Yoꞌoꞌ kaꞌán a̱ xaꞌa̱ꞌ ña̱ ni̱ nde̱ku̱i̱e̱e̱ te̱ xíinꞌ rey Senaquerib ñu̱u̱ Jerusalén
36
Kii̱ꞌ xa̱ kuaꞌa̱n uxi̱ ku̱miꞌ kuiya̱ ña̱ xaꞌndia tyuunꞌ rey Ezequías ndii,
ni̱ ki̱xi̱n rey Senaquerib,
te̱ ni̱ xa̱ꞌndi̱a̱ tyuunꞌ nuu̱ꞌ ñu̱ꞌuꞌ Asiria,
te̱ ni̱ ku̱ntaꞌanꞌ ra̱ xiinꞌ sa̱kuuꞌ te̱ ndieeꞌ ñu̱u̱ ña̱ ndasi i̱ꞌnu̱ kutu̱ꞌ xa̱va̱ꞌa̱ ña̱ ñuꞌuꞌ nuu̱ꞌ ñu̱ꞌuꞌ Judá,
te̱ ni̱ ka̱nandoo ra̱ sa̱kuuꞌ ra̱.
2 Rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria ndii,
nde̱e̱ ñu̱u̱ Laquis nduꞌu̱ꞌ ra̱,
te̱ ni̱ ti̱viꞌ ra̱ te̱ xíinꞌ kuuꞌ nu̱uꞌ nuu̱ꞌ sa̱kuuꞌ te̱ xíinꞌ ra̱ xiinꞌ kuaꞌa̱ꞌ xa̱va̱ꞌa̱ te̱ xíinꞌ,
te̱ kooꞌ tyukuuꞌ va̱,
te̱ ku̱ntaꞌanꞌ ra̱ xiinꞌ rey Ezequías ñu̱u̱ Jerusalén.
Te̱ kii̱ꞌ ni̱ xa̱a̱ ra̱ miiꞌ kuaꞌa̱n tyi̱tyi̱ ña̱ xita̱ꞌ ti̱kui teꞌ kuaꞌa̱n mi̱ni̱ tyiee̱ ndii,
i̱kanꞌ ni̱ na̱ndiee̱ꞌ ra̱.
Te̱ ya̱ti̱n tyi̱tyi̱ ja̱a̱nꞌ xkaꞌndíá i̱tyiꞌ ña̱ kuaꞌa̱n xaꞌa̱ꞌ kuꞌu̱ miiꞌ ndieeꞌ yuu̱ꞌ natiaꞌ ne̱ yivi̱ꞌ toto̱.
3 Te̱ i̱kanꞌ ni̱ xaꞌa̱n na̱ti̱i̱n ña̱ꞌaꞌ Eliaquim,
siꞌe̱ Hilcías,
te̱ nduuꞌ martomo vi̱ꞌe̱ miiꞌ xaꞌndia tyuunꞌ rey.
Te̱ ni̱ xaꞌa̱n tu̱ Sebna,
te̱ natisoꞌ sa̱kuuꞌ ña̱ xkaꞌndíá ñu̱u̱ ja̱a̱nꞌ xiinꞌ ra̱,
te̱ ni̱ xaꞌa̱n tu̱ Joa,
siꞌe̱ Asaf,
te̱ xavaꞌa̱ tu̱tu̱ nuu̱ꞌ ñu̱u̱ ja̱a̱nꞌ xiinꞌ ra̱.
4 Te̱ ni̱ kaꞌa̱n te̱ xíinꞌ kuuꞌ nu̱uꞌ,
te̱ ni̱ ki̱e̱e̱ nuu̱ꞌ ñu̱ꞌuꞌ Asiria ja̱a̱nꞌ,
xiinꞌ te̱ ja̱a̱nꞌ ndii:
―Kaꞌa̱n ndo̱ꞌ xiinꞌ Ezequías ndii:
“Ña̱ yo̱ꞌo̱ꞌ kaꞌán rey kaꞌnuꞌ va̱,
rey te̱ xaꞌndia tyuunꞌ nuu̱ꞌ ñu̱ꞌuꞌ Asiria,
kaꞌán ra̱ ndii:
¿Yo̱o̱ tyindieeꞌ yoꞌó na kuiiꞌ i̱ni̱ va̱ u̱nꞌ ña̱ ka̱nandoo ña̱ꞌaꞌ u̱nꞌ xiinꞌ ñuꞌu̱?
5 Sa̱kanꞌ ña̱ kaꞌán u̱nꞌ ndii,
xa̱ ni̱ tyi̱tuní u̱nꞌ sa̱a̱ sa̱a̱ u̱nꞌ te̱ xa̱ kumiꞌ tu̱ u̱nꞌ kuaꞌa̱ꞌ va̱ te̱ xíinꞌ,
katyi u̱nꞌ,
ndisu̱ ña̱ kaꞌán u̱nꞌ ja̱a̱nꞌ ndii,
i̱i̱n ña̱ köo̱ꞌ ndi̱e̱e̱ꞌ nduuꞌ a̱.
¿Yo̱o̱ i̱ni̱ u̱nꞌ xini u̱nꞌ na kuiiꞌ xateiꞌ u̱nꞌ nuu̱ꞌ i̱?
6 Ko̱to̱ u̱nꞌ,
yoꞌó ndii,
te̱ xíinꞌ,
te̱ ndieeꞌ nuu̱ꞌ ñu̱ꞌuꞌ Egipto,
i̱ni̱ u̱nꞌ ña̱ tyi̱ndi̱e̱eꞌ ra̱ yoꞌó.
Te̱ ja̱a̱nꞌ ndii,
nduuꞌ ra̱ nde̱e̱ naa tunꞌ yoo̱ꞌ taꞌviꞌ,
tunꞌ katuviꞌ ne̱ yivi̱ꞌ,
tunꞌ ja̱a̱nꞌ ndii,
xaꞌndia nu̱ꞌ nda̱ꞌaꞌ ne̱ katuviꞌ nu̱ꞌ,
te̱ nde̱e̱ naa tunꞌ ja̱a̱nꞌ nduuꞌ faraón,
te̱ nduuꞌ rey nuu̱ꞌ ñu̱ꞌuꞌ Egipto,
sa̱kanꞌ ña̱ sa̱ndoꞌoꞌ ra̱ sa̱kuuꞌ ne̱ i̱ni̱ xini ña̱ꞌaꞌ.
7 Te̱ naaꞌ kaꞌa̱n ndo̱ꞌ xiinꞌ i̱ ndii:
I̱ni̱ ndu̱ xini ndu̱ Yahvé,
Ndiosí ña̱ xakaꞌnuꞌ ndu̱,
katyi̱ ndo̱ꞌ.
Naaꞌ sa̱kanꞌ ndii,
¿ndiotyun na kuiiꞌ ni̱ ta̱ni̱ ndo̱o̱ Ezequías altar miiꞌ xakaꞌnuꞌ ndo̱ꞌ Ndiosí ja̱a̱nꞌ,
te̱ ni̱ kaꞌa̱n tyuunꞌ ra̱ ña̱ ndee ñu̱u̱ Jerusalén yoꞌoꞌ xiinꞌ ñuu Judá ku̱i̱ti̱ꞌ kuní a̱ sa̱kaꞌnuꞌ ndo̱ꞌ Ndiosí?
8 Sa̱kanꞌ na kuiiꞌ vi̱ti̱n ndii,
kaꞌán i̱ xiinꞌ u̱nꞌ ña̱ ndoo̱ u̱nꞌ kuento xiinꞌ xto̱ꞌo̱ i̱ rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria.
Ta̱xi̱ yuꞌu̱ uvi̱ mií kuei nda̱ꞌaꞌ u̱nꞌ naaꞌ na̱ndu̱kuꞌ u̱nꞌ te̱ yivi̱ꞌ,
te̱ ko̱so̱ꞌ riꞌ.
9 Köo̱ꞌ kuaꞌa̱ꞌ xa̱tyiꞌ te̱ xíinꞌ kumiꞌ yoꞌó,
tee̱ꞌ ndee xanini u̱nꞌ ña̱ na̱kuii̱n teiꞌ u̱nꞌ nuu̱ꞌ ndiaꞌviꞌ ku̱i̱ti̱ꞌ te̱ xíinꞌ,
te̱ köo̱ꞌ tyuunꞌ xa̱tyiꞌ te̱ kumiꞌ xto̱ꞌo̱ i̱ ndii,
kë̱ta̱ va̱ꞌa̱ u̱nꞌ xiinꞌ te̱ xíinꞌ ja̱a̱nꞌ tee̱ꞌ ndee tyi̱ndi̱e̱eꞌ te̱ xíinꞌ te̱ ñu̱ꞌuꞌ Egipto,
te̱ kañuuꞌ carreta,
yoꞌó.
10 Te̱ siinꞌ tukuꞌ ndii,
tee̱ꞌ xanini u̱nꞌ ña̱ köo̱ꞌ Yahvé ni̱ kaꞌa̱n tyuunꞌ xiinꞌ i̱ te̱ ku̱a̱xi̱ sa̱nduxín i̱ ñu̱ꞌuꞌ yoꞌoꞌ.
Su̱u̱ mi̱iꞌ Yahvé ni̱ kaꞌa̱n xiinꞌ i̱ ndii:
Kuaꞌa̱n ka̱a̱ te̱ sa̱nduxín xa̱tyiꞌ u̱nꞌ ka̱niiꞌ ñu̱u̱ kaa̱ꞌ,
ni̱ katyi̱ a̱” ―ni̱ katyi̱ ra̱.
11 Sa̱kanꞌ te̱ ni̱ na̱ku̱i̱i̱n Eliaquim xiinꞌ Sebna xiinꞌ Joa,
te̱ ni̱ kaꞌa̱n ra̱ xiinꞌ te̱ xíinꞌ kuuꞌ nu̱uꞌ,
te̱ ni̱ ki̱e̱e̱ nuu̱ꞌ ñu̱ꞌuꞌ Asiria ja̱a̱nꞌ ndii:
―Sa̱a̱ u̱nꞌ ña̱ va̱ꞌa̱ te̱ kaꞌa̱n u̱nꞌ xiinꞌ ndu̱ xiinꞌ tu̱ꞌu̱n arameo,
sa̱kanꞌ ña̱ ku̱ndani̱ va̱ꞌa̱ ndu̱ tu̱ꞌu̱n ja̱a̱nꞌ,
te̱ käꞌa̱n u̱nꞌ xiinꞌ ndu̱ xiinꞌ tu̱ꞌu̱n hebreo,
sa̱kanꞌ ña̱ sa̱kuuꞌ ne̱ ndieeꞌ nuu̱ꞌ nama̱ kaa̱ꞌ xini so̱ꞌo̱ ña̱ kaꞌán u̱nꞌ xiinꞌ tu̱ꞌu̱n kaa̱ꞌ ―ni̱ katyi̱ ra̱.
12 Sa̱kanꞌ te̱ ni̱ na̱ku̱i̱i̱n te̱ xíinꞌ kuuꞌ nu̱uꞌ nuu̱ꞌ ñu̱ꞌuꞌ Asiria kaꞌán ra̱ ndii:
―Xiinꞌ te̱ kaa̱ꞌ ni̱ ti̱ꞌviꞌ rey,
te̱ xaꞌndia tyuunꞌ nuuꞌ ñu̱ꞌuꞌ Asiria,
yuꞌu̱ ku̱a̱xi̱ kaꞌa̱n i̱,
te̱ süu̱ꞌ xiinꞌ ndoꞌó,
ni̱ nde̱e̱ süu̱ꞌ xiinꞌ Ezequías,
te̱ nduuꞌ rey ñu̱u̱ ndo̱ꞌ ku̱i̱ti̱ꞌ.
Sa̱kanꞌ na kuiiꞌ ka̱xi̱ꞌ ndo̱ꞌ nde̱e̱ si̱ꞌviꞌ ka̱ꞌaꞌ ndo̱ꞌ ña̱ xiꞌí va̱ ndo̱ꞌ so̱ko̱,
te̱ ko̱ꞌo̱ tu̱ nde̱e̱ texa ka̱ꞌaꞌ ndo̱ꞌ ña̱ i̱tyiꞌ xa̱va̱ꞌa̱ ndo̱ꞌ ti̱kui ―ni̱ katyi̱ ra̱.
13 Sa̱kanꞌ te̱ ni̱ xi̱kuii̱n ndi̱tyi̱ te̱ xíinꞌ kuuꞌ nuu̱ꞌ ñu̱ꞌuꞌ Asiria ja̱a̱nꞌ kaꞌán tiꞌeꞌ ra̱ xiinꞌ tu̱ꞌu̱n hebreo ndii:
―Ku̱ni̱ so̱ꞌo̱ ndo̱ꞌ ña̱ kaꞌán tyuunꞌ rey kaꞌnuꞌ va̱,
rey te̱ xaꞌndia tyuunꞌ nuu̱ꞌ ñu̱ꞌuꞌ Asiria,
14 kaꞌán ra̱ ndii:
“Tä̱xi̱ ndo̱ꞌ ku̱ni̱ xaꞌanꞌ rey Ezequías ndoꞌó,
sa̱kanꞌ ña̱ kü̱vi̱ sa̱kakú ra̱ nde̱e̱ i̱i̱n ndo̱ꞌ nda̱ꞌaꞌ yuꞌu̱ te̱ kä̱ꞌni̱ꞌ i̱ ndoꞌó.
15 Tä̱xi̱ ndo̱ꞌ ku̱ni̱ xaꞌanꞌ rey Ezequías ndoꞌó,
te̱ i̱ni̱ ndo̱ꞌ ku̱ni̱ ndo̱ꞌ Yahvé kii̱ꞌ kaꞌa̱n ra̱ xiinꞌ ndo̱ꞌ ndii:
Ña̱ nda̱ku kaꞌán i̱ xiinꞌ ndo̱ꞌ ndii,
Yahvé sa̱kakú yooꞌ.
Tä̱xi̱ ña̱ ja̱a̱nꞌ ña̱ na̱ti̱i̱n rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria,
nde̱e̱ i̱i̱n yooꞌ,
katyi̱ ra̱.”
16 ¡Kä̱ndi̱xaꞌ ndo̱ꞌ ña̱ kaꞌán Ezequías!
Kaꞌán rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria xiinꞌ ndo̱ꞌ ndii:
“Na̱koo̱ꞌ ndo̱ꞌ ña̱ mani̱ꞌ xiinꞌ yuꞌu̱,
te̱ sa̱na̱kuaꞌa xiinꞌ mi̱iꞌ ndo̱ꞌ.
Sa̱kanꞌ te̱ i̱ꞌi̱n ndo̱ꞌ ndii,
ku̱vi̱ na̱ka̱ya̱ ndo̱ꞌ nduu̱ꞌ uva mi̱iꞌ ndo̱ꞌ ka̱xi̱ꞌ naa ka̱xi̱ꞌ ndo̱ꞌ,
te̱ ku̱vi̱ tu̱ na̱ka̱ya̱ ndo̱ꞌ ndo̱koꞌ higuera mi̱iꞌ ndo̱ꞌ ka̱xi̱ꞌ naa ka̱xi̱ꞌ ndo̱ꞌ,
te̱ ku̱vi̱ tu̱ ko̱ꞌo̱ naa ko̱ꞌo̱ tu̱ i̱ꞌi̱n ndo̱ꞌ ti̱kui poso mi̱iꞌ ndo̱ꞌ.
17 Nde̱e̱ ska̱tyiꞌ ki̱xi̱n yuꞌu̱ te̱ na̱ka̱ i̱ ndoꞌó te̱ kuꞌu̱n tyi̱ndi̱e̱e̱ i̱ ndoꞌó nuu̱ꞌ i̱i̱n ñu̱ꞌuꞌ ña̱ kaaꞌ sa̱a̱ niiꞌ kaaꞌ miiꞌ ndieeꞌ ndo̱ꞌ yoꞌoꞌ,
i̱i̱n ñu̱ꞌuꞌ miiꞌ yooꞌ kuaꞌa̱ꞌ va̱ ndi̱kinꞌ trigo,
te̱ yoo kuaꞌa̱ꞌ tu̱ yo̱ꞌoꞌ uva,
te̱ ku̱vi̱ ka̱sa̱ꞌa̱ ndo̱ꞌ xita̱ꞌ va̱ꞌa̱ ku̱xi̱ ndo̱ꞌ,
te̱ ka̱sa̱ꞌa̱ tu̱ ndo̱ꞌ vino ko̱ꞌo̱ ndo̱ꞌ.
18 Tä̱xi̱ tu̱ ndo̱ꞌ ku̱ni̱ xaꞌanꞌ ra̱ kii̱ꞌ kaꞌa̱n ra̱ xiinꞌ ndo̱ꞌ ndii:
Yahvé sa̱kakú yooꞌ,
katyi̱ ra̱.
Xiní kaxiꞌ ndo̱ꞌ ña̱ nde̱e̱ i̱i̱n ndiosí ña̱ xakaꞌnuꞌ ne̱ tukuꞌ nï̱ ku̱vi̱ sa̱kakú ña̱ꞌaꞌ nda̱ꞌaꞌ rey,
te̱ xaꞌndia tyuunꞌ nuu̱ꞌ ñu̱ꞌuꞌ Asiria.
19 Ni̱ nde̱e̱ i̱i̱n ndiosí ña̱ xakaꞌnuꞌ ne̱ ndieeꞌ ñu̱u̱ Hamat,
uun nde̱e̱ i̱i̱n ndiosí ña̱ xakaꞌnuꞌ ne̱ ndieeꞌ ñu̱u̱ Arfad,
uun nde̱e̱ i̱i̱n ndiosí ña̱ xakaꞌnuꞌ ne̱ ndieeꞌ ñu̱u̱ Sefarvaim nï̱ ku̱vi̱ sa̱kakú ne̱ ndieeꞌ nuu̱ꞌ ñu̱ꞌuꞌ Samaria nda̱ꞌaꞌ rey ja̱a̱nꞌ.
20 Sa̱kanꞌ na kuiiꞌ köo̱ꞌ nde̱e̱ i̱i̱n ndiosí ña̱ xakaꞌnuꞌ ne̱ ndieeꞌ nde̱e̱ i̱i̱n ñu̱u̱ ja̱a̱nꞌ ku̱vi̱ sa̱kakú ne̱ yivi̱ꞌ nda̱ꞌaꞌ yuꞌu̱,
te̱ xaꞌndia tyuunꞌ nuu̱ꞌ ñu̱ꞌuꞌ Asiria.
Xaꞌa̱ꞌ a̱ ja̱a̱nꞌ na köo̱ꞌ nde̱e̱ i̱i̱n xaꞌa̱ꞌ te̱ ka̱ni̱ni̱ ndo̱ꞌ ña̱ ku̱vi̱ sa̱kakú Yahvé ñu̱u̱ Jerusalén nda̱ꞌaꞌ rey ja̱a̱nꞌ” ―ni̱ katyi̱ ra̱.
21 Ndisu̱ ne̱ yivi̱ꞌ,
ne̱ ndieeꞌ nuu̱ꞌ nama̱ ja̱a̱nꞌ ndii,
nï̱ na̱ku̱i̱i̱n ni̱a̱ nde̱e̱ i̱i̱n yu̱ꞌuꞌ nuu̱ꞌ te̱ ja̱a̱nꞌ,
sa̱kanꞌ ña̱ xa̱ ni̱ kaꞌa̱n rey Ezequías xiinꞌ ni̱a̱ ndii:
“Nä̱ku̱i̱i̱n xa̱tyiꞌ ndo̱ꞌ ña̱ kaꞌán te̱ kaa̱ꞌ xiinꞌ ndo̱ꞌ”,
ni̱ katyi̱ ra̱.
22 Sa̱kanꞌ te̱ ni̱ xaꞌa̱n Eliaquim,
siꞌe̱ Hilcías,
te̱ nduuꞌ martomo vi̱ꞌe̱ miiꞌ xaꞌndia tyuunꞌ rey Ezequías.
Te̱ ni̱ xaꞌa̱n tu̱ Sebna,
te̱ natisoꞌ sa̱kuuꞌ ña̱ xkaꞌndíá ñu̱u̱ ja̱a̱nꞌ xiinꞌ ra̱,
te̱ ni̱ xaꞌa̱n tu̱ Joa,
siꞌe̱ Asaf,
te̱ xavaꞌa̱ tu̱tu̱ ñu̱u̱ ja̱a̱nꞌ xiinꞌ ra̱.
Te̱ xaꞌa̱ꞌ a̱ ña̱ sutyiꞌ va̱ i̱ni̱ sa̱kuuꞌ ra̱ ndii,
ni̱ nda̱taꞌ ra̱ toto̱ ndiká ña̱ niꞌnuꞌ ra̱,
te̱ ni̱ xaꞌa̱n kaꞌa̱n ra̱ xiinꞌ Ezequías ja̱a̱nꞌ sa̱kuuꞌ ña̱ ni̱ kaꞌa̱n te̱ xíinꞌ kuuꞌ nu̱uꞌ,
te̱ ni̱ ki̱e̱e̱ nuu̱ꞌ ñu̱ꞌuꞌ Asiria ja̱a̱nꞌ.