Yoꞌoꞌ kaꞌán a̱ xaꞌa̱ꞌ ña̱ sa̱kiꞌví Yahvé ne̱ nduuꞌ kuenta a̱
40
Kaꞌán Yahvé Ndiosí,
ña̱ xakaꞌnuꞌ e̱ꞌ,
xiinꞌ i̱ ndii:
“Sa̱kiꞌví u̱nꞌ,
sa̱kiꞌví u̱nꞌ ne̱ nduuꞌ kuenta i̱.
2 Kaꞌa̱n mani̱ꞌ u̱nꞌ xiinꞌ ne̱ ndieeꞌ ñu̱u̱ Jerusalén,
kaꞌa̱n tiꞌeꞌ u̱nꞌ xiinꞌ ni̱a̱ ña̱ xa̱ ni̱ sa̱ndiꞌiꞌ i̱ ña̱ nduuꞌ ni̱a̱ ne̱ xikaꞌ nuuꞌ so̱ꞌo̱.
Te̱ xa̱ ndi̱ꞌi̱ tu̱ ni̱ tya̱ꞌvi̱ ni̱a̱ xaꞌa̱ꞌ sa̱kuuꞌ ku̱a̱tyi̱ ni̱a̱,
sa̱kanꞌ ña̱ xa̱ ni̱ sa̱ndoꞌoꞌ ña̱ꞌaꞌ i̱ uvi̱ taꞌan i̱tyiꞌ xaꞌa̱ꞌ sa̱kuuꞌ ku̱a̱tyi̱ ña̱ ni̱ xa̱a̱ ni̱a̱”,
katyi a̱.
3 Ku̱ni̱ so̱ꞌo̱ ndo̱ꞌ,
tiakú kaꞌán tiꞌeꞌ i̱i̱n te̱ yivi̱ꞌ miiꞌ i̱tyi kaaꞌ ndii:
“Nda̱sa̱ va̱ꞌa̱ ndo̱ꞌ i̱tyiꞌ miiꞌ ki̱xi̱n Yahvé,
te̱ nda̱sa̱ nda̱ku tu̱ ndo̱ꞌ i̱tyiꞌ ja̱a̱nꞌ,
te̱ ki̱xi̱n Xto̱ꞌo̱ e̱ꞌ Ndiosí ja̱a̱nꞌ.
4 Te̱ na sa̱na̱kutuꞌ tu̱ ndo̱ꞌ ka̱niiꞌ yo̱soꞌ,
te̱ na nda̱sa̱ ndaa̱ tu̱ ndo̱ꞌ ka̱niiꞌ miiꞌ itaꞌ xiki̱ꞌ xiinꞌ xaꞌa̱ꞌ i̱kuꞌ.
Te̱ na nda̱sa̱ nda̱ku tu̱ ndo̱ꞌ miiꞌ ya̱kuaꞌ i̱tyiꞌ,
te̱ na nda̱sa̱ i̱i̱n katyi tu̱ ndo̱ꞌ miiꞌ tikoꞌndoꞌ nuu̱ꞌ ñu̱ꞌuꞌ.
5 Sa̱kanꞌ vi̱ꞌ te̱ niaꞌa̱ Yahvé ña̱ kaꞌnuꞌ a̱,
te̱ sa̱kuuꞌ ne̱ yivi̱ꞌ i̱i̱n yivi̱ꞌ ku̱ni̱ ña̱ kaꞌnuꞌ a̱ ja̱a̱nꞌ.
Sa̱kanꞌ ña̱ xa̱ mi̱iꞌ Yahvé ni̱ kuni̱ sa̱a̱ ña̱ ja̱a̱nꞌ”,
katyi̱ ra̱.
6 Ni̱ xi̱ni̱ so̱ꞌo̱ i̱ kaꞌán i̱i̱n tatyi̱ꞌ yu̱ꞌuꞌ ne̱ yivi̱ꞌ xiinꞌ i̱ ndii:
“Kaꞌa̱n tiꞌeꞌ”,
ni̱ katyi̱ a̱.
Sa̱kanꞌ te̱ ni̱ nda̱tuꞌu̱nꞌ i̱ ndii:
“¿Yo̱o̱ nduuꞌ a̱ kuní a̱ kaꞌa̱n tiꞌeꞌ i̱?”,
ni̱ katyi̱ i̱.
Te̱ ni̱ kaꞌa̱n a̱ xiinꞌ i̱ ndii:
“Kaꞌa̱n tiꞌeꞌ ña̱ sa̱kuuꞌ ne̱ yivi̱ꞌ i̱i̱n yivi̱ꞌ ndii,
nduuꞌ ni̱a̱ nde̱e̱ naa kuꞌu̱ ku̱i̱ti̱ꞌ,
te̱ sa̱kuuꞌ ña̱ kaꞌnuꞌ ni̱a̱ ndii,
nduuꞌ a̱ nde̱e̱ naa i̱ta̱ ña̱ yoo xaꞌa̱ꞌ kuꞌu̱ ku̱i̱ti̱ꞌ.
7 Kuꞌu̱ ndii,
ityí a̱ te̱ xii i̱ta̱ a̱ kii̱ꞌ xkaꞌndíá ña̱ i̱ꞌniꞌ xaaꞌ Yahvé,
te̱ ne̱ yivi̱ꞌ ndii,
nduuꞌ ni̱a̱ nde̱e̱ naa kuꞌu̱ ku̱i̱ti̱ꞌ.
8 Kuꞌu̱ ndii,
ityí a̱ te̱ xii tu̱ i̱ta̱ a̱,
te̱ koyó a̱,
ndisu̱ kuento Ndiosí,
ña̱ xakaꞌnuꞌ e̱ꞌ ndii,
yoo a̱ nde̱e̱ ndiꞌiꞌ ni̱ kivi̱ꞌ”,
ni̱ katyi̱ a̱ xiinꞌ i̱.
9 Ndoꞌó,
ne̱ ndieeꞌ ñu̱u̱ Sión,
kuaꞌan ka̱a̱ ndo̱ꞌ xíniꞌ i̱kuꞌ sukun va̱,
te̱ kaꞌa̱n tiꞌeꞌ va̱ ndo̱ꞌ.
Ndoꞌó,
ne̱ ndieeꞌ ñu̱u̱ Jerusalén,
ne̱ niꞌiꞌ kuento va̱ꞌa̱ xa̱aꞌ ku̱a̱xi̱ ndo̱ꞌ,
kaꞌa̱n ndo̱so̱ꞌ tiꞌeꞌ ndo̱ꞌ,
te̱ kuäa̱n yi̱ꞌvi ndo̱ꞌ.
Kaꞌa̱n ndo̱so̱ꞌ ndo̱ꞌ nuu̱ꞌ sa̱kuuꞌ ne̱ ndieeꞌ ñu̱u̱ Judá ndii:
“Ko̱to̱ ndo̱ꞌ,
yoꞌoꞌ yoo Ndiosí ña̱ xakaꞌnuꞌ e̱ꞌ”,
katyi̱ ndo̱ꞌ.
10 Ko̱to̱ ndo̱ꞌ,
xa̱ ku̱a̱xi̱ Yahvé xto̱ꞌo̱ e̱ꞌ,
te̱ xiinꞌ kuaꞌa̱ꞌ va̱ ña̱ ndi̱e̱eꞌ xaꞌndia tyuunꞌ a̱,
te̱ sa̱kuuꞌ ña̱ yoo xikoniꞌiꞌ a̱ xiinꞌ sa̱kuuꞌ ña̱ ndi̱e̱eꞌ a̱.
Te̱ ko̱to̱ ndo̱ꞌ,
niꞌiꞌ a̱ tu̱mani̱ꞌ ku̱a̱xi̱ a̱ ta̱xi̱ a̱ nda̱ꞌaꞌ ne̱ nduuꞌ kuenta a̱.
11 Ko̱to̱ a̱ ne̱ nduuꞌ kuenta a̱ nde̱e̱ naa xaaꞌ i̱i̱n te̱ pa̱xto,
te̱ xitoꞌ mbe̱e̱ sana̱ ra̱.
Ko̱ni̱ꞌi̱ nda̱ꞌaꞌ a̱ mbe̱e̱ kualiꞌ,
te̱ ku̱ndi̱a̱a̱ nduꞌu̱ꞌ riꞌ ti̱a̱ꞌni̱ a̱ kuꞌu̱n a̱.
Te̱ mbe̱e̱ tiata̱nꞌ tiꞌ saka̱nꞌ ni̱ tuvi̱ siꞌe̱ ndii,
kuiee va̱ ku̱ndi̱a̱kaꞌ a̱ riꞌ kuꞌu̱n a̱.
Yoꞌoꞌ kaꞌán Isaías xaꞌa̱ꞌ ña̱ i̱i̱n nda̱a̱ꞌ Ndiosí ña̱ xakaꞌnuꞌ ne̱ vi̱ꞌe̱ Israel ku̱i̱ti̱ꞌ nduuꞌ ña̱ kaꞌnuꞌ va̱
12 Ndiosí nduuꞌ ña̱ ni̱ tyu̱ꞌu̱n ti̱kui mi̱ni̱ kaꞌnuꞌ xiinꞌ ti̱koko̱ nda̱ꞌaꞌ a̱,
te̱ su̱vi̱ tu̱ a̱ ni̱ ki̱ꞌi̱n ku̱ꞌva̱ ndi̱viꞌ,
te̱ xiinꞌ uni̱ taꞌan ku̱i̱ti̱ꞌ nuu̱ꞌ nda̱ꞌaꞌ a̱ ni̱ na̱ta̱ndi̱e̱e̱ ma̱to a̱ sa̱kuuꞌ ya̱kaꞌ,
te̱ xiinꞌ ka̱a̱ ña̱ xikuitá ña̱ꞌa̱ ni̱ xa̱ta̱a̱ a̱ xiki̱ꞌ,
te̱ xiinꞌ ka̱a̱ viee̱ ni̱ xa̱ta̱a̱ a̱ i̱kuꞌ naꞌnuꞌ.
13 Nde̱e̱ i̱i̱n köo̱ꞌ xiní ña̱ xanini Yahvé,
te̱ nde̱e̱ i̱i̱n tu̱ köo̱ꞌ ni̱ kaꞌa̱n tu̱n kaaꞌ va̱ꞌa̱ xiinꞌ a̱.
14 Te̱ nï̱ nda̱tuꞌu̱nꞌ tu̱ a̱ nde̱e̱ i̱i̱n ne̱ yivi̱ꞌ te̱ ku̱nda̱ni̱ a̱ tu̱ꞌu̱n kaaꞌ va̱ꞌa̱ te̱ ku̱ndityi a̱,
te̱ köo̱ꞌ ni̱ sa̱niaꞌá tu̱ ña̱ꞌaꞌ te̱ sa̱tyuunꞌ nda̱ku a̱.
Te̱ köo̱ꞌ ni̱ sa̱niaꞌá tu̱ ña̱ꞌaꞌ te̱ ku̱ndu̱u̱ a̱ ña̱ xini tuní uun te̱ ku̱ndu̱u̱ a̱ ña̱ kuuꞌ kaxiꞌ.
15 Ko̱to̱ ndo̱ꞌ,
sa̱kuuꞌ ne̱ tukuꞌ,
ne̱ yoo i̱i̱n yivi̱ꞌ ndii,
nduuꞌ ni̱a̱ nuu̱ꞌ Ndiosí nde̱e̱ naa lulu maꞌá ti̱kui,
teꞌ toó ti̱xi̱n ya̱xinꞌ ku̱i̱ti̱ꞌ.
Te̱ nduuꞌ tu̱ ni̱a̱ nde̱e̱ naa siee ya̱kaꞌ ña̱ xkuitá nuu̱ꞌ ka̱a̱ xaaꞌ te̱ yivi̱ꞌ.
Ko̱to̱ ndo̱ꞌ,
Ndiosí ndii,
ndoniꞌiꞌ a̱ ka̱niiꞌ ñu̱ꞌuꞌ i̱i̱n yivi̱ꞌ nde̱e̱ naa i̱i̱n ñu̱tiꞌ lulu ku̱i̱ti̱ꞌ.
16 Sa̱kuuꞌ nuu̱ꞌ tunꞌ yoo xiki̱ꞌ Líbano ndii,
ni̱ä̱ni̱ nu̱ꞌ ko̱ko̱ nuu̱ꞌ altar,
ni̱ nde̱e̱ ni̱ä̱ni̱ tu̱ sa̱kuuꞌ ki̱tiꞌ,
tiꞌ yoo xiki̱ꞌ ja̱a̱nꞌ,
ka̱ꞌmi̱ e̱ꞌ te̱ na̱soko̱ꞌ e̱ꞌ nuu̱ꞌ Yahvé,
te̱ ku̱ndu̱u̱ riꞌ tu̱mani̱ꞌ.
17 Sa̱kuuꞌ ne̱ tukuꞌ ndii,
köo̱ꞌ nduuꞌ xa̱tyiꞌ ni̱a̱ nuu̱ꞌ Yahvé,
te̱ nde̱e̱ siee tu̱ kuäsa̱ꞌ tu̱ ndiaa yaꞌviꞌ xa̱tyiꞌ nde̱e̱ i̱i̱n ni̱a̱ nuu̱ꞌ a̱.
18 Köo̱ꞌ nde̱e̱ i̱i̱n ña̱ꞌa̱,
te̱ köo̱ꞌ tu̱ nde̱e̱ i̱i̱n ne̱ yivi̱ꞌ ku̱vi̱ na̱ka̱ta̱ e̱ꞌ xiinꞌ Ndiosí.
Te̱ köo̱ꞌ tu̱ nde̱e̱ i̱i̱n ña̱ nianiaꞌ ku̱vi̱ ka̱sa̱ꞌa̱ e̱ꞌ te̱ kaꞌa̱n e̱ꞌ ña̱ Ndiosí,
ña̱ kooꞌ tyukuuꞌ nduꞌu̱ꞌ ndi̱vi,
nduuꞌ a̱.
19 Te̱ xatyuunꞌ xiinꞌ ka̱a̱ ndii,
xaꞌmiꞌ ra̱ ña̱ nianiaꞌ,
te̱ te̱ xatyuunꞌ xiinꞌ oro ndii,
tisaꞌví ra̱ a̱ xiinꞌ oro ja̱a̱nꞌ,
te̱ xaꞌa ra̱ i̱i̱n karena xiinꞌ plata tyuꞌunꞌ ra̱ suku̱nꞌ ña̱ nianiaꞌ ja̱a̱nꞌ.
20 Te̱ ne̱ ndaꞌvi xa̱va̱ꞌa̱ kuuꞌ ndii,
i̱tunꞌ,
tunꞌ xäxi̱ꞌ ndi̱kiꞌndiꞌ,
nandukuꞌ ni̱a̱,
te̱ ndukuꞌ ni̱a̱ i̱i̱n te̱ tyu̱u̱n va̱ tuxiꞌ i̱tunꞌ,
te̱ ka̱sa̱ꞌa̱ ra̱ i̱i̱n ña̱ nianiaꞌ xiinꞌ tunꞌ ja̱a̱nꞌ ku̱ndu̱u̱ ndiosí ña̱ sa̱kaꞌnuꞌ ni̱a̱,
te̱ kutu̱ꞌ va̱ ku̱i̱i̱n a̱ sa̱a̱ ra̱.
21 Ndoꞌó ndii,
ne̱ küuꞌ kaxiꞌ xa̱tyiꞌ nduuꞌ ndo̱ꞌ,
sa̱kanꞌ ña̱ xa̱ xiní ndo̱ꞌ Ndiosí ndi̱xa̱ xna̱ꞌa̱,
te̱ xa̱ ni̱ xi̱ni̱ so̱ꞌo̱ tu̱ ndo̱ꞌ kaꞌán te̱ yivi̱ꞌ xaꞌa̱ꞌ a̱ nde̱e̱ ña̱ nu̱uꞌ,
te̱ xa̱ ni̱ ku̱nda̱ni̱ ndo̱ꞌ xaꞌa̱ꞌ a̱ nde̱e̱ xta̱ꞌanꞌ kii̱ꞌ ni̱ xi̱ka̱nduꞌu̱ꞌ i̱i̱n yivi̱ꞌ.
22 Ndiosí ja̱a̱nꞌ ndii,
nde̱e̱ to̱so̱ xata̱ꞌ ñu̱ꞌuꞌ i̱i̱n yivi̱ꞌ iinꞌ tei̱ kaꞌnuꞌ nduꞌu̱ꞌ a̱.
Te̱ yooꞌ,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ nuu̱ꞌ Ndiosí ja̱a̱nꞌ ndii,
naa iinꞌ ti̱ka̱ ku̱i̱ti̱ꞌ iinꞌ e̱ꞌ.
Te̱ sanakaá a̱ ndi̱viꞌ nde̱e̱ naa sanakaá ne̱ yivi̱ꞌ i̱i̱n toto̱ ndiká ku̱i̱ti̱ꞌ,
te̱ xiinꞌ ña̱ ja̱a̱nꞌ xaꞌa a̱ vi̱ꞌe̱ toto̱ nduꞌu̱ꞌ a̱.
23 Te̱ te̱ kaꞌnuꞌ ndii,
sanuuꞌ xa̱tyiꞌ ña̱ꞌaꞌ Ndiosí,
te̱ te̱ xaꞌndia tyuunꞌ nuu̱ꞌ ñu̱ꞌuꞌ i̱i̱n yivi̱ꞌ yoꞌoꞌ ndii,
ndasaꞌ nduuꞌ ña̱ꞌaꞌ a̱ nde̱e̱ naa ña̱ꞌa̱ ña̱ kuäsa̱ꞌ kuní xa̱tyiꞌ.
24 Te̱ nduuꞌ ra̱ nde̱e̱ naa tunꞌ ta̱ta̱ iti̱a̱ꞌ,
tunꞌ saka̱nꞌ ni̱ tyi̱ꞌi̱ ne̱ yivi̱ꞌ,
te̱ saka̱nꞌ xa̱ꞌaꞌ kikú ku̱i̱ti̱ꞌ tu̱ ti̱o̱ꞌo̱ nu̱ꞌ ti̱xi̱n ñu̱ꞌuꞌ.
Te̱ naaꞌ ti̱ꞌviꞌ Ndiosí tatyi̱ꞌ ndi̱e̱eꞌ miiꞌ itaꞌ tunꞌ ja̱a̱nꞌ ndii,
xi̱i̱ sa̱kuuꞌ nu̱ꞌ,
te̱ naaꞌ ku̱u̱n kuiꞌe̱ savi̱ꞌ ndii,
sa̱ndi̱a̱tyiꞌ ña̱ꞌaꞌ a̱ nde̱e̱ naa mi̱ꞌiꞌ ku̱i̱ti̱ꞌ.
25 Kaꞌán Ndiosí su̱ꞌu̱n ndii:
“Köo̱ꞌ nde̱e̱ i̱i̱n ña̱ ku̱vi̱ na̱ka̱ta̱ ndo̱ꞌ xiinꞌ yuꞌu̱,
sa̱kanꞌ ña̱ köo̱ꞌ nde̱e̱ i̱i̱n ña̱ nakuitá xiinꞌ i̱”,
katyi a̱.
26 Ndo̱ni̱ꞌi̱ ndo̱ꞌ ndu̱tyiꞌ nuu̱ꞌ ndo̱ꞌ ndi̱viꞌ te̱ ko̱to̱ ndo̱ꞌ te̱ ku̱ni̱ ndo̱ꞌ yo̱o̱ ni̱ xa̱ꞌa̱ sa̱kuuꞌ ña̱ ndieeꞌ i̱kanꞌ.
Ndiosí ndii,
kaꞌviꞌ a̱ sa̱kuuꞌ tiuu̱nꞌ ndieeꞌ ndi̱viꞌ tee̱ꞌ ndee kuaꞌa̱ꞌ xa̱va̱ꞌa̱ riꞌ,
te̱ kanaꞌ a̱ na̱ndaa̱ꞌ riꞌ xiinꞌ kivi̱ꞌ riꞌ,
te̱ nde̱e̱ i̱i̱n riꞌ nä̱ko̱o̱ a̱.
Ña̱ ndi̱e̱eꞌ kooꞌ tyukuuꞌ nduuꞌ a̱,
te̱ ku̱vi̱ xikoniꞌiꞌ a̱ sa̱kuuꞌ ña̱ yoo.
27 Ndoꞌó,
ne̱ vi̱ꞌe̱ Israel,
ne̱ nduuꞌ si̱a̱niꞌ xikaꞌ Jacob,
¿ndiotyun na kuiiꞌ kaꞌán ku̱a̱tyi̱ ndo̱ꞌ nuu̱ꞌ Ndiosí?
¿Ndiotyun na kaꞌán ndo̱ꞌ ndii:
“Xïní Yahvé ña̱ ndoꞌoꞌ yuꞌu̱,
te̱ kuäsa̱ꞌ tu̱ ndiꞌni̱ a̱ xaꞌa̱ꞌ i̱?”,
katyi ndo̱ꞌ.
28 Xa̱ xiní ndoꞌó,
te̱ xa̱ ni̱ xi̱ni̱ so̱ꞌo̱ tu̱ ndo̱ꞌ ña̱ Ndiosí,
ña̱ yoo nde̱e̱ ndiꞌiꞌ ni̱ kivi̱ꞌ,
nduuꞌ Yahvé.
Te̱ ña̱ ja̱a̱nꞌ nduuꞌ ña̱ ni̱ xa̱ꞌa̱ ka̱niiꞌ ñu̱ꞌuꞌ i̱i̱n yivi̱ꞌ,
te̱ ña̱ ja̱a̱nꞌ ndii,
köo̱ꞌ kivi̱ꞌ xáviꞌ a̱,
te̱ ni̱ nde̱e̱ köo̱ꞌ kivi̱ꞌ tu̱ ndiꞌiꞌ ndi̱e̱e̱ꞌ a̱.
Te̱ ña̱ ndityi a̱ ndii,
nde̱e̱ i̱i̱n ne̱ yivi̱ꞌ näkuitá xiinꞌ a̱.
29 Te̱ taxiꞌ a̱ ndi̱e̱e̱ꞌ ne̱ xa̱vi,
te̱ ndasaꞌ kuaꞌa̱ꞌ a̱ ndi̱e̱e̱ꞌ ne̱ köo̱ꞌ xa̱tyiꞌ ka̱ ndi̱e̱e̱ꞌ.
30 Nde̱e̱ ne̱ sa̱va̱ ndii,
ndiꞌiꞌ ndo̱o̱ ndi̱e̱e̱ꞌ ni̱a̱,
te̱ xáviꞌ tu̱ ni̱a̱,
te̱ ne̱ kuatyi̱ꞌ ndii,
kekiꞌí ni̱a̱,
te̱ xaá ni̱a̱ ñu̱ꞌuꞌ.
31 Ndisu̱ ne̱ i̱ni̱ xini Yahvé ndii,
sa̱a̱ kivi̱ꞌ nda̱sa̱ xa̱aꞌ a̱ ndi̱e̱e̱ꞌ ni̱a̱,
te̱ nduuꞌ ka̱ma̱ ni̱a̱ nde̱e̱ naa xaaꞌ tasu̱ꞌ nuniaꞌ riꞌ ndi̱xi̱n riꞌ te̱ taꞌnuꞌ riꞌ.
Ne̱ ja̱a̱nꞌ ndii,
ta̱xtaꞌanꞌ ni̱a̱,
te̱ xä̱vi xa̱tyiꞌ ni̱a̱ kuꞌu̱n xaꞌaꞌ ni̱a̱,
te̱ ndö̱ko̱ xa̱tyiꞌ ndi̱e̱e̱ꞌ ni̱a̱.