Yoꞌoꞌ kaꞌán a̱ xaꞌa̱ꞌ ña̱ xitoꞌ Ndiosí ne̱ vi̱ꞌe̱ Israel
41
Kaꞌán Ndiosí ndii:
“Ndoꞌó,
ne̱ ndieeꞌ nuu̱ꞌ ñu̱ꞌuꞌ ña̱ ndasi i̱ꞌnu̱,
taxi̱nꞌ ko̱o̱ ndo̱ꞌ te̱ ku̱ni̱ so̱ꞌo̱ ndo̱ꞌ ña̱ kaꞌán i̱.
Te̱ ndoꞌó,
ne̱ tukuꞌ,
na̱tyi̱naá ndo̱ꞌ ña̱ ndi̱e̱eꞌ ndo̱ꞌ.
Ku̱ya̱ti̱n ndo̱ꞌ nuu̱ꞌ i̱ te̱ nda̱tuꞌunꞌ e̱ꞌ.
Ndu̱i̱i̱n e̱ꞌ te̱ kuꞌu̱n ti̱ꞌvi̱ e̱ꞌ nuu̱ꞌ a̱ miiꞌ xaꞌnú i̱ ku̱a̱tyi̱ te̱ nda̱tuꞌunꞌ kaxiꞌ e̱ꞌ.
2 ’Yuꞌu̱ nduuꞌ Ndiosí ña̱ xakaꞌnuꞌ ne̱ vi̱ꞌe̱ Israel.
Te̱ su̱vi̱ i̱ nduuꞌ ña̱ ni̱ xa̱a̱ sa̱kanꞌ te̱ ni̱ ndo̱ni̱ꞌi̱ te̱ xaꞌndia tyuunꞌ nuu̱ꞌ ñu̱ꞌuꞌ miiꞌ ketaꞌ ñu̱ꞌu̱,
te̱ sa̱tyuunꞌ nda̱ku ra̱ nuu̱ꞌ i̱.
Te̱ ni̱ ta̱xi̱ i̱ ña̱ ke̱ta̱ va̱ꞌa̱ ra̱ nuu̱ꞌ sa̱kuuꞌ te̱ tukuꞌ,
te̱ ni̱ ta̱xi̱ tu̱ i̱ ña̱ sa̱ndi̱e̱e̱ kuiꞌe ra̱ sa̱kuuꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ.
Te̱ sakuatyiꞌ xiꞌe̱ ra̱ sa̱kuuꞌ te̱ xíinꞌ xiinꞌ ityi̱ ña̱ niꞌiꞌ ra̱,
te̱ xiinꞌ tunꞌ to̱so̱ xatia ra̱ kuxi̱ te̱ ki̱ku̱ꞌ ra̱ sa̱kuuꞌ te̱ xíinꞌ ja̱a̱nꞌ nde̱e̱ naa xaaꞌ tatyi̱ꞌ kii̱ꞌ sandiatyiꞌ a̱ mi̱ꞌiꞌ i̱tyi.
3 Ndikún rey ja̱a̱nꞌ taxiꞌ ra̱ te̱ xíinꞌ ja̱a̱nꞌ,
te̱ köo̱ꞌ a̱ ni̱ ndoꞌoꞌ xa̱tyiꞌ ra̱ i̱tyiꞌ ja̱a̱nꞌ tee̱ꞌ ndee i̱tyiꞌ miiꞌ köo̱ꞌ kivi̱ꞌ xikaꞌ ra̱ nduuꞌ a̱.
4 Yuꞌu̱ nduuꞌ ña̱ taxiꞌ te̱ xkaꞌndíá sa̱kuuꞌ tyu̱u̱n kaꞌnuꞌ ja̱a̱nꞌ,
te̱ yuꞌu̱ tu̱ nduuꞌ ña̱ kaꞌán tyuunꞌ nde̱e̱ ña̱ nu̱uꞌ te̱ nakoó sa̱kuuꞌ ti̱ꞌvi̱ ne̱ yivi̱ꞌ i̱i̱n yivi̱ꞌ.
Te̱ i̱i̱n nda̱a̱ꞌ yuꞌu̱,
Yahvé,
nduuꞌ ña̱ yoo nde̱e̱ ña̱ nu̱uꞌ,
te̱ i̱i̱n nda̱a̱ꞌ yuꞌu̱ tu̱ nduuꞌ ña̱ yoo nde̱e̱ soꞌo̱ꞌ ndiꞌiꞌ.
5 ’Sa̱kuuꞌ ne̱ yivi̱ꞌ,
ne̱ ndieeꞌ ñu̱u̱ ña̱ ñuꞌuꞌ yu̱ꞌuꞌ mi̱ni̱ kii̱ꞌ ni̱ xi̱ni̱ ni̱a̱ ña̱ ni̱ xa̱a̱ i̱ jaa̱nꞌ ndii,
ni̱ yi̱ꞌvi xa̱va̱ꞌa̱ ni̱a̱.
Te̱ ndi̱e̱eꞌ va̱ tu̱ ni̱ ka̱nda̱ kaniiꞌ ñu̱ꞌuꞌ i̱i̱n yivi̱ꞌ kii̱ꞌ xa̱ kuyatinꞌ te̱ xíinꞌ rey ja̱a̱nꞌ kuaxi̱ ra̱.
6 Te̱ i̱ꞌi̱n ne̱ yivi̱ꞌ tyindieeꞌ ne̱ ndieeꞌ ya̱ti̱n vi̱ꞌe̱ ni̱a̱,
kaꞌán tu̱ ni̱a̱ xiinꞌ taꞌanꞌ ni̱a̱ ndii:
Sa̱ndi̱e̱ni xiinꞌ miiꞌ ndo̱ꞌ,
te̱ kü̱yi̱ꞌvi ndo̱ꞌ,
katyi ni̱a̱.
7 Te̱ tuxiꞌ i̱tunꞌ xandieni te̱ xatyuunꞌ xiinꞌ plata,
te̱ te̱ ndasaꞌ ndi̱i̱ꞌ ka̱a̱ xandieni te̱ xaꞌa ka̱a̱,
kaꞌán xiinꞌ taꞌanꞌ ra̱ ndii:
Va̱ꞌa̱ va̱ ndoó ka̱a̱ xaaꞌ u̱nꞌ,
katyi ra̱.
Ndi̱ꞌi̱ ja̱a̱nꞌ te̱ xataꞌ kutu̱ꞌ va̱ ra̱ ña̱ nianiaꞌ,
ña̱ xaꞌa ra̱ ja̱a̱nꞌ,
te̱ kä̱nda̱ a̱.
8 ’Ndisu̱ ndoꞌó,
ne̱ Israel,
ne̱ xikaꞌ nuuꞌ nuu̱ꞌ i̱,
ndoꞌó,
ne̱ vi̱ꞌe̱ Jacob,
ne̱ ni̱ na̱ka̱xi̱n i̱ ndii,
si̱a̱niꞌ xikaꞌ Abraham,
te̱ xiní taꞌanꞌ xiinꞌ i̱,
nduuꞌ ndo̱ꞌ.
9 Nde̱e̱ nuu̱ꞌ ñu̱ꞌuꞌ miiꞌ xikaꞌ va̱ i̱i̱n yivi̱ꞌ ni̱ ka̱na̱ i̱ ndoꞌó,
te̱ nde̱e̱ miiꞌ xaꞌa̱n ndi̱ꞌi̱ i̱i̱n yivi̱ꞌ ni̱ xaꞌa̱n na̱ka̱ i̱ ndoꞌó,
ni̱ na̱ka̱xi̱n i̱ ndoꞌó,
te̱ nï̱ sa̱xi̱o̱o̱ i̱ ndoꞌó,
ni̱ kaꞌa̱n i̱ xiinꞌ ndo̱ꞌ ndii:
Ne̱ xikaꞌ nuuꞌ nuu̱ꞌ i̱ nduuꞌ ndoꞌó,
ni̱ katyi̱ i̱.
10 Sa̱kanꞌ na kuiiꞌ kä̱ka̱ nimá ndo̱ꞌ,
sa̱kanꞌ ña̱ yoo yuꞌu̱ xiinꞌ ndo̱ꞌ,
te̱ kü̱ndi̱ꞌni̱ ndo̱ꞌ,
sa̱kanꞌ ña̱ yuꞌu̱ nduuꞌ Ndiosí ña̱ taxiꞌ ndi̱e̱e̱ꞌ ndo̱ꞌ.
Nde̱e̱ ndiꞌiꞌ ni̱ kivi̱ꞌ tyi̱ndi̱e̱eꞌ i̱ ndoꞌó,
te̱ ta̱xi̱ tu̱ i̱ ndi̱e̱e̱ꞌ ndo̱ꞌ,
te̱ sa̱kakú i̱ ndoꞌó xiinꞌ nda̱ꞌaꞌ ku̱a̱ꞌa̱ i̱ ña̱ ketaꞌ va̱ꞌa̱ sa̱kuuꞌ i̱tyiꞌ.
11 ’Sa̱kuuꞌ ne̱ ndasiꞌ ndoꞌó ndii,
ku̱ka̱ꞌa̱n nuu̱ꞌ ni̱a̱ sa̱a̱ i̱,
te̱ sa̱ndi̱e̱e̱ kuiꞌe tu̱ ña̱ꞌaꞌ i̱,
te̱ sa̱ndo̱ñuꞌuꞌ xa̱tyiꞌ i̱ sa̱kuuꞌ ne̱ kuntaꞌanꞌ xiinꞌ ndo̱ꞌ,
te̱ nduxi̱n xa̱tyiꞌ sa̱kuuꞌ ni̱a̱ sa̱a̱ i̱.
12 Tee̱ꞌ ndee na̱ndu̱kuꞌ ndo̱ꞌ ne̱ ndasiꞌ taꞌanꞌ xiinꞌ ndo̱ꞌ ja̱a̱nꞌ ndii,
köo̱ꞌ ka̱ ni̱a̱ ku̱ni̱ ndo̱ꞌ nuu̱ꞌ.
Te̱ ne̱ kuntaꞌanꞌ xiinꞌ ndo̱ꞌ ndii,
nduxi̱n xa̱tyiꞌ sa̱kuuꞌ ni̱a̱ sa̱a̱ i̱ nde̱e̱ naa köo̱ꞌ kivi̱ꞌ ni̱ yoo̱ nde̱e̱ i̱i̱n ni̱a̱.
13 Sa̱kanꞌ ña̱ yuꞌu̱,
Yahvé,
nduuꞌ Ndiosí ndo̱ꞌ,
ña̱ xitoꞌ ndoꞌó tiinꞌ i̱ nda̱ꞌaꞌ ku̱a̱ꞌa̱ ndo̱ꞌ,
te̱ kaꞌán i̱ xiinꞌ ndo̱ꞌ ndii:
Kü̱yi̱ꞌvi ndo̱ꞌ,
sa̱kanꞌ ña̱ yuꞌu̱ tyindieeꞌ ndoꞌó,
katyi i̱.
14 ’Ndoꞌó,
ne̱ Israel,
ne̱ nduuꞌ ne̱ vi̱ꞌe̱ Jacob,
tee̱ꞌ ndee köo̱ꞌ kuaꞌa̱ꞌ xa̱tyiꞌ ndo̱ꞌ,
te̱ köo̱ꞌ xa̱tyiꞌ tu̱ ndi̱e̱e̱ꞌ ndo̱ꞌ ndii,
kü̱yi̱ꞌvi ndo̱ꞌ,
sa̱kanꞌ ña̱ yuꞌu̱ tyindieeꞌ ndoꞌó.
Yuꞌu̱,
ña̱ nduuꞌ Ndiosí su̱ꞌu̱n,
ña̱ xakaꞌnuꞌ ndoꞌó,
ne̱ vi̱ꞌe̱ Israel,
nduuꞌ ña̱ sandoó ndiká ndoꞌó.
15 Ku̱ndu̱u̱ ndo̱ꞌ nde̱e̱ naa i̱i̱n tunꞌ tisiꞌin yu̱ꞌuꞌ,
tunꞌ sakoyó ne̱ yivi̱ꞌ ndi̱kinꞌ trigo,
tunꞌ xíinꞌ yu̱ꞌuꞌ,
sa̱a̱ i̱,
te̱ sakuatyiꞌ xiꞌe̱ ndo̱o̱ ndo̱ꞌ i̱kuꞌ naꞌnuꞌ xiinꞌ xiki̱ꞌ,
te̱ nda̱sa̱ nduuꞌ ndo̱ꞌ a̱ ndee ya̱kaꞌ ku̱i̱ti̱ꞌ.
16 Te̱ ka̱ti̱a̱ ña̱ꞌaꞌ ndo̱ꞌ te̱i̱n tatyi̱ꞌ te̱ ndi̱a̱tyiꞌ ndo̱o̱ a̱,
te̱ kiku̱ sa̱kuuꞌ a̱ te̱i̱n ti̱katyi̱ꞌ ndi̱e̱eꞌ.
Ndisu̱ ndoꞌó ndii,
na̱ku̱a̱tiaꞌ ndo̱ꞌ nuu̱ꞌ yuꞌu̱,
Yahvé,
te̱ kaꞌa̱n ni̱nu̱ ndo̱ꞌ xaꞌa̱ꞌ yuꞌu̱,
Ndiosí su̱ꞌu̱n ña̱ xakaꞌnuꞌ ndoꞌó,
ne̱ vi̱ꞌe̱ Israel.
17 ’Ne̱ ndaꞌvi kuuꞌ xiinꞌ ne̱ natiín ndii,
ndukuꞌ ni̱a̱ ti̱kui ko̱ꞌo̱ ni̱a̱,
te̱ köo̱ꞌ raꞌ niꞌíꞌ ni̱a̱.
Xa̱ ni̱ na̱ya̱a̱ ndo̱o̱ yaa̱ꞌ ni̱a̱ ña̱ ityí ni̱a̱ ti̱kui.
Ndisu̱ yuꞌu̱,
Yahvé,
ta̱xi̱ ti̱kui ko̱ꞌo̱ ni̱a̱,
te̱ yuꞌu̱,
ña̱ nduuꞌ Ndiosí ña̱ xakaꞌnuꞌ ne̱ vi̱ꞌe̱ Israel ja̱a̱nꞌ ndii,
nä̱ko̱o̱ i̱i̱n nda̱a̱ꞌ ña̱ꞌaꞌ i̱.
18 Nde̱e̱ xíniꞌ i̱kuꞌ miiꞌ sukun va̱ miiꞌ i̱tyiꞌ kaaꞌ ndii,
ta̱va̱ꞌ i̱ kuaꞌa̱ꞌ ti̱kui,
te̱ na̱kaa̱ꞌ raꞌ nde̱e̱ naa i̱ti̱a̱,
te̱ yo̱soꞌ sa̱na̱nduuꞌ i̱ ti̱ko̱ꞌyoꞌ,
te̱ miiꞌ kaaꞌ i̱tyi sa̱na̱nduuꞌ i̱ mi̱ni̱,
te̱ ta̱va̱ꞌ i̱ ti̱kui nuu̱ꞌ ñu̱ꞌuꞌ i̱tyiꞌ.
19 Nuu̱ꞌ ñu̱ꞌuꞌ miiꞌ kaaꞌ i̱tyiꞌ ndii,
tyi̱ꞌi̱ i̱ kuaꞌa̱ꞌ i̱tunꞌ naniꞌ cedro,
xiinꞌ kuaꞌa̱ꞌ tunꞌ naniꞌ acacia,
xiinꞌ kuaꞌa̱ꞌ tunꞌ naniꞌ mirto,
xiinꞌ kuaꞌa̱ꞌ tunꞌ naniꞌ olivo,
xiinꞌ kuaꞌa̱ꞌ tunꞌ naniꞌ cipres,
xiinꞌ kuaꞌa̱ꞌ tunꞌ naniꞌ abeto,
xiinꞌ kuaꞌa̱ꞌ va̱ tunꞌ naniꞌ pino.
20 Sa̱kanꞌ te̱ ku̱ni̱ sa̱kuuꞌ ne̱ yivi̱ꞌ i̱i̱n yivi̱ꞌ,
te̱ ku̱nda̱ni̱ tu̱ ni̱a̱,
te̱ na̱ka̱ni̱ni̱ ni̱a̱,
te̱ na̱ku̱ni̱ ni̱a̱ ña̱ yuꞌu̱,
Yahvé,
nduuꞌ ña̱ ni̱ xa̱ꞌa̱ sa̱kuuꞌ ña̱ kaa̱ꞌ,
te̱ yuꞌu̱ Ndiosí su̱ꞌu̱n,
ña̱ xakaꞌnuꞌ ne̱ vi̱ꞌe̱ Israel,
nduuꞌ ña̱ ni̱ sa̱nakoó a̱.”
Yoꞌoꞌ kaꞌán a̱ xaꞌa̱ꞌ ña̱ köo̱ꞌ nduuꞌ xa̱tyiꞌ ndiosí saka
21 Yahvé,
Ndiosí ña̱ xakaꞌnuꞌ ne̱ vi̱ꞌe̱ Jacob,
kaꞌán xiinꞌ ne̱ xakaꞌnuꞌ ndiosí saka ndii:
“Ni̱a̱ꞌa̱ ndo̱ꞌ nuu̱ꞌ i̱ te̱ niaꞌa̱ ndo̱ꞌ ña̱ kooꞌ tyukuuꞌ ndiosí saka ndo̱ꞌ,
ni̱a̱ꞌa̱ ndo̱ꞌ te̱ na̱kaꞌa̱n ndo̱ꞌ xaꞌa̱ꞌ ndo̱ꞌ.
22 Ni̱a̱ꞌa̱ ndo̱ꞌ xiinꞌ ndiosí saka ndo̱ꞌ,
te̱ kaꞌa̱n a̱ xiinꞌ ndu̱ xaꞌa̱ꞌ ña̱ ko̱o̱ nuu̱ꞌ kuꞌu̱n e̱ꞌ,
te̱ kaꞌa̱n tu̱ a̱ xiinꞌ ndu̱ sa̱a̱ ni̱ xa̱a̱ xta̱ꞌanꞌ te̱ ni̱ xi̱koo̱ i̱i̱n yivi̱ꞌ.
Te̱ tyu̱nxaꞌaꞌ ndu̱ ña̱ kaꞌán a̱,
te̱ ku̱nda̱ni̱ tu̱ ndu̱ sa̱a̱ kuꞌu̱n ndi̱ꞌi̱ i̱i̱n yivi̱ꞌ.
Te̱ kaꞌa̱n tu̱ a̱ xiinꞌ ndu̱ xaꞌa̱ꞌ ña̱ ko̱o̱ nuu̱ꞌ kuꞌu̱n e̱ꞌ.
23 Kaꞌa̱n a̱ xiinꞌ ndu̱ xaꞌa̱ꞌ ña̱ ko̱o̱ kii̱ꞌ yaꞌa̱ kivi̱ꞌ,
sa̱kanꞌ te̱ ku̱nda̱ni̱ ndu̱ꞌ ña̱ sa̱kuuꞌ a̱ nduuꞌ ndiosí.
Sa̱a̱ a̱ i̱i̱n ña̱ na̱nda̱ni̱,
ña̱ va̱ꞌa̱ uun ña̱ vä̱ꞌa̱ te̱ ku̱ni̱ ndu̱ a̱,
te̱ na̱nda̱ni̱ va̱ ndu̱ uun ku̱yi̱ꞌvi va̱ ndu̱.
24 Ndisu̱ ña̱ ndi̱xa̱ nduuꞌ a̱ ndii,
kuäsa̱ꞌ kuní xa̱tyiꞌ ndiosí saka ndoꞌó,
te̱ köo̱ꞌ tu̱ nde̱e̱ i̱i̱n ña̱ nandani̱ ku̱vi̱ sa̱a̱ a̱.
Te̱ nuu̱ꞌ yuꞌu̱ ndii,
ne̱ kuäsa̱ꞌ kuní xa̱tyiꞌ nduuꞌ ne̱ yivi̱ꞌ,
ne̱ nakaxin ndiosí saka ndoꞌ kunduuꞌ ndiosí ni̱a̱.
25 ’Nde̱e̱ nuu̱ꞌ ñu̱ꞌuꞌ ni̱nu̱ ndo̱ni̱ꞌi̱ i̱ i̱i̱n te̱ yivi̱ꞌ te̱ ki̱xi̱n ra̱,
te̱ nde̱e̱ miiꞌ ketaꞌ ñu̱ꞌu̱ ki̱ꞌi̱n kaꞌnuꞌ ra̱ yuꞌu̱.
Kueꞌni̱ ndo̱so̱ꞌ ra̱ sa̱kuuꞌ te̱ kaꞌnuꞌ nde̱e̱ naa ndeꞌi̱,
te̱ kueꞌni̱ ndo̱so̱ꞌ ña̱ꞌaꞌ ra̱ nde̱e̱ naa xaaꞌ te̱ xaꞌa ki̱si̱ xeꞌní ra̱ ñu̱ꞌuꞌ kixinꞌ.
26 Nde̱e̱ i̱i̱n köo̱ꞌ ni̱ kaꞌa̱n xaꞌa̱ꞌ ña̱ ja̱a̱nꞌ nde̱e̱ ña̱ nu̱uꞌ,
te̱ ku̱nda̱ni̱ e̱ꞌ a̱.
Te̱ nde̱e̱ i̱i̱n tu̱ köo̱ꞌ ni̱ kaꞌa̱n xiinꞌ e̱ꞌ nde̱e̱ kii̱ꞌ kuní ka̱ ko̱o̱ a̱,
te̱ kaꞌa̱n e̱ꞌ xiinꞌ ña̱ ja̱a̱nꞌ ndii:
Ña̱ nda̱ku kaꞌán ndo̱ꞌ,
katyi̱ e̱ꞌ.
’Ndisu̱ nde̱e̱ i̱i̱n ndoꞌó nï̱ kaꞌa̱n xaꞌa̱ꞌ a̱,
ni̱ nde̱e̱ nï̱ sa̱niaꞌá tu̱ ndo̱ꞌ a̱,
te̱ ni̱ nde̱e̱ nï̱ xi̱ni̱ so̱ꞌo̱ tu̱ nde̱e̱ i̱i̱n ne̱ yivi̱ꞌ ña̱ kaꞌán ndo̱so̱ꞌ ndo̱ꞌ xaꞌa̱ꞌ a̱.
27 Xi̱ꞌna̱ yuꞌu̱ ni̱ kaꞌa̱n xiinꞌ ne̱ ndieeꞌ ñu̱u̱ Sión xaꞌa̱ꞌ ña̱ ja̱a̱nꞌ nde̱e̱ ña̱ nu̱uꞌ ndii:
Xa̱ i̱tyiꞌ naá te̱ tyi̱ndi̱e̱eꞌ ndoꞌó ku̱a̱xi̱ ra̱,
ni̱ katyi̱ i̱.
Yuꞌu̱ tu̱ ni̱ ti̱ꞌviꞌ i̱i̱n te̱ yivi̱ꞌ ñu̱u̱ Jerusalén,
te̱ ni̱ xaꞌa̱n ra̱ xiinꞌ tu̱ꞌu̱n va̱ꞌa̱ ña̱ xakuatiaꞌ nimá ne̱ yivi̱ꞌ.
28 Xitoꞌ i̱ te̱i̱n ndiosí saka ja̱a̱nꞌ,
te̱ köo̱ꞌ nde̱e̱ i̱i̱n ña̱ ku̱vi̱ kaꞌán xaꞌa̱ꞌ ña̱ ja̱a̱nꞌ,
te̱ köo̱ꞌ nde̱e̱ i̱i̱n ña̱ ja̱a̱nꞌ ku̱vi̱ taxiꞌ tu̱ꞌu̱n nde̱iꞌ,
ni̱ nda̱tuꞌu̱nꞌ ña̱ꞌaꞌ i̱,
ndisu̱ nde̱e̱ i̱i̱n a̱ nï̱ ku̱vi̱ na̱ku̱i̱i̱n ña̱ kaꞌán i̱.
29 Sa̱kuuꞌ ndiosí saka ja̱a̱nꞌ ndii,
ña̱ sikiꞌ ku̱i̱ti̱ꞌ nduuꞌ a̱,
te̱ sa̱kuuꞌ ña̱ xaaꞌ a̱ ndii,
kuäsa̱ꞌ kuní xa̱tyiꞌ a̱.
Te̱ sa̱kuuꞌ ña̱ nianiaꞌ ja̱a̱nꞌ ndii,
köo̱ꞌ xa̱tyiꞌ ña̱ ku̱vi̱ sa̱a̱ a̱”,
ni̱ katyi̱ Ndiosí.