Yoꞌoꞌ kaꞌán Isaías xaꞌa̱ꞌ ña̱ ni̱ ku̱ni̱ ku̱vi̱ rey Ezequías te̱ ni̱ nda̱ꞌa̱ ra̱
38
Te̱ kii̱ꞌ sa̱kanꞌ ndii,
ndi̱e̱eꞌ xa̱va̱ꞌa̱ ni̱ ku̱ni̱ ku̱vi̱ rey Ezequías,
sa̱kanꞌ te̱ ni̱ xaꞌa̱n ko̱to̱ ña̱ꞌaꞌ Isaías,
te̱ kaꞌán tiakú tu̱ꞌu̱n Ndiosí,
te̱ nduuꞌ siꞌe̱ Amoz,
te̱ ni̱ kaꞌa̱n ra̱ xiinꞌ rey ja̱a̱nꞌ ndii:
―Ña̱ yo̱ꞌo̱ꞌ kaꞌán Yahvé xiinꞌ u̱nꞌ:
“Nda̱sa̱ va̱ꞌa̱ kiꞌi̱ꞌ sa̱kuuꞌ tyu̱u̱n ña̱ yoꞌoꞌ vi̱ꞌe̱ u̱nꞌ,
sa̱kanꞌ ña̱ yoꞌó ndii,
te̱ ku̱vi̱ ku̱ndu̱u̱ u̱nꞌ,
te̱ ndä̱ꞌa̱ u̱nꞌ xiinꞌ kuiꞌe̱ ña̱ ndoꞌoꞌ u̱nꞌ vi̱ti̱n”,
katyi̱ a̱ ―ni̱ katyi̱ Isaías xiinꞌ ra̱.
2 Sa̱kanꞌ te̱ ni̱ ndi̱ko̱ kuiín Ezequías,
te̱ ni̱ na̱ko̱to̱ ra̱ xaꞌa̱ꞌ nama̱ vi̱ꞌe̱ ra̱,
te̱ ni̱ kaꞌa̱n ra̱ xiinꞌ Yahvé ndii:
3 ―Yahvé,
kaꞌán ndaꞌvi i̱ xiinꞌ u̱nꞌ ña̱ na̱ka̱ꞌanꞌ u̱nꞌ ña̱ yuꞌu̱ ndii,
xikaꞌ nuuꞌ nda̱ku i̱ nuu̱ꞌ u̱nꞌ,
te̱ i̱i̱n nda̱a̱ꞌ tu̱ nimá i̱,
te̱ xaaꞌ i̱ ña̱ xtani̱ u̱nꞌ ―ni̱ katyi̱ ra̱ xiinꞌ a̱.
Te̱ ni̱ xa̱ku̱ xa̱va̱ꞌa̱ Ezequías nuu̱ꞌ Ndiosí kii̱ꞌ kaꞌán ra̱ si̱u̱ꞌunꞌ ja̱a̱nꞌ.
4 Sa̱kanꞌ te̱ ni̱ kaꞌa̱n tyuunꞌ Yahvé xiinꞌ Isaías ndii:
5 ―Kuaꞌa̱n te̱ kaꞌa̱n u̱nꞌ xiinꞌ Ezequías ndii:
“Ña̱ yo̱ꞌo̱ꞌ nduuꞌ ña̱ kaꞌán Yahvé,
Ndiosí,
ña̱ xakaꞌnuꞌ te̱ xii̱ꞌ ya̱taꞌ u̱nꞌ David,
xiinꞌ u̱nꞌ:
Xa̱ ni̱ xi̱ni̱ so̱ꞌo̱ i̱ si̱u̱ꞌunꞌ ña̱ kaꞌán ndaꞌvi u̱nꞌ xiinꞌ i̱,
te̱ xa̱ ni̱ xi̱ni̱ i̱ ña̱ xakuꞌ u̱nꞌ nuu̱ꞌ i̱,
xaꞌa̱ꞌ a̱ ja̱a̱nꞌ na kuiiꞌ na̱tyi̱ka̱nuꞌ i̱ i̱nga̱ ka̱ xaꞌu̱n kuiya̱ ña̱ ku̱ti̱a̱ku̱ u̱nꞌ.
6 Te̱ tä̱xi̱ i̱ vi̱kuꞌu̱n ñu̱u̱ yoꞌoꞌ xiinꞌ sa̱kuuꞌ ndoꞌó,
ne̱ ndieeꞌ yoꞌoꞌ,
nda̱ꞌaꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria,
süu̱ꞌ ja̱a̱nꞌ ndii,
tyi̱ndi̱e̱eꞌ i̱ ndoꞌó,
ne̱ ndieeꞌ ñu̱u̱ yoꞌoꞌ,
katyi a̱,
katyi̱ u̱nꞌ xiinꞌ ra̱”,
―ni̱ katyi Ndiosí.
7 Te̱ ni̱ kaꞌa̱n ka̱ Isaías xiinꞌ Ezequías ndii:
―Ña̱ yo̱ꞌo̱ꞌ nduuꞌ ña̱ niaꞌa̱ Yahvé nuu̱ꞌ u̱nꞌ,
te̱ ku̱ni̱ u̱nꞌ ña̱ sa̱xinu̱ xna̱ꞌa̱ a̱ ña̱ ni̱ kaꞌa̱n a̱ xiinꞌ u̱nꞌ sa̱a̱ a̱,
kaꞌán a̱ ndii:
8 “Ko̱to̱ u̱nꞌ,
sa̱na̱ndikoꞌ i̱ ka̱tiꞌ ñu̱ꞌu̱ nuu̱ꞌ uxi̱ taꞌan kuato̱ miiꞌ kuaꞌa̱n ka̱a̱ Acaz vi̱ꞌe̱ ra̱”,
ni̱ katyi̱ a̱ ―ni̱ katyi̱ Isaías.
I̱kanꞌ te̱ na̱ndi̱koꞌ xataꞌ ka̱tiꞌ ñu̱ꞌu̱ uxi̱ taꞌan kuato̱ miiꞌ kuaꞌa̱n ka̱a̱ Acaz vi̱ꞌe̱ ra̱.
Yoꞌoꞌ kaꞌán a̱ xaꞌa̱ꞌ ya̱a̱ ña̱ ni̱ xi̱ta̱ rey Ezequías kii̱ꞌ ni̱ nda̱ꞌa̱ ra̱
9 Kii̱ꞌ ni̱ nda̱ꞌa̱ rey Ezequías,
te̱ ni̱ xa̱ꞌndi̱a̱ tyuunꞌ nuu̱ꞌ ñu̱ꞌuꞌ Judá,
nuu̱ꞌ kuiꞌe̱ ña̱ ni̱ ndo̱ꞌo̱ ra̱,
te̱ ni̱ ke̱ꞌi̱ ra̱ ya̱a̱ yoꞌoꞌ kaꞌán ra̱ ndii:
10 “Ni̱ kaꞌa̱n yuꞌu̱ ndii:
Sa̱va̱ ni̱ kii̱ꞌ taꞌvíꞌ sa̱va̱ kivi̱ꞌ ñu̱u̱ i̱ ña̱ xikaꞌ i̱ i̱i̱n yivi̱ꞌ,
te̱ ku̱vi̱,
ni̱ xa̱ni̱ni̱ i̱.
Kueinꞌ kuꞌu̱n i̱ yavi̱ ndi̱i̱ miiꞌ ñuꞌuꞌ ne̱ xa̱ ni̱ xiꞌi̱,
sa̱kanꞌ ña̱ kü̱vi̱ ka̱ ku̱ti̱a̱ku̱ i̱ kivi̱ꞌ ñu̱u̱ i̱ ña̱ kuní i̱ ka̱ka̱ i̱ i̱i̱n yivi̱ꞌ.
11 Ni̱ xa̱ni̱ni̱ yuꞌu̱ ña̱ kü̱ni̱ ka̱ i̱ nuu̱ꞌ Yahvé i̱i̱n yivi̱ꞌ yoꞌoꞌ,
te̱ kü̱ni̱ ka̱ tu̱ i̱ nuu̱ꞌ nde̱e̱ i̱i̱n ne̱ yivi̱ꞌ,
sa̱kanꞌ ña̱ köo̱ꞌ ka̱ i̱ ko̱o̱ i̱i̱n yivi̱ꞌ yoꞌoꞌ.
12 Ni̱ tu̱ꞌu̱n Ndiosí kivi̱ꞌ ñu̱u̱ i̱ nde̱e̱ naa tuꞌunꞌ tatyi̱ꞌ ndi̱e̱eꞌ vi̱ꞌe̱ toto̱ miiꞌ ndieeꞌ te̱ pa̱xto xitoꞌ ra̱ ki̱tiꞌ sana̱ ra̱.
Ni̱ ke̱ndoso̱ꞌ Ndiosí kivi̱ꞌ ñu̱u̱ i̱ nde̱e̱ naa xaaꞌ te̱ naku kendoso̱ꞌ ra̱ toto̱ te̱ naku ra̱ a̱.
Te̱ i̱i̱n ni̱ sa̱ndiꞌiꞌ ku̱i̱ti̱ꞌ a̱ kivi̱ꞌ ñu̱u̱ i̱.
13 Kuiee va̱ ni̱ ndiatu̱ i̱ni̱ i̱ niiꞌ ñu̱u,
ndisu̱ uꞌvi̱ xa̱va̱ꞌa̱ ni̱ xi̱ni̱ i̱ nde̱e̱ naa ndondia vi̱ꞌ kiꞌinꞌ lion sakuatyiꞌ riꞌ sa̱kuuꞌ i̱kiꞌ i̱.
Te̱ i̱i̱n ni̱ sa̱ndiꞌiꞌ ku̱i̱ti̱ꞌ a̱ kivi̱ꞌ ñu̱u̱ i̱.
14 Te̱ kii̱ꞌ xa̱ yoo i̱ ku̱vi̱ ndii,
tanaꞌ i̱ nde̱e̱ naa sa̱a̱ mi̱ni̱,
te̱ xakuꞌ i̱ nde̱e̱ naa ti̱xkoꞌ,
te̱ ni̱ ta̱na̱ ndi̱i i̱ nde̱e̱ naa paloma.
Ni̱ xa̱vi va̱ ndu̱tyiꞌ nuu̱ꞌ i̱ xitoꞌ ndiaa i̱ ndi̱viꞌ.
Yahvé,
ndiꞌni̱ va̱ nimá i̱,
sa̱a̱ u̱nꞌ ña̱ va̱ꞌa̱ te̱ ki̱xi̱n kiꞌi̱ꞌ u̱nꞌ te̱ tyi̱ndi̱e̱eꞌ u̱nꞌ yuꞌu̱.
15 Ndisu̱ köo̱ꞌ xa̱tyiꞌ a̱ ku̱vi̱ kaꞌa̱n i̱ xiinꞌ Ndiosí,
sa̱kanꞌ ña̱ xa̱ mi̱iꞌ ña̱ ja̱a̱nꞌ ni̱ ti̱ꞌviꞌ kuiꞌe̱ ja̱a̱nꞌ ni̱ ndo̱ꞌo̱ i̱,
sa̱kanꞌ na kuiiꞌ vi̱ti̱n ndii,
ka̱ka̱ maso i̱ i̱i̱n yivi̱ꞌ xaꞌa̱ꞌ kuiꞌe̱ ña̱ ni̱ ndo̱ꞌo̱ i̱ yoꞌoꞌ.
16 Tákuiꞌe,
ña̱ sandoꞌoꞌ yoꞌó ndii,
ña̱ va̱ꞌa̱ nduuꞌ a̱,
sa̱kanꞌ ña̱ sandaꞌa a̱ ne̱ yivi̱ꞌ,
te̱ taxiꞌ tu̱ a̱ kivi̱ꞌ ñu̱u̱ ni̱a̱.
Yoꞌó nduuꞌ ña̱ ni̱ sa̱ndaꞌa yuꞌu̱,
te̱ ni̱ ta̱xi̱ u̱nꞌ ka̱ka̱ i̱ i̱i̱n yivi̱ꞌ.
17 Ko̱to̱ u̱nꞌ,
kuaꞌa̱ꞌ va̱ ni̱ ndo̱ꞌo̱ i̱ kii̱ꞌ nduꞌu̱ mani̱ꞌ i̱,
ndisu̱ xaꞌa̱ꞌ ña̱ va̱ꞌa̱ mi̱iꞌ i̱ ni̱ ndo̱ꞌo̱ i̱ sa̱kuuꞌ ña̱ ja̱a̱nꞌ.
Te̱ xaꞌa̱ꞌ a̱ ña̱ ndani̱ va̱ u̱nꞌ yuꞌu̱ ndii,
ni̱ sa̱kakú u̱nꞌ yuꞌu̱,
te̱ küꞌu̱n i̱ yavi̱ miiꞌ i̱i̱n yaví va̱,
sa̱kanꞌ ña̱ xa̱ ni̱ yoo̱ kaꞌnuꞌ i̱ni̱ u̱nꞌ xaꞌa̱ꞌ sa̱kuuꞌ ku̱a̱tyi̱ i̱.
18 Yavi̱ ndi̱i̱ ndii,
köo̱ꞌ nde̱e̱ i̱i̱n ne̱ xakaꞌnuꞌ yoꞌó i̱kanꞌ,
sa̱kanꞌ ña̱ ne̱ xa̱ ni̱ xiꞌi̱ ndii,
kü̱vi̱ sa̱kaꞌnuꞌ ne̱ ja̱a̱nꞌ yoꞌó,
te̱ kü̱vi̱ tu̱ i̱ni̱ ni̱a̱ ku̱ni̱ ni̱a̱ ña̱ xatyuunꞌ nda̱ku u̱nꞌ.
19 Ne̱ tiaku ku̱i̱ti̱ꞌ,
ne̱ yoo ka̱ kivi̱ꞌ ñu̱u̱ ku̱i̱ti̱ꞌ,
ku̱vi̱ sa̱kaꞌnuꞌ yoꞌó nde̱e̱ naa xaaꞌ yuꞌu̱ xakaꞌnuꞌ i̱ yoꞌó vi̱ti̱n.
Yu̱vaꞌ siꞌiꞌ ndii,
i̱ꞌi̱n ni̱a̱ kaꞌán xiinꞌ siꞌe̱ ni̱a̱ xaꞌa̱ꞌ ña̱ xatyuunꞌ nda̱ku u̱nꞌ.
20 Yahvé ni̱ sa̱kakú yuꞌu̱,
xaꞌa̱ꞌ ja̱a̱nꞌ na na sa̱ndaaꞌ e̱ꞌ ñuu̱ꞌ ña̱ naniꞌ arpa nuu̱ꞌ a̱,
te̱ na ka̱ta̱ tu̱ e̱ꞌ ya̱a̱ nuu̱ꞌ a̱ ti̱xi̱n yu̱kunꞌ miiꞌ nduꞌu̱ꞌ a̱ sa̱kuuꞌ kivi̱ꞌ ña̱ xikaꞌ e̱ꞌ i̱i̱n yivi̱ꞌ,
ni̱ katyi̱ i̱”,
ni̱ katyi̱ ra̱.
21 Te̱ ni̱ kaꞌa̱n Isaías xiinꞌ te̱ xikaꞌ nuuꞌ nuu̱ꞌ rey Ezequías ndii:
―Ndi̱ko̱ ndo̱ꞌ ndiaꞌviꞌ ndo̱koꞌ higo,
te̱ na̱ndu̱u̱ a̱ i̱xanꞌ,
te̱ ka̱ki̱n ndo̱ꞌ a̱ i̱i̱nꞌ rey miiꞌ teꞌí ra̱,
te̱ nda̱ꞌa̱ ra̱ ―ni̱ katyi̱ ra̱.
22 Sa̱kanꞌ te̱ ni̱ nda̱tuꞌu̱nꞌ Ezequías nuu̱ꞌ Isaías kaꞌán ra̱ ndii:
―¿Sa̱a̱ sa̱a̱ i̱ te̱ ku̱nda̱ni̱ i̱ ña̱ xa̱ ku̱vi̱ kuꞌu̱n i̱ ti̱xi̱n yu̱kunꞌ Yahvé te̱ sa̱kaꞌnuꞌ ña̱ꞌaꞌ i̱?
―ni̱ katyi̱ ra̱.