Yoꞌoꞌ kaꞌán Isaías xaꞌa̱ꞌ ña̱ na̱ndi̱koꞌ ne̱ vi̱ꞌe̱ Israel ñu̱u̱ Jerusalén
35
Na na̱ku̱a̱tiaꞌ miiꞌ kaaꞌ i̱tyi,
te̱ na na̱ku̱a̱tiaꞌ tu̱ miiꞌ taxi̱nꞌ kaaꞌ kivi̱ꞌ ja̱a̱nꞌ.
Ñu̱ꞌuꞌ miiꞌ i̱tyiꞌ kaaꞌ ndii,
na na̱ku̱a̱tiaꞌ a̱,
te̱ na na̱ndu̱u̱ nda̱tu̱nꞌ a̱ nde̱e̱ naa i̱ta̱ rosa kii̱ꞌ xaaꞌ a̱.
2 Ko̱o̱ xna̱ꞌa̱ i̱ta̱ nuu̱ꞌ ñu̱ꞌuꞌ ja̱a̱nꞌ,
te̱ va̱ꞌa̱ yaꞌa̱ ku̱ni̱ a̱ nde̱e̱ ndeꞌi̱ tiꞌeꞌ a̱ ña̱ kuatiaꞌ i̱ni̱ a̱.
Sa̱kanꞌ ña̱ nda̱sa̱ nda̱tu̱nꞌ ña̱ꞌaꞌ Ndiosí nde̱e̱ naa xiki̱ꞌ Líbano,
te̱ sa̱ndu̱u̱ ñaꞌma tu̱ ña̱ꞌaꞌ a̱ nde̱e̱ naa xiki̱ꞌ Carmelo uun nde̱e̱ naa yo̱soꞌ ña̱ naniꞌ Sarón.
Te̱ sa̱kuuꞌ ne̱ yivi̱ꞌ ku̱ni̱ ña̱ kaꞌnuꞌ va̱ ña̱ nduuꞌ Yahvé,
te̱ ku̱ni̱ tu̱ ni̱a̱ ña̱ nda̱tu̱nꞌ xa̱va̱ꞌa̱ a̱.
3 Ta̱xi̱ ndo̱ꞌ ndi̱e̱e̱ꞌ ne̱ köo̱ꞌ ndi̱e̱e̱ꞌ nda̱ꞌaꞌ,
te̱ na̱ka̱ta̱ nda̱ku ndo̱ꞌ xaꞌa̱ꞌ ne̱ kisiꞌ a̱ kondo̱.
4 Te̱ kaꞌa̱n ndo̱ꞌ xiinꞌ ne̱ yiꞌvi nimá ndii:
“Na̱tyi̱naá ndo̱ꞌ ña̱ ndi̱e̱eꞌ ndo̱ꞌ,
te̱ kü̱yi̱ꞌvi ndo̱ꞌ.
Sa̱kanꞌ ña̱ xa̱ ku̱a̱xi̱ Ndiosí e̱ꞌ te̱ sa̱ndo̱ñuꞌuꞌ a̱ sa̱kuuꞌ te̱ ndasiꞌ taꞌanꞌ xiinꞌ e̱ꞌ.
Mi̱iꞌ Ndiosí ku̱a̱xi̱ te̱ sa̱kakú a̱ yooꞌ”,
katyi̱ ndo̱ꞌ.
5 Kivi̱ꞌ ja̱a̱nꞌ ndii,
nuni̱a̱ꞌ ndu̱tyiꞌ nuu̱ꞌ ne̱ tüviꞌ nuu̱ꞌ,
te̱ nuni̱a̱ꞌ tu̱ so̱ꞌo̱ ne̱ soꞌoꞌ.
6 Te̱ sa̱kanꞌ tu̱ ne̱ kuiꞌe xaꞌa̱ꞌ kivi̱ꞌ ja̱a̱nꞌ ndii,
nda̱ꞌa̱ xaꞌa̱ꞌ ni̱a̱ te̱ ka̱nde̱ta̱ ni̱a̱ nde̱e̱ naa i̱su̱,
te̱ ne̱ iꞌinꞌ ndii,
ku̱vi̱ ka̱ta̱ tiꞌeꞌ ni̱a̱ kivi̱ꞌ ja̱a̱nꞌ ña̱ va̱ꞌa̱ kuni ni̱a̱.
Ñu̱ꞌuꞌ miiꞌ i̱tyi kaaꞌ ndii,
na̱koo̱ kuaꞌa̱ꞌ va̱ ti̱kui kivi̱ꞌ ja̱a̱nꞌ,
te̱ na̱kaa̱ raꞌ kuꞌu̱n raꞌ nuu̱ꞌ ñu̱ꞌuꞌ ja̱a̱nꞌ nde̱e̱ naa i̱ti̱a̱ vi̱ꞌ.
7 Te̱ miiꞌ i̱tyi kaaꞌ ndii,
mi̱ni̱ na̱ndu̱u̱ a̱,
te̱ ñu̱ꞌuꞌ i̱tyi xa̱va̱ꞌa̱ ndii,
ti̱ko̱ꞌyoꞌ miiꞌ yoo kuaꞌa̱ꞌ xa̱va̱ꞌa̱ ti̱kui na̱ndu̱u̱ a̱,
te̱ yavi̱ miiꞌ ñuꞌuꞌ naya̱ꞌ i̱kuꞌ ndii,
ndoo̱ꞌ xiinꞌ tunꞌ yoo̱ꞌ ku̱a̱ꞌnu̱ i̱kanꞌ.
8 Te̱ ko̱o̱ i̱i̱n ya̱ꞌya̱ miiꞌ nda̱ki̱n te̱ yivi̱ꞌ yuu̱ꞌ nuu̱ꞌ ñu̱ꞌuꞌ ñu̱u̱ ja̱a̱nꞌ,
te̱ tyi̱nduꞌu̱ꞌ ne̱ yivi̱ꞌ kivi̱ꞌ a̱ ndii,
I̱tyiꞌ Su̱ꞌu̱n ku̱na̱niꞌ a̱.
Te̱ nde̱e̱ i̱i̱n ne̱ yivi̱ꞌ,
ne̱ ndisoꞌ ku̱a̱tyi̱,
kü̱vi̱ xkaꞌndi̱a̱ ya̱ꞌya̱ ja̱a̱nꞌ ni̱ nde̱e̱ kü̱vi̱ tu̱ kuꞌu̱n ne̱ küuꞌ kaxiꞌ ya̱ꞌya̱ ja̱a̱nꞌ.
Süu̱ꞌ ja̱a̱nꞌ ndii,
ne̱ xikaꞌ i̱tyiꞌ Ndiosí ku̱i̱ti̱ꞌ nduuꞌ ne̱ ku̱vi̱ kuꞌu̱n ya̱ꞌya̱ ja̱a̱nꞌ.
9 Ya̱ꞌya̱ ja̱a̱nꞌ ndii,
köo̱ꞌ nde̱e̱ i̱i̱n lion ka̱ka̱,
ni̱ nde̱e̱ köo̱ꞌ tu̱ ki̱tiꞌ i̱kuꞌ,
tiꞌ i̱yo̱ va̱ iinꞌ ka̱ka̱ i̱kanꞌ,
süu̱ꞌ ja̱a̱nꞌ ndii,
ne̱ xa̱ ni̱ sa̱kakú Ndiosí ku̱i̱ti̱ꞌ ka̱ka̱ ya̱ꞌya̱ ja̱a̱nꞌ.
10 Te̱ ne̱ ni̱ sa̱kakú Ndiosí ndii,
va̱ꞌa̱ kuni ni̱a̱ kuꞌu̱n ni̱a̱ ñu̱u̱ Sión xitaꞌ sii̱ꞌ ni̱a̱,
te̱ ña̱ va̱ꞌa̱ kuni ni̱a̱ ja̱a̱nꞌ ndii,
köo̱ꞌ kivi̱ꞌ ndi̱ꞌi̱ a̱.
Te̱ na̱ku̱a̱tiaꞌ i̱ni̱ ni̱a̱,
te̱ sii̱ꞌ xa̱va̱ꞌa̱ tu̱ ku̱ni̱ ni̱a̱,
te̱ sa̱kuuꞌ ña̱ xakuꞌ ni̱a̱ xiinꞌ ña̱ sutyiꞌ i̱ni̱ ni̱a̱ ndii,
ku̱nu̱ ndo̱o̱ a̱ nuu̱ꞌ ni̱a̱.