Yoꞌoꞌ kaꞌán a̱ xaꞌa̱ꞌ te̱ ni̱ ki̱e̱e̱ nuu̱ꞌ ñu̱ꞌuꞌ Babilonia, te̱ ku̱a̱xi̱ xiinꞌ kuento
39
Ndiaꞌviꞌ kivi̱ꞌ ni̱ yaꞌa̱,
te̱ te̱ nduuꞌ rey nuu̱ꞌ ñu̱ꞌuꞌ Babilonia,
te̱ naniꞌ Merodac-baladán,
siꞌe̱ te̱ nduuꞌ Baladán ndii,
ni̱ ti̱ꞌviꞌ ra̱ kiꞌinꞌ te̱ yivi̱ꞌ,
te̱ ni̱ xaꞌa̱n ko̱to̱ ra̱ rey Ezequías niꞌiꞌ ra̱ tyaꞌanꞌ te̱ ja̱a̱nꞌ xiinꞌ tu̱mani̱ꞌ.
Sa̱kanꞌ ña̱ ni̱ xi̱ni̱ ra̱ kuento ndii,
ni̱ ku̱ni̱ ku̱vi̱ rey ja̱a̱nꞌ,
ndisu̱ xa̱ ni̱ nda̱ꞌa̱ ra̱.
2 Te̱ va̱ꞌa̱ va̱ ni̱ ku̱ni̱ Ezequías kii̱ꞌ ni̱ xa̱a̱ te̱ yivi̱ꞌ ja̱a̱nꞌ miiꞌ nduꞌu̱ꞌ ra̱,
sa̱kanꞌ na ni̱ niaꞌa̱ ña̱ꞌaꞌ ra̱ vi̱ꞌe̱ miiꞌ taxaꞌa ra̱ sa̱kuuꞌ ña̱ vikaꞌ ña̱ kumiꞌ ra̱.
Naa kuuꞌ plata,
xiinꞌ oro,
xiinꞌ ti̱kui xavixínꞌ,
xiinꞌ xa̱ꞌa̱n oliva,
xiinꞌ miiꞌ taxaꞌa ra̱ sa̱kuuꞌ ña̱ xíinꞌ ña̱ kumiꞌ ra̱,
xiinꞌ sa̱kuuꞌ ña̱ ñuꞌuꞌ ti̱xi̱n yaka̱ ra̱.
Te̱ nde̱e̱ i̱i̱n ña̱ꞌa̱ nï̱ na̱ko̱o̱ ra̱ i̱i̱n kaniiꞌ ti̱xi̱n vi̱ꞌe̱ nduꞌu̱ꞌ ra̱ xiinꞌ nuu̱ꞌ ñu̱ꞌuꞌ miiꞌ xaꞌndia tyuunꞌ ra̱ ña̱ nï̱ sa̱niaꞌá ra̱ nuu̱ꞌ te̱ yivi̱ꞌ ja̱a̱nꞌ.
3 Sa̱kanꞌ te̱ ni̱ xaꞌa̱n Isaías,
te̱ kaꞌán tiakú tu̱ꞌu̱n Ndiosí,
miiꞌ nduꞌu̱ꞌ rey Ezequías,
te̱ ni̱ nda̱tuꞌu̱nꞌ ña̱ꞌaꞌ ra̱ ndii:
―¿Miiꞌ ni̱ ki̱e̱e̱ te̱ yivi̱ꞌ,
te̱ ni̱ ki̱xi̱n ko̱to̱ yoꞌó ja̱a̱nꞌ,
te̱ yo̱o̱ nduuꞌ a̱ ni̱ kaꞌa̱n ra̱ xiinꞌ u̱nꞌ?
―ni̱ katyi̱ ra̱.
Sa̱kanꞌ te̱ ni̱ na̱ku̱i̱i̱n Ezequías kaꞌán ra̱ ndii:
―Xikaꞌ xa̱va̱ꞌa̱ nuu̱ꞌ ñu̱ꞌuꞌ Babilonia ni̱ ki̱e̱e̱ ra̱ ―ni̱ katyi̱ ra̱.
4 Te̱ ni̱ nda̱tuꞌu̱nꞌ tu̱ku̱u̱ ña̱ꞌaꞌ Isaías kaꞌán ra̱ ndii:
―¿Yo̱o̱ nduuꞌ a̱ ni̱ xi̱ni̱ yoo vi̱ꞌe̱ miiꞌ nduꞌu̱ꞌ u̱nꞌ,
xaꞌndia tyuunꞌ u̱nꞌ?
―ni̱ katyi̱ ra̱.
Te̱ ni̱ na̱ku̱i̱i̱n Ezequías kaꞌán ra̱ ndii:
―Ni̱ sa̱niaꞌá i̱ sa̱kuuꞌ ña̱ vikaꞌ ña̱ kumiꞌ i̱ nuu̱ꞌ ra̱,
te̱ nde̱e̱ i̱i̱n a̱ nï̱ na̱ko̱o̱ i̱ ―ni̱ katyi̱ ra̱.
5 Sa̱kanꞌ te̱ ni̱ kaꞌa̱n ka̱ Isaías xiinꞌ rey Ezequías ndii:
―Ku̱ni̱ so̱ꞌo̱ u̱nꞌ tu̱ꞌu̱n ña̱ kaꞌán Yahvé,
ña̱ xaꞌndia tyuunꞌ nu̱uꞌ sa̱kuuꞌ te̱ xíinꞌ ndieeꞌ ndi̱viꞌ:
6 “Xaa̱ i̱i̱n kivi̱ꞌ nuu̱ꞌ kuꞌu̱n e̱ꞌ ña̱ na̱tyiꞌi̱ꞌ ndo̱o̱ te̱ yivi̱ꞌ sa̱kuuꞌ ña̱ vikaꞌ ña̱ kumiꞌ u̱nꞌ ti̱xi̱n vi̱ꞌe̱ u̱nꞌ miiꞌ xaꞌndia tyuunꞌ u̱nꞌ xiinꞌ sa̱kuuꞌ ña̱ ni̱ ka̱ya̱ te̱ xii̱ꞌ ya̱taꞌ u̱nꞌ nde̱e̱ kivi̱ꞌ vi̱ti̱n,
te̱ kuꞌu̱n a̱ nde̱e̱ nuu̱ꞌ ñu̱ꞌuꞌ Babilonia,
te̱ nde̱e̱ i̱i̱n nda̱a̱ꞌ a̱ ndöo̱ ka̱ yoꞌoꞌ”,
katyi Yahvé.
7 Te̱ na̱ka̱ tu̱ ra̱ nde̱e̱ sa̱va̱ si̱a̱niꞌ u̱nꞌ te̱ kuꞌu̱n ra̱ nde̱e̱ nuu̱ꞌ ñu̱ꞌuꞌ Babilonia,
te̱ i̱kanꞌ sa̱ñaꞌma ña̱ꞌaꞌ ra̱,
te̱ ku̱ndu̱u̱ ra̱ te̱ ka̱ka̱ nu̱u̱ so̱ꞌo̱ nuu̱ꞌ rey ti̱xi̱n vi̱ꞌe̱ miiꞌ xaꞌndia tyuunꞌ ra̱ ―ni̱ katyi̱ ra̱.
8 Sa̱kanꞌ te̱ ni̱ na̱ku̱i̱i̱n rey Ezequías kaꞌán ra̱ xiinꞌ Isaías ndii:
―Tu̱ꞌu̱n yu̱ꞌuꞌ Yahvé,
ña̱ kaꞌán u̱nꞌ xiinꞌ i̱ vi̱ti̱n ndii,
va̱ꞌa̱ yoo a̱ ―ni̱ katyi̱ ra̱.
Ni̱ kaꞌa̱n Ezequías ja̱a̱nꞌ sa̱kanꞌ,
sa̱kanꞌ ña̱ ni̱ xa̱ni̱ni̱ ra̱ xiinꞌ nimá ra̱ ndii:
“Sa̱kuuꞌ kuiya̱ ña̱ xaꞌndia tyuunꞌ e̱ꞌ ndii,
ku̱ndi̱e̱e̱ mani̱ꞌ ne̱ yivi̱ꞌ,
te̱ köo̱ꞌ tu̱ a̱ ku̱ndo̱ꞌo̱ nde̱e̱ i̱i̱n ni̱a̱”,
ni̱ xa̱ni̱ni̱ ra̱.