌ sanakuaꞌa i̱ i̱nga̱ ne̱ yivi̱ꞌ xaꞌa̱ꞌ ndo̱ꞌ te̱ sa̱kakú i̱ ndoꞌó,
te̱ sanakuaꞌa tu̱ i̱ ne̱ tukuꞌ te̱ ku̱vi̱ ni̱a̱ xaꞌa̱ꞌ ndo̱ꞌ.
5 Kuäa̱n yiꞌvi ndo̱ꞌ,
sa̱kanꞌ ña̱ yoo i̱ xiinꞌ ndo̱ꞌ,
te̱ kuꞌu̱n na̱ka̱ i̱ si̱a̱niꞌ xikaꞌ ndo̱ꞌ,
ne̱ ndieeꞌ nde̱e̱ miiꞌ ketaꞌ ñu̱ꞌu̱.
Te̱ kuꞌu̱n na̱ka̱ tu̱ i̱ ne̱ ndieeꞌ nde̱e̱ miiꞌ ketá ñu̱ꞌu̱ te̱ ndu̱i̱i̱n ni̱a̱ xiinꞌ ndo̱ꞌ.
6 Kaꞌa̱n i̱ xiinꞌ te̱ ndieeꞌ nuu̱ꞌ ñu̱ꞌuꞌ xíniꞌ i̱i̱n yivi̱ꞌ,
te̱ kaꞌa̱n tu̱ i̱ xiinꞌ te̱ ndieeꞌ nuu̱ꞌ ñu̱ꞌuꞌ xaꞌa̱ꞌ i̱i̱n yivi̱ꞌ ndii:
Na̱ta̱xi̱ ndo̱ꞌ tiaa̱ siꞌe̱ i̱,
xiinꞌ ña̱ꞌaꞌ siꞌe̱ i̱ nda̱ꞌaꞌ i̱,
te̱ na̱ndi̱koꞌ ni̱a̱ nuu̱ꞌ ñu̱ꞌuꞌ ni̱a̱ Israel,
kuꞌu̱n na̱ka̱ ña̱ꞌaꞌ i̱ tee̱ꞌ ndee xikaꞌ xa̱va̱ꞌa̱ ndieeꞌ ni̱a̱ nde̱e̱ xaꞌa̱ꞌ ñu̱ꞌuꞌ i̱i̱n yivi̱ꞌ,
katyi̱ i̱ xiinꞌ ra̱.
7 Na̱ta̱xi̱ ndo̱ꞌ sa̱kuuꞌ ne̱ nakuni ña̱ yuꞌu̱ nduuꞌ Ndiosí,
ña̱ xakaꞌnuꞌ ni̱a̱,
sa̱kanꞌ ña̱ ni̱ xa̱ꞌa̱ ña̱ꞌaꞌ i̱ te̱ ki̱ꞌi̱n kaꞌnuꞌ ni̱a̱ yuꞌu̱,
te̱ yuꞌu̱ ni̱ xa̱a̱ sa̱kanꞌ te̱ yoo ni̱a̱”,
katyi a̱.
8 Ta̱va̱ꞌ ndo̱ꞌ sa̱kuuꞌ ne̱ yivi̱ꞌ,
ne̱ kuiꞌe nuu̱ꞌ tee̱ꞌ ndee yoo ndu̱tyiꞌ nuu̱ꞌ ni̱a̱,
te̱ ta̱va̱ꞌ tu̱ ndo̱ꞌ sa̱kuuꞌ ne̱ soꞌoꞌ tee̱ꞌ ndee yoo so̱ꞌo̱ ni̱a̱.
9 Na na̱kaya̱ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ na ndu̱i̱i̱n sa̱kuuꞌ nuu̱ꞌ ne̱ yivi̱ꞌ,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ.
Naaꞌ yoo i̱i̱n ne̱ ja̱a̱nꞌ,
ne̱ ku̱vi̱ kaꞌa̱n xiinꞌ e̱ꞌ xaꞌa̱ꞌ ña̱ ni̱ yoo̱ xta̱ꞌanꞌ xiinꞌ xaꞌa̱ꞌ ña̱ ko̱o̱ nuu̱ꞌ kuꞌu̱n e̱ꞌ ndii,
na ki̱xi̱n ni̱a̱ xiinꞌ ne̱ ku̱vi̱ na̱ta̱xi̱ ña̱ nda̱ku xaꞌa̱ꞌ ni̱a̱ ña̱ ña̱ ndi̱xa̱ nduuꞌ ña̱ kaꞌán ni̱a̱,
sa̱kanꞌ te̱ ku̱ni̱ so̱ꞌo̱ sa̱kuuꞌ e̱ꞌ ña̱ kaꞌán ni̱a̱ te̱ kaꞌa̱n e̱ꞌ ndii:
“Ña̱ ndi̱xa̱ xna̱ꞌa̱ nduuꞌ ña̱ kaꞌán ne̱ kaa̱ꞌ”,
katyi̱ e̱ꞌ.
10 Kaꞌán Yahvé ndii:
“Ndoꞌó nduuꞌ ne̱ ndieeꞌ yu̱ꞌuꞌ xaꞌa̱ꞌ i̱,
te̱ su̱vi̱ tu̱ ndo̱ꞌ nduuꞌ ne̱ xikaꞌ nuuꞌ nuu̱ꞌ i̱,
ne̱ ni̱ na̱ka̱xi̱n mi̱iꞌ i̱,
te̱ na̱ku̱ni̱ ndo̱ꞌ yuꞌu̱,
te̱ i̱ni̱ tu̱ ndo̱ꞌ ku̱ni̱ ndo̱ꞌ yuꞌu̱,
te̱ ku̱nda̱ni̱ ndo̱ꞌ ña̱ i̱i̱n nda̱a̱ꞌ yuꞌu̱ ku̱i̱ti̱ꞌ nduuꞌ Ndiosí.
Köo̱ꞌ nde̱e̱ i̱i̱n i̱nga̱ ndiosí,
te̱ ni̱i̱ nde̱e̱ köo̱ꞌ kivi̱ꞌ tu̱ ni̱ yoo̱ a̱,
te̱ köo̱ꞌ kivi̱ꞌ tu̱ ko̱o̱ nde̱e̱ i̱i̱n a̱.
11 Yuꞌu̱ nduuꞌ Yahvé,
te̱ i̱i̱n nda̱a̱ꞌ yuꞌu̱ ku̱i̱ti̱ꞌ nduuꞌ ña̱ ku̱vi̱ sakakú ndoꞌó,
te̱ köo̱ꞌ ka̱ nde̱e̱ i̱i̱n ña̱ ku̱vi̱ sakakú.
12 Yuꞌu̱ nduuꞌ ña̱ ni̱ kaꞌa̱n ndo̱so̱ꞌ nuu̱ꞌ ndo̱ꞌ xaꞌa̱ꞌ ña̱ ja̱a̱nꞌ kii̱ꞌ kuní ka̱ ko̱o̱ a̱,
te̱ ni̱ sa̱kakú i̱ ndoꞌó,
te̱ ni̱ kaꞌa̱n ndo̱so̱ꞌ tiꞌeꞌ i̱ xaꞌa̱ꞌ a̱ te̱i̱n ndo̱ꞌ,
te̱ süu̱ꞌ i̱nga̱ ndiosí ndi̱va̱ꞌa̱ ni̱ kaꞌa̱n ndo̱so̱ꞌ a̱ nuu̱ꞌ ndo̱ꞌ.
Sa̱kuuꞌ ndoꞌó nduuꞌ ne̱ nataxiꞌ ña̱ nda̱ku xaꞌa̱ꞌ i̱ ña̱ yuꞌu̱ nduuꞌ Ndiosí,
katyi i̱.
13 Nde̱e̱ xta̱ꞌanꞌ i̱i̱n yivi̱ꞌ ndii,
yuꞌu̱ nduuꞌ Ndiosí,
te̱ köo̱ꞌ nde̱e̱ i̱i̱n ne̱ ku̱vi̱ sa̱kakú xiinꞌ miiꞌ nda̱ꞌaꞌ i̱,
te̱ köo̱ꞌ tu̱ nde̱e̱ i̱i̱n ne̱ ku̱vi̱ na̱ta̱ni̱ sa̱kuuꞌ ña̱ xaaꞌ i̱”,
katyi a̱.
Yoꞌoꞌ kaꞌán Ndiosí xaꞌa̱ꞌ ña̱ sa̱nduxín a̱ ñu̱ꞌuꞌ Babilonia
14 Yahvé,
Ndiosí su̱ꞌu̱n,
ña̱ xakaꞌnuꞌ ne̱ vi̱ꞌe̱ i̱ Israel,
ña̱ ni̱ sa̱kakú ña̱ꞌaꞌ,
kaꞌán ndii:
“Xaꞌa̱ꞌ a̱ ña̱ kuni sa̱kakú i̱ ndoꞌó ku̱i̱ti̱ꞌ na kuiiꞌ ni̱ ti̱ꞌviꞌ i̱ kuaꞌa̱ꞌ te̱ xíinꞌ ñu̱ꞌu̱ Babilonia,
te̱ ni̱ sa̱nduva ra̱ sa̱kuuꞌ yiꞌeꞌ ñu̱u̱ ja̱a̱nꞌ,
te̱ nde̱e̱ te̱ ñu̱ꞌu̱ Babilonia ja̱a̱nꞌ ni̱ ta̱xiꞌ ra̱,
te̱ ni̱ ko̱ꞌni̱ ndo̱o̱ te̱ ja̱a̱nꞌ ti̱xi̱n tunꞌ ndo̱oꞌ tunꞌ kaꞌán ñuñuꞌ ra̱ xaꞌa̱ꞌ te̱ ni̱ xi̱nu̱ sa̱kuuꞌ ra̱.
15 Yuꞌu̱ nduuꞌ Yahvé,
Ndiosí su̱ꞌu̱n,
ña̱ xakaꞌnuꞌ ne̱ vi̱ꞌe̱ Israel,
ña̱ ni̱ xa̱ꞌa̱ ña̱ꞌaꞌ,
ña̱ nduuꞌ tu̱ rey ña̱ xaꞌndia tyuunꞌ nuu̱ꞌ ni̱a̱”,
ni̱ katyi̱ a̱.
16 Ña̱ yo̱ꞌo̱ꞌ kaꞌán Yahvé,
ña̱ nuniaꞌ i̱tyiꞌ nuu̱ꞌ mi̱ni̱ kaꞌnuꞌ,
te̱ xaꞌa tu̱ a̱ i̱tyiꞌ nuu̱ꞌ ti̱kui mi̱ni̱ miiꞌ i̱yo̱ va̱ kuuꞌ.
17 Ni̱ ta̱va̱ꞌ a̱ sa̱kuuꞌ te̱ xíinꞌ kooꞌ tyukuuꞌ va̱,
te̱ ñu̱ꞌu̱ Egipto xiinꞌ sa̱kuuꞌ karreta ra̱ xiinꞌ sa̱kuuꞌ kuei sana̱ ra̱,
te̱ ni̱ xa̱ꞌni̱ꞌ ña̱ꞌaꞌ a̱.
Ni̱ sa̱nde̱kaꞌnú ña̱ꞌaꞌ a̱ ti̱xi̱n ti̱kui mi̱ni̱,
te̱ ni̱ xiꞌi̱ ndo̱o̱ ra̱,
te̱ köo̱ꞌ kivi̱ꞌ ka̱ ni̱ na̱ti̱a̱ku̱ nde̱e̱ i̱i̱n ra̱,
ni̱ ndo̱ꞌo̱ ra̱ nde̱e̱ naa tunꞌ ñuꞌu̱ ti̱kei̱ kii̱ꞌ kosó ne̱ yivi̱ꞌ ti̱kui nuu̱ꞌ nu̱ꞌ te̱ ndee ñuꞌma̱ ku̱i̱ti̱ꞌ tava̱ꞌ nu̱ꞌ.
18 Ndisu̱ vi̱ti̱n kaꞌán Yahvé xiinꞌ ne̱ nduuꞌ kuenta a̱ ndii:
“Näkaꞌanꞌ ka̱ ndo̱ꞌ xaꞌa̱ꞌ ña̱ ni̱ xkaꞌndi̱a̱ xta̱ꞌanꞌ,
te̱ ni̱ nde̱e̱ kä̱ni̱ni̱ ka̱ tu̱ ndo̱ꞌ xaꞌa̱ꞌ ña̱ ni̱ yoo̱ nuu̱ꞌ ni̱ ki̱xi̱n.
19 Sa̱kanꞌ ña̱ nä̱ꞌaꞌ ka̱ te̱ sa̱a̱ i̱ tyu̱u̱n kaꞌnuꞌ xa̱aꞌ.
Ko̱to̱ ndo̱ꞌ xa̱ ni̱ xa̱ꞌaꞌ i̱ xaaꞌ i̱ tyu̱u̱n ja̱a̱nꞌ.
¿Ñáá xiní ndo̱ꞌ a̱?
Ka̱sa̱ꞌa̱ i̱ i̱tyiꞌ miiꞌ kuꞌu̱n ndo̱ꞌ nuu̱ꞌ ñu̱ꞌuꞌ miiꞌ i̱tyi kaaꞌ,
te̱ na̱tyi̱ka̱nuꞌ i̱ i̱ti̱a̱ nuu̱ꞌ ñu̱ꞌuꞌ miiꞌ kaaꞌ i̱tyi va̱ miiꞌ köo̱ꞌ xa̱tyiꞌ ña̱ꞌa̱.
20 Kiꞌinꞌ kaꞌnuꞌ ki̱tiꞌ i̱kuꞌ,
tiꞌ ni̱a̱ꞌa yuꞌu̱,
xiinꞌ naya̱ꞌ i̱kuꞌ,
xiinꞌ ti̱u̱unꞌ nani̱ꞌ xaꞌa̱ꞌ xaꞌa̱ꞌ a̱ ña̱ tava̱ꞌ i̱ ti̱kui miiꞌ kaaꞌ i̱tyiꞌ xiꞌiꞌ riꞌ.
Te̱ xaꞌa tu̱ i̱ i̱ti̱a̱ nuu̱ꞌ ñu̱ꞌuꞌ miiꞌ kaaꞌ i̱tyi xa̱tyiꞌ te̱ taxiꞌ i̱ ti̱kui xiꞌiꞌ ne̱ nduuꞌ kuenta i̱,
ne̱ ni̱ na̱ka̱xi̱n i̱.
21 Mi̱iꞌ yuꞌu̱ ni̱ xa̱ꞌa̱ ndoꞌó,
ne̱ vi̱ꞌe̱ Israel,
te̱ ku̱ndu̱u̱ ndo̱ꞌ kuenta mi̱iꞌ i̱,
te̱ kaꞌa̱n ndo̱so̱ꞌ ndo̱ꞌ xaꞌa̱ꞌ i̱ nuu̱ꞌ ne̱ yivi̱ꞌ.
22 ’Ndisu̱ ndoꞌó,
ne̱ si̱a̱niꞌ xikaꞌ Jacob ndii,
nï̱ xika̱n ndo̱ꞌ nuu̱ꞌ i̱ te̱ tyi̱ndi̱e̱eꞌ i̱ ndoꞌó,
süu̱ꞌ ja̱a̱nꞌ ndii,
ni̱ xa̱vi ndi̱ꞌi̱ ndoꞌó,
ne̱ vi̱ꞌe̱ Israel,
ni̱ xi̱ni̱ ndo̱ꞌ yuꞌu̱.
23 Köo̱ꞌ kivi̱ꞌ ni̱ ki̱xi̱n ka̱ꞌmi̱ ndo̱ꞌ mbe̱e̱ xiinꞌ ti̱xuꞌu̱ꞌ nuu̱ꞌ i̱,
te̱ na̱soko̱ꞌ ndo̱ꞌ riꞌ,
ni̱ nde̱e̱ tiäꞌa̱an tu̱ ki̱ꞌi̱n kaꞌnuꞌ ndo̱ꞌ yuꞌu̱ xiinꞌ ña̱ nasoko̱ꞌ ndo̱ꞌ ja̱a̱nꞌ,
tee̱ꞌ ndee kuäsa̱ꞌ ni̱ sa̱xávi i̱ ndoꞌó,
ni̱ nde̱e̱ kuäsa̱ꞌ tu̱ ni̱ sa̱ta̱ñaꞌa̱ꞌ i̱ ndoꞌó ña̱ xikán ndi̱e̱eꞌ i̱ ña̱ na̱soko̱ꞌ ndo̱ꞌ nuu̱ꞌ i̱ tu̱mani̱ꞌ ja̱a̱nꞌ naa kuuꞌ sa̱kuuꞌ nuu̱ꞌ ndi̱kinꞌ xiinꞌ xa̱ꞌa̱n xavixínꞌ.
24 Nï̱ sa̱ta̱ꞌ ndo̱ꞌ tunꞌ kumiꞌ xa̱ꞌa̱n xavixínꞌ te̱ ki̱xi̱n ndo̱ꞌ xiinꞌ a̱ te̱ ku̱ndu̱u̱ a̱ tu̱mani̱ꞌ nuu̱ꞌ i̱,
te̱ ni̱ nde̱e̱ nï̱ xa̱kuatiaꞌ ndo̱ꞌ yuꞌu̱ xiinꞌ xa̱ꞌa̱n ki̱tiꞌ tiꞌ xaꞌmiꞌ ndo̱ꞌ nuu̱ꞌ i̱.
Süu̱ꞌ ja̱a̱nꞌ ndii,
xa̱ ni̱ sa̱xávi ndo̱ꞌ yuꞌu̱ xiinꞌ kuaꞌa̱ꞌ va̱ ku̱a̱tyi̱ ña̱ xaaꞌ ndo̱ꞌ,
te̱ ni̱ sa̱ta̱ñaꞌa̱ꞌ tu̱ ndo̱ꞌ yuꞌu̱ xiinꞌ ña̱ ni̱a̱ꞌa ña̱ xaaꞌ ndo̱ꞌ.
25 Yuꞌu̱ nduuꞌ ña̱ ni̱ sa̱ndoyoꞌ sa̱kuuꞌ ku̱a̱tyi̱ ndo̱ꞌ xaꞌa̱ꞌ a̱ ña̱ ndani̱ xiinꞌ miiꞌ mi̱iꞌ i̱,
te̱ köo̱ꞌ kivi̱ꞌ na̱ka̱ꞌanꞌ ka̱ i̱ xaꞌa̱ꞌ ku̱a̱tyi̱ nde̱e̱ i̱i̱n ndo̱ꞌ ja̱a̱nꞌ.
26 Sa̱na̱kaꞌanꞌ ndo̱ꞌ yuꞌu̱ naaꞌ yoo ña̱ ku̱vi̱ na̱kaꞌa̱n ndo̱ꞌ xaꞌa̱ꞌ ndo̱ꞌ,
te̱ niaꞌa̱ ndo̱ꞌ yuꞌu̱ naaꞌ ne̱ köo̱ꞌ ku̱a̱tyi̱ nduuꞌ ndo̱ꞌ.
27 Te̱ xii̱ꞌ ya̱taꞌ ndo̱ꞌ,
te̱ nu̱uꞌ ndii,
ni̱ xa̱a̱ te̱ ja̱a̱nꞌ ku̱a̱tyi̱ nuu̱ꞌ i̱,
te̱ sa̱kanꞌ tu̱ ni̱ xa̱a̱ te̱ sa̱niaꞌá ndoꞌó.
28 Xaꞌa̱ꞌ a̱ ja̱a̱nꞌ na kuiiꞌ ni̱ sa̱kaꞌanꞌ i̱ sa̱kuuꞌ sutu̱ kaꞌnuꞌ,
te̱ xaꞌndia tyuunꞌ ti̱xi̱n yu̱kunꞌ,
te̱ ni̱ kaꞌa̱n tuní tu̱ i̱ ña̱ sa̱ndo̱ñuꞌuꞌ xa̱tyiꞌ te̱ yivi̱ꞌ sa̱kuuꞌ ne̱ vi̱ꞌe̱ Israel,
ne̱ nduuꞌ si̱a̱niꞌ xikaꞌ Jacob.