Yoꞌoꞌ kaꞌán Isaías xaꞌa̱ꞌ ña̱ xiꞌé Ndiosí xini a̱ ne̱ tukuꞌ, ne̱ ndieeꞌ ka̱niiꞌ nuu̱ꞌ ñu̱ꞌuꞌ i̱i̱n yivi̱ꞌ
34
Sa̱kuuꞌ ndoꞌó,
ne̱ tukuꞌ,
ku̱ya̱ti̱n ndo̱ꞌ nuu̱ꞌ i̱ te̱ ku̱ni̱ so̱ꞌo̱ ndo̱ꞌ ña̱ kaꞌa̱n i̱.
Tyu̱u̱n xaꞌaꞌ sa̱kuuꞌ ndoꞌó,
ne̱ tukuꞌ,
ne̱ ndieeꞌ nuu̱ꞌ ñu̱ꞌuꞌ i̱i̱n yivi̱ꞌ ña̱ kaꞌa̱n i̱ xiinꞌ ndo̱ꞌ.
Na tyu̱u̱n xaꞌaꞌ tu̱ ñu̱ꞌuꞌ i̱i̱n yivi̱ꞌ xiinꞌ sa̱kuuꞌ ña̱ yoo nuu̱ꞌ a̱ ña̱ kaꞌa̱n i̱.
Te̱ na tyu̱u̱n xaꞌaꞌ ka̱niiꞌ i̱i̱n yivi̱ꞌ xiinꞌ ña̱ nakún nuu̱ꞌ a̱.
2 Sa̱kanꞌ ña̱ xiꞌé va̱ Yahvé xini a̱ sa̱kuuꞌ ne̱ tukuꞌ,
te̱ xiꞌé va̱ tu̱ a̱ xini a̱ sa̱kuuꞌ te̱ xíinꞌ ni̱a̱.
Xaꞌa̱ꞌ a̱ ja̱a̱nꞌ na sa̱ndo̱ñuꞌuꞌ a̱ sa̱kuuꞌ ni̱a̱,
te̱ xa̱ ni̱ sa̱na̱kuaꞌa tu̱ a̱ sa̱kuuꞌ ni̱a̱ te̱ ka̱ꞌni̱ꞌ ña̱ꞌaꞌ te̱ yivi̱ꞌ.
3 Köo̱ꞌ nataa̱nꞌ ñu̱ꞌuꞌ ndeꞌi̱ nde̱e̱ i̱i̱n ni̱a̱,
te̱ sa̱a̱ kuaꞌa̱n ki̱ni̱ xa̱va̱ꞌa̱ ku̱xaꞌa̱n ña̱ teꞌi̱ ñu̱ꞌuꞌ ndeꞌi̱ ni̱a̱,
te̱ nde̱e̱ xíniꞌ i̱kuꞌ ki̱e̱e̱ níiꞌ ni̱a̱,
te̱ na̱kaa̱ꞌ a̱ nde̱e̱ naa ti̱kui i̱ti̱a̱.
4 Sa̱kuuꞌ ña̱ tuún ndieeꞌ ndi̱viꞌ koyo̱,
te̱ ndi̱viꞌ ndii,
na̱tuvi̱ꞌ a̱ nde̱e̱ naa natuviꞌ ne̱ yivi̱ꞌ i̱i̱n tu̱tu̱.
Te̱ sa̱kuuꞌ tiuu̱nꞌ ndieeꞌ ndi̱viꞌ ndii,
ndaꞌva̱ ndo̱o̱ ña̱ tuún a̱ nde̱e̱ naa xaaꞌ yuku̱ yo̱ꞌoꞌ uva kii̱ꞌ xii a̱ te̱ koyó a̱ uun nde̱e̱ naa xaaꞌ ndo̱koꞌ higo kii̱ꞌ tyityí a̱ te̱ koyó a̱.
5 Te̱ ni̱ kaꞌa̱n Ndiosí ndi̱i̱:
“Kii̱ꞌ sa̱a̱ ityi̱ nii̱ꞌ yuꞌu̱ tyu̱u̱n nuu̱ꞌ a̱ ndi̱viꞌ ndii,
xa̱ꞌaꞌ a̱ ka̱ꞌni̱ꞌ a̱ ne̱ ndieeꞌ nuu̱ꞌ ñu̱ꞌuꞌ Edom,
sa̱kanꞌ ña̱ xa̱ ne̱ ndieeꞌ ja̱a̱nꞌ nduuꞌ ne̱ ni̱ tyi̱tuní i̱ ka̱ꞌni̱ꞌ i̱ nde̱e̱ xta̱ꞌanꞌ vi̱ꞌ”,
ni̱ katyi̱ a̱.
6 Ityi̱ nii̱ꞌ ña̱ tiinꞌ Yahvé ndii,
ni̱ ka̱ꞌma̱ ndo̱o̱ a̱ níiꞌ,
te̱ ni̱ ka̱ꞌma̱ ndo̱o̱ tu̱ a̱ xa̱ꞌa̱n,
níiꞌ ti̱xuꞌu̱ꞌ siꞌi xiinꞌ níiꞌ mbe̱e̱,
xiinꞌ níiꞌ ti̱xuꞌu̱ꞌ tyiee̱,
xiinꞌ xa̱ꞌa̱n mboki̱ mbe̱e̱.
Sa̱kanꞌ ña̱ xiꞌí ne̱ ndieeꞌ ñu̱u̱ Bosra,
te̱ nduuꞌ ni̱a̱ nde̱e̱ naa ña̱ nasoko̱ꞌ ne̱ yivi̱ꞌ ki̱tiꞌ nuu̱ꞌ Yahvé,
te̱ ka̱ꞌni̱ꞌ tu̱ Ndiosí kuaꞌa̱ꞌ va̱ ne̱ ndieeꞌ nuu̱ꞌ ñu̱ꞌuꞌ Edom.
7 Te̱ ku̱vi̱ ndo̱o̱ sa̱kuuꞌ te̱ yivi̱ꞌ,
te̱ ndi̱e̱eꞌ nde̱e̱ naa toro i̱kuꞌ,
xiinꞌ te̱ sa̱va̱,
te̱ ndi̱e̱eꞌ nde̱e̱ naa toro tiakiꞌ,
uun te̱ ndi̱e̱eꞌ nde̱e̱ naa toro xi̱xa̱.
Te̱ ka̱niiꞌ nuu̱ꞌ ñu̱ꞌuꞌ miiꞌ ndieeꞌ ra̱ ka̱ꞌma̱ níiꞌ ra̱,
te̱ ku̱xaꞌa̱n ndo̱o̱ tu̱ ka̱niiꞌ nuu̱ꞌ ñu̱ꞌuꞌ ja̱a̱nꞌ xiinꞌ xa̱ꞌa̱n ra̱.
8 Sa̱kanꞌ ña̱ kivi̱ꞌ ja̱a̱nꞌ nduuꞌ ña̱ ke̱ndiaa̱ꞌ yaꞌviꞌ Yahvé,
te̱ kuiya̱ ja̱a̱nꞌ tu̱ nduuꞌ ña̱ naka̱n a̱ kuenta nuu̱ꞌ ne̱ ndieeꞌ nuu̱ꞌ ñu̱ꞌuꞌ Edom xaꞌa̱ꞌ sa̱kuuꞌ ña̱ ni̱ sa̱ndoꞌoꞌ ni̱a̱ sa̱kuuꞌ ne̱ ndieeꞌ ñu̱u̱ Sión.
9 Sa̱kuuꞌ i̱ti̱a̱ ña̱ yoo nuu̱ꞌ ñu̱ꞌuꞌ Edom ndii,
xa̱ꞌa̱n kixinꞌ ndiaaꞌ na̱ndu̱u̱ sa̱kuuꞌ ti̱kui a̱ ya̱kaꞌ ña̱ yoo nuu̱ꞌ ñu̱ꞌuꞌ ja̱a̱nꞌ ndii,
yu̱tyiꞌ azufre na̱ndu̱u̱ a̱,
te̱ ka̱niiꞌ nuu̱ꞌ ñu̱ꞌuꞌ ja̱a̱nꞌ na̱ndu̱u̱ xa̱ꞌa̱n kixinꞌ ndiaaꞌ ndatin.
10 Te̱ köo̱ꞌ kivi̱ꞌ ndaꞌva̱ a̱ niiꞌ ñu̱u xiinꞌ niiꞌ i̱i̱n keꞌinꞌ,
süu̱ꞌ ja̱a̱nꞌ ndii nde̱e̱ ndiꞌiꞌ ni̱ kivi̱ꞌ kaaꞌ ñuꞌma̱ ña̱ xixí a̱,
te̱ nde̱e̱ i̱i̱n ne̱ yivi̱ꞌ kü̱ndi̱e̱e̱ ka̱ tu̱ nuu̱ꞌ ñu̱ꞌuꞌ ja̱a̱nꞌ nde̱e̱ a̱ma̱a̱ ka̱ ni̱ kivi̱ꞌ,
te̱ nde̱e̱ i̱i̱n kivi̱ꞌ xkäꞌndi̱a̱ ka̱ tu̱ nde̱e̱ i̱i̱n ne̱ yivi̱ꞌ nuu̱ꞌ ñu̱ꞌuꞌ ja̱a̱nꞌ.
11 Te̱ nuu̱ꞌ ñu̱ꞌuꞌ ja̱a̱nꞌ ndii,
ndee xa̱ mi̱iꞌ ndiꞌiꞌ ti̱u̱unꞌ mi̱ni̱ ku̱i̱ti̱ꞌ ku̱ndi̱e̱e̱ xiinꞌ ti̱inꞌ i̱ñu̱ꞌ xata̱ꞌ,
te̱ ka̱sa̱ꞌa̱ tu̱ ndi̱kuꞌún xiinꞌ ti̱ka̱kaꞌ tyoꞌo̱ riꞌ nda̱ꞌaꞌ i̱tunꞌ nuu̱ꞌ ñu̱ꞌuꞌ ja̱a̱nꞌ.
Sa̱kanꞌ ña̱ sa̱nduxín xa̱tyiꞌ Yahvé ñu̱u̱ ja̱a̱nꞌ,
te̱ köo̱ꞌ ku̱ndi̱e̱e̱ xa̱tyiꞌ ka̱.
Ku̱a̱tyi̱ ndii,
sa̱a̱ Ndiosí xiinꞌ ñu̱ꞌuꞌ ja̱a̱nꞌ nde̱e̱ naa xaaꞌ te̱ yivi̱ꞌ kii̱ꞌ kiꞌinꞌ ku̱ꞌva̱ ra̱ ñu̱ꞌuꞌ ra̱ xiinꞌ yo̱ꞌoꞌ uun kii̱ꞌ ndasaꞌ ndaa̱ ra̱ xiinꞌ ka̱a̱ viee̱.
12 Te̱ köo̱ꞌ xa̱tyiꞌ ka̱ nde̱e̱ i̱i̱n rey,
te̱ ka̱ꞌndi̱a̱ tyuunꞌ nuu̱ꞌ ne̱ ndieeꞌ nuu̱ꞌ ñu̱ꞌuꞌ ja̱a̱nꞌ,
sa̱kanꞌ ña̱ sa̱kuuꞌ rey,
te̱ ni̱ xa̱ꞌndi̱a̱ tyuunꞌ nuu̱ꞌ ni̱a̱ ja̱a̱nꞌ ndii,
ka̱ꞌni̱ꞌ ña̱ꞌaꞌ te̱ yivi̱ꞌ.
13 Te̱ vi̱ꞌe̱ kaꞌnuꞌ miiꞌ ni̱ ndiee̱ ra̱ xaꞌndia tyuunꞌ ra̱ ndii,
ndee i̱ñu̱ꞌ ku̱i̱ti̱ꞌ ku̱a̱ꞌnu̱,
te̱ kuꞌu̱ xiti̱nꞌ xiinꞌ i̱ñu̱ꞌ kuii̱ꞌ ku̱a̱ꞌnu̱ ka̱niiꞌ miiꞌ ni̱ ndiee̱ ra̱ xaꞌndia tyuunꞌ ra̱.
Te̱ na̱ndu̱u̱ tu̱ a̱ yavi̱ miiꞌ ñuꞌuꞌ naya̱ꞌ i̱kuꞌ,
te̱ ka̱sa̱ꞌa̱ tu̱ ti̱u̱unꞌ na̱ma̱ tyoꞌo̱ riꞌ i̱kanꞌ miiꞌ taꞌvi̱ꞌ siꞌe̱ riꞌ.
14 Sa̱kuuꞌ nuu̱ꞌ ki̱tiꞌ i̱kuꞌ,
tiꞌ yoo miiꞌ kaaꞌ i̱tyi,
ndu̱i̱i̱n xiinꞌ naya̱ꞌ i̱kuꞌ i̱kanꞌ.
Te̱ ti̱xuꞌu̱ꞌ i̱kuꞌ ndii,
ku̱a̱aꞌ riꞌ na̱ka̱na̱ taꞌanꞌ riꞌ i̱kanꞌ,
te̱ i̱kanꞌ tu̱ na̱kaya̱ sa̱a̱ tiꞌ yoo ñu̱u na̱ndiee̱ꞌ riꞌ.
15 Te̱ ka̱sa̱ꞌa̱ tu̱ ndi̱kuꞌún tyoꞌo̱ riꞌ i̱kanꞌ te̱ ka̱ki̱n riꞌ,
te̱ i̱kanꞌ ka̱ndi̱ꞌi̱ riꞌ,
te̱ taꞌvi̱ꞌ riꞌ te̱ ko̱to̱ riꞌ siꞌe̱ riꞌ ja̱a̱nꞌ ti̱xi̱n ndi̱xi̱n riꞌ.
Te̱ na̱kaya̱ tu̱ ti̱ko̱xií i̱kanꞌ,
te̱ i̱ꞌi̱n riꞌ ndii,
xa̱ ko̱o̱ xa̱ ko̱o̱ ti̱ko̱xií siꞌi ku̱ndi̱a̱ka̱ riꞌ.
16 Sa̱kuaa̱n ndo̱ꞌ tu̱ꞌu̱n Ndiosí,
te̱ ka̱ꞌvi̱ ndo̱ꞌ ña̱ yoso̱ꞌ nuu̱ꞌ tu̱tu̱ a̱,
te̱ ku̱ni̱ ndo̱ꞌ naaꞌ ni̱ kuni̱ sa̱va̱ ki̱tiꞌ ja̱a̱nꞌ.
Te̱ nde̱e̱ i̱i̱n tu̱ riꞌ nï̱ kuni̱ tiꞌ siꞌi ku̱ndi̱a̱ka̱.
Ku̱a̱tyi̱ ndii,
xa̱ sa̱kanꞌ ni̱ kaꞌa̱n tyuunꞌ Ndiosí xaꞌa̱ꞌ ña̱ ja̱a̱nꞌ,
te̱ xiinꞌ Espíritu mi̱iꞌ a̱ ni̱ nda̱sa̱ i̱i̱n a̱ sa̱kuuꞌ riꞌ i̱kanꞌ.
17 Mi̱iꞌ tu̱ Ndiosí ni̱ na̱ka̱xi̱n miiꞌ ku̱ndi̱e̱e̱ i̱ꞌi̱n tiꞌ ja̱a̱nꞌ,
te̱ ni̱ niaꞌa̱ tu̱ ña̱ꞌaꞌ a̱ nuu̱ꞌ ñu̱ꞌuꞌ miiꞌ ka̱ka̱ riꞌ,
te̱ xa̱ i̱kanꞌ ndoo̱ riꞌ ku̱ndi̱e̱e̱ riꞌ nde̱e̱ ndiꞌiꞌ ni̱ kivi̱ꞌ,
te̱ i̱kanꞌ tu̱ ko̱o̱ riꞌ nde̱e̱ a̱ma̱a̱ ka̱ kivi̱ꞌ.